Ang Umaabot nga Himaya ug Kadaugan sa Iglesia

710 sa wala pa si Cristo

Biblica® Open Ang Pulong sa Dios™ (OCCB)

Isaias 59:16–61:11

16 Natingala siya sa dihang iyang nakita

nga wala gayoy bisan usa nga mitabang sa mga dinaog-daog,

busa gigamit niya ang iyang gahom sa pagluwas kanila.

Sa iyang pagkamatarong, tabangan niya sila.

17 Gamiton niya ingon nga taming sa dughan ang pagkamatarong

ug ingon nga helmet ang kaluwasan.

Ug ang pagpanimalos ug kasuko iyang isul-ob daw sama sa bisti.

18 Baslan niya ang iyang mga kaaway sumala sa ilang binuhatan;

mahiagoman nila ang iyang kasuko.

Panimaslan usab niya ang atua sa mga isla.

19 Bisan asa tahoron ug pasidunggan siya sa mga tawo,

kay moabot siya sama sa naghaguros nga tubig

nga gihuyop sa makusog nga hangin sa Ginoo.

20 Miingon ang Ginoo, “Moabot sa Zion

ang manluluwas ninyong mga kaliwat ni Jacob,

ug luwason niya ang naghinulsol sa ilang mga sala.

21 “Ug mao kini ang akong kasabotan uban kaninyo: Dili gayod mawala ang akong Espiritu nga anaa kaninyo ug ang mga pulong nga gisulti ko kaninyo. Isugilon ninyo kini sa inyong mga kabataan, ug isugilon usab nila kini sa ilang kabataan, ug magpadayon kini sukad karon ug hangtod sa kahangtoran. Ako, ang Ginoo, ang nag-ingon niini.”

60:1 “Bangon, O Jerusalem, ug sidlak sama sa adlaw!

Kay miabot na ang imong kaluwasan

ug misidlak na kanimo ang gahom sa Ginoo.

2 Tabonan sa bagang kangitngit ang mga nasod sa kalibotan,

apan kamo dan-agan sa gahom sa Ginoo.

3 Moduol ang mga nasod

ug ang ilang mga hari sa imong kahayag.

4 “Tan-aw sa imong palibot!

Nagkatigom na ang imong katawhan.

Mamauli na sila kanimo gikan sa layong mga dapit ug

mura silag mga bata nga gikugos.

5 Malipay ka gayod inigkakita mo niini.

Mag-awas gayod sa kalipay ang imong kasing-kasing

kay ang mga bahandi sa mga nasod

ug sa kadagatan pagadad-on diha kanimo.

6 Mapuno ang imong kayutaan sa mga kamelyo

sa mga taga-Midian ug mga taga-Efa.

Kadtong gikan sa Sheba moabot

nga adunay dalang mga bulawan

ug mga insenso aron mosimba sa Ginoo.

7 Dad-on kanimo sa mga taga-Kedar

ug sa taga-Nebayot ang daghan nilang mga karnero,

ug dawaton kini ingon nga halad sa halaran sa Ginoo.

Himuon sa Ginoo nga halangdon ang iyang Templo.

8-9 “Molayag ang mga barko nga daw sa mga panganod nga naglupad,

ug daw sa mga salampati nga nagpadulong sa ilang mga salag.

Kini nga mga barko alang sa mga nagpuyo sa mga isla nga naglaom sa Ginoo.

Pangunahan sila sa mga barko gikan sa Tarshish sa pagdala sa imong katawhan

pabalik kanimo gikan sa layong mga dapit.

Magdala usab silag mga bulawan ug mga pilak alang sa Ginoo nga imong Dios,

ang Balaang Dios sa Israel, kay gipasidunggan ka niya.”

10 Nag-ingon ang Ginoo sa Jerusalem,

“Pabarogon sa mga langyaw ang imong mga paril,

ug ang ilang mga hari moalagad kanimo.

Bisan gisilotan ka nako tungod sa akong kasuko,

kaloy-an ka nako tungod sa akong kaayo.

11 Kanunay na unyang abli ang imong pultahan adlaw ug gabii,

sa pagdawat sa mga bahandi sa mga kanasoran.

Moparada ang mga hari sa pagsulod sa imong gingharian.

12 Kay malaglag gayod sa hingpit ang mga nasod

o gingharian nga dili moalagad kanimo.

13 “Ang bahandi sa Lebanon maimo,

ang ilang mga kahoy nga pino, enebro, ug sipres,

aron sa pagpatahom sa Templo nga akong puloy-anan.

14 Ang mga kaliwat sa mga nagdaog-daog kanimo moduol kanimo nga magyukbo.

Moluhod sa imong tiilan ang tanang mitamay kanimo,

ug tawgon ka nila nga ‘Siyudad sa Ginoo’ o ‘Zion, ang Siyudad sa Balaang Dios sa Israel.’

15 “Bisag gisalikway ka ug gidumtan,

ug walay nagtagad kanimo kaniadto,

himuon ka nako nga halangdon hangtod sa kahangtoran,

ug ikalipay ka sa tanang henerasyon.

16 Atimanon ka sa mga nasod ug sa ilang mga hari

sama sa usa ka bata nga gipasuso sa iyang inahan.

Unya masayran mo nga ako mao ang Ginoo,

ang imong Manluluwas ug Manunubos,

ang Makagagahom nga Dios ni Jacob.

17 Ilisdan ko ang mga materyales sa imong Templo,

ang mga bronsi ilisdan kog bulawan,

ang mga puthaw ilisdan kog plata,

ang mga kahoy ilisdan kog bronsi,

ug ang mga bato ilisdan kog puthaw.

Ug molungtad diha kanimo ang kalinaw ug pagkamatarong.

18 Wala nay kagubot nga mahitabo diha sa imong yuta.

Wala nay kalaglagan nga moabot kanimo.

Magpalibot kanimo ang kaluwasan nga daw sa paril,

ug magdayeg kanako ang mosulod sa imong mga pultahan.

19 “Dili mo na kinahanglan ang kahayag sa adlaw ug sa bulan,

kay ako, ang Ginoo,

mao na ang mahimo nimong kahayag hangtod sa kahangtoran.

Ako nga imong Dios mao na ang imong himaya.

20 Ako ang mahimo nimong adlaw ug bulan nga dili mosalop;

ang imong kahayag hangtod sa kahangtoran.

Ug matapos na ang imong mga pag-antos.

21 Ang tanan mong katawhan mahimong matarong,

ug panag-iyahan nila ang yuta sa Israel hangtod sa hangtod.

Gihimo ko sila; sama sila sa tanom nga akong gitanom

alang sa akong kadungganan.

22 Gamay lang sila, apan modaghan gayod sila.

Wala silay katakos, apan mahimo silang gamhanan nga nasod.

Ako, ang Ginoo, ang mohimo niini sa madali,

sa gitakda nga panahon.”

61:1 Ang Espiritu sa Ginoong Dios ania kanako.

Kay gipili niya ako nga mowali sa maayong balita ngadto sa mga kabos.

Gipadala niya ako aron sa paglipay sa mga nagmasulob-on

ug sa pagmantala ngadto sa mga binihag nga aduna na silay kagawasan.

2-3 Gipadala usab niya ako aron sa pagmantala nga miabot

na ang panahon nga luwason sa Ginoo ang iyang katawhan,

ug silotan ang ilang mga kaaway.

Gipadala usab niya ako aron sa paglipay sa mga nagsubo sa Jerusalem,

aron imbis nga abo ang ibutang nila sa ilang ulo sa pagpaila nga nagsubo sila,

korona nga bulak ang ilang ibutang,

ug haplasan nilag lana ang ilang ulo sa pagpaila nga malipayon sila.

Imbis nga maguol, magdayeg sila.

Mahisama sila sa lig-on nga kahoyng terebinto nga gitanom sa Ginoo.

Tawgon silang mga matarong alang sa kadungganan sa Ginoo.

4 Pabarogon nila pag-usab ang ilang mga siyudad

nga dugay nang nangaguba.

5 Mga katawhan sa Dios, moalagad kaninyo ang mga langyaw.

Bantayan nila ang inyong mga kahayopan,

ug motrabaho sila sa inyong mga kaumahan ug mga ubasan.

6 Tawgon kamong mga pari sa Ginoo, mga alagad sa atong Dios.

Busgon kamo sa bahandi sa mga kanasoran,

ug ipasigarbo ninyo kini.

7 Imbis nga maulawan kamo,

madoble pa hinuon ang panalangin

nga inyong madawat gikan sa inyong yuta,

ug malipay gayod kamo sa inyong madawat.

Ang inyong kalipay magpadayon hangtod sa hangtod.

8 “Kay ako, ang Ginoo, mahigugmaon sa hustisya.

Gikapungtan ko ang pagpangawat ug ang uban pang kadaotan.

Tungod sa akong pagkamatinumanon,

hatagan kog ganti ang akong katawhan,

ug maghimo akog walay kataposan nga kasabotan uban kanila.

9 Ang ilang mga kaliwat mahimong inila sa mga kanasoran.

Ang tanang makakita kanila moila nga sila katawhan

nga akong gipanalanginan.”

10 Malipayon gayod ako sa Ginoo nga akong Dios,

kay sama ra nga gipabistihan niya ako sa kaluwasan ug kadaogan.

Sama ako sa pamanhonon nga adunay matahom nga turban,

ug pangasaw-onon nga nagsul-ob ug mga alahas.

11 Kay ingon nga ang yuta nagpatubo ug binhi,

ang Ginoong Dios nagpatunhay usab sa pagkamatarong,

ug dayegon siya sa tanang mga nasod.