Pati 7: Peche Salomon (continued)
980 rive 975 anvan Christ
Bib Sen An (BSA)
1 Mouch mouri bay
lwil pafen yon move odè;
Se konsa yon ti kras foli gen pouvwa
pou depase sajès ak respè.
2 Kè a yon moun saj mennen li adwat,
men kè a moun san konprann nan
mennen l agoch.
3 Menm lè ensanse a mache nan lari
li manke bon tèt.
Li montre tout moun ke
se moun fou li ye.
4 Si kòlè a wa a vin monte kont ou,
pa abandone pozisyon ou;
paske rete kalm ka evite gwo ofans.
5 Gen yon mal mwen konn wè anba solèy la, tankou yon fot ki sòti nan sila k ap gouvène a—— 6 Foli plase nan anpil kote byen wo pandan rich yo chita kote ki ba. 7 Mwen konn wè esklav ki monte sou cheval ak prens k ap mache atè tankou esklav. 8 Sila ki fouye fè yon twou ka byen tonbe ladann, e yon sèpan ka mòde gèrye a ki kraze yon miray. 9 Sila ki taye wòch yo ka blese ladann, e sila ki fann gwo bout bwa a kapab an danje. 10 Si rach la pa gen tay, e li pa file pwent li; alò, li va egzije plis fòs. Avantaj a sajès se reyisi!
11 Si sèpan an mòde avan li vin chame, nanpwen pwofi. 12 Pawòl ki soti nan bouch sila ki saj la plen ak gras, men pawòl a moun ensanse a fin manje l nèt; 13 Kòmansman diskou ensanse a se foli, e fen diskou li se plen mechanste ak betiz. 14 Malgre tout sa, moun ensanse a ogmante pawòl li yo.
Pèsòn pa konnen sa ki va rive, e kilès kab di li sa ki va rive apre li. 15 Zèv a moun ensanse a tèlman fatige l, ke li pa konnen kijan pou li rive nan vil la.
16 Malè a ou menm, O peyi ki gen jenn ti gason kon wa;
ak prens yo k ap fè fèt granmaten.
17 Beni se ou menm, O peyi ki gen yon fis byen prepare kon wa a
ak prens ki manje nan pwòp lè yo, pou bay fòs,
e non pou fè banbòch vin sou.
18 Akoz parès ak neglijans, twati a vin pann,
e nan enpridans kay la vin koule.
19 Yon gwo tab manje fèt pou yo rejwi yo,
diven pou fè kè kontan;
epi lajan se repons pou tout bagay.
20 Anplis, nan chanm a kouche ou, pa bay wa a madichon;
e nan chanm a kouche ou, pa bay yon moun rich madichon.
Paske yon zwazo syèl la ka pote bri a,
e sa ki gen zèl yo ka fè yo konnen bagay la.
11:1 Voye pen ou sou sifas dlo,
e apre anpil jou, ou va twouve l.
2 Divize byen ou fè sèt, oswa uit menm;
paske ou pa janm konnen ki malè k ap rive sou latè.
3 Si nwaj yo plen, yo vide lapli sou latè;
epi si yon bwa tonbe vè sid, oswa vè nò,
kote li tonbe a, se la l ap kouche.
4 Sila ki veye van an p ap simen;
ni sila ki veye syèl la p ap rekòlte.
5 Menm jan ke ou pa konnen chemen van an,
ni jan zo yo vin fòme nan vant a fanm ansent lan,
se konsa ou pa konnen zèv Bondye
ki fè tout bagay la.
6 Simen semans ou nan maten an;
ni pa gaspiye tan nan aswè.
Paske ou pa janm konnen si se nan maten
oswa nan aswè semans lan ap reyisi;
ni si se pa tou de k ap bon.
7 Limyè a byen bèl,
e li bon pou zye wè solèy la.
8 Anverite, si yon nonm ta viv anpil ane,
kite li rejwi li nan yo tout;
men pa kite l bliye jou tenèb yo, paske yo va anpil.
Tout sa ki gen pou vini se vanite.
9 Rejwi jennonm, pandan jenès ou,
e kite kè ou rete kontan
pandan ane de laj jenès ou yo.
Swiv sa ki atire kè ou ak dezi a zye ou,
men konnen byen ke Bondye
va rele ou nan jijman pou tout bagay sa yo.
10 Pou sa, retire gwo doulè ak mechanste
pou l pa nan kè ou,
e fè mal rete lwen chè ou;
paske jenès ak ane jenès yo va disparèt vit.
12:1 Anplis, sonje Kreyatè ou a nan jou jenès ou yo,
avan move jou yo rive e ane yo pwoche lè ou va di:
“Mwen pa pran plezi nan yo;”
2 Avan solèy la ak limyè a, lalin nan ak zetwal yo vin tounwa,
e nwaj yo retounen apre lapli yo;
3 nan jou ke gadyen kay la tranble a,
e mesye pwisan yo vin koube a.
Lè sila k ap moulen yo rete san travay
akoz anpil nan yo ki manke,
e sila k ap gade nan fenèt yo vin mal pou wè.
4 Lè pòt vè lari yo vin fèmen akoz bri moulen an vin ba,
e yon moun va leve ak son zwazo a,
epi tout fi chanson yo va rete ba.
5 Anplis mesye yo va vin pè yon wo plas
ak gwo danje k ap vini a.
Lè pye zanmann nan fleri, krikèt volan rale kò l olon wout la,
e dezi gason an pa ka.
Paske lòm nan ap prale nan kay etènèl li a,
pandan sila k ap fè dèy yo vire toupatou nan wout la.
6 Sonje Li avan kòd ajan an kase,
e bòl an lò a kraze kivèt dlo la kote pwi a vin fann,
e wou sitèn nan vin kraze.
7 Paske konsa pousyè la va retounen nan tè a jan li te ye a,
e lespri a va retounen kote Bondye ki te bay li a.
8 “Vanite sou vanite”, predikatè a di: “tout se vanite!”
9 Anplis akoz li te yon nonm saj, predikatè a te enstwi pèp la ak konesans. Wi, li te reflechi, chache twouve, e te aranje anpil pwovèb. 10 Predikatè a te chache jwenn bèl mo pou ekri pawòl verite yo byen kòrèk. 11 Pawòl a moun saj yo tankou pwent pike bèt yo ye; tankou klou ki kloure nèt, se konsa ansanm a pawòl sila yo ye. Se yon sèl Bèje ki bay yo tout.
12 Men anplis ke sa, fis mwen, veye byen: ekri anpil liv se yon bagay san rete, e anpil devosyon a liv yo va fatige kò ou. 13 Konklizyon lè tout bagay fin tande se: Gen lakrent Bondye e kenbe kòmandman li yo, akoz se sa ki aplike a tout moun. 14 Paske Bondye va pote tout zèv nan jijman; tout sa ki kache, kit li bon kit li mal.