Ang Ikaduhang Panagtigom sa Katawhan

1015 sa wala pa si Cristo

Biblica® Open Ang Pulong sa Dios™ (OCCB)

1 Cronicas 29:1–19

1 Unya miingon si Haring David sa tibuok katilingban sa Israel, “Ang akong anak nga si Solomon nga gipili sa Dios batan-on pa ug walay kasinatian. Dako ang buluhaton, kay ang tukoron nga gambalay dili alang sa tawo kondili alang sa Ginoong Dios. 2 Gihimo ko ang tanan kong mahimo sa pag-andam sa mga materyales alang sa Templo sa akong Dios, daghan nga bulawan, plata, bronsi, puthaw, kahoy, mahalong bato nga onix, emerald, mga bato nga nagkalain-lain ang kolor, ug uban pa nga matahom nga mga bato, ug daghan usab nga marmol. 3 Ug tungod sa akong dakong tinguha alang sa Templo sa akong Dios, ihatag ko ang akong kaugalingong mga bulawan ug plata alang sa pagpatukod niini, walay labot sa mga materyales nga natigom ko na alang sa balaan nga templo. 4 Mohatag ako ug 100 ka toneladang bulawan gikan sa Ofir, ug 250 ka toneladang plata. Gamiton kini nga panghaklap sa mga dingding sa Templo, 5 ug alang sa tanang mga kagamitan nga pagahimuon sa mga panday. Karon, kinsa kaninyo ang gustong mohatag alang sa Ginoo?”

6 Unya kinabubut-on nga mihatag ang mga pangulo sa mga pamilya, mga pangulo sa mga tribo sa Israel, mga komander sa linibo ug ginatos ka mga sundalo, ug ang mga opisyal nga gitugyanan sa pagdumala sa mga kabtangan sa hari. 7 Mihatag sila alang sa pagpatrabaho sa Templo sa Dios ug 175 ka toneladang bulawan, 10,000 ka pilakng bulawan, 350 ka toneladang plata, 630 ka toneladang bronsi, ug 3,500 ka toneladang puthaw. 8 Ang adunay mahalong mga bato mihatag usab niini, ug gitipigan kini didto sa bodega sa Templo sa Ginoo nga gidumalahan ni Jehiel nga kaliwat ni Gershon. 9 Nalipay pag-ayo ang mga tawo kay mihatag sila nga kinabubut-on ug kinasing-kasing ngadto sa Ginoo. Nalipay usab kaayo si Haring David.

10 Gidayeg ni David ang Ginoo atubangan sa tanang katawhan nga nagtigom didto. Miingon siya:

“Ginoo, Dios sa among katigulangan nga si Jacob,

dalaygon ka sa walay kataposan.

11 Gamhanan ikaw, talahuron, dungganon,

halangdon, ug dalaygon.

Imo ang tanang mga butang

sa langit ug sa yuta.

Ikaw ang hari, Ginoo,

ug labaw ka sa tanan.

12 Ang bahandi ug dungog naggikan kanimo.

Ikaw ang nagdumala sa tanang mga butang.

Gamhanan ikaw, ug ikaw ang nagbuot sa paghatag

ug kusog ug gahom sa tanan.

13 Busa karon, O among Dios,

ginapasalamatan namo

ug ginadayeg ang imong halangdon nga ngalan.

14 “Apan kinsa man ako ug ang akong katawhan nga makahimo man kami sa paghatag nga madagayaon sama niini? Ang tanang mga butang naggikan kanimo, ug gibalik lang namo kanimo ang imong gihatag kanamo. 15 Nasayod ikaw nga lumalabay lang kami dinhi sa kalibotan sama sa among mga katigulangan. Ang among kinabuhi dinhi sa kalibotan sama lang sa landong nga lumalabay lamang.

16 “Ginoo nga among Dios, bisan kining tanang gihatag namo alang sa pagpatukod sa templo alang sa kadungganan sa imong balaan nga ngalan naggikan kanimo. Imo kining tanan! 17 Dios ko, nahibalo ako nga ginasusi mo ang among kasing-kasing ug malipay ka kon makita mo nga matarong kini. Nasayod ka nga matinud-anon ako ug maayo ang akong tuyo sa paghatag niining mga butanga. Ug nakita ko nga malipayon ug kinasing-kasing usab nga nanghatag ang imong katawhan diha kanimo.

18 “Ginoo, Dios sa among mga katigulangan nga si Abraham, Isaac, ug Jacob, hinaut nga ibutang mo kanunay kini nga tinguha sa kasing-kasing sa imong katawhan, ug tabangi sila nga magmatinumanon kanimo. 19 Tabangi usab ang akong anak nga si Solomon nga magmatinud-anon gayod sa pagtuman sa imong mga sugo, mga pagtulon-an, ug mga tulomanon, ug sa pagpatukod sa Templo nga akong gipangandaman.”

Mga Salmo 72

Awit ni Solomon.

1 O Dios, tudloi ang hari

sa imong pamaagi sa paghukom ug pagkamatarong,

2 aron hukman niya diha sa pagkamatarong

ang imong katawhan, labi na ang mga kabos.

3 Hinaut pa nga ang mga bukid

ug mga bungtod mohatag ug panalangin

sa imong katawhan samtang nagkinabuhi sila nga matarong.

4 Hinaut pa nga labanan ug tabangan sa hari ang mga kabos,

ug laglagon niya ang mga nangdaog-daog kanila.

5 Hinaut pa nga magpadayon ang iyang paghari hangtod sa kahangtoran pinaagi sa iyang mga kaliwat,

samtang adunay adlaw ug aduna pay bulan.

6 Hinaut pa nga mahisama siya sa ulan

nga naghatag ug tubig sa kalibotan.

7 Sa panahon sa iyang paghari,

hinaut nga molambo ang katarong,

ug molungtad ang mauswagon nga kahimtang sa mga tawo

hangtod sa kahangtoran.

8 Hinaut pa nga maghari siya gikan sa usa ka dagat hangtod sa pikas dagat,

ug gikan sa Suba sa Eufrates hangtod sa kinatumyan sa yuta sa Israel.

9 Hinaut pa nga ang iyang mga kaaway nga nagpuyo sa kamingawan moyukbo kaniya

ug magpailalom sa iyang gahom.

10 Hinaut pa nga ang mga hari sa Tarshish,

sa mga isla, sa Sheba,

ug sa Seba mohatag kaniya ug mga gasa

sa pagpaila nga nagpasakop sila kaniya.

11 Hinaut pa nga ang tanang hari magpasakop kaniya

ug ang tanang kanasoran moalagad kaniya.

12 Kay gitabangan niya ang mga pinasagdang

mga kabos ug timawa nga nangayo ug tabang kaniya.

13 Naluoy siya sa mga timawa ug mga kabos,

ug gitabangan niya sila.

14 Giluwas niya sila gikan sa mga nangdaog-daog

ug nanghasi kanila,

kay ang ilang mga kinabuhi bililhon kaniya.

15 Hinaut nga hatagan ug taas nga kinabuhi ang hari!

Hinaut pa nga hatagan siya ug bulawan gikan sa Sheba.

Hinaut nga i-ampo siya sa kanunay nga panalanginan siya sa Dios.

16 Hinaut pa nga modaghan ang mga abot sa yuta,

bisan sa kinatumyan sa mga bukid.

Hinaut pa nga mahimo kining sama kamabungahon

sa bukid sa Lebanon.

Hinaut pa nga modaghan ang mga lumulupyo sa mga lungsod

sama sa mga sagbot sa mga kaumahan.

17 Hinaut pa nga dili malimtan ang ngalan sa hari

hangtod sa kahangtoran samtang aduna pay adlaw.

Hinaut pa nga pinaagi kaniya panalanginan ang tanang kanasoran,

ug ang kanasoran moisip kaniya nga bulahan.

18 Dalaygon ang Ginoong Dios, ang Dios sa Israel,

nga mao lang gayod ang naghimo sa katingalahang mga butang.

19 Dalaygon ang iyang pagkagamhanan sa walay kataposan.

Makita sa mga tawo sa tibuok kalibotan ang iyang pagkagamhanan.

Amen! Amen!

20 Mao kini ang kataposan sa mga pag-ampo ni David nga anak ni Jesse.

1 Cronicas 29:20–25

20 Unya miingon si David sa tibuok katilingban, “Dayega ninyo ang Ginoo nga inyong Dios.” Busa gidayeg nila ang Ginoo, nga Dios sa ilang mga katigulangan. Nangluhod sila ug miyukbo sa pagpasidungog sa Ginoo ug sa hari.

21 Pagkasunod nga adlaw naghalad sila sa Ginoo ug mga halad nga sinunog: 1,000 ka torong baka, 1,000 ka laking karnero, ug 1,000 ka toriyong karnero. Naghalad usab sila ug mga halad nga ilimnon ug daghan pang halad alang sa tibuok Israel. 22 Nangaon sila ug nanginom nga malipayon sa presensya sa Ginoo niadtong adlawa.

Ug sa ikaduhang higayon gihimo nilang hari si Solomon nga anak ni David. Gidihogan si Solomon ug lana sa presensya sa Ginoo ingon nga hari, ug gidihogan usab si Sadok ingon nga pari. 23 Busa milingkod si Solomon sa trono sa Ginoo ingon nga hari puli sa iyang amahan nga si David. Nagmauswagon si Solomon, ug mituman kaniya ang tibuok Israel. 24 Nanumpa ang tanan nga opisyal, ang bantogan nga mga tawo, ug ang tanang anak nga lalaki ni Haring David nga magpasakop sila kang Haring Solomon. 25 Gihimo sa Ginoo si Solomon nga bantogan sa tibuok Israel. Gihatagan niya kini ug kadungganan nga wala sukad maangkon sa ubang mga hari sa Israel.