Mga Salmo gikan sa Paghari ni David, Dili Tino ang mga Petsa (continued)

Mga salmo nga gisulat ni David human siya mahimong hari, nga dili tino ang mga petsa ug mga higayon sa pagsulat niini.

1015 sa wala pa si Cristo

Biblica® Open Ang Pulong sa Dios™ (OCCB)

Mga Salmo 120–122

Ang awit samtang gatungas.

1 Sa akong kalisod, nanawag ako sa Ginoo

ug gitubag niya ako.

2 Ginoo, luwasa ako sa mga bakakon ug mga limbongan.

3 Kamong mga limbongan, unsa kahay isilot sa Dios kaninyo?

4 Silotan niya kamo pinaagi sa talinis nga pana sa sundalo

ug sa nagdilaab nga baga.

5 Alaot ako kay nagpuyo ako uban kaninyo nga sama kadaotan

sa mga lumulupyo sa Meshec ug sa Kedar.

6 Dugay na akong nagpuyo uban sa mga tawo nga dili gustog kalinaw.

7 Gusto kog kalinaw

apan kon maghisgot na gani ako mahitungod niini,

ang ilang gusto kagubot.

Ang awit samtang gatungas.

121:1 Nagtan-aw ako sa mga bukid;

asa man maggikan ang akong gipaabot nga tabang?

2 Ang maong tabang maggikan sa Ginoo,

nga nagbuhat sa langit ug sa yuta.

3 Dili niya itugot nga mapandol ka.

Siya nga nagtipig kanimo, dili matulog.

4 Pamati! Ang nagtipig sa Israel wala magduka o matulog.

5 Ang Ginoo mao ang imong tigpanalipod;

anaa siya sa imong tapad aron sa pagpanalipod kanimo.

6 Ang kainit sa adlaw dili makaunsa kanimo,

ni ang siga sa bulan sa panahon sa kagabhion.

7 Tipigan ka sa Ginoo gikan sa tanang katalagman;

ampingan niya ang imong kinabuhi.

8 Ang Ginoo motipig kanimo

karon ug hangtod sa kahangtoran, bisan asa ka moadto.

Ang awit samtang gatungas si David.

122:1 Nalipay ako sa dihang miingon sila kanako,

“Mangadto kita sa Templo sa Ginoo.”

2 Ug karon, ania na kami nagtindog sa pultahan sa Jerusalem!

3 Ang Jerusalem usa ka siyudad nga maayong pagkatukod ug lig-on.

4 Motungas didto ang mga tribo sa Israel sa pagdayeg sa Ginoo

sumala sa iyang gisugo kanila.

5 Atua sa Jerusalem ang trono nga lingkoranan sa mga hari nga kaliwat ni David

kon magdumala sila ug maghukom.

6 Pag-ampo kamo alang sa maayo nga kahimtang sa Jerusalem pinaagi sa pag-ingon,

“Hinaut nga magmauswagon ang nahigugma niining siyudara.

7 Hinaut nga adunay kalinaw,

panaghiusa, ug kauswagan sa sulod sa Jerusalem

ug sa lig-ong mga bahin niini.”

8 Tungod sa akong mga paryente ug mga higala, moingon ako,

“Hinaut nga magpadayon ang kalinaw ug maayo nga kahimtang sa Jerusalem.”

9 Tungod ug alang sa Templo sa Ginoo nga atong Dios,

mag-ampo ako alang sa kauswagan sa Jerusalem.

Mga Salmo 124

Ang awit samtang gatungas ni David.

1 Kon wala pa modapig ang Ginoo kanato, unsa kaha ang mahitabo?

Tubag kamo mga taga-Israel!

2 “Kon wala pa modapig ang Ginoo kanato

sa dihang gisulong kita sa mga kaaway,

3 gipatay na unta nila kita tungod sa ilang labihang kasuko kanato.

4-5 Daw gilapawan na unta kita sa tubig;

gianod sa makusog nga baha ug nalumos.

6 “Dalaygon ang Ginoo, kay wala siya motugot nga kunis-kunison kita

sa atong mga kaaway nga sama sa mabangis nga mga mananap.

7 Nakaikyas kita nga daw langgam nga nakabuhi gikan sa lit-ag.

Naguba ang lit-ag ug naluwas kita.

8 Ang panabang nga atong nadawat naggikan sa Ginoo,

nga naghimo sa kalangitan ug sa kalibotan.”

Mga Salmo 131

Ang awit samtang gatungas ni David.

1 O Ginoo, dili ako garboso ug mapahitas-on.

Wala ako mangandoy sa dagko ug pinasahi nga mga butang nga dili ko masarangan.

2 Sa pagkatinuod, kontento na ako ug malinawon,

sama kakontento ug kamalinawon

sa usa ka bata kon kauban niya ang iyang inahan.

3 Mga taga-Israel, salig kamo sa Ginoo karon ug hangtod sa kahangtoran.

Mga Salmo 133

Ang awit samtang gatungas. Sulat ni David.

1 Pagkamaayo ug pagkaanindot

kon ang katawhan sa Dios magpuyo nga adunay panaghiusa.

2 Sama kini sa mahalong lana nga gidihog sa ulo ni Aaron,

nga midagayday sa iyang bangas ug ngadto sa kuwelyo sa iyang bisti.

3 Sama usab kini sa yamog sa Bukid sa Hermon

nga naabot sa mga bukid sa Zion.

Ug dinhi sa Zion misaad ang Ginoo sa paghatag sa panalangin,

nga mao ang kinabuhi nga walay kataposan.