Ang mga Panultihon ni Solomon (continued)

984 sa wala pa si Cristo

Biblica® Open Ang Pulong sa Dios™ (OCCB)

Mga Panultihon 21:1–22:16

1 Maingon nga gibut-an sa Ginoo ang pagdagayday

sa suba,

mahimo usab niyang but-an

ang huna-huna sa hari sumala sa iyang gusto.

2 Alang kanato husto na gayod ang tanan natong ginahimo,

apan ang Ginoo ray nasayod

sa tinuod natong motibo.

3 Mas ikalipay sa Ginoo ang husto

ug matarong nga binuhatan sa tawo

kaysa iyang mga halad.

4 Sala ang pagkamapasigarbohon

ug ang pagkamapahitas-on.

Mailhan mo nga daotan kana nga tawo

pinaagi niana nga kinaiya.

5 Kon magplano kag maayo ug magmakugihon,

sigurado nga mouswag ka.

Apan kon magdali-dali ka,

sigurado nga mapobre ka.

6 Ang bahandi nga nakuha sa pagpanglimbong

dali rang mawala,

ug maghatod kini sa tawo ngadto sa kamatayon.

7 Ang kabangis sa mga daotan mao ang makapalaglag kanila,

kay nagdumili sila sa pagbuhat sa matarong.

8 Daotan ang kinaiya sa tawong makasasala,

apan maayo ang kinaiya sa tawo nga matarong.

9 Mas maayo pang magpuyo sa atop sa balay

kaysa magpuyo sulod sa balay uban

sa asawa nga palaaway.

10 Ang mga daotan gusto lang

gayod nga kanunayng maghimog daotan;

wala silay kaluoy sa ilang isigka-tawo.

11 Kon silotan ang mga mabiay-biayon,

ang mga walay alamag magkat-on nga magmaalamon.

Ang maalamon mas magmaalamon pa gayod kon tudloan.

12 Nasayod ang matarong nga Dios sa binuhatan sulod sa

panimalay sa mga daotan,

ug sila pagasilotan.

13 Kon dili mo panumbalingon ang mga kabos

kon mangayo sila ug tabang,

dili ka usab panumbalingon kon mangayo ka ug tabang.

14 Kon regalohan mo sa tago ang tawo nga nasuko kanimo,

mawala ang iyang kasuko.

15 Kon mapatunhay ang hustisya,

malipay ang mga matarong,

apan mahadlok ang mga daotan.

16 Kamatayon ang dangatan

sa tawong dili gustog kaalam.

17 Ang tawo nga magpatuyang sa paglingaw-lingaw

ug pagkombira,

dili gayod madato, mapobre pa hinuon.

18 Ginasilotan ang mga daotan ug maluibon

aron maluwas ang mga matarong.

19 Mas maayo pang magpuyo sa disyerto

kaysa magpuyo uban sa asawa nga sapoton ug palaaway.

20 Ang maalamon nga tawo nagtagana gayod alang sa umaabot,

apan ang buang-buang nagpatuyang lang ug gasto.

21 Ang tawo nga nagtinguha gayod nga magkinabuhi

nga matarong ug matinud-anon,

makaangkon ug taas nga kinabuhi ug kalamposan,

ug ang mga tawo modayeg kaniya.

22 Ang komander nga maayog mga taktika molampos

sa pag-ilog ug siyudad nga daghag kasundalohan,

ug ang gisaligan niining lig-ong mga paril iyang malumpag.

23 Ang tawong nagbantay sa iyang ipanulti

malikay sa kasamok.

24 Ang tawong garboso

ug mapahitas-on mailhan pinaagi sa iyang kamabiay-biayon

ug kalabihan manghambog.

25 Bisan daghan kag gihandom apan tapolan ka,

maghatod kini kanimo sa kalaglagan.

26 Ang tawong tapolan kanunayng maghandom

nga adunay mohatag,

apan ang tawong matarong dili managana mohatag.

27 Ngil-aran ang Ginoo

sa halad sa mga daotan,

labi na gayod kon daotan kinig motibo.

28 Ang bakakon nga saksi dili na pasultihon,

apan ang saksi nga nagsugilon sa tinuod

padayon nga pasultihon.

29 Ang daotan dili mabalaka sa iyang mga ginahimo,

apan ang matarong mamalansi pag-ayo sa iyang ginahimo.

30 Walay kaalam, panabot, o tambag

nga makatupong sa Ginoo.

31 Bisan hanas na ang mga kabayo sa gira,

ang Ginoo ray makapadaog.

22:1 Mas maayo nga nindot kag reputasyon kaysa daghan kag bahandi.

Ang pagtahod sa mga tawo kanimo mas bililhon pa kaysa bulawan ug pilak.

2 Ang adunahan ug ang kabos

parehas nga binuhat sa Ginoo.

3 Ang maalamon nga tawo molikay sa kakuyaw,

apan ang walay alamag magpaduol hinuon niini,

mao nga mag-antos siya.

4 Ang pagtahod sa Ginoo ug ang pagpaubos makahatag kanimo

ug bahandi, dungog, ug taas nga kinabuhi.

5 Ang tawong daotan nagsubay sa dalan nga tunokon ug makuyaw.

Ang tawong nag-amping sa iyang kinabuhi molikay niini.

6 Tudloi ang bata sa hustong gawi,

ug mahinumdoman niya kini hangtod siya matigulang.

7 Ang kabos gamhan sa adunahan,

ug ang utangan ulipon sa iyang giutangan.

8 Ang magpugas ug daotan moani ug kalaglagan,

ug maundang na ang iyang pagpasakit sa uban.

9 Panalanginan ang mga manggihatagon

ug pagkaon ngadto sa mga kabos.

10 Aboga ang tawong tampalasan, ug mahunong ang panaglalis,

panag-away, ug ang ininsultohanay.

11 Ang tawo nga matinud-anon ug matinahoron manulti

mahimong higala sa hari.

12 Gibantayan ug maayo sa Ginoo ang mga maalamon,

apan daoton niya ang mga plano sa mga maluibon.

13 Ang tapolan nga tawo dili mogawas sa balay kay basin kuno

ug adunay liyon sa gawas ug tukbon siya.

14 Ang mga pulong sa babayeng daotan nahisama sa lawom nga bangag,

ug diha ipangtambog ang mga tawong gikapungtan sa Ginoo.

15 Kinaiya sa mga bata ang pagbinuang,

apan matul-id kini kon disiplinahon sila.

16 Ang tawo nga mangdaog-daog sa mga kabos

o manghatag ug regalo sa mga adunahan

sa tuyo nga gustong maadunahan, mahimo na hinuong kabos.