Mapintas nga Giawhag ni Zofar si Job sa Paghinulsol

Gipadayon ni Zofar ang pangatarongan ni Elifaz sa hilabihang kapintas, ug gipasiugda ang panginahanglan sa paghinulsol.

2130 sa wala pa si Cristo

Biblica® Open Ang Pulong sa Dios™ (OCCB)

Job 11

1 Unya gitubag siya ni Zofar nga taga-Naamat,

2 “Kinahanglan nga matubag kanang imong mga gipanulti.

Dili mapamatud-an nga dili ka sad-an pinaagi lang sa pagsigeg tagawtaw.

3 Dili mahimong magpakahilom lang kami sa imong mga gipanulti nga walay pulos.

Abi nimog dili ka namo badlongon sa imong pagpasipala?

4 Matod mo nga husto ka sa imong gituohan ug hinlo ka atubangan sa Dios.

5 Maayo unta ug mosulti ang Dios kanimo

6 ug sultihan ka niya sa mga butang

nga wala mo pa mahibaloi.

Adunay mga butang nga nahibaloan mo na

ug adunay mga butang nga wala pa.

Nahibalo ba diay ka nga ang silot sa Dios kanimo

kulang pa sa unsay angay unta kanimo?

7 “Matugkad mo ba ang tanan mahitungod

sa Makagagahom nga Dios?

8-9 Mas taas pa kini sa kalangitan ug mas lawom pa

sa dapit sa mga patay.

Mas dako pa kini sa kalibotan ug mas halapad pa sa kadagatan.

Nan, maabot ba kini sa imong huna-huna?

10 “Pananglitan, dakpon ka sa Dios ug dad-on

sa hukmanan ug unya prisohon,

kinsa may makapugong kaniya?

11 Nahibaloan gayod niya kon kinsay limbongan

nga mga tawo

ug nakita niya ang ilang kadaotan.

12 Murag imposible na sa usa ka buang-buang

nga magmaalamon,

maingon nga imposible alang sa asno

nga manganak ug tawo.

13 “Job, kon maghinulsol ka lang

ug modangop sa Dios,

14 ug dili ka na magpakasala ug dili mo tugotan

ang imong panimalay sa pagpakasala,

15 sigurado gayod nga dili ka na maulaw ug magkinabuhi ka

nga lig-on ug walay gikahadlokan.

16 Unya malimtan mo na ang imong mga kasakit,

nga daw sama lang kini sa tubig nga milabay.

17 Ug ang imong kinabuhi hayag pa kaysa sidlak

sa adlaw sa kaudtohon.

Ang kangitngit sa imong kinabuhi modan-ag

sama sa kabuntagon.

18 Magkinabuhi ka nga lig-on tungod kay aduna kay paglaom.

Panalipdan ka sa Dios ug magpahulay

nga walay gikahadlokan.

19 Maghigda ka nga walay manghadlok kanimo,

ug daghan ang mangayog tabang gikan kanimo.

20 Apan ang mga daotan madismaya,

ug wala nay laing kapaingnan pa,

ug ang ila lang malaoman mao ang kamatayon.”

Gitubag ni Job ang Tibuok Pangatarongan

Job 12

1 Unya mitubag si Job,

2 “Nagtuo kamo nga kamo ray maalamon, ug kon mamatay kamo,

uban kaninyo nga mamatay ang kaalam!

3 Apan maalamon usab ako

ug wala kamo makabintaha kanako.

Nahibalo ang tanang tawo

niining tanan ninyong gipanulti.

4 “Nahimo akong kataw-anan

sa akong mga higala bisag matarong ako

ug walay ikasaway sa akong kinabuhi,

ug bisan ginatubag sa Dios

ang akong pag-ampo kaniadto.

5 Ang mga tawo nga sama kanako nga nag-antos

ug halos dili na makabarog

ginatamay sa mga tawo nga hayahay ug kahimtang.

6 Apan ang mga tulisan ug ang mga tawo

nga nagpalagot sa Dios nagkinabuhi nga malinawon bisan

ug ang ilang abilidad maoy ilang gipakadios.

7-8 “Kuhaig leksyon ang lain-laing klasi sa mananap,

ang mananap nga naglakaw,

ang naglupad, ang nagkamang, ug ang nagpuyo sa tubig.

9 Kay silang tanan nahibalo niining gihimo sa Ginoo.

10 Anaa sa iyang kamot ang kinabuhi o ang gininhawa

sa tanang binuhat, apil na ang sa tawo.

11 Ang dila sa tawo mahibalo sa lami sa pagkaon,

ug ang dalunggan mahibalo usab kon maayo ba

o dili ang mga pulong.

12 Ang mga tigulang adunay kaalam ug panabot,

kay samtang gataas ang ilang kinabuhi,

nagkadaghan pa gayod ang ilang kahibalo.

13 “Apan anaa sa Dios ang kaalam,

gahom, panabot, ug pagtambag.

14 Walay makatukod pagbalik sa iyang giguba,

ug walay makaluwas sa iyang gipriso.

15 Kon pugngan niya ang ulan, moabot ang hulaw;

ug kon buhian niya kini, daoton sa baha ang yuta.

16 Kusgan siya ug madaogon, ug ilalom sa iyang gahom

ang nagpanglimbong ug ang ginalimbongan.

17 Kuhaan niya sa kaalam ang mga magtatambag,

ug himuon niyang mga buang-buang

ang mga maghuhukom.

18 Pakanaogon niya ang mga hari

sa ilang trono ug ipabihag.

19 Tangtangon niya sa ilang katungdanan ang mga pari

ug ang mga tawo nga dugay na sa pangagamhanan.

20 Patak-omon niya ang baba niadtong masaligan nga mga magtatambag,

ug kuhaan niya sa hustong panabot ang mga tigulang.

21 Ipaubos niya ang mga dungganon ug kuhaan

ug gahom ang gamhanan nga mga tawo.

22 Ipadayag niya ang mga tinago,

ug lamdagan niya ang kangitngit.

23 Himuon niyang gamhanan ang mga nasod,

ug unya laglagon niya kini.

Palapdon niya ang teritoryo niini

ug unya isalikway niya kini.

24 Himuon niyang mga buang-buang

ang ilang mga pangulo,

ug palatagawon niya sila sa disyerto.

25 Magpangapkap sila sa kangitngit

ug magsukarap sama sa hubog.