യൂദാ സഭയ്ക്ക് എഴുതുന്നു

കൃപയുടെ ഉപദേശത്തെ അധാർമികതയ്ക്കുള്ള ഒരു പ്രോത്സാഹനമാക്കി മാറ്റിക്കൊണ്ട് ഇപ്പോൾ പ്രത്യക്ഷപ്പെട്ടിരുന്ന വ്യാജോപദേഷ്ടാക്കളുടെ അപകടകരമായ ഉപദേശങ്ങൾക്കെതിരേ ക്രൈസ്തവസഭയ്ക്കു മുന്നറിയിപ്പു നൽകാനും, വിശ്വാസവും വിശുദ്ധിയും മുറുകെപ്പിടിക്കാൻ അവരെ ഉദ്ബോധിപ്പിക്കാനും യൂദാ തന്റെ ലേഖനം എഴുതുന്നു.

ക്രി.പി. 66

Biblica® Open Malayalam Contemporary Version™ (OMCV)

വിളിക്കപ്പെട്ടവരെ യൂദാ അഭിവാദ്യം ചെയ്യുന്നു

യേശുക്രിസ്തുവിലുള്ള വിശ്വാസത്തിലൂടെ വിളിക്കപ്പെടുകയും സംരക്ഷിക്കപ്പെടുകയും ദൈവത്തിനായി വേർതിരിക്കപ്പെടുകയും ചെയ്ത എല്ലാവർക്കുമായി യൂദാ തന്റെ കത്ത് എഴുതുന്നു. അദ്ദേഹം അവരെ അനുഗ്രഹിക്കുന്നു.

യൂദാ 1:1–2

1 യേശുക്രിസ്തുവിന്റെ ദാസനും യാക്കോബിന്റെ സഹോദരനുമായ യൂദാ,

പിതാവായ ദൈവത്താൽ സ്നേഹിക്കപ്പെട്ടും യേശുക്രിസ്തുവിനായി സംരക്ഷിക്കപ്പെട്ടുമിരിക്കുന്ന വിളിക്കപ്പെട്ടവർക്ക്, എഴുതുന്നത്:

2 നിങ്ങൾക്കു കരുണയും സമാധാനവും സ്നേഹവും സമൃദ്ധമായി ഉണ്ടാകുമാറാകട്ടെ.

വിശ്വാസത്തിനുവേണ്ടി പോരാടാൻ യൂദാ അവരെ ഉദ്ബോധിപ്പിക്കുന്നു

വ്യാജോപദേഷ്ടാക്കളുടെ ദോഷകരമായ ഉപദേശങ്ങളെക്കുറിച്ചു കേട്ട യൂദാ, യേശുക്രിസ്തു ആത്മാവിലൂടെ അപ്പൊസ്തലന്മാർക്കും പ്രവാചകന്മാർക്കും ഏൽപ്പിച്ചുകൊടുത്ത വിശ്വാസത്തിനുവേണ്ടി പോരാടാൻ ക്രിസ്ത്യാനികളെ ശക്തമായി ഉദ്ബോധിപ്പിക്കുന്നു. കാരണം, അഭക്തരായ ചില മനുഷ്യർ സഭയിൽ നുഴഞ്ഞുകയറിയിരുന്നു. ദൈവത്തിന്റെ നന്മ അത്ര വലിയതായതിനാൽ വിശ്വാസമുള്ളവർക്ക് ശിക്ഷയില്ലാതെ പാപം ചെയ്യാമെന്ന് അവർ പഠിപ്പിക്കുകയും പിതാവിനെയും പുത്രനെയും നിഷേധിക്കുകയും ചെയ്തു (1 യോഹന്നാൻ 2:22). അവരുടെ ശിക്ഷാവിധി ആദിമുതൽതന്നെ ദൈവത്തിന്റെ ന്യായപ്രമാണം മുൻകൂട്ടി പ്രഖ്യാപിച്ചിരുന്നു. ഈ അപകടകരമായ ഉപദേശങ്ങളെ ഖണ്ഡിക്കാൻ, ദൈവത്തിന്റെ തെരഞ്ഞെടുക്കപ്പെട്ട ജനത്തിനുപോലും അവരുടെ പാപങ്ങൾനിമിത്തം വന്ന ശിക്ഷയെക്കുറിച്ച് യൂദാ അവരെ ഓർമിപ്പിക്കുന്നു (സംഖ്യാപുസ്തകം 14:23 എബ്രായർ 3:18–19-നോടു താരതമ്യം ചെയ്യുക). തങ്ങളുടെ സ്ഥാനത്തിൽ തൃപ്തരാകാതെ സ്വയം ഉയരാൻ ശ്രമിച്ച്, തങ്ങൾക്കു നിശ്ചയിക്കപ്പെട്ട വാസസ്ഥലങ്ങൾ ഉപേക്ഷിച്ച ദൂതന്മാർക്കായി സൂക്ഷിച്ചിരിക്കുന്ന ശിക്ഷയെക്കുറിച്ചും സൊദോം, ഗൊമോറാ എന്നീ പട്ടണങ്ങളുടെ സമ്പൂർണവും ശാശ്വതവുമായ നാശത്തെക്കുറിച്ചും അദ്ദേഹം ഓർമിപ്പിക്കുന്നു. ഈ വ്യാജോപദേഷ്ടാക്കളും അവരുടെ അനുയായികളും അതേ അവിശ്വാസം, അനുസരണക്കേട്, ദുർന്നടപ്പ് എന്നീ പാപങ്ങളിലൂടെ അതേ ശിക്ഷ തങ്ങളുടെമേൽ വരുത്തിവെക്കുമെന്ന് അദ്ദേഹം കാണിക്കുന്നു. സ്ഥാപിതമായ എല്ലാ അധികാരങ്ങളെയും അവർ അപകീർത്തിപ്പെടുത്തുകയോ നിന്ദിക്കുകയോ ചെയ്യുന്നു. എന്നാൽ അവരെക്കാൾ എത്രയോ വലിയവനായ പ്രധാനദൂതൻ മീഖായേൽ പിശാചിനെതിരെപ്പോലും അപകീർത്തികരമായ കുറ്റാരോപണം ഉന്നയിക്കാതെ അവനെ ദൈവത്തിന്റെ ന്യായവിധിക്കു വിട്ടുകൊടുത്തു. നിയമങ്ങളുടെയും ന്യായാധിപന്മാരുടെയും പ്രയോജനവും ഉത്ഭവവും അറിയാതെ അവർ അവയെ നിന്ദിക്കുന്നു. വിവേകമില്ലാത്ത മൃഗങ്ങളെപ്പോലെ അവർ സഹജവാസനകളാൽ നിയന്ത്രിക്കപ്പെടുകയും മൃഗീയമായ അഭിലാഷങ്ങളിൽ മുഴുകി സ്വയം നശിക്കുകയും ചെയ്യുന്നു. സഹോദരന്മാരുടെ ആത്മാക്കളെ നശിപ്പിച്ചുകൊണ്ട് അവർ കയീന്റെ മാതൃകയും, ലാഭത്തിനായി ദൈവവചനം ദുഷിപ്പിച്ചുകൊണ്ട് ബിലെയാമിന്റെ മാതൃകയും പിന്തുടർന്നിരിക്കുന്നു. കോരഹിന്റെ കൂട്ടർ മോശയെയും അഹരോനെയും എതിർത്തതുപോലെ ക്രിസ്തുവിന്റെ അപ്പൊസ്തലന്മാരെയും ശുശ്രൂഷകരെയും എതിർത്തുകൊണ്ട് അവർ കോരഹിന്റെയും അവന്റെ കൂട്ടരുടെയും മാതൃകയും പിന്തുടർന്നിരിക്കുന്നു. കോരഹും അനുയായികളും നശിച്ചതുപോലെതന്നെ അവരും തീർച്ചയായും നശിക്കും.

യൂദാ 1:3–11

3 പ്രിയരേ, നാം പങ്കാളികളായിരിക്കുന്ന രക്ഷയെപ്പറ്റി നിങ്ങൾക്ക് എഴുതാൻ ഞാൻ അത്യന്തം ഉത്സാഹിച്ചു കൊണ്ടിരിക്കുകയായിരുന്നു. എന്നാൽ ദൈവം വിശുദ്ധർക്ക് ഒരിക്കലായി ഏൽപ്പിച്ചിട്ടുള്ള വിശ്വാസത്തിനുവേണ്ടി അടരാടാൻ പ്രബോധിപ്പിച്ചുകൊണ്ട് നിങ്ങൾക്ക് എഴുതാൻ ഞാൻ നിർബന്ധിതനായി. 4 കാരണം, നമ്മുടെ ദൈവത്തിന്റെ കൃപയെ അസാന്മാർഗികജീവിതത്തിനുള്ള ഒരു ഉപാധിയായി ഉപയോഗിക്കുകയും നമ്മുടെ ഏകാധിനാഥനും കർത്താവുമായ യേശുക്രിസ്തുവിനെ നിഷേധിക്കുകയുംചെയ്യുന്ന അഭക്തരായ ചിലർ നിങ്ങളുടെയിടയിൽ നുഴഞ്ഞുകയറിയിരിക്കുന്നു. ഇവരുടെ ശിക്ഷാവിധി പണ്ടുതന്നെ എഴുതിയിരിക്കുന്നു.

5 നിങ്ങൾ എല്ലാം അറിഞ്ഞവരെങ്കിലും നിങ്ങളെ ഞാൻ ഓർമിപ്പിക്കാൻ ആഗ്രഹിക്കുന്നത്, കർത്താവ് തന്റെ ജനത്തെ ഒരിക്കലായി ഈജിപ്റ്റിൽനിന്ന് വിടുവിച്ചതിനുശേഷവും വിശ്വാസത്തിൽ നിലനിൽക്കാതിരുന്നവരെ പിന്നീടു നശിപ്പിച്ചു. 6 ദൈവം ദൂതന്മാരെ ഏൽപ്പിച്ച അധികാരസീമയ്ക്കുള്ളിൽ ഒതുങ്ങിനിൽക്കാതെ തങ്ങളുടെ നിവാസസ്ഥാനം ഉപേക്ഷിച്ചുപോയ ദൂതന്മാരെ ദൈവം മഹാദിവസത്തിലെ ന്യായവിധിക്കായി നിത്യബന്ധനത്തിലാക്കി ഘോരാന്ധകാരത്തിൽ സൂക്ഷിച്ചിരിക്കുന്നു. 7 അതേവിധത്തിൽ, സൊദോമിലും ഗൊമോറായിലും ചുറ്റുമുള്ള പട്ടണങ്ങളിലും ജീവിച്ചിരുന്നവർ ഹീനമായ ലൈംഗിക അസാന്മാർഗികതയിൽ മുഴുകി അസ്വാഭാവികമായ ഭോഗവിലാസത്തിൽ ജീവിച്ചതുമൂലം നിത്യാഗ്നിയുടെ ശിക്ഷാവിധി അനുഭവിച്ചത് ഇന്നുള്ളവർക്കും ഒരു അപായസൂചനയായി നിലകൊള്ളുന്നു.

8 ഇപ്രകാരംതന്നെയാണ് നിങ്ങളുടെ ഇടയിൽ നുഴഞ്ഞുകയറിയവരും. അവർ സ്വപ്നദർശികളായി ശരീരത്തെ മലിനമാക്കുകയും അധികാരത്തെ ധിക്കരിക്കുകയും സ്വർഗീയജീവികളെ അധിക്ഷേപിക്കുകയുംചെയ്യുന്നു. 9 എന്നാൽ പ്രധാന ദൂതനായ മീഖായേൽപോലും, മോശയുടെ ശരീരത്തെ സംബന്ധിച്ച് പിശാചിനോടു തർക്കിച്ചപ്പോൾ, “കർത്താവ് നിന്നെ ശാസിക്കട്ടെ” എന്നു പറഞ്ഞതല്ലാതെ അവനെതിരായി ന്യായവിധിനടത്തി ദൈവദൂഷണം ചെയ്യാൻ മുതിർന്നില്ല. 10 എന്നാൽ ഇവരാകട്ടെ, വിശേഷബുദ്ധിയില്ലാതെ ജന്മവാസനകൊണ്ടു ഗ്രഹിക്കുന്ന മൃഗങ്ങളെപ്പോലെ, തങ്ങൾക്കു ഗ്രഹിക്കാൻ പ്രയാസമുള്ളതിനെയെല്ലാം ദുഷിക്കുന്നു. ഇങ്ങനെ ഇവർ നശിക്കുകയുംചെയ്യുന്നു.

11 ഇവർക്കു ഹാ കഷ്ടം! അവർ കയീന്റെ വഴിയിൽ നടക്കുകയും, പ്രതിഫലം മോഹിച്ചു ബിലെയാമിന്റെ വഞ്ചനയ്ക്ക് സ്വയം ഏൽപ്പിച്ചുകൊടുക്കുകയും കോരഹിന്റെ മത്സരത്തിൽ നശിച്ചുപോകുകയുംചെയ്യുന്നു.

വ്യാജോപദേഷ്ടാക്കൾ വെള്ളമില്ലാത്ത മേഘങ്ങളാണ്

തങ്ങളുടെ ഭക്ഷണമോഹങ്ങളെ താലോലിക്കുന്ന ഈ ഉപദേഷ്ടാക്കൾ ക്രിസ്ത്യാനികളുടെ സ്നേഹവിരുന്നുകൾക്ക് അപമാനമാണെന്ന് യൂദാ അവരോടു പറയുന്നു. അദ്ദേഹം അവരെ വെള്ളമില്ലാത്ത മേഘങ്ങളോട് ഉപമിക്കുന്നു (ആവർത്തനം 32:2): അവരുടെ പദവി നല്ല ഉപദേശം വാഗ്ദാനം ചെയ്യുന്നുവെങ്കിലും അവർ അതൊന്നും നൽകുന്നില്ല; സ്വന്തം വികാരങ്ങളാൽ അവർ അങ്ങുമിങ്ങും നയിക്കപ്പെടുന്നു. അവർതന്നെ അത്രമേൽ രോഗഗ്രസ്തരായതിനാൽ അവരുടെ ഉപദേശങ്ങളും ദുഷിച്ചതായിരിക്കാതെ വയ്യ. സ്വാഭാവികമായും ആത്മികമായും മരിച്ചവരായ അവർ ഫലശൂന്യരായതിനാൽ വേരോടെ പിഴുതെറിയപ്പെട്ടവരാണ്. സ്വന്തം ദുഷ്ടത നുരച്ചുതള്ളിക്കൊണ്ട് കടലിലെ തിരമാലകളെപ്പോലെ അവർ ഉഗ്രരും അക്രമാസക്തരുമാണ്; അവരുടെ പെരുമാറ്റം അസ്ഥിരവും ക്രമരഹിതവുമാണ് (വെളിപ്പാട് 1:16; 2:1). വെളിച്ചമില്ലാത്ത അവർക്കായി നിത്യാന്ധകാരം കരുതിവെച്ചിരിക്കുന്നു. പുരാതന പാരമ്പര്യമനുസരിച്ച്, ആദാംമുതൽ ഏഴാമനായ ഹാനോക്കും അവർക്കെതിരെ പ്രവചിച്ചു. ആദാംമുതൽ മൂന്നാമനായ, കയീന്റെ മകൻ ഹാനോക്കിൽനിന്ന് വേർതിരിച്ചറിയാനാണ് അദ്ദേഹത്തെ അങ്ങനെ വിളിക്കുന്നത്. തന്റെ കാലത്തെ ദുഷ്ടന്മാരുടെ ശിക്ഷാവിധിയും ജലപ്രളയത്തിലൂടെയുള്ള അവരുടെ നാശവും മുൻകൂട്ടി പറഞ്ഞപ്പോഴാണ് അദ്ദേഹം അങ്ങനെ പ്രവചിച്ചത്. കാരണം, ജലപ്രളയത്തിനു മുമ്പുള്ളവരെപ്പോലെ ഈ വ്യാജോപദേഷ്ടാക്കളും ദൈവപരിപാലനം തങ്ങൾക്ക് അനുവദിച്ചതിനെക്കുറിച്ചും തങ്ങളുടെമേൽ ഏർപ്പെടുത്തിയ നിയന്ത്രണങ്ങളെക്കുറിച്ചും പിറുപിറുക്കുന്നു. അവർ അഹങ്കാരികളും മത്സരികളുമാണ്; സ്വന്തം നേട്ടത്തിനായി മനുഷ്യരെ മുഖസ്തുതി പറയുന്നു.

യൂദാ 1:12–16

12 ഇവർ നിങ്ങളുടെ സ്നേഹവിരുന്നുകളിലെ കളങ്കങ്ങളാണ്. യാതൊരു ലജ്ജയുമില്ലാതെ തിന്നുകുടിച്ചു മദിക്കുന്നവർ! സ്വന്തം വിശപ്പുമാത്രം തീർക്കുന്ന ഇടയന്മാർ! കാറ്റിൽ പാറിപ്പോകുന്ന, വെള്ളമില്ലാത്ത മേഘങ്ങൾ! ഫലമില്ലാത്തതും പിഴുതെടുത്തതും രണ്ടുവട്ടം ചത്തതുമായ ശരൽക്കാല വൃക്ഷങ്ങൾ! 13 സ്വന്തം നാണക്കേടിന്റെ നുരയും പതയും വമിച്ച് അലറുന്ന കടൽത്തിരകൾ! കൊടുംതമസ്സിനായി നിത്യം സൂക്ഷിക്കപ്പെട്ടിരിക്കുന്ന വക്രഗതിയുള്ള നക്ഷത്രങ്ങൾ!

14-15 ആദാംമുതൽ ഏഴാമനായ ഹാനോക്കും ഇവരെക്കുറിച്ച് ഇങ്ങനെ പ്രവചിച്ചിരിക്കുന്നു: “സകലരെയും ന്യായംവിധിക്കാനും ദൈവഭയമില്ലാതെ ചെയ്ത സകലതിന്മപ്രവൃത്തികളെക്കുറിച്ചും ഭക്തികെട്ട പാപികൾ കർത്താവിനെതിരേ പറഞ്ഞ സകലനിഷ്ഠുര വചനങ്ങളെക്കുറിച്ചും അവർക്കു ബോധംവരുത്താനുമായി, കർത്താവ് അവിടത്തെ ആയിരമായിരം വിശുദ്ധരോടുകൂടി ഇതാ വരുന്നു.” 16 ഇവർ തങ്ങളുടെ അവസ്ഥയെക്കുറിച്ച് എപ്പോഴും പിറുപിറുക്കുന്നവരും ദോഷംമാത്രം കാണുന്നവരും സ്വന്തം ദുർമോഹങ്ങളെ പിൻതുടരുന്നവരുമാണ്. തങ്ങളെക്കുറിച്ച് ഇവർ പൊങ്ങച്ചം പറയുകയും കാര്യസാധ്യത്തിനായി മുഖസ്തുതി പ്രയോഗിക്കുകയുംചെയ്യുന്നു.

അപ്പൊസ്തലന്മാർ മുൻകൂട്ടി പറഞ്ഞത് ഓർക്കുക

വ്യാജോപദേഷ്ടാക്കളെ പിന്തുടരുന്നതിനുപകരം അപ്പൊസ്തലന്മാർ നൽകിയ ഉപദേശങ്ങൾ ഓർക്കാൻ യൂദാ അവരെ ഉദ്ബോധിപ്പിക്കുന്നു. തങ്ങൾക്കു കൂടുതൽ അറിവുണ്ടെന്ന് അവകാശപ്പെട്ട് ക്രിസ്തുവിന്റെ യഥാർഥ ശിഷ്യരിൽനിന്ന് വേർപിരിയുന്ന ഈ കാമാസക്തരായ പരിഹാസികളുടെ വരവും അപ്പൊസ്തലന്മാർ മുൻകൂട്ടി പറഞ്ഞിരുന്നു (2 പത്രോസ് 3:2). എന്നാൽ അവർ ദൈവാത്മാവില്ലാത്ത, കേവലം ലൗകികരായ മനുഷ്യരാണ്. ക്രിസ്ത്യാനികളാകട്ടെ, മനുഷ്യരെ ആത്മികരും വിശുദ്ധരുമാക്കുന്ന ക്രിസ്തുവിന്റെയും അപ്പൊസ്തലന്മാരുടെയും ഉപദേശങ്ങളിൽ തങ്ങളെത്തന്നെയും പരസ്പരവും പടുത്തുയർത്തണം. അവർ പരിശുദ്ധാത്മാവിന്റെ പ്രേരണയിൽ ദൈവത്തോടു പ്രാർഥിക്കുകയും ദൈവത്തോടുള്ള സ്നേഹത്തിൽ നിരന്തരം നിലനിൽക്കുകയും നിത്യജീവനോടൊപ്പം ക്രിസ്തുവിൽനിന്നുള്ള പാപക്ഷമയ്ക്കായി കാത്തിരിക്കുകയും വേണം. അജ്ഞതയും ബലഹീനതയുംമൂലം വഴിതെറ്റിയവരെയും അഹങ്കാരവും ദുഷിച്ച ഹൃദയവുംമൂലം തെറ്റിലേക്കു പോയവരെയും അവർ വേർതിരിച്ചറിയണം. ആദ്യത്തെ കൂട്ടരെ സൗമ്യതയോടെ തിരുത്തുകയും മറ്റുള്ളവരെ ഭയത്തിന്റെ ശക്തിയാൽ പാപത്തിന്റെ നാശത്തിൽനിന്ന് രക്ഷിക്കുകയും വേണം. അവരുടെ പാപങ്ങൾ തങ്ങളിലേക്കും പകരാതിരിക്കാൻ ആ പാപങ്ങളോട് അത്യന്തം വെറുപ്പു പുലർത്തുകയും വേണം.

യൂദാ 1:17–23

17 നിങ്ങളോ പ്രിയരേ, നമ്മുടെ കർത്താവായ യേശുക്രിസ്തുവിന്റെ അപ്പൊസ്തലന്മാർ മുന്നറിയിപ്പായി നിങ്ങളോടു പറഞ്ഞ സന്ദേശങ്ങൾ ഓർക്കുക. 18 “അന്ത്യകാലത്തു ഭക്തിവിരുദ്ധമായ സ്വന്തം മോഹങ്ങളെ പിൻതുടരുന്ന പരിഹാസകർ ഉണ്ടാകും” എന്ന് അവർ നിങ്ങളോടു പറഞ്ഞുവല്ലോ. 19 ലൗകികരും ദൈവാത്മാവ് ഇല്ലാത്തവരുമായ ഇവരാണ് നിങ്ങളുടെയിടയിൽ ഭിന്നിപ്പുണ്ടാക്കുന്നത്.

20 നിങ്ങളോ പ്രിയരേ, നിങ്ങളുടെ അതിവിശുദ്ധവിശ്വാസത്തിൽ നിങ്ങൾക്കുതന്നെ ആത്മികശാക്തീകരണം വരുത്തിയും പരിശുദ്ധാത്മാവിൽ പ്രാർഥിച്ചും 21 നിത്യജീവനായി, നമ്മുടെ കർത്താവായ യേശുക്രിസ്തുവിന്റെ കരുണയ്ക്കായി കാത്തിരുന്നും ദൈവസ്നേഹത്തിൽ നിങ്ങളെത്തന്നെ സൂക്ഷിക്കുക.

22 ചഞ്ചലമാനസരോടു കരുണ കാണിക്കുക; 23 ചിലരെ നിത്യാഗ്നിയിൽനിന്നു വലിച്ചെടുത്തു രക്ഷിക്കുക; മറ്റുചിലരോട്, ജീവിതങ്ങളെ മലീമസമാക്കുന്ന അവരുടെ പാപപ്രവൃത്തികളെ വെറുത്തുകൊണ്ട് അത്യധികം ഭയഭക്തിയോടെ സൂക്ഷ്മത പുലർത്തിക്കൊണ്ടു കരുണ കാണിക്കുക.

യൂദാ അവരെ ദൈവത്തിനു സമർപ്പിക്കുന്നു

പാപത്തിന്റെയും തെറ്റിന്റെയും പകർച്ചയിൽനിന്ന് അവരെ കാത്തുസൂക്ഷിക്കാൻ കഴിയുന്ന ഏക ദൈവത്തിന് അവരെ സമർപ്പിച്ചുകൊണ്ടും, സകലകാലത്തും നിത്യതയിലും മഹത്ത്വവും ശക്തിയും നിലനിൽക്കുന്ന നമ്മുടെ രക്ഷകനായ ദൈവത്തെ സ്തുതിച്ചുകൊണ്ടും യൂദാ അവസാനിപ്പിക്കുന്നു.

യൂദാ 1:24–25

24 വീഴാതെ നിങ്ങളെ സൂക്ഷിച്ചു തന്റെ തേജസ്സുള്ള സന്നിധിയിൽ മഹാ ആനന്ദത്തോടെ കളങ്കമറ്റവരായി നിർത്താൻ കഴിവുള്ള ദൈവത്തിന്, 25 നമ്മുടെ കർത്താവായ യേശുക്രിസ്തുവിലൂടെ നമ്മുടെ രക്ഷകനായ ഏകദൈവത്തിനുതന്നെ, സർവകാലങ്ങൾക്ക് മുമ്പും ഇപ്പോഴും എന്നേക്കും തേജസ്സും മഹിമയും ബലവും ആധിപത്യവും ഉണ്ടായിരിക്കട്ടെ! ആമേൻ.