Gitubag ni Job ang Tibuok Pangatarongan (continued)

2130 sa wala pa si Cristo

Biblica® Open Ang Pulong sa Dios™ (OCCB)

Job 13–14

1 “Nakita ko na ug nadungog kanang tanan ninyong gisulti,

ug nakasabot ako niana.

2 Nahibalo ako sa inyong nahibaloan;

wala kamo makabintaha kanako.

3 Apan buot ko nga makigsulti sa Dios nga Makagagahom

ug makighusay kaniya bahin sa akong kaso.

4 Kay gitinguha ninyo nga tambalan ako pinaagi sa mga bakak.

Nahisama kamong tanan sa doktor nga walay pulos.

5 Mas maayo pag magpakahilom na lang kamo.

Mao kanay labing maayo ninyong buhaton.

6 “Palihog, paminawa ninyo ang akong reklamo;

hatagi ninyog pagtagad ang akong mga rason.

7 Depensahan ba ninyo ang Dios pinaagi sa inyong pagpamakak

ug pagpanglimbong?

8 Paboran ba ninyo siya?

Kamo bay mobarog alang kaniya sa atubangan sa Dios?

9 Kon susihon kamo sa Dios,

aduna kaha siyay maayo nga makita diha kaninyo?

Limbongan ba ninyo siya

sama sa paglimbong ninyo sa mga tawo?

10 Sigurado gayod nga badlongon kamo sa Dios

bisag gipaboran pa ninyo siya.

11 Wala ba kamo mahadlok sa iyang gahom?

12 Ang inyong mga panultihon walay pulos sama sa abo;

ang inyong mga rason sama kahuyang sa kolon.

13 “Paghilom kamo, ug pasultiha ninyo ako.

Pasagdi ug unsay mahitabo kanako.

14 Andam ako nga mosugal sa akong kinabuhi.

15 Kon patyon ako sa Dios, wala na akoy paglaom.

Apan depensahan ko gihapon ang akong kaugalingon

sa iyang atubangan.

16 Basin pinaagi niini maluwas ako,

kay ang tawo nga dili diosnon

dili gayod makaduol sa iyang presensya.

17 “Paminawag maayo ang akong isulti.

18 Karon giandam ko na ang akong kaso,

ug nasayod ako nga i-deklarar ako nga inosente.

19 Kinsay makaakusar kanako? Kon aduna man,

magpakahilom na ako ug mamatay.

20 “O Dios, buhata kining duha ka butang alang kanako

ug dili ako motago gikan kanimo:

21 undangi na ang pagpaantos kanako, ug ayaw na akog hadloka

sa imong makahahadlok nga gihimo kanako.

22 Karon, tawga ako ug tubagon ka nako,

o ako ang mosulti kanimo ug tubaga ako.

23 Sultihi ako kon unsay sayop nga akong nahimo.

Ipakita kanako ang akong mga kalapasan ug kasal-anan.

24 Nganong naglikay ka man kanako,

ug giisip mo ako nga imong kaaway?

25 Nganong gihadlok ug gigukod mo ako?

Sama lang ako sa ugang dagami

o sa dahon nga gipalid sa hangin.

26 Nagsulat ka ug sakit nga mga sumbong batok kanako,

ug gipabayad mo ako sa mga sala

nga nahimo ko niadtong batan-on pa ako.

27 Daw sa gikadenahan mo ang akong mga tiil.

Gibantayan mo ang akong mga lakang,

ug gisundan mo ang akong mga tunob.

28 “Busa nadaot ako sama sa gabok nga butang

o sa bisti nga gikutkot sa gagmayng mananap.

14:1 “Mubo rag kinabuhi ang tawo ug puno kini sa kalisod.

2 Sama kini sa bulak nga mobukhad ug malaya ra dayon;

sama sa anino nga dali rang mahanaw.

3 Nan, nganong gibantayan mo man gayod ang tawo, Ginoo?

Dad-on mo ba siya sa imong atubangan aron hukman?

4 Aduna bay tawo nga magkinabuhi nga putli gayod?

Wala! Kay ang tanan, natawo nga mahugaw.

5 Gitakda mo na kon unsa kataas ang kinabuhi sa tawo.

Ug dili siya makalapas sa panahon nga gitagal mo kaniya.

6 Busa ayaw na lang lisod-lisora ang tawo.

Pasagdi na lang siya aron makapahulay

sama sa usa ka trabahante sa pagkahuman niya sa iyang buluhaton.

7 “Kon putlon ang usa ka kahoy,

adunay purohan pa nga manalingsing kini

ug mananga pag-usab.

8 Bisag dugay na ang gamot niini diha sa yuta

ug nadunot na ang tuod,

9 kon matubigan, manalingsing pa kini

sama sa usa ka bag-o nga tanom.

10 Apan kon ang tawo mamatay,

mawala na ang tanan niyang kusog.

Pagkabugto sa iyang gininhawa,

mao na kana ang iyang kataposan.

11 Sama sa paghunas sa dagat ug paghubas sa suba,

12 ang tawo mamatay, ug dili na mobangon

o makamata pa sa iyang pagkatulog

hangtod mahanaw ang kalangitan.

13 “Ginoo, hinaut unta nga tagoan mo na lang ako

sa dapit sa mga patay hangtod nga mawala ang imong kasuko,

ug magtakda ka ug panahon nga hinumdoman mo ako.

14 Kon mamatay ang tawo mabuhi pa ba siya pag-usab?

Kon ingon niana, agwantahon ko ang tibuok nga panahon

sa akong pag-antos hangtod moabot ang panahon nga matapos kini.

15 Sa panahon nga manawag ka kanako, Ginoo, motubag ako.

Handomon mo ako nga imong binuhat.

16 Nianang higayona bantayan mo ang akong mga binuhatan,

apan dili mo na hinumdoman pa ang akong sala.

17 Sama ra nga isulod mo kini sa buyot

aron matago ug dili mo na makita pa.

18 “Apan maingon nga mangatumpag ang mga bukid

ug mangahulog ang mga bato,

19 ug maingon usab nga mahilis ang mga bato sa sigeng pagbanlas sa tubig

ug makab-kab ang yuta tungod sa makusog nga ulan,

giguba mo ang paglaom sa tawo.

20 Pildihon mo ang tawo kanunay ug mamatay siya,

ug usbon mo ang iyang hitsura kon motaliwan na siya.

21 Dili na siya masayod kon gipasidunggan ba

o gipakaubos ang iyang mga anak.

22 Ang iya lang mabati mao

ang iyang kaugalingong kasakit ug kasubo.”