Ang Kamatayon ni Ezequias (continued)

710 sa wala pa si Cristo

Biblica® Open Ang Pulong sa Dios™ (OCCB)

Isaias 37:1–38:8

1 Sa pagkadungog ni Haring Ezequias sa gibalita kaniya, gigisi niya ang iyang bisti ug nagsul-ob ug sako sa pagpakita sa iyang pagsubo, ug miadto siya sa Templo sa Ginoo. 2 Gipaadto niya kang Isaias nga anak ni Amos sila si Eliakim nga tigdumala sa palasyo, si Shebna nga sekretaryo, ug ang mga pangulo nga pari. Tanan sila nagbistig sako.

3 Pag-abot nila kang Isaias, miingon sila kaniya, “Mao kini ang giingon ni Ezequias: Nag-antos kita niini nga panahon; ginasilotan ug ginapakaulawan. Nahisama kita sa babayeng nagbati nga wala nay kusog sa pagpahimugso sa iyang anak. 4 Gisugo sa hari sa Asiria ang iyang komander sa pagbiay-biay sa buhi nga Dios. Basin pa ug nadungog sa Ginoo nga imong Dios ang giingon sa komander ug silotan siya sa iyang gipanulti, busa pag-ampo alang sa mga nangahibilin kanato.”

5 Pagkahuman ug sulti sa mga opisyal nga gipadala ni Haring Ezequias, 6 miingon si Isaias kanila, “Sultihi ninyo ang inyong agalon nga si Haring Ezequias nga mao kini ang giingon sa Ginoo: Ayaw kahadlok sa imong nadunggan nga pagpasipala kanako sa mga sakop sa hari sa Asiria. 7 Pamati! Linglahon ko ang hari sa Asiria. Makadungog siya ug balita nga makapahukom kaniya sa pagbalik sa iyang nasod. Ug didto ipapatay ko siya pinaagi sa espada.”

8 Unya sa dihang nadunggan sa komander nga mibiya na sa Lakish ang hari sa Asiria ug nakig-gira sa Libna, miapas siya didto. 9 Nakadungog ug balita si Senakerib nga hari sa Asiria nga si Tirhaka nga hari sa Etiopia nagpadulong sa pagpakig-gira kaniya. Busa nagpadala siyag mga mensahero kang Ezequias sa pag-ingon niini: 10 “Ayaw pagpatunto sa dios nga imong ginasaligan kon moingon siya, ‘Ang Jerusalem dili itugyan ngadto sa kamot sa hari sa Asiria. 11 Pamati! Ikaw mismo nakadungog kon unsa ang gihimo sa mga hari sa Asiria ngadto sa tanang nasod. Gilaglag nila sila sa hingpit. Ug ikaw, naghuna-huna ka ba nga makalingkawas ka? 12 Gipanglaglag sa akong mga katigulangan ang mga lungsod sa Gozan, Haran, Rezef, ug ang katawhan sa Eden nga anaa sa Telasar. Naluwas ba sila sa ilang mga dios? 13 Adunay nahimo ba ang hari sa Hamat, Arpad, Sefarvaim, Hena, ug Iva?’ ”

14 Pagkahuman ug basa ni Ezequias sa sulat nga gihatag kaniya sa mga mensahero, miadto siya sa Templo sa Ginoo ug gibukhad ang sulat sa presensya sa Ginoo. 15 Unya nag-ampo siya, 16 “Ginoo nga Makagagahom, Dios sa Israel nga naglingkod sa trono taliwala sa mga kerubin, ikaw lang ang Dios nga nagdumala sa tanang gingharian dinhi sa kalibotan. Gihimo mo ang kalangitan ug ang kalibotan. 17 Ginoo, pamati ug tan-awa ang nahitabo. Pamatia ang tanang giingon ni Senakerib sa pagbiay-biay kanimo, O buhi nga Dios. 18 Tinuod, Ginoo, nga gipanglaglag sa mga hari sa Asiria ang daghang mga nasod 19 ug gipangsunog ang ilang mga dios, kay dili man usab kini tinuod nga mga dios kondili mga bato lang ug mga kahoy nga hinimo sa tawo. 20 Busa karon, Ginoo nga among Dios, luwasa kami gikan sa kamot sa Asiria, aron ang tanang gingharian dinhi sa kalibotan mahibalo nga ikaw lang, Ginoo, ang Dios.”

21 Unya nagpadala si Isaias nga anak ni Amos niini nga mensahe ngadto kang Ezequias: Mao kini ang giingon sa Ginoo, nga Dios sa Israel: Tungod kay nag-ampo ka mahitungod kang Senakerib nga hari sa Asiria, 22 mao kini ang giingon sa Ginoo batok kaniya:

“Gikataw-an ka ug gitamay sa mga lumulupyo sa Zion.

Nagpanglingo sila sa pagbiay-biay kanimo samtang miikyas ka.

23 Kinsay imong giinsulto ug gipasipad-an?

Kinsay gipataasan mo sa imong kilay ug gisingkahan?

Dili ba nga ako, ang Balaang Dios sa Israel?

24 Pinaagi sa imong mga ulipon, gibiay-biay mo ako.

Miingon ka pa, ‘Pinaagi sa akong daghang mga karwahi

akong nasaka ang tag-as nga mga bukid,

ang kinatumyan sa mga bukid sa Lebanon.

Gipamutol ko ang iyang labing tag-as nga mga

kahoyng sedro ug labing maayo nga mga sipres.

Nakaabot ako sa kinasuokang bahin

sa iyang mabagang kalasangan.

25 Nagpakalot ako ug mga atabay sa ubang mga dapit,

ug miinom ako gikan niini.

Sa akong pag-agi, mimala ang mga sapa sa Ehipto.’

26 “Tinuod nga gipangguba mo ang pinarilan nga mga lungsod.

Apan wala ka ba makahibalo nga dugay ko na kining gitakda?

Dugay ko na kining giplano

nga mahitabo ug karon ginatuman ko na kini.

27 Ang mga lumulupyo sa mga lungsod nga gipangguba mo

nawad-an ug kusog; nahadlok sila ug naulawan.

Sama sila sa mga sagbot sa uma nga dali rang malaya

o sa mga sagbot nga nagtubo sa atop sa balay,

nga mao pa gani ang pagturok nalaya na dayon.

28 “Apan nahibaloan ko ang tanan bahin kanimo,

kon hain ka magpuyo,

ang imong gigikanan

ug ang imong padulngan,

ug kon unsa ka kapungot kanako.

29 Tungod kay napungot ka kanako

ug nadunggan ko ang imong pagpasigarbo,

kaw-itan ko ang imong ilong ug busalan ko ang imong baba,

ug guyoron balik sa imong gigikanan,

sa dalan nga imong giagian.”

30 Unya miingon si Isaias kang Ezequias,

“Mao kini ang timailhan nga panalipdan sa Ginoo

ang Jerusalem gikan sa mga taga-Asiria:

Karong tuiga mokaon kamo sa mga bunga

sa mga tanom nga nanubo lang ug ila,

ug sa sunod nga tuig ang mga bunga

sa mga tanom nga nanubo

gikan niadto mao na usab ang inyong kan-on.

Apan sa ikatulong tuig makatanom na kamo

ug mga lugas ug makaani.

Makatanom usab kamo

ug mga ubas ug makakaon sa bunga niini.

31 Sa makausa pa ang mga nahibiling buhi sa Juda mouswag

sama sa tanom nga nanggamot ug lawom ug namunga.

32 Kay adunay mangahibiling buhi nga magkatag

gikan sa Jerusalem,

ug mga naluwas gikan sa Bukid sa Zion.

Siguradohon gayod sa Ginoo nga Makagagahom

nga matuman kini.

33 “Mao kini ang giingon sa Ginoo bahin sa hari sa Asiria,

“Dili siya makasulod sa siyudad sa Jerusalem o makapana niini.

Dili siya makaduol nga adunay taming o makakita ug paagi

nga malibotan kini.

34 Mobalik siya sa iyang agi.

Dili siya makasulod niini nga siyudad.

Ako, ang Ginoo, ang nag-ingon niini.

35 Panalipdan ug luwason ko kining siyudara

alang sa akong kadungganan ug tungod

sa akong saad kang David nga akong alagad.”

36 Unya miadto ang anghel sa Ginoo sa kampo sa Asiria ug gipamatay niya ang 185,000 ka mga sundalo. Pagkabuntag, pagmata niadtong nangahibiling buhi, nakita nila ang mga patayng lawas. 37 Tungod niini, mipauli si Senakerib sa Nineve ug nagpabilin didto.

38 Usa ka adlaw, samtang nagsimba si Senakerib sa templo sa iyang dios nga si Nisroc, gipatay siya pinaagi sa espada sa iyang duha ka anak nga lalaki nga sila si Adramelec ug Sharezer, ug unya miikyas sila sa Ararat. Ang usa niya ka anak nga si Esarhadon mao ang mipuli kaniya ingon nga hari.

38:1 Niadtong higayona nagsakit si Ezequias ug himalatyon na. Miadto kaniya si Propeta Isaias nga anak ni Amos ug miingon, “Nag-ingon ang Ginoo nga himuon mo na ang angay mong himuon kay dili ka na maulian gikan sa imong sakit kay mamatay ka na.”

2 Pagkadungog ni Ezequias niini, miatubang siya sa bongbong ug nag-ampo sa Ginoo. 3 Ingon niya, “Ginoo, hinumdomi kon giunsa ko pagkinabuhi nga matinumanon kanimo ug sa pag-alagad nga kinasing-kasing gayod, ug kon giunsa ko paghimo ang maayo sa imong atubangan.” Ug midanguyngoy.

4 Unya giingnan sa Ginoo si Isaias 5 nga mobalik kang Ezequias ug isulti kini: “Mao kini ang giingon sa Ginoo, nga Dios sa imong katigulangan nga si David: Nadungog ko ang imong pag-ampo ug nakita ko ang imong mga luha. Dugangan ko pag 15 ka tuig ang imong kinabuhi. 6 Luwason ka nako ug kining siyudara gikan sa kamot sa hari sa Asiria. Panalipdan ko kini nga siyudad. 7 Mao kini ang timailhan nga akong ihatag sa pagpamatuod nga tumanon ko kining akong saad: 8 Pabalikon ko ug napulo ka lakang ang landong sa adlaw sa orasan nga gipahimo ni Ahaz.” Ug natuman kini.

Isaias 38:21–39:8

21 Sa wala pa maulii si Ezequias, giingnan siya ni Isaias nga pahampolan niya sa iyang mga sulugoon ang iyang hubag-hubag ug binulad nga igos aron maayo siya. 22 Unya nangutana si Ezequias, “Unsay timailhan nga magpamatuod nga maulian ako ug makaadto ako sa Templo sa Ginoo?”

39:1 Niadtong panahona nabalitaan ni Merodac-Baladan sa Babilonia nga naayo na si Ezequias sa iyang sakit. Busa nagpadala siyag mga sulat ug regalo alang kang Ezequias. 2 Giabi-abi pag-ayo ni Ezequias ang mga mensahero ug gipakita niya kanila ang sulod sa iyang tago-anan sa bahandi nga mga pilak, mga bulawan, mga panakot, mga maayong matang sa lana, mga armas ug uban pa niyang mga bahandi. Wala gayoy bisan usa nga anaa sa iyang palasyo o gingharian nga wala niya ipakita kanila.

3 Unya, miadto si Propeta Isaias kang Haring Ezequias ug nangutana, “Diin gikan kadtong mga tawhana, ug unsay ilang tuyo?”

Mitubag si Ezequias, “Gikan sila sa layong dapit, sa Babilonia.”

4 Nangutana pa gayod ang propeta, “Unsay ilang nakita dinhi sa imong palasyo?”

Mitubag si Ezequias, “Nakita nila ang tanan dinhi sa akong palasyo. Wala gayoy bisan usa sa akong bahandi nga wala ko ipakita kanila.”

5 Unya miingon si Isaias kang Ezequias, “Pamatia kining mensahe sa Ginoo nga Makagagahom: 6 Moabot gayod ang panahon nga dad-on ngadto sa Babilonia ang tanang butang sa imong palasyo, ang tanan nga natigom sa imong mga katigulangan nga anaa pa hangtod karon. Wala gayoy mahibilin, ingon sa Ginoo. 7 Ug ang uban sa imong umaabot nga mga kaliwat bihagon, ug mahimo silang mga alagad sa palasyo sa hari sa Babilonia.” 8 Naghuna-huna si Ezequias nga adunay kalinaw ug walay katalagman nga moabot sa iyang panahon. Busa miingon siya kang Isaias, “Maayo kanang mensahe sa Ginoo nga gisulti mo kanako.”

2 Mga Hari 20:20–21

20 Ang uban pang mga sugilanon mahitungod sa paghari ni Ezequias, ug ang tanan niyang gihimo, apil ang iyang pagpahimo sa pundohanan ug tubig ug sa agianan paingon sa siyudad, nasulat sa libro sa mga sugilanon bahin sa mga hari sa Juda. 21 Sa dihang namatay si Ezequias, si Manases nga iyang anak mao ang mipuli kaniya ingon nga hari.