ஊழியர்களைக் குறித்த பிரிவினைகள் ஆவிக்குரிய தன்மையை அழிக்கின்றன

தங்கள் ஊழியர்களின் வெவ்வேறு வரங்களைக் குறித்த மக்களின் கருத்துகளால் சபையில் எழும் பிரிவினைகள் ஆவிக்குரிய தன்மையை அழிக்கின்றன என்பதைப் பவுல் காட்டுகிறார்.

கி.பி. 57

இண்டியன் ரிவைஸ்டு வெர்ஸன் (IRV) - தமிழ் (IRVTAM)

1 கொரிந்தியர் 3:1–10

1 மேலும், சகோதரர்களே, நான் உங்களை ஆவியானவருக்குரியவர்கள் என்று நினைத்து உங்களோடு பேசாமல், மாம்சத்திற்குரியவர்களென்றும், கிறிஸ்துவிற்குள் குழந்தைகளென்றும் நினைத்துப் பேசவேண்டியதாக இருக்கிறது. 2 நீங்கள் பெலன் இல்லாதவர்களானதால், உங்களுக்கு உணவு கொடுக்காமல், பாலைக் குடிக்கக்கொடுத்தேன்; இன்னமும் நீங்கள் சரீரத்திற்குரியவர்களாக இருக்கிறபடியால், இப்பொழுதும் உங்களுக்குப் பெலனில்லை. 3 பொறாமையும் வாக்குவாதமும் வேறுபாடுகளும் உங்களுக்குள் இருக்கிறபடியால், நீங்கள் மாம்சத்திற்குரியவர்களாக இருந்து மனித வழிமுறையில் நடக்கிறீர்களல்லவா? 4 ஒருவன் நான் பவுலைச் சேர்ந்தவனென்றும், மற்றொருவன் நான் அப்பொல்லோவைச் சேர்ந்தவனென்றும் சொல்லுகிறபடியால் நீங்கள் சரீரத்திற்குரியவர்களல்லவா? 5 பவுல் யார்? அப்பொல்லோ யார்? கர்த்தர் அவனவனுக்கு கிருபை அளித்தபடியே நீங்கள் விசுவாசிக்கிறதற்கு காரணமாக இருந்த ஊழியக்காரர்கள்தானே. 6 நான் நட்டேன், அப்பொல்லோ தண்ணீர்ப் பாய்ச்சினான், தேவனே விளையச்செய்தார். 7 அப்படியிருக்க, நடுகிறவனாலும் ஒன்றுமில்லை, தண்ணீர்ப் பாய்ச்சுகிறவனாலும் ஒன்றுமில்லை, விளையச்செய்கிற தேவனாலே எல்லாம் ஆகும். 8 மேலும் நடுகிறவனும் தண்ணீர்ப் பாய்ச்சுகிறவனும் ஒன்றாயிருக்கிறார்கள்; அவனவன் தன்தன் வேலைக்குத் தகுந்தபடி கூலியைப் பெறுவான். 9 நாங்கள் தேவனுக்கு உடன்வேலையாட்களாக இருக்கிறோம்; நீங்கள் தேவனுடைய பண்ணையும், தேவனுடைய மாளிகையுமாக இருக்கிறீர்கள். 10 எனக்கு அளிக்கப்பட்ட தேவகிருபையின்படியே புத்தியுள்ள சிற்ப ஆசாரியைப்போல அஸ்திபாரம் போட்டேன். வேறொருவன் அதின்மேல் கட்டுகிறான். அவனவன் தான் அதின்மேல் எப்படிக் கட்டுகிறான் என்று கவனமாக இருக்கவேண்டும்.

கிறிஸ்துவே ஒரே அஸ்திபாரம்

இயேசு கிறிஸ்துவே கிறிஸ்தவத்தின் ஒரே அஸ்திபாரம். இந்த அஸ்திபாரத்தின்மேல் கட்டுகிறவர்கள் கடுமையான சோதனையைக் கடக்க வேண்டியிருப்பதால், கவனமாக இருக்கும்படி எச்சரிக்கப்படுகிறார்கள். கள்ளப் போதனைகளைப் புகுத்திய போதகர், தம்மால் விசுவாசத்தை ஏற்றுக்கொண்டவர்கள் துன்புறுத்தலின் காலத்தில் நெருப்பிலுள்ள மரம், வைக்கோல், துரும்பு ஆகியவற்றைப் போல வீழ்ந்துபோவதைக் காண்பார்; அவரும் மிகுந்த சிரமத்துடன் தப்புவார். மறுபுறம், இந்த அஸ்திபாரத்தின்மேல் உறுதியான நல்ல போதனையைக் கட்டியவர்கள், தங்களால் விசுவாசத்தை ஏற்றுக்கொண்டவர்கள் வெள்ளியையும் பொன்னையும் போல அக்கினிச் சோதனையைக் கடப்பதைக் காண்பார்கள்; போதகரும் தமது உழைப்புக்கான பலனைப் பெறுவார்.

1 கொரிந்தியர் 3:11–15

11 போடப்பட்டிருக்கிற அஸ்திபாரமாகிய இயேசுகிறிஸ்துவை அல்லாமல் வேறு அஸ்திபாரத்தைப்போட ஒருவனாலும் முடியாது. 12 ஒருவன் அந்த அஸ்திபாரத்தின்மேல் பொன், வெள்ளி, விலையேறப்பெற்ற கல், மரம், புல், வைக்கோல் ஆகிய இவைகளைக்கொண்டு கட்டினால், 13 அவனவனுடைய வேலைப்பாடு வெளிப்படும்; நியாயத்தீர்ப்பு நாளானது அதை வெளிப்படுத்தும். ஏனென்றால், அது அக்கினியினாலே வெளிப்படுத்தப்படும்; அவனவனுடைய வேலைப்பாடு எத்தன்மையுள்ளது என்று அக்கினியானது பரிசோதிக்கும். 14 அதின்மேல் ஒருவன் கட்டினது நிலைத்தால், அவன் கூலியைப் பெறுவான். 15 ஒருவன் கட்டினது வெந்துபோனால், அவன் நஷ்டமடைவான்; அவனோ இரட்சிக்கப்படுவான்; அதுவும் அக்கினியில் அகப்பட்டுத் தப்பினதுபோல இருக்கும்.

இவ்வுலகத்தின் ஞானம் முட்டாள்தனமே

வேண்டுமென்றே சபையில் கள்ளப் போதனையைப் புகுத்தும் போதகர், எவ்வளவு வெற்றிபெற்றவராக இருந்தாலும் அழிக்கப்படுவார் என்று பவுல் அறிவிக்கிறார். இவ்வுலகத்தின் ஞானம் தேவனுடைய பார்வையில் முட்டாள்தனமே. ஆகவே அவர்கள் தங்கள் போதகர்களையோ அவர்கள் பெரிதாகப் புகழும் தத்துவத்தையோ குறித்துப் பெருமைபாராட்டிச் சபையில் பிரிவினைகளை உண்டாக்கக்கூடாது. கிறிஸ்தவனின் உண்மையான மகிமை தேவனுக்குரிய கிறிஸ்துவிலேயே இருக்கிறது. நற்செய்திப் பிரசங்கிகள் அளிக்க முடியாத இரட்சிப்பின் வாக்குத்தத்தங்களை அவர் மூலமாக மட்டுமே நாம் பெறுகிறோம்.

1 கொரிந்தியர் 3:16–23

16 நீங்கள் தேவனுடைய ஆலயமாக இருக்கிறீர்களென்றும், தேவனுடைய ஆவியானவர் உங்களில் வாசமாக இருக்கிறாரென்றும் அறியாதிருக்கிறீர்களா? 17 ஒருவன் தேவனுடைய ஆலயத்தைக் கெடுத்தால், தேவன் அவனைக் கெடுப்பார்; தேவனுடைய ஆலயம் பரிசுத்தமாக இருக்கிறது; நீங்களே அந்த ஆலயம். 18 ஒருவனும் தன்னைத்தானே ஏமாற்றாமல் இருக்கட்டும்; இந்த உலகத்திலே உங்களில் ஒருவன் தன்னை ஞானியென்று நினைத்தால் அவன் ஞானியாகும்படிக்குப் பைத்தியக்காரனாகவேண்டும். 19 ஏனெனில், இந்த உலகத்தின் ஞானம் தேவனுக்கு முன்பாகப் பைத்தியமாக இருக்கிறது. அப்படியே, ஞானிகளை அவர்களுடைய தந்திரத்திலே பிடிக்கிறாரென்றும், 20 ஞானிகளுடைய எண்ணங்கள் வீணாக இருக்கிறதென்று கர்த்தர் அறிந்திருக்கிறாரென்றும் எழுதியிருக்கிறது. 21 இப்படியிருக்க, ஒருவனும் மனிதர்களைக்குறித்து மேன்மைபாராட்டாமலிருப்பானாக; எல்லாம் உங்களுடையதே; 22 பவுலானாலும், அப்பொல்லோவானாலும், கேபாவானாலும், உலகமானாலும், ஜீவனானாலும் மரணமானாலும், நிகழ்காரியங்களானாலும், வரும்காரியங்களானாலும், எல்லாம் உங்களுடையது; 23 நீங்கள் கிறிஸ்துவினுடையவர்கள்; கிறிஸ்து தேவனுடையவர்.

தேவன் மட்டுமே தமது ஊழியர்களை நியாயந்தீர்க்கிறார்

கிறிஸ்துவின் ஊழியர்களான அப்போஸ்தலர்கள், மக்கள் ஏற்றுக்கொள்ள ஆயத்தமாகும்போது நற்செய்தியின் இரகசியங்களை அவர்களுக்கு வழங்க வேண்டியவர்களாக இருக்கிறார்கள். கொரிந்தியர்களுக்குக் கிறிஸ்தவத்தின் ஆழமான போதனைகளைக் கற்பிக்கவில்லை என்று தம்மைக் குறைகூறிய கள்ளப் போதகர்களுக்குப் பதிலளிக்கும்போது, மனிதத் தீர்ப்பால் கண்டிக்கப்படுவது மிகச் சிறிய காரியம் என்று பவுல் அறிவிக்கிறார். ஏனெனில் தேவன் மட்டுமே சரியாக நியாயந்தீர்க்க முடியும்; அவர் மட்டுமே இருதயத்தின் இரகசியங்களை அறிந்திருக்கிறார். ஆகவே தங்கள் ஆவிக்குரிய போதகர்களைக் குறித்து நியாயத்தீர்ப்பு வழங்க வேண்டாம் என்று அவர்களை வலியுறுத்துகிறார்.

1 கொரிந்தியர் 4:1–5

1 இப்படியாக, எந்த மனிதனும் எங்களைக் கிறிஸ்துவின் ஊழியக்காரன் என்றும், தேவனுடைய இரகசியங்களின் மேற்பார்வைக்காரர்களென்றும் நினைத்துக்கொள்ளவேண்டும். 2 மேலும், மேற்பார்வைக்காரன் உண்மையுள்ளவன் என்று காணப்படுவது அவசியமாகும். 3 ஆனாலும் நான் உங்களாலேயாவது மனிதர்களுடைய நியாயநாளின் விசாரணையினாலோ தீர்ப்பைப்பெறுவது எனக்கு மிகவும் சாதாரண காரியமாக இருக்கிறது; நானும் என்னைக்குறித்துத் தீர்ப்புச்சொல்லுகிறதில்லை. 4 என்னிடத்தில் நான் எந்தவொரு குற்றத்தையும் அறியேன்; ஆனாலும் அதினாலே நான் நீதிமானாகிறதில்லை; என்னை நியாயம் விசாரிக்கிறவர் கர்த்தரே. 5 ஆதலால், கர்த்தர் வரும்வரைக்கும் நீங்கள் காலத்திற்குமுன்னே எதைக்குறித்தும் தீர்ப்புச்சொல்லாதிருங்கள்; இருளில் மறைந்திருக்கிறவைகளை அவர் வெளிப்படையாக்கி, இருதயங்களின் நோக்கங்களையும் வெளிப்படுத்துவார்; அப்பொழுது அவனவனுக்குரிய புகழ்ச்சி தேவனால் உண்டாகும்.

அப்போஸ்தலர்கள் இகழப்படுகிறார்கள், கள்ளப் போதகர்கள் மதிக்கப்படுகிறார்கள்

அவர்கள் தங்கள் தனித்தனி தலைவர்களை அளவுக்கு மீறி உயர்வாக எண்ணி, ஒருவர்மீது ஒருவர் கோபமும் இகழ்ச்சியும் கொண்டு இறுமாப்படையாமல் இருக்கக் கற்றுக்கொள்ளும்படி, தமது பெயரையும் அப்பொல்லோவின் பெயரையும் பயன்படுத்தியதாகப் பவுல் அறிவிக்கிறார். பவுலும் அப்பொல்லோவும் கிறிஸ்துவின் ஊழியர்கள் மட்டுமே; அவர்களுடைய ஊழியத்தின் மூலமாகக் கிறிஸ்தவர்கள் விசுவாசித்தார்கள். தங்கள் முன்மாதிரியால், தாம் எழுதியதற்கு மேலாகத் தங்கள் போதகர்களை மதிக்கக் கூடாது என்பதைக் கொரிந்தியர்கள் கற்றுக்கொள்ளும்படி, அவர்கள் தங்களுக்குள் எல்லாப் பட்டங்களையும் சிறப்பு வேறுபாடுகளையும் மறுத்தார்கள். பின்னர் பவுல் கள்ளப் போதகர்கள் பக்கம் திரும்புகிறார். கிறிஸ்தவ விசுவாசத்தின் முதல் கோட்பாட்டைப் பிரசங்கிப்பதால் அப்போஸ்தலர்கள் அறிவில்லாதவர்கள் என்றும் முட்டாள்கள் என்றும் அழைக்கப்படுகிறார்கள்; ஆனால் கள்ளப் போதகர்கள் தங்கள் ஊகங்களாலும் மரபுகளாலும் ஞானிகளாகவும் தத்துவஞானிகளாகவும் கருதப்படுகிறார்கள். அப்போஸ்தலர்கள் இகழப்படுகிறார்கள்; கள்ளப் போதகர்கள் மதிக்கப்படுகிறார்கள். அப்போஸ்தலர்கள் எல்லாவிதமான ஆபத்துகளுக்கும் ஆளாகிறார்கள்; ஆனால் கள்ளப் போதகர்கள் செல்வத்தையும் எல்லா வசதிகளையும் அனுபவிக்கிறார்கள்.

1 கொரிந்தியர் 4:6–13

6 சகோதரர்களே, எழுதப்பட்டதற்கு அதிகமாக நினைக்கவேண்டாமென்று நீங்கள் எங்களாலே கற்றுக்கொள்ளவும், ஒருவனும் ஒருவனிமித்தம் மற்றொருவனுக்கு விரோதமாக கர்வமடையாதிருக்கவும், நான் உங்கள்நிமித்தம் என்னையும் அப்பொல்லோவையும் ஆதாரமாக வைத்து, இவைகளை எழுதினேன். 7 அன்றியும் உன்னை சிறப்பானவனாகும்படி செய்கிறவர் யார்? உனக்கு உண்டாயிருக்கிறவைகளில் நீ பெற்றுக்கொள்ளாதது எது? நீ பெற்றுக்கொண்டவனானால் பெற்றுக்கொள்ளாதவன்போல ஏன் மேன்மைபாராட்டுகிறாய்? 8 இப்பொழுது திருப்தியடைந்திருக்கிறீர்களே, இப்பொழுது ஐசுவரியவான்களாக இருக்கிறீர்களே, எங்களையல்லாமல் ஆளுகிறீர்களே; நீங்கள் ஆளுகிறவர்களானால் நலமாக இருக்கும்; அப்பொழுது உங்களோடுகூட நாங்களும் ஆளுவோமே. 9 தேவன் அப்போஸ்தலர்களாகிய எங்களை மரணத்திற்குக் குறிக்கப்பட்டவர்கள்போலக் கடைசியானவர்களாகக் காணப்படப்பண்ணினார் என்று தோன்றுகிறது; நாங்கள் உலகத்திற்கும் தூதர்களுக்கும் மனிதர்களுக்கும் வேடிக்கையானோம். 10 நாங்கள் கிறிஸ்துவினிமித்தம் பைத்தியக்காரர்கள், ஆனால் நீங்கள் கிறிஸ்துவில் புத்திசாலிகள்; நாங்கள் பலவீனமானவர்கள், ஆனால் நீங்கள் பலவான்கள்; நீங்கள் மேன்மையானவர்கள், ஆனால் நாங்கள் மேன்மையற்றவர்கள். 11 இந்நேரம்வரைக்கும் பசியுள்ளவர்களும், தாகமுள்ளவர்களும், நிர்வாணிகளும், கொடூரமாக தாக்கப்பட்டவர்களும், தங்க இடம் இல்லாதவர்களுமாக இருக்கிறோம். 12 எங்களுடைய கைகளினாலே வேலைசெய்து பாடுபடுகிறோம், சபிக்கப்படும்போது ஆசீர்வதிக்கிறோம், துன்பப்படும்போது சகிக்கிறோம். 13 நிந்திக்கப்படும்போது வேண்டிக்கொள்ளுகிறோம், இந்தநாள்வரை உலகத்தின் குப்பையைப்போலவும், எல்லோரும் துடைத்துப்போடுகிற அழுக்கைப்போலவும் ஆனோம்.

பவுல் அவர்களின் தந்தையாக அவர்களை எச்சரிக்கிறார்

அவர்களை வெட்கப்படுத்துவதற்காக அல்ல, கற்பிப்பதற்காகவும் கள்ளப் போதகர்களைக் குறித்து எச்சரிப்பதற்காகவுமே இவற்றை எழுதுவதாகப் பவுல் அறிவிக்கிறார். அவர்களுடைய ஆவிக்குரிய தந்தையாகத் தாம் இருந்ததுபோல அந்தக் கள்ளப் போதகர்கள் இருக்க மாட்டார்கள். ஆகவே தம்மைப் பின்பற்றும்படி அவர்களை வலியுறுத்தி, தமது போதனையை அவர்களுக்கு நினைவூட்டுவதற்காகத் தீமோத்தேயுவை அவர்களிடம் அனுப்புகிறார்.

1 கொரிந்தியர் 4:14–17

14 உங்களை வெட்கப்படுத்தும்படிக்கு நான் இவைகளை எழுதவில்லை, நீங்கள் எனக்குப் பிரியமான பிள்ளைகளென்று உங்களுக்குப் புத்திசொல்லுகிறேன். 15 கிறிஸ்துவிற்குள் பத்தாயிரம் ஆசிரியர்கள் உங்களுக்கு இருந்தாலும், தகப்பன்மார்கள் அநேகர் உங்களுக்கு இல்லையே; கிறிஸ்து இயேசுவிற்குள் நற்செய்தியினால் நான் உங்களைப்பெற்றேன். 16 ஆகவே, என்னைப் பின்பற்றுகிறவர்களாக இருங்கள் என்று உங்களுக்குப் புத்திசொல்லுகிறேன். 17 இதினிமித்தமாக, எனக்குப் பிரியமும், கர்த்தருக்குள் உண்மையுமுள்ள என் குமாரனாகிய தீமோத்தேயுவை உங்களிடம் அனுப்பினேன்; நான் எங்கும் எந்தச் சபையிலும் போதித்துவருகிற பிரகாரம் கிறிஸ்துவிற்குள்ளான என் நடக்கைகளை அவன் உங்களுக்கு ஞாபகப்படுத்துவான்.

பவுல் தண்டனையுடனோ அன்புடனோ வருவார்

இவ்வளவு கற்றறிந்த, சொல்வன்மையுள்ள எதிரிகளைச் சந்திக்கப் பவுல் பயப்படுகிறார் என்று கள்ளப் போதகர் கூறியிருந்தார். விரைவில் அவர்களைச் சந்திக்க எண்ணியிருப்பதாகவும், அப்போது தமது எதிரிகளின் பேச்சையல்ல, அவர்களுடைய இயற்கைக்கு அப்பாற்பட்ட வல்லமைகளையே ஆராயப்போவதாகவும் பவுல் அறிவிக்கிறார். ஏனெனில் நற்செய்தி, அதைப் பிரசங்கிப்பவர்கள் பெரிதாகப் புகழும் ஞானத்தால் அல்ல, அதை உறுதிப்படுத்த அவர்களுக்கு அளிக்கப்பட்ட அற்புத வல்லமைகளாலேயே நிலைநாட்டப்படுகிறது. பின்னர், தம்முடைய இயற்கைக்கு அப்பாற்பட்ட வல்லமைகளை அவர்களுக்கு எதிராகத் தண்டிப்பதற்குப் பயன்படுத்த வேண்டுமா, அல்லது அவர்கள் தங்கள் பிழைகளைத் திருத்திக்கொண்டதால் சமாதானமும் அன்புமுள்ள மனப்பான்மையுடன் அவர்களிடம் வர வேண்டுமா என்று கேட்கிறார்.

1 கொரிந்தியர் 4:18–21

18 நான் உங்களிடத்திற்கு வருகிறதில்லை என்கிறதற்காகச் சிலர் இறுமாப்படைந்திருக்கிறார்கள். 19 ஆனாலும் கர்த்தருக்கு விருப்பமானால் நான் சீக்கிரமாக உங்களிடத்திற்கு வந்து, இறுமாப்படைந்திருக்கிறவர்களுடைய பேச்சை அல்ல, அவர்களுடைய பெலத்தையே அறிந்துகொள்வேன். 20 தேவனுடைய ராஜ்யம் பேச்சிலே இல்லை, பெலத்திலே உண்டாயிருக்கிறது. 21 உங்களுக்கு என்ன வேண்டும்? நான் பிரம்போடு உங்களிடம் வரவேண்டுமோ? அல்லது அன்போடும் சாந்தமுள்ள ஆவியோடும் வரவேண்டுமோ?