Nalumpag ang Kasundalohan ni Senakerib

710 sa wala pa si Cristo

Biblica® Open Ang Pulong sa Dios™ (OCCB)

2 Mga Hari 19:8–19

8 Unya sa dihang nadunggan sa komander nga mibiya na sa Lakish ang hari sa Asiria ug nakig-gira sa Libna, miapas siya didto.

9 Nakadungog ug balita si Senakerib nga hari sa Asiria nga si Tirhaka nga hari sa Etiopia nagpadulong sa pagpakig-gira kaniya. Busa nagpadala siyag mga mensahero kang Ezequias sa pag-ingon niini:

10 “Ayaw pagpatunto sa dios nga imong ginasaligan kon moingon siya, ‘Ang Jerusalem dili itugyan ngadto sa kamot sa hari sa Asiria.’ 11 Pamati! Ikaw mismo nakadungog kon unsa ang gihimo sa mga hari sa Asiria ngadto sa tanang nasod. Gilaglag nila sila sa hingpit. Ug ikaw, naghuna-huna ka ba nga makalingkawas ka? 12 Gipanglaglag sa akong mga katigulangan ang mga lungsod sa Gozan, Haran, Rezef, ug ang katawhan sa Eden nga anaa sa Telasar. Naluwas ba sila sa ilang mga dios? 13 Adunay nahimo ba ang hari sa Hamat, Arpad, Sefarvaim, Hena, ug Iva?”

14 Pagkahuman ug basa ni Ezequias sa sulat nga gihatag kaniya sa mga mensahero, miadto siya sa Templo sa Ginoo ug gibukhad ang sulat sa presensya sa Ginoo. 15 Unya nag-ampo siya, “Ginoo, Dios sa Israel nga naglingkod sa trono taliwala sa mga kerubin, ikaw lang ang Dios nga nagdumala sa tanang gingharian dinhi sa kalibotan. Gihimo mo ang kalangitan ug ang kalibotan. 16 Ginoo, pamati ug tan-awa ang nahitabo. Pamatia ang tanang giingon ni Senakerib sa pagbiay-biay kanimo, O buhi nga Dios.

17 “Tinuod, Ginoo, nga gipanglaglag sa mga hari sa Asiria ang daghang mga nasod 18 ug gipangsunog ang ilang mga dios, kay dili man usab kini tinuod nga mga dios kondili mga bato lang ug mga kahoy nga hinimo sa tawo. 19 Busa karon, Ginoo nga among Dios, luwasa kami gikan sa kamot sa Asiria aron ang tanang gingharian dinhi sa kalibotan mahibalo nga ikaw lang Ginoo, nga Dios.”

Mga Salmo 73

Ang awit ni Asaf.

1 Maayo gayod ang Dios sa Israel,

labi na gayod sa mga putli ug kasing-kasing.

2 Apan ako,

hapit na mawad-ig pagtuo,

3 kay nasina ako sa garboso ug daotang mga tawo

sa dihang nakita ko nga nagmauswagon sila.

4 Himsog ang ilang panglawas

ug dili sakit ang ilang kamatayon.

5 Wala sila mag-antos ug walay mga katalagman

nga moabot kanila sama sa ubang mga tawo.

6 Busa gipakita nila ang ilang pagkagarboso

ug pagkabangis.

7 Ang ilang mga kasing-kasing puno sa kadaotan,

ug ang kanunay lang nilang gihuna-huna mao

ang paghimo ug daotan.

8 Mobiay-biay sila ug mosultig daotan.

Mapasigarbohon kaayo silang nanghulga

sa pagdaog-daog sa uban.

9 Nagsulti sila ug daotan batok sa Dios sa langit

ug sa mga tawo sa kalibotan.

10 Bisan ang katawhan sa Dios mosunod kanila

ug modawat sa ilang gipanulti.

11 Moingon sila,

“Walay kalibotan ang Labing Halangdong Dios!

Unsaon niya pagkahibalo?”

12 Ingon niana ang mga daotan,

walay kabalaka ug mosamot pa gayod kadato.

13 Busa wala ba diay kapuslanan ang pagkinabuhi ko

nga matarong ug putli?

14 Kanunay mo akong gipaantos, O Dios;

halos kada buntag gisilotan mo ako.

15 Kon gibugal-bugalan ko man ikaw sama

sa gisulti sa mga daotan,

murag giluiban ko na niana ang imong katawhan.

16 Apan sa dihang naninguha ako

sa pagsabot niining mga butanga,

nalisdan ako,

17 hangtod nga miadto ako sa imong balaang puloy-anan,

ug didto nasabtan ko kon unsa

ang mahitabo sa mga daotan.

18 Tinuod gayod nga gibutang mo sila

sa walay kasigurohan nga kahimtang,

ug laglagon mo sila.

19 Kalit lang silang malaglag;

modangat kanilang tanan

ang makalilisang nga kamatayon.

20 Sama sila sa damgo nga mahanaw ra inigmata, O Ginoo.

Dili na sila mahinumdoman pa kon masilotan mo na sila.

21 Sa dihang nasilo ako ug nasakitan sa hilabihan,

22 nahimo akong usa ka hungog;

nahisama ako sa usa ka hayop sa imong atubangan nga dili makasabot.

23 Apan uban gihapon ako kanimo ug giagak mo ako.

24 Gigiyahan mo ako pinaagi sa imong mga tambag,

ug sa kaulahian pasidunggan mo ako.

25 Wala nay lain pa sa langit

nga akong gikinahanglan kondili ikaw lang.

Tungod kay ikaw ania kanako,

wala na akoy lain pang gihandom sa kalibotan.

26 Magmaluya man ang akong lawas ug huna-huna,

apan ikaw gihapon, O Dios, mao ang akong kusog.

Ikaw lang gayod

ang akong gikinahanglan hangtod sa kahangtoran.

27 Sigurado gayod nga mangawala

ang mga tawo nga mobiya kanimo;

laglagon mo kadtong wala magmatinumanon kanimo.

28 Apan alang kanako,

maayo ang magpaduol kanimo, O Dios.

Ikaw Ginoong Dios ang gihimo ko

nga akong tigpanalipod,

ug isaysay ko ang tanan mong binuhatan.

2 Mga Hari 19:20–35

20 Unya nagpadala si Isaias nga anak ni Amos niini nga mensahe ngadto kang Ezequias nga nag-ingon, “Mao kini ang giingon sa Ginoo, nga Dios sa Israel: Nadungog ko ang imong pag-ampo mahitungod kang Senakerib nga hari sa Asiria. 21 Ug mao kini ang isulti ko batok kaniya:

“ ‘Kataw-an ug tamayon ka sa mga lumulupyo sa Zion.

Magpanglingo-lingo sila sa pagbiay-biay kanimo

samtang niikyas ka.

22 Kinsay imong giinsulto ug gipasipalahan?

Kinsay imong gisinggitan ug gitaas-taasan sa imong kilay?

Dili ba ako man, ang Balaan nga Dios sa Israel?

23 Pinaagi sa imong mga mensahero,

gibiay-biay mo ako, ang Ginoo.

Miingon ka pa,

“Pinaagi sa akong daghang mga karwahi

akong nasaka ang tag-as nga mga bukid,

ang kinatumyan sa mga bukid sa Lebanon.

Gipamutol ko ang iyang labing tag-as nga mga kahoyng sedro

ug labing maayo nga mga sipres.

Nakaabot ako sa kinasuokang bahin

sa iyang mabagang kalasangan.

24 Nagpakalot ako ug mga atabay sa ubang mga dapit,

ug miinom ako gikan niini.

Sa akong pag-agi,

mimala ang mga sapa sa Ehipto.”

25 “ ‘Tinuod nga imong gipangguba ang pinarilan

nga mga lungsod.

Apan wala ka ba masayod nga ako

ang nagbuot niining tanan?

Kaniadto ko pa kining giplano

ug karon gipatuman ko na.

26 Ang mga lumulupyo sa mga lungsod nga gipangguba mo nawad-an ug kusog;

nahadlok sila ug naulawan.

Sama sila sa mga tanom sa uma

o sa mga sagbot nga nanurok diha sa mga atop sa balay,

nga sa pagtubo pa lang nangalaya na.

27 “ ‘Apan nahibaloan ko ang tanan bahin kanimo,

kon hain ka magpuyo,

ang imong gigikanan ug ang imong padulngan,

ug kon unsa ka kapungot kanako.

28 Tungod kay napungot ka kanako

ug nadunggan ko ang imong pagpasigarbo,

kaw-itan ko ang imong ilong

ug busalan ko ang imong baba,

ug guyoron balik sa imong gigikanan,

sa dalan nga imong giagian.’ ”

29 Unya miingon si Isaias kang Ezequias, “Mao kini ang timailhan nga panalipdan sa Ginoo ang Jerusalem gikan sa mga taga-Asiria:

“Karong tuiga mokaon kamo sa mga bunga sa mga tanom nga nanubo,

ug sa ikaduhang tuig ang mga bunga sa mga tanom

nga nanubo mao na usab ang inyong kan-on.

Apan sa ikatulong tuig makatanom na kamo ug mga lugas ug makaani.

Makatanom usab kamo ug mga ubas ug makakaon sa bunga niini.

30 Sa makausa pa ang mga nahibiling buhi sa Juda mouswag sama

sa tanom nga nanggamot ug lawom ug namunga.

31 Kay adunay mga nahibiling buhi nga magkatag gikan sa Jerusalem,

ug mga naluwas gikan sa Bukid sa Zion.

Siguradohon gayod sa Ginoo nga Makagagahom nga matuman kini.

32 “Ug mao kini ang giingon sa Ginoo bahin sa hari sa Asiria,

“ ‘Dili siya makasulod sa siyudad sa Jerusalem

o makapana niini.

Dili siya makaduol nga adunay taming

o makakita ug paagi nga malibotan kini.

33 Mobalik siya sa iyang agi.

Dili siya makasulod niini nga siyudad.

Ako, ang Ginoo, ang nag-ingon niini.

34 Panalipdan ug luwason ko kining siyudara alang sa akong kadungganan

ug tungod sa akong saad kang David nga akong alagad.’ ”

35 Nianang pagkagabii, miadto ang anghel sa Ginoo sa kampo sa Asiria ug gipamatay niya ang 185,000 ka mga sundalo. Pagkabuntag, pagmata niadtong mga nahabiling buhi, nakita nila ang mga patayng lawas.

Mga Salmo 75–76

Ang awit nga gisulat ni Asaf alang sa maestro sa mga mag-aawit. Giawit sa tono nga “Ayaw Laglaga.”

1 O Dios, mapasalamaton kami kanimo.

Mapasalamaton kami kay duol ikaw kanamo.

Gimantala sa mga tawo ang imong katingalahang mga buhat.

2 Miingon ang Dios,

“Adunay gitakda ako nga panahon sa paghukom,

ug matarong ang akong paghukom.

3 Kon matay-og ang kalibotan ug mokurog sa kahadlok ang mga lumulupyo niini,

ako ang nagpalig-on sa mga pundasyon niini.

4 Miingon ako sa mga mapasigarbohon nga dili na sila magpasigarbo,

ug sa mga daotan nga dili na nila ipasigarbo ang ilang katakos.

5 Miingon ako kanila nga hunongon na nila ang ilang pagkamapahitas-on.”

6 Kay ang pasidungog wala maggikan bisan asa,

7 kondili sa Dios lamang.

Siya ang naghukom;

ipaubos niya ang uban ug ang uban pasidunggan.

8 Kay nagkupot ang Ginoo ug kopa nga puno

sa bag-ong bino nga labihan kaisog timaan sa iyang kasuko.

Ibubo niya kini, ug imnon sa tanang daotang tawo

sa kalibotan hangtod ang kataposang tulo niini.

9 Apan dili ako moundang sa pagsugilon mahitungod sa Dios ni Jacob,

ug awitan ko siya ug mga pagdayeg.

10 Kuhaan niya ug katakos ang mga daotan,

apan dugangan niya ang katakos sa mga matarong.

Ang awit alang sa maestro sa mga mag-aawit. Gamita ang mga instrumento nga adunay mga kuwerdas. Ang awit ni Asaf.

76:1 Nailhan gayod ang Dios sa Juda;

nabantog siya sa Israel.

2 Nagpuyo siya sa Bukid sa Zion sa Jerusalem.

3 Didto gipangbali niya

ang naghaguros nga mga pana sa mga kaaway,

ang ilang mga taming, mga espada,

ug ang uban pa nilang mga hinagiban.

4 O Dios, gamhanan ug halangdon ka

samtang galugsong ka gikan sa mga bukid

diin gipamatay mo ang imong mga kaaway.

5 Gipang-ilog mo gikan sa maisog nga mga sundalo

ang mga butang nga giilog nila sa uban.

Ug nangamatay silang tanan;

wala nay usa kanila ang makadagmal kanamo.

6 O Dios ni Jacob, sa imong pagbadlong

nangamatay ang ilang mga tigkabayo ug mga kabayo.

7 Gikahadlokan ka, O Dios.

Kinsa bay makaharong kanimo kon ikaw nay masuko?

8 Gikan sa langit gipadayag mo ang imong hukom.

Nahadlok kanimo ang mga tawo

sa kalibotan ug nanghilom sila

9 sa dihang mihukom ka, O Dios,

sa pagluwas sa tanang mga dinaog-daog sa kalibotan.

10 Sigurado gayod nga ang imong kasuko

sa mga tawo makahatag ug dugang pagdayeg kanimo;

gipugngan mo pa ang nabilin mong kasuko.

11 Panaad kamo sa Ginoo nga inyong Dios,

ug tumana ninyo kana.

Tanan kamo nga duol sa talahurong Dios,

pagdala kamo ug mga gasa ngadto kaniya.

12 Ipaubos niya ang mapahitas-on nga mga pangulo;

gikahadlokan siya sa mga hari sa kalibotan.

2 Mga Hari 19:36–37

36 Tungod niini, mipauli si Senakerib sa Nineve ug nagpabilin didto.

37 Usa ka adlaw, samtang nagsimba si Senakerib sa templo sa iyang dios nga si Nisroc, gipatay siya pinaagi sa espada sa iyang duha ka anak nga lalaki nga sila si Adramelec ug Sharezer, ug unya miikyas sila sa Ararat. Ang usa niya ka anak nga si Esarhadon mao ang mipuli kaniya ingon nga hari.