Nagsulat si Pedro ngadto sa mga Cristohanong Judio ug dili Judio

Gisulat ni Pedro ang iyang unang sulat ngadto sa mga Judio nga, panahon sa paglutos, midangop sa mga paganong nasod nga ginganlan sa sinugdanan niini, ug ngadto usab sa mga dili Judio nga nakabig. Nagsulat siya aron dasigon sila nga malipayong mag-antos tungod sa ilang relihiyon, ug aron ipasiugda kanila ang panginahanglan sa pagkinabuhi nga balaan ug walay ikasaway, aron mapakaulawan nila ang mga pagbutangbutang sa ilang mga kaaway.

65 o 66 human matawo si Cristo

Biblica® Open Ang Pulong sa Dios™ (OCCB)

Nangumusta si Pedro sa mga Cristohanong Judio ug dili Judio

Ang pagtimbaya ug panalangin ni Pedro ngadto sa mga Judio ug sa mga dili Judio nga gipili sumala sa nag-una nga kahibalo sa Dios, nga gipadayag pinaagi sa mga propeta, aron mahimong masinugtanon sa ebanghelyo pinaagi sa buhat sa Espiritu Santo. Pinaagi niini nakaambit sila sa tanang panalangin nga gikan sa dugo ni Cristo nga nagbayad sa sala.

1 Pedro 1:1–2

1 Ako si Pedro nga apostol ni Jesu-Cristo.

Nagpangumusta ako kaninyong tanang mga pinili sa Dios nga nagkatag ug nagpuyo sa Ponto, Galacia, Capadocia, Asia, ug Bitinia. 2 Gipili kamo sa Dios nga amahan gikan pa kaniadto sa katuyoan nga himuon niya kamo nga iyang mga anak pinaagi sa Espiritu, aron magmasinugtanon kamo kang Jesu-Cristo ug mahinloan sa inyong mga sala pinaagi sa iyang dugo.

Hinaut nga madawat ninyo ang dugang pa nga grasya ug kalinaw.

Gidayeg ni Pedro ang Dios tungod sa Ilang Bag-ong Pagkatawo

Gidayeg ni Pedro ang Dios tungod sa espirituhanong pagkatawo sa mga Judio ug sa mga dili Judio ngadto sa paglaom sa kinabuhi human sa kamatayon pinaagi sa pagkabanhaw ni Jesu-Cristo, aron sila makaambit sa usa ka panulondon nga dili malaglag. Diha sa paglaom niini nga kaluwasan kinahanglan nga dako ang ilang kalipay, bisan pa nga nagsubo sila tungod sa nagkalainlaing mga kasakitan. Kini gikinahanglan aron sulayan ang ilang pagtuo, kansang pagsulay mas bililhon pa kay sa pagsulay sa bulawan, tungod kay kini makadaog alang kanila og walay kataposang himaya ug pagdayeg sa pag-abot ni Jesu-Cristo. Diha kaniya, bisan wala nila siya makita, nagmaya sila pag-ayo ingon nga ilang Manluluwas, nga nahibalo nga madawat nila gikan kaniya ang ganti sa ilang pagtuo, ang kaluwasan sa ilang mga kalag. Gitagna sa mga propeta kini nga kaluwasan, nga nagsusi pag-ayo aron mahibal-an ang panahon ug ang katawhan nga gipunting sa Espiritu sa Dios, sa dihang kini nagpamatuod daan bahin sa mga pag-antos ni Cristo ug sa mga himaya ug mga panalangin nga mosunod niini. Ngadto sa mga propeta gipadayag usab sa Espiritu Santo nga dili ang ilang kaugalingon ang ilang gialagaran kondili ang usa ka katawhan sa ulahing panahon, diha sa mga butang nga karon gipahibalo sa kalibotan sa mga apostoles, nga gihatagan og gahom alang niana nga katuyoan sa mao gihapong Espiritu Santo. Kini nga mga misteryo, ang mga anghel, ingon man ang mga tawo, “nagahandom sa pagsud-ong” (Exodo 25:20).

1 Pedro 1:3–12

3-4 Dayegon ta ang Dios ug Amahan sa atong Ginoong Jesu-Cristo! Tungod sa iyang dako nga kaluoy kanato, natawo kita pag-usab pinaagi sa pagkabanhaw ni Jesu-Cristo. Mao kini ang naghatag kanato ug dakong paglaom nga adunay gitagana ang Dios kanato nga panulondon. Kini nga panulondon atua sa langit, kanunay nga hinlo ug matahom, ug dili gayod mawala. 5 Ug pinaagi sa inyong pagtuo, panalipdan kamo sa gahom sa Dios samtang naghulat kamo sa kaluwasan nga giandam nang daan nga ipadayag sa kataposang adlaw.

6 Tungod niini maglipay kamo bisan adunay miabot karon nga nagkalain-lain nga mga pagsulay. Kay kini nga mga pagsulay lumalabay lang, ug kinahanglan nga masinati ninyo 7 aron masulayan ang inyong pagtuo, sama sa bulawan nga gisulayan sa kalayo aron masayran kon tinuod o dili. Apan mas mahinungdanon ang atong pagtuo kaysa bulawan nga mawala lang. Busa kon mapamatud-an nga ang inyong pagtuo tinuod gayod, dayegon niya kamo ug pasidunggan sa adlaw nga si Jesu-Cristo moabot. 8 Bisan wala kamo makakita kaniya gihigugma ninyo siya, ug nagtuo kamo kaniya bisan wala pa ninyo siya makita hangtod karon. Mao kana nga dili matukib ang inyong kalipay, 9 tungod kay madawat ninyo ang bunga sa inyong pagtuo nga mao ang inyong kaluwasan.

10 Kini nga kaluwasan gisusi pag-ayo sa mga propeta kaniadto. Sila mao ang nagtagna bahin niini nga grasya sa Dios kanato. 11 Gipahibalo na silang daan sa Espiritu ni Cristo nga anaa diha kanila nga mag-antos ang Mesiyas ug pagkahuman niana pasidunggan siya. Busa ang mga propeta kaniadto nagpadayon sa ilang pagsusi kon kanus-a ug sa unsa nga pamaagi kini mahitabo. 12 Gipahibalo usab sila sa Dios nga ang ilang gipanulti dili alang sa ilang kaayohan kondili alang kanato. Ug karon ang ilang mga panagna nadungog na ninyo gikan sa mga nagsangyaw sa Maayong Balita. Nagsulti sila kaninyo pinaagi sa gahom sa Espiritu Santo nga gipadala kanila gikan sa langit. Ug bisan ang mga anghel gusto nga makasabot niining Maayong Balita nga gisulti kaninyo.

Pagkinabuhi sa Balaang Kahadlok, Tinubos pinaagi sa Dugo ni Cristo

Gikan sa mga panalangin nga nadaog pinaagi sa mga pag-antos ni Cristo, gitawag sila ni Pedro sa pagbaton og kaisog sa tanan nilang mga pagsulay, nga ginapaluyohan hangtod sa kataposan sa ilang kinabuhi sa paglaom sa kinabuhing dayon nga gisaad kanila sa adlaw nga ipadayag si Cristo. Kinahanglan nilang likayan ang mga kailibgon nga ilang gibuhat sa wala pa sila makabig, ug sundogon ang pagkabalaan sa Dios, nga nagtawag kanila aron mahimong iyang mga anak, ingon sa gisulat ni Moises (Levitico 19:2; 1 Pedro 5:10; 2:21; 3:9). Sanglit ang matag tawo pagahukman sumala sa iyang kaugalingong mga buhat, nga walay pinalabi, giawhag sila nga gamiton ang panahon sa ilang pagpuyo dinhi sa yuta diha sa matinahoron nga kahadlok. Labi pa gayod, tungod kay giluwas sila gikan sa mga napanunod nga patuotuo, mga tradisyon o dunot nga mga ritwal sa pagsimba nga nadawat gikan sa ilang mga katigulangan, pinaagi sa dugo ni Cristo, ingon sa halad tungod sa sala nga walay ikasaway. Si Cristo gitudlo diha sa katuyoan sa Dios sa wala pa ang pagpatukod sa kalibotan ug gilandongan sa sakripisyo sa Balaod, apan gipaila sa kataposang dispensasyon, ang dispensasyon sa ebanghelyo, ngadto usab sa mga dili Judio. Pinaagi sa pagtuo sa kaluoy sa Dios nga gipakita niini nga sakripisyo ni Cristo, nagtuo sila sa Dios, nga nagbanhaw kaniya gikan sa mga patay ug nagbayaw kaniya ngadto sa langitnong himaya, aron nga, uban sa ilang pagtuo nga napalig-on diha sa katumanan sa mga saad sa Dios, ang ilang paglaom sa walay kataposang himaya pinaagi kang Cristo anaa sa Dios.

1 Pedro 1:13–21

13 Busa pangandam kamo kanunay sa pagsunod sa kabubut-on sa Dios. Pagmalig-on kamo, ug salig sa hingpit nga madawat ninyo ang panalangin nga ihatag kaninyo inig-abot na ni Jesu-Cristo. 14 Isip mga matinumanong mga anak sa Dios, ayaw kamo pagpadala sa daotan nga mga tinguha nga naggahom kaninyo sa wala pa kamo nakaila sa Dios. 15 Balaan ang Dios nga nagtawag kaninyo, busa angay usab nga magpakabalaan kamo sa tanan ninyong buhaton. 16 Kay nag-ingon ang Kasulatan, “Magpakabalaan kamo, tungod kay ako balaan.”

17 Ang Dios walay pinalabi. Naghukom siya sa tanan nga tawo sumala sa ilang binuhatan. Busa kon gitawag ninyo siya nga Amahan diha sa inyong mga pag-ampo, tahora ninyo siya samtang ania pa kamo sa kalibotan. 18 Nasayran usab ninyo kon unsa ang gibayad aron maluwas kamo gikan sa pagkinabuhing walay pulos nga inyong napanunod sa inyong mga katigulangan. Ang gitubos kaninyo dili mga butang nga mawala, sama sa bulawan o plata, 19 kondili ang bililhong dugo ni Cristo. Sama si Cristo sa karnero nga hinlo ug walay deperensya nga gihalad ngadto sa Dios. 20 Sa wala pa mamugna ang kalibotan, gipili na sa Dios si Cristo nga mahimong atong Manluluwas. Karon lang niining ulahing mga adlaw siya gipaila sa Dios. Gibuhat niya kini alang kaninyo. 21 Ug pinaagi kang Cristo nagtuo kamo sa Dios. Ug inyong gibutang ang inyong pagtuo ug paglaom sa Dios tungod gibanhaw niya si Cristo ug gipasidunggan siya pag-ayo.

Kay Natawo Pag-usab, Paghigugmaay Kamo

Giawhag ni Pedro kadtong kansang mga kasingkasing naputli gikan sa unodnong mga kailibgon pinaagi sa pagtuo kang Cristo Jesu nga maghigugmaay, dili pinaagi sa bakak nga mga pamaagi ug mga pulong kondili uban sa putling kasingkasing nga gawasnon sa unodnong mga pangibog, ingong mga igsoon nga natawo pag-usab. Natawo sila pag-usab dili pinaagi sa kaliwat gikan sa tawhanong mga ginikanan kondili gikan sa diosnon ug langitnong tinubdan, ang pagtulon-an sa buhing Dios, nga nagapabilin hangtod sa kahangtoran.

1 Pedro 1:22–25

22 Ug tungod kay nagsunod na kamo sa kamatuoran, gihinloan kamo gikan sa inyong mga sala aron nga magmatinud-anon kamo sa paghigugma sa inyong mga igsoon kang Cristo. Hinaut unta nga maghigugmaay kamo sa kinasing-kasing gayod, 23 kay natawo na kamo pag-usab. Ug kini nga pagkatawo dili pinaagi sa inyong ginikanan nga adunay kamatayon, kondili pinaagi sa pulong sa Dios nga buhi ug walay kataposan. 24 Nag-ingon ang Kasulatan:

“Ang kinabuhi sa tanang mga tawo sama sa sagbot,

ug ang ilang kabantog sama sa bulak niini.

Ang sagbot malaya ug ang iyang bulak mahulog,

25 apan ang pulong sa Ginoo magpadayon sa gihapon.”

Ug mao kini ang Maayong Balita nga giwali kaninyo.

Buhing mga Bato sa Espirituhanong Templo sa Dios

Giawhag sila ni Pedro sa paglabay sa tanang daotang mga kinaiya sa ilang kanhing kinaiyahan ug, ingon nga mga masuso nga natawo pag-usab pinaagi sa balaang grasya, sa paghandom sa lunsay nga gatas sa ebanghelyo, aron ang ilang bag-ong kinaiyahan mapakaon hangtod sa pagkahamtong, tungod kay natilawan na nila ang kaayo ug kahalangdon sa Ginoo diha sa ilang ikaduha, espirituhanong pagkatawo (Salmo 34:8). Sa pag-anha kaniya pinaagi sa pagtuo ingon sa usa ka buhing patukoranang bato, sila gitukod diha kaniya ug nakaambit sa iyang kinabuhi, aron mahimong usa ka espirituhanong templo ug usa ka pundok sa mga pari (Exodo 19:6; Pinadayag 1:6), nga gitudlo sa paghalad og mga sakripisyo sa pag-ampo ug pagdayeg pinaagi kang Cristo. Mao nga gipahayag ni Isaias (Isaias 28:16) nga sa Zion ibutang “ang usa ka pinili ug bililhong bato sa pamag-ang,” ingon nga patukoranan sa bag-ong templo sa Dios, nga nagdugtong sa duha ka kilid sa tinukod, ang mga Judio ug ang mga dili Judio, sa usa ka iglesia (Mga Taga-Efeso 2:21). Kadtong mga nagtuo nahisakop niini nga tinukod. Apan bahin sa mga masupilon nasulat (Salmo 118:22) nga kining gisalikway nga patukoranang bato “nahimong bato sa pamag-ang” sa bag-ong templo sa Dios, ug “usa ka bato nga kapandolan” niadtong wala motuo kang Cristo, nga diin sila mangapukan ug mabuak, ingon sa gitagna ni Isaias (Isaias 8:14–15). Gihulagway ni Pedro ang tag-as nga mga pribilehiyo sa mga Cristohanon pinaagi sa mga titulo nga kaniadto gihatag ngadto sa Judio nga iglesia, ngadto sa tanan nga gidawat ngadto sa pakigsaad uban sa Dios.

1 Pedro 2:1–10

1 Tungod kay natawo na kamo pag-usab, biyai na ninyo ang tanang matang sa pagkadaotan. Ayaw kamo pamakak o pagpakaaron-ingnon. Ayaw kamo kasina o pagsulti ug daotan batok sa inyong isigka-tawo. 2 Sama sa batang masuso nga nangandoy sa gatas sa iyang inahan, pangandoya usab ninyo ang lunsayng gatas nga espirituhanon aron motubo kamo hangtod madawat ninyo ang hingpit nga kaluwasan, 3 karon nga nasinati na ninyo nga ang Ginoo maayo gayod.

4 Siya ang buhing bato nga gisalikway sa mga tawo, apan gipili sa Dios ug bililhon alang kaniya. Ug samtang nagduol kamo kaniya, 5 kamo ingon nga mga buhing bato gipatindog usab sa Dios isip usa ka espirituhanong balay. Ug isip mga pari nga pinili sa Dios, gahalad kamo kaniya sa espirituhanong mga halad nga makapahimuot kaniya tungod kay gihalad kini pinaagi kang Jesu-Cristo. 6 Kay nag-ingon ang Dios sa Kasulatan:

“Aduna akoy gipili nga maghari sa Zion.

Sama siya sa bililhon nga bato nga akong gihimong patukoranan.

Ang nagtuo kaniya dili gayod maulawan.”

7 Busa kamo nga nagtuo pasidunggan sa Dios. Apan sa mga wala motuo matuman ang Kasulatan nga nag-ingon,

“Ang bato nga gisalikway sa mga panday

mao ang nahimong pundasyon nga bato.”

8 Ug

“Mao kini ang bato nga makapapandol sa mga tawo,

ug makapadagma kanila.”

Napandol sila kay wala sila motuman sa pulong sa Dios. Mao kini ang kabubut-on sa Dios alang kanila.

9 Apan kamo mga pinili, mga pari sa Hari, ug mga katawhan sa Dios. Nahimo kamong iya aron magmantala sa iyang kahibulongan nga mga binuhatan. Siya ang nagtawag kaninyo gikan sa kangitngit ngadto sa iyang kahibulongan nga kahayag. 10 Kaniadto dili kamo mga katawhan sa Dios, apan karon iya na kamo. Kaniadto wala kamo kaloy-i sa Dios, apan karon gikaloy-an na niya kamo.

Ingong mga Dumuluong, Pagpasakop sa Matag Tawhanong Pangagamhanan

Sa paghisgot sa mga Israelinhon sa karaang panahon (mga Hebreo 11:13), giawhag sila ni Pedro, ingong mga dumuluong ug mga lumalangyaw (nga mao gayod sila sa Asia, Ponto ug ubang kayutaan) nga walay panulondon sa yuta, nga mangita og langitnong nasod ug maglikay sa unodnong mga kailibgon, nga nag-ulipon o nagalaglag sa kalag. Kinahanglan silang magkinabuhi sa paagi nga ang mga pagbutangbutang sa ilang mga kaaway mapamatud-ang bakak pinaagi sa ilang maayong mga buhat. Kinahanglan silang magpasakop sa matag matang sa tawhanong pangagamhanan tungod sa Ginoo, aron mapahilom ang pagkawalay alamag sa mga buangbuang nga nag-ingon nga ang ilang relihiyon maoy hinungdan nga dili sila gustong magpasakop sa mga hari ug mga maghuhukom. Ingong piniling katawhan sa Dios, nanghambog ang mga Judio nga gawasnon silang mga tawo, nga gimandoan sa ilang kaugalingong mga balaod. Uban niini sa iyang hunahuna, giawhag sila ni Pedro nga magpamando sa sulod sa ilang kaugalingon sa mga balaod sa ilang relihiyon, apan dili gamiton ang ilang kagawasan ingong tabon sa pagrebelde, sama sa gibuhat sa mga Judio, kondili magkinabuhi ingong mga alagad sa Dios.

1 Pedro 2:11–17

11 Mga hinigugma, ang kalibotan dili ninyo tinuod nga puloy-anan. Mga dumuduong lang kamo dinhi. Busa nagpakiluoy ako kaninyo nga biyaan ninyo ang daotan nga mga tinguha sa inyong lawas nga nagsupak sa inyong espiritu. 12 Ipakita ninyo kanunay sa mga tawo nga wala motuo sa Dios ang inyong maayo nga paggawi. Kay kon nag-ingon sila nga naghimo kamo ug daotan, apan makita nila sa kaulahian nga maayo diay ang inyong gihimo, dayegon nila ang Dios sa adlaw sa iyang pag-anhi.

13 Tungod sa Ginoo, pagpasakop kamo sa tanang mga tawo nga nangulo sa lungsod, mahimong sa hari nga mao ang adunay labaw nga gahom, 14 o sa mga gobernador nga mao ang iyang gihatagan sa gahom nga mosilot sa mga naghimo ug daotan ug mopasidungog sa mga naghimo ug maayo. 15 Kay mao kini ang kabubut-on sa Dios, aron kon maghimo kamo ug maayo walay ikasulti ang mga tawong buang-buang nga wala pa makasabot sa kamatuoran. 16 Aduna na kamoy kagawasan, apan wala kini magkahulogan nga aduna na kamoy kagawasan sa paghimo ug daotan; kondili magkinabuhi kamo isip mga ulipon sa Dios. 17 Tahora ninyo ang tanang mga tawo, ug higugmaa ninyo ang inyong mga igsoon kang Cristo. Pagkinabuhi kamo nga adunay kahadlok sa Dios, ug tahora ninyo ang hari.

Ang mga Sulugoon Kinahanglang Mag-antos Sama sa Pag-antos ni Cristo

Giawhag ni Pedro ang mga ulipon sa panimalay ug mga sulugoon nga motuman sa ilang mga agalon uban sa pagpasakop ug pagtahod, bisan sa mga bangis ug dili makiangayon, ug dili ipasukad ang ilang pagkamasinugtanon sa kinaiya niadtong ilang gialagaran. Kinahanglan silang mag-antos tungod sa pagbuhat og maayo, nga nagsunod sa panig-ingnan ni Cristo, nga nag-antos alang kanila aron makasunod sila sa iyang mga tunob. Wala siyay sala (Isaias 53:6). Gipas-an niya ang silot nga angay sa sala, aron iyang mapagawas ang tawo gikan sa gahom niini.

1 Pedro 2:18–25

18 Kamo nga mga ulipon, tumana ninyo ang inyong mga agalon nga adunay kahadlok sa Dios, dili lang ang buotan nga agalon kondili apil usab ang mangil-ad ug batasan. 19 Kay panalanginan kamo sa Dios kon maantos ninyo ang mga kasakit bisan ug wala kamoy sayop nga nahimo, tungod ug alang sa inyong pagtuman sa kabubut-on sa Dios. 20 Unsa may dungog nga inyong maangkon kon mag-antos kamo sa silot sa inyong sala? Apan kon mag-antos kamo tungod sa paghimo ug maayo, kaloy-an kamo sa Dios. 21 Ang pag-antos ni Cristo alang kanato mao ang panig-ingnan nga angay natong sundon. Ug mao kini ang katuyoan kon nganong gitawag kita, aron masunod ta ang kinabuhi ni Cristo. 22 “Wala siya makasala, ug wala mamakak.” 23 Giinsulto siya, apan wala siya mobalos ug insulto. Gisilotan siya, apan wala gayod siya manghulga. Nagsalig siya sa Dios nga mao ang naghukom sa matarong. 24 Si Cristo mao gayod ang miangkon sa atong mga sala sa dihang gilansang siya didto sa krus, aron dili na kita magpakasala kondili magkinabuhi na kita nga matarong. Tungod sa iyang mga samad naayo kita. 25 Kaniadto sama kita sa mga karnero nga nahisalaag, apan karon nahibalik na kita sa Ginoo nga Tig-atiman ug Magbalantay sa atong kinabuhi.