Ang Ikaduhang Pagsulong ni Senakerib sa Tibuok

710 sa wala pa si Cristo

Biblica® Open Ang Pulong sa Dios™ (OCCB)

2 Mga Hari 18:17–19:7

17 Apan samtang didto si Senakerib sa Lakish, gisugo niya ang iyang pangulo nga komander, ang pangulo nga opisyal, ug ang iyang komander nga adunay daghang mga sundalo, nga moadto sa Jerusalem sa pagpakigkita kang Haring Ezequias. Sa didto na sila sa gawas sa Jerusalem, mihunong sila duol sa tubod sa tubig nga paingon sa tigomanan ug tubig sa ibabaw, dapit sa dalan paingon sa lugar nga labhanan. 18 Gipatawag nila si Haring Ezequias, apan ang gipaadto sa hari mao si Eliakim nga anak ni Hilkia, nga tigdumala sa palasyo, si Shebna nga sekretaryo, ug si Joa nga anak ni Asaf, nga nagdumala sa mga kasulatan sa gingharian.

19 Miingon kanila ang komander sa mga sundalo, “Ingna ninyo si Ezequias nga mao kini ang giingon sa gamhanang hari sa Asiria:

“Unsa may imong gisaligan? 20 Naghuna-huna ka ba nga madaog nimo ang gira sa pulong lamang ug dili sa katakos ug kusog sa imong mga sundalo? Kinsay imong gisaligan nga nagrebelde ka man kanako? 21 Ang Ehipto ba? Kini nga nasod ug ang iyang hari sama lang sa gabok nga baston nga kon imong itukod mabali ug makasamad sa kamot. 22 Apan tingali moingon ka kanako nga nagsalig kamo sa Ginoo nga inyong Dios. Apan dili ba nga gipangguba mo man ang iyang mga simbahanan diha sa habog nga mga dapit, ug gisultihan mo ang mga lumulupyo sa Jerusalem ug sa uban pang mga lungsod sa Juda sa pagsimba didto lang sa halaran sa Jerusalem?

23 “Karon adunay itanyag kanimo ang akong agalon, ang hari sa Asiria. Hatagan ka namo ug 2,000 ka mga kabayo, kana kon adunay 2,000 ka usab ka mga tigkabayo! 24 Wala ka gayoy mahimo sa pagpildi bisan sa pinakaubos nga opisyal sa akong agalon. Nagsalig ka lang sa Ehipto nga mohatag kanimo sa mga karwahi ug mga tigkabayo. 25 Naghuna-huna ka ba nga wala ako sugoa sa Ginoo sa pag-anhi dinhi sa paglaglag niining lugara? Ang Ginoo mismo ang nagsugo kanako sa pagsulong ug sa paglaglag niini nga nasod.”

26 Miingon si Eliakim, Shebna, ug Joa ngadto sa komander, “Palihog pakigsulti kanamo sa pinulongan nga Aramico, kay masabtan namo kini. Ayaw pag-Hebreo kay madunggan ka sa mga tawo nga anaa sa mga paril sa lungsod.”

27 Apan mitubag ang komander, “Gisugo ako sa akong agalon nga ipahibalo kining mga butanga sa tanang lumulupyo sa Jerusalem, dili lang kaninyo ug sa inyong hari. Kamong tanan gutomon ug uhawon sa panahon nga sulongon namo kamo. Busa kaonon ninyo ang inyong kaugalingong tae ug imnon ang inyong kaugalingong ihi.”

28 Unya mitindog ang komander sa mga sundalo ug misinggit sa pinulongang Hebreo, “Pamatia ninyo ang mensahe sa gamhanang hari sa Asiria! 29 Miingon siya nga dili kamo magpatunto kang Ezequias. Dili siya makaluwas kaninyo gikan sa akong mga kamot! 30 Ayaw kamo pagpahaylo kaniya nga mosalig sa Ginoo kon moingon siya, ‘Sigurado gayod nga luwason kita sa Ginoo; kining lungsora dili itugyan ngadto sa kamot sa hari sa Asiria.’

31 “Ayaw kamo pamati kang Ezequias! Mao kini ang giingon sa hari sa Asiria: Ayaw na kamo pagsukol kanako; ampo na lang kamo! Unya tugotan ko kamo nga makakaon sa bunga sa inyong ubasan ug kahoy nga igos, ug makainom sa inyong pundohanan ug tubig, 32 hangtod nga mobalik ako ug dad-on ko kamo sa yuta nga sama sa inyong yuta, ang yuta nga adunay mga tamnanan sa ubas nga makahatag kaninyo ug duga sa ubas ug adunay mga trigo nga mahimo ninyong pan, ug adunay mga kahoyng olibo ug mga dugos. Tumana ninyo ang akong giingon aron mabuhi kamo ug dili mamatay.

“Ayaw kamo pamati kang Ezequias kay gilingla lang niya kamo sa iyang pag-ingon nga luwason kamo sa Ginoo. 33 Aduna bay mga dios sa bisan unsang nasod nga nakaluwas sa ilang nasod gikan sa kamot sa hari sa Asiria? 34 Aduna bay nahimo ang mga dios sa Hamat, Arpad, Sefarvaim, Hena, ug Iva? Naluwas ba sa mga dios sa Samaria ang ilang nasod gikan sa akong mga kamot? 35 Kinsa ba sa mga dios niining mga nasora ang nakaluwas sa ilang nasod gikan kanako? Busa unsaon sa Ginoo pagluwas ang Jerusalem gikan sa akong mga kamot?”

36 Apan wala motubag ang mga tawo kay nagmando si Haring Ezequias nga dili sila motubag.

37 Unya gigisi ni Eliakim, Shebna, ug Joa nga anak ni Asaf ang ilang mga bisti tungod sa kasubo, ug nangadto sila kang Ezequias ug misugilon sa giingon sa komander.

19:1 Sa pagkadungog ni Haring Ezequias sa gibalita kaniya, gigisi niya ang iyang bisti ug nagsul-ob ug sako sa pagpakita sa iyang pagsubo, ug miadto siya sa Templo sa Ginoo. 2 Gipaadto niya kang Isaias nga anak ni Amos sila si Eliakim nga tigdumala sa palasyo, si Shebna nga sekretaryo, ug ang mga pangulo nga pari. Tanan sila nagbistig sako. 3 Pag-abot nila kang Isaias, miingon sila kaniya, “Mao kini ang giingon ni Ezequias: ‘Nag-antos kita niini nga panahon; gisilotan ug gipakaulawan. Nahisama kita sa babayeng nagbati nga wala nay kusog sa pagpahimugso sa iyang anak. 4 Gisugo sa hari sa Asiria ang iyang komander sa pagbiay-biay sa buhi nga Dios. Basin pa ug nadungog sa Ginoo nga imong Dios ang giingon sa komander ug silotan siya sa iyang gipanulti, busa pag-ampo alang sa mga nangahibilin kanato.’ ”

5 Pagkahuman ug sulti sa mga opisyal nga gipadala ni Haring Ezequias, 6 miingon si Isaias kanila, “Sultihi ninyo ang inyong agalon nga mao kini ang giingon sa Ginoo: ‘Ayaw kahadlok sa imong nadunggan nga pagpasipala kanako sa mga sakop sa hari sa Asiria. 7 Pamati! Linglahon ko ang hari sa Asiria. Makadungog siya ug balita nga makapahukom kaniya sa pagbalik sa iyang nasod. Ug didto ipapatay ko siya pinaagi sa espada.’ ”

Mga Salmo 44

Ang awit alang sa maestro sa mga mag-aawit. Ang “Maskil” sa mga anak ni Kora.

1 O Dios, gisuginlan kami sa among mga katigulangan

mahitungod sa gipanghimo mo sa ilang panahon,

sa dugay nang panahon.

2 Giabog mo ang mga katawhan nga wala nagtuo kanimo,

ug ang among mga katigulangan mao

ang gipapuyo mo sa ilang mga dapit.

Gipaantos mo kadtong mga tawhana

apan gipauswag mo ang among mga katigulangan.

3 Apan wala maangkon sa

among mga katigulangan ang yuta pinaagi sa

ilang hinagiban ug katakos,

kondili pinaagi sa imong gahom, katakos, ug kaluoy,

tungod kay gihigugma mo sila.

4 Ikaw ang akong Hari ug Dios nga naghatag

sa kadaogan sa mga kaliwat ni Jacob.

5 Pinaagi kanimo mapildi namo

ang among mga kaaway.

6 Wala ako nagsalig sa akong pana

ug espada aron modaog.

7 Kay ikaw ang nagpadaog kanamo batok

sa among mga kaaway.

Gipakaulawan mo ang mga nakigbatok kanamo.

8 Gipasigarbo ka namo sa kanunay, O Dios,

ug dayegon ka namo sa walay kataposan.

9 Apan karon, gisalikway mo na kami

ug gitugot mo nga maulawan.

Wala mo na ubani ang among mga sundalo.

10 Gipaatras mo kami gikan sa among mga kaaway.

Ug gipang-ilog nila ang among mga kabtangan.

11 Gitugot mo nga mangamatay kami nga daw

mga karnero nga gipang-ihaw.

Ug ang uban kanamo imong gikatag sa mga kanasoran.

12 Kami nga imong katawhan gibaligya mo ug barato,

ug wala ka man lang gani nakaginansya.

13 Gihimo mo kaming makauulaw

ug kataw-anan sa among mga silingang nasod.

14 Gihimo mo kami nga hisgotanan ug talamayon,

ug nagpanglingo sila kanamo.

15 Kanunay na lang akong bation ug kaulaw.

Ug wala na akoy nawong nga ikaatubang,

16 tungod sa mga pagpakaulaw

ug pagpanginsulto kanako

sa akong mga kaaway nga buot manimalos kanako.

17 Nahitabo kining tanan kanamo

bisan wala kami malimot kanimo,

ni molapas sa imong kasabotan.

18 Wala kami motalikod kanimo,

ug wala kami mosimang sa imong dalan.

19 Apan gidugmok mo kami

ug gipasagdan sa mangitngit kaayong dapit

diin nagpuyo ang ihalas nga mga iro.

20 Kon gikalimtan ka pa namo, O Dios,

ug nag-ampo kami sa ubang dios,

21 dili mo kaha kini mahibaloan,

sanglit nahibaloan mo man ang mga tinago sa

huna-huna sa tawo?

22 Apan tungod sa among pagtuo kanimo,

anaa kami kanunay sa kakuyaw sa kamatayon.

Daw mga karnero kami nga ihawonon.

23 Sige na, Ginoo, lihok na!

Ayaw kami isalikway hangtod sa kahangtoran.

24 Nganong nagtago ka man gikan kanamo,

ug gikalimtan mo ang among pag-antos apil na

ang pagpangdaog-daog kanamo?

25 Nalukapa kami sa yuta

ug dili na makabangon.

26 Sige na, tabangi kami,

luwasa kami tungod sa imong gugma kanamo.