Ang mga Panultihon ni Solomon (continued)
984 sa wala pa si Cristo
Biblica® Open Ang Pulong sa Dios™ (OCCB)
1 Mas maayo pa nga gamay ra ang pagkaon
nga malinawon ang panimalay kaysa magkombira
nga adunay panag-away.
2 Ang maalamon nga sulugoon magagahom sa makauulaw
nga anak sa iyang agalon,
ug bahinan siya sa panulondon
sa mga anak sa iyang agalon.
3 Sama sa bulawan ug plata nga sulayan pinaagi sa kalayo,
ang atong kasing-kasing ginasulayan usab sa Ginoo.
4 Ang tawong daotan ganahang mamati sa sama niyang daotan,
ug ang bakakon gustong mamati sa sama niyang bakakon.
5 Ang nagtamay sa mga kabos nag-insulto
sa iyang Magbubuhat.
Silotan ang tawo nga malipay
kon adunay daotang mahitabo sa uban.
6 Garbo sa mga tigulang ang ilang mga apo,
maingon nga garbo usab sa mga anak ang ilang mga ginikanan.
7 Dili angayan nga mosultig maayo ang buang-buang,
ug labi nang dili angay nga mamakak ang usa ka pangulo.
8 Nagtuo ang uban nga ang suborno sama sa madyik
nga magpasayon sa tanan.
9 Kon pasayloon mo ang imong higala nga nakasala kanimo,
magpabilin ang inyong panaghigalaay,
apan kon balik-balikon mo paghisgot ang iyang sala,
maguba ang inyong panaghigalaay.
10 Ang maalamon nga tawo makakat-on na
sa usa lang ka pagbadlong,
apan ang buang-buang dili gayod makakat-on
bisan sigehan paglatos.
11 Ang tawong daotan kanunayng mangitag samok,
busa padad-an siyag bangis nga tawo nga mosilot kaniya.
12 Mas makuyaw pa nga ikatagbo ang tawong buang-buang
nga naghimog binuang
kaysa mananap nga oso nga nawad-ag mga anak.
13 Kon daotan ka ngadto sa mga tawo nga maayo kanimo,
kanunay lang adunay daotang mahitabo sa imong panimalay.
14 Ang nagsugod pa lang nga away nahisama sa buslot sa tangke sa tubig.
Santaa kini sa dili pa modako.
15 Ngil-aran ang Ginoo sa tawong mohukom nga silotan ang dili sad-an
o mohukom nga hatagag kagawasan ang sad-an.
16 Walay kapuslanan ang paggasto sa pagpaeskwela sa usa ka tawong buang-buang
kay wala siyay gana nga magtuon.
17 Ang higala naghigugma kanimo sa tanang panahon,
ug ang kadugo motabang kanimo
sa panahon sa kalisdanan.
18 Walay panabot ang tawo nga mosaad nga mobayad
sa utang sa uban.
19 Ang tawong ganahan magpakasala ganahag gubot,
ug ang tawong hambog nangitag kalaglagan.
20 Dili gayod mouswag ang tawong baliko ug utok,
ug ang tawong bakakon kalaglagan ray maangkon.
21 Kasubo ug kasakit ang bation sa ginikanan
sa buang-buang nga anak.
22 Kon malipayon ka,
makahatag kinig kaayohan sa imong panglawas,
apan kon masulob-on ka, maglain imong pamati.
23 Ang tawong daotan modawat ug suborno
aron tuison ang hustisya.
24 Ang tawo nga adunay panabot naningkamot kanunay
nga madugangan ang kaalam,
apan ang tawong buang-buang wala kahibalo
kon unsay iyang buhaton.
25 Kasubo ug kasakit ang ihatag sa buang-buang nga anak
ngadto sa iyang mga ginikanan.
26 Dili maayo nga pakasad-on ang tawong walay sala,
o ang tawong dungganon nga ensakto ug binuhatan.
27 Ang tawong maalamon ug adunay panabot
magbantay sa iyang isulti ug kalmado.
28 Bisan ang buang-buang maalaan
nga maalamon ug adunay panabot
kon maghilom-hilom lang.
18:1 Ang tawo nga gustong maglain-lain
kaugalingon ray gihuna-huna,
ug supakon niya ang ensakto nga huna-huna sa uban.
2 Ang tawong buang-buang wala gayoy tinguha nga makakat-on;
ang gusto lang niya nga masulti ang iyang gusto.
3 Ang paghimog daotan ug makauulaw nga butang
maghatag ug kaulawan.
4 Ang pulong sa tawong maalamon makahatag ug kaalam ngadto sa uban;
sama kini sa nagdagayday nga tubig gikan sa lawom nga tuboran.
5 Dili maayo ang pagdapig sa tawong sad-an ug ang dili paghatag
ug hustisya ngadto sa tawong inosente sa sala.
6 Ang mga pulong sa tawong buang-buang makapasugod ug away
ug mahimong hinungdan nga madapatan siya.
7 Ang mga pulong sa tawong buang-buang
magpasakit ra usab kaniya.
8 Ang tabi-tabi daw sama sa pagkaon
nga lami usapon ug tunlon.
9 Ang tawong tapolan sama kamaot
sa tawong tigpangdaot.
10 Ang Ginoo sama sa lig-ong tore;
nagdangop kaniya ang mga matarong aron walay daotang mahitabo kanila.
11 Naghuna-huna ang mga adunahan
nga ang ilang bahandi makapanalipod kanila
sama sa lig-on ug habog nga mga paril
nga naglibot sa siyudad.
12 Ang pagpanghambog makapalaglag sa tawo,
apan ang pagpaubos makahatag ug kadungganan.
13 Balingag ug pakaulaw lang
ang tawong wala mamati unya magtubag-tubag.
14 Ang determinasyon sa tawo nga mabuhi makapalig-on kaniya kon magsakit siya,
apan kon mawala kini wala nay makatabang pa kaniya.
15 Ang tawong maalamon ug adunay panabot
naninguha pa nga madugangan ang iyang kaalam.
16 Sayon ra duolon ang tawong dungganon
kon aduna kay dala nga regalo alang kaniya.
17 Ang unang mopamatuod sa korte murag mao nay husto,
hangtod dili pa niya ikaatubang ang iyang kontra.
18 Ang hulbot-hulbot makapaundang sa panaglalis,
ug makahusay sa panagbangi sa duha ka gamhanang tawo.
19 Lisod magpasig-uli sa usa ka igsoon nga nahiubos kanimo.
Mas lisod pa kining buhaton kaysa pagsulong
sa usa ka pinarilan nga lungsod.
Maingon nga malisod gub-on ang mga trangka
sa pultahan sa palasyo,
malisod usab husayon ang panag-away sa duha ka tawo.
20 Anihon mo ang bunga
sa imong gipanulti.
21 Ang imong ipanulti makaluwas sa kinabuhi o makamatay.
Busa kon istoryador ka, pagmatngon kay anihon mo
ang bunga sa imong gipamulong.
22 Kon nakapangasawa ka, nakaangkon kag kaayohan,
ug nagpadayag kana nga maayo ang Ginoo kanimo.
23 Ang mga kabos mohangyo,
apan ang mga adunahan sakit ug tinubagan.
24 Adunay panaghigalaay nga dili molungtad,
apan aduna usab panaghigalaay nga mas suod pa
kaysa managsoon.