Mga Salmo gikan sa Paghari ni David, Dili Tino ang mga Petsa (continued)

Mga salmo nga gisulat ni David human siya mahimong hari, nga dili tino ang mga petsa ug mga higayon sa pagsulat niini.

1015 sa wala pa si Cristo

Biblica® Open Ang Pulong sa Dios™ (OCCB)

Mga Salmo 24

Awit ni David.

1 Ang tibuok kalibotan ug ang tanang anaa niini iya sa Ginoo.

2 Kay siya ang nagmugna sa kalibotan diha sa lawom nga katubigan.

3 Kinsay makatungas sa bungtod sa Ginoo?

Kinsay makasulod sa iyang balaang dapit?

4 Kadtong maayog binuhatan ug limpyog huna-huna,

wala mosimbag mga dios-dios,

ug dili bakakon.

5 Panalanginan siya ug isipon nga matarong sa Ginoo,

ang Dios nga iyang manluluwas.

6 Mao kana nga matang sa tawo ang makadangop

ug makasimba sa Dios ni Jacob.

7 Ablihi ang karaang mga pultahan sa Templo

aron makasulod ang gamhanang Hari!

8 Kinsa kining gamhanang Hari?

Siya mao ang Ginoo nga kusgan ug lig-on sa pagpakig-gira.

9 Ablihi ang karaang mga pultahan sa Templo

aron makasulod ang gamhanang Hari!

10 Kinsa ba kining gamhanang Hari?

Siya mao ang Ginoo nga makagagahom.

Oo, siya ang gamhanang Hari.

Mga Salmo 28–29

Awit ni David.

1 Ginoo, nga akong salipdanan nga bato,

nagtawag ako kanimo.

Pamatia ang akong pag-ampo!

Kay kon dili ka mamati,

mahisama ako sa mga nangamatay na.

2 Pamatia ang akong pagpakiluoy sa pagpangayo

ug tabang kanimo,

samtang nag-atubang ako

sa imong balaan nga Templo

nga gabayaw sa akong mga kamot.

3 Ayaw ako siloti uban sa mga daotan.

Nagpakaaron-ingnon sila nga mga higala sila,

apan diay nagplano sila ug daotan.

4 Balosi sila sumala sa ilang mga binuhatan.

Siloti sila sa ilang daotang gipanghimo.

5 Kay gipakawalay-bili nila ang imong gipanghimo,

busa laglagon mo sila sa dayon.

6 Dalaygon ka, Ginoo,

kay gidungog mo ang akong pagpakiluoy kanimo.

7 Ikaw ang naghatag kanako ug kusog

ug nagpanalipod kanako.

Nagsalig ako kanimo ug gitabangan mo ako.

Busa nalipay gayod ako ug nag-awit

ug pagpasalamat kanimo.

8 Ikaw, Ginoo, ang naghatag ug kusog

sa imong katawhan.

Gipanalipdan mo ug giluwas ang imong pinili.

9 Luwasa ug panalangini

ang katawhan nga imong gipanag-iyahan.

Bantayi sila

sama sa ginabuhat sa usa ka magbalantay

ngadto sa iyang mga karnero;

atimana sila

sa walay kataposan.

Awit ni David.

29:1 Dayega ninyo ang Ginoo,

kamo nga mga anak sa gamhanang Dios.

Dayega ninyo ang iyang gahom ug kusog.

2 Dayega ninyo ang iyang pagkagamhanan.

Simbaha ninyo siya sa dihang ipadayag niya ang iyang balaang presensya.

3 Nagdahunog ang tingog sa Ginoo, ang gamhanang Dios,

ug madunggan kini diha sa kadagatan.

4 Ang iyang tingog gamhanan ug halangdon.

5 Makabali kini sa mga kahoyng sedro sa Lebanon.

6 Tay-ogon sa Ginoo ang mga bukid sa Lebanon ug ang bukid sa Hermon,

ug mahisama kini sa nati nga baka nga naglukso-lukso.

7 Ang tingog sa Ginoo makapakilat ug

8 makapatay-og sa kamingawan,

bisan pa ang kamingawan sa Kadesh.

9 Ang tingog sa Ginoo makapaanak sa mananap nga usa

ug makapataktak sa mga dahon sa kahoy.

Ug sa iyang Templo nagsinggit ang tanan, “Gamhanan ang Dios!”

10 Ang Ginoo ang nagmando sa mga baha.

Nagmando siya ingon nga hari sa walay kataposan.

11 Gilig-on sa Ginoo ang iyang katawhan

ug gihatagan ug maayong kahimtang.

Mga Salmo 38

Ang awit ni David nga ginaawit panahon sa paghalad sa halad sa paghinumdom sa Ginoo.

1 Ginoo, sa imong kasuko, ayaw akog siloti.

2 Daw sa gipana mo ako ug gidagmalan.

3 Nagsakit ako tungod kay nasuko ka sa nahimo kong mga kasal-anan.

4 Daw sa malumos na ako sa akong mga sala;

sama kini sa mabug-at nga palas-anon nga dili ko madaog.

5 Tungod sa akong kabuang,

ang akong mga samad nahimong kabahong.

6 Nabako na ako pag-ayo sa labihan nga kasakit,

ug nagsubo ako tibuok adlaw.

7 Sakit kaayo ang tibuok nakong lawas

ug gangutngot ang akong mga kilid.

8 Naluya na gayod ako pag-ayo.

Nag-agulo ako sa kasakit nga akong gibati.

9 Ginoo, nahibalo ka sa tanan kong gipangandoy

ug nadungog mo ang akong pag-agulo.

10 Nagkuba-kuba ang akong dughan;

nawad-an na ako ug kusog,

ug nahalap na ang akong panan-aw.

11 Ginalikayan ako sa akong mga higala ug mga kauban tungod sa akong sakit.

Bisan ang akong mga paryente nagpahilayo na kanako.

12 Ang mga tawo nga buot mopatay kanako nagbutang ug lit-ag.

Sila nga buot mosakit kanako naghisgot kon unsaon nila ako paglaglag.

Sa tibuok adlaw nagplano sila ug daotan batok kanako.

13 Nagpabungol-bungol ako nga kunohay dili makadungog.

Nagpaamang-amang ako nga kunohay dili makasulti.

14 Nahisama ako sa usa ka tawo nga dili makadungog,

ug dili makapangatarongan.

15 Kay nagsalig ako kanimo, Ginoo.

Ikaw, Ginoo nga akong Dios,

ang magtubag sa akong pag-ampo.

16 Busa nag-ampo ako nga dili mo itugot

nga ang akong mga kaaway maglipay

o magpasigarbo tungod sa akong pagkapukan.

17 Kay hapit na ako mapukan,

ug daw sa walay kataposan ang akong pag-antos.

18 Isulti ko ang akong mga sala; gahasol kini kanako.

19 Mahitungod sa akong mga kaaway, lig-on sila ug daghan.

Gikasilagan nila ako sa walay igong hinungdan.

20 Gibalosan nila ako ug daotan sa maayong gipanghimo ko kanila.

Ug nakigbatok sila kanako kay nagtinguha ako sa pagbuhat ug maayo.

21 Ginoo nga akong Dios, ayaw ako pasagdi;

ayaw pagpahilayo kanako.

22 Tabangi ako dayon, Ginoo nga akong manluluwas.