Misulat si Pablo ngadto sa mga taga-Corinto
Gisulat ni Pablo ang iyang unang sulat ngadto sa mga taga-Corinto aron ipamatuod ang iyang awtoridad isip apostol, badlongon ang dili hustong mga binuhatan ug kagubot sa iglesia, ug tubagon ang mga pangutana sa mga nakabig bahin sa nagkalainlaing punto sa doktrina ug disiplina.
57 human matawo si Cristo
Biblica® Open Ang Pulong sa Dios™ (OCCB)
Gipangumusta ni Pablo ang mga taga-Corinto
Ang pasiuna ni Pablo, diin gipamatuod niya ang iyang pagkaapostol ug ang panaghiusa sa mga nagtuo kang Cristo Jesus.
1 Gikan kang Pablo nga pinili sa Dios nga mahimong apostol ni Cristo Jesus. Ako ug si Sostenes nga atong igsoon diha kang Cristo.
2 Nangumusta kaninyong mga tumutuo diha sa Corinto. Gitawag kamo sa Dios aron mahimong iya tungod sa inyong pagkahiusa kang Cristo Jesus. Gipili niya kamo nga mahimong iyang mga anak uban sa tanan nga nag-ila kang Jesu-Cristo nga atong Ginoo sa bisan asang lugar. Siya Ginoo natong tanan.
3 Hinaut nga madawat ninyo ang grasya ug kalinaw gikan sa Dios nga atong Amahan ug kang Ginoong Jesu-Cristo.
Nalipay si Pablo sa Ilang Pagkakabig ug mga Gasa
Nalipay si Pablo sa ilang pagkakabig ug sa espirituhanong mga gasa nga ilang nadawat isip pamatuod sa kamatuoran ni Cristo.
4 Nagpasalamat ako kanunay sa Dios tungod sa mga panalangin nga iyang gihatag kaninyo nga anaa kang Cristo Jesus. 5 Kay sa inyong pagkahiusa kang Cristo, gipanalanginan kamo sa Dios sa tanan, sa kahibalo ug sa pagpanulti. 6 Tungod niini napamatud-an ninyo mismo ang among mga gipanudlo mahitungod kang Cristo. 7 Busa wala gayod kamo makulangi sa mga espirituhanong mga gasa nga gihatag sa Dios samtang naghulat kamo sa pagbalik sa atong Ginoong Jesu-Cristo. 8 Si Cristo mao ang maglig-on sa inyong pagtuo hangtod sa kataposan, aron nga sa pag-abot sa adlaw nga ang Ginoong Jesu-Cristo maghukom, wala siyay ikasaway kaninyo. 9 Kasaligan ang Dios nga nagtawag kaninyo sa pagpakighiusa sa iyang Anak nga si Jesu-Cristo nga atong Ginoo.
Giawhag ni Pablo ang Panaghiusa, Dili ang Pagpundok-pundok
Giawhag sila ni Pablo nga maghiusa sa ngalan ni Jesus Cristo, nga walay pagkabahinbahin diha kaniya, inay mosunod sa mga pangulo kansang mga ngalan ilang gigamit sa pagpasakop sa ilang mga pundok.
10 Mga igsoon diha kang Cristo, naghangyo ako kaninyo sa ngalan sa atong Ginoong Jesu-Cristo, nga maghiusa kamong tanan ug likayi ninyo ang pagkabahin-bahin. Paghiusa kamo sa samang huna-huna ug sa inyong katuyoan. 11 Nahisgotan ko kini tungod kay adunay nagsugilon kanako gikan sa pamilya ni Cloe nga adunay panag-away diha kaninyo. 12 Ang buot nako ipasabot mao kini: ang uban kaninyo nag-ingon, “Kang Pablo ako,” ug adunay nag-ingon, “Kang Apolos ako.” Aduna pa gayoy nag-ingon, “Kang Pedro ako,” ug ang uban nag-ingon, “Kang Cristo ako.”
13 Ngano, nabahin-bahin ba diay si Cristo? Si Pablo wala magpalansang sa krus alang kaninyo. Wala usab kamo mabautismohi sa ngalan ni Pablo.
14 Nagpasalamat ako sa Dios nga wala akoy gibautismohan kaninyo gawas lang kang Crispo ug kang Gayo. 15 Busa walay makaingon nga gibautismohan kamo sa akong ngalan. 16 (Gibautismohan ko usab diay si Estefanas ug ang iyang pamilya. Apan gawas kanila wala na akoy mahinumdoman pang uban.) 17 Kay wala ako sugoa ni Cristo aron sa pagbautismo kondili sa pagtudlo sa Maayong Balita. Ug ang akong pagtudlo dili pinaagi sa mga maanindot ug maalamon nga pagpanulti, kay basin madala ko ang mga tawo ngadto kang Cristo pinaagi sa akong abilidad ug mawad-an na lang ug gahom ang kamatayon ni Cristo sa krus.
Ang Krus Milabaw sa Kaalam sa Tawo
Gipamatuod ni Pablo nga gipadala siya aron isangyaw ang Maayong Balita dili pinaagi sa maalamon ug hanas nga pagpanulti, aron dili mapasagdan ang gahom sa Dios. Gipahayag niya nga ang mga kamatuoran sa Maayong Balita dili madiskobrehan pinaagi sa kaalam o pagtuon sa tawo. Bisan tuod ang pagsangyaw sa krus daw kabuang alang sa mga dili motuo, kini milabaw sa kaalam sa mga tawo, ug mao ang gahom sa Dios alang sa kaluwasan sa nakabig nga Judio ug Griego. Gipili sa Dios ang labing tinamay nga mga tawo aron pakaulawan ang maalamong mga pilosopo ug ang bantogang mga tawo sa mga Judio, nga misupak sa kaalam sa Maayong Balita. Pinaagi sa pagtandi gipakita niya kon unsa kaubos ang tanang kalamposan sa tawo, aron walay bisan kinsa nga manghambog gawas diha sa Ginoo.
18 Alang sa mga tawong nangawala, ang pagtulon-an mahitungod sa kamatayon ni Cristo sa krus binuang lang, apan kanatong nangaluwas, kini gahom sa Dios. 19 Kay ang Kasulatan nag-ingon:
“Gub-on nako ang kaalam sa mga tawo nga maalamon,
ug ipakita ko nga walay pulos ang pagsabot sa mga adunay kinaadman.”
20 Unsa may kapuslanan sa mga maalamon, sa mga magtutudlo sa Kasugoan, ug sa mga maayong makiglantugi niini nga panahon? Kay gipakita man sa Dios nga binuang lang ang kalibotanon nga kaalam. 21 Kay ang Dios sa iyang kaalam wala magtugot nga maila siya sa mga tawo pinaagi sa kalibotanon nga kaalam; kondili pagbuot sa Dios nga luwason ang mga tawo pinaagi sa ilang pagtuo sa giwali nga Maayong Balita, nga sumala sa mga wala motuo, binuang lang kini. 22 Ang mga Judio dili motuo kon walay milagro nga ilang makita, ug ang mga Griego, ilang timbang-timbangon kon ang gitudlo kanila motukma ba sa ilang giingon nga kaalam. 23 Apan kami, ang among giwali mao ang Cristo nga gilansang sa krus. Kini dili madawat sa mga Judio ug binuang lang alang sa mga dili Judio. 24 Apan sa mga tawo nga gitawag sa Dios, Judio man o dili, si Cristo mao ang gahom ug ang kaalam sa Dios. 25 Kay ang gihuna-huna nila nga binuang nga gihimo sa Dios mas labaw pa kaysa kaalam sa tawo, ug ang gihuna-huna nila nga kaluyahon nga gihimo sa Dios mas kusog pa kaysa kusog sa tawo.
26 Mga igsoon kang Cristo, hinumdomi ninyo kon unsa ang inyong kahimtang sa wala pa kamo mahimong tinawag sa Dios, pipila lang gayod kaninyo ang giila nga maalamon o kaha adunay katakos, ug pipila lang usab ang naggikan sa inila nga mga pamilya. 27 Apan ang gipili sa Dios mao kadtong giisip sa katawhan nga dili maalamon aron pakaulawan ang mga maalamon, ug gipili usab niya ang mga tawo nga wala gayoy gahom aron pakaulawan ang mga tawong gamhanan. 28 Gipili sa Dios ang mga kabos ug talamayon, nga giisip sa katawhan nga walay kapuslanan, aron ipakita niya nga dili mahinungdanon ang giisip sa katawhan nga mahinungdanon. 29 Busa walay makapasigarbo atubangan sa Dios. 30 Sa pagbuot sa Dios anaa kita kang Cristo Jesus. Si Cristo mao ang kaalam sa Dios alang kanato. Pinaagi kaniya gipakamatarong kita sa Dios, iya na kita, ug gitubos na niya kita gikan sa atong mga sala. 31 Busa, sama sa giingon sa Kasulatan, “Ang buot magpasigarbo, kinahanglan ipasigarbo lamang niya ang gibuhat sa Ginoo.”
Nagsangyaw si Pablo nga Walay Tawhanong Kahanas sa Pagpanulti
Gipahayag ni Pablo nga sa dihang gisangyaw niya kanila ang Maayong Balita, wala niya kini dayandayani sa tawhanong kinaadman o kahanas sa pagpanulti, dili sama sa ilang bakak nga mga magtutudlo. Ang iyang mga pangatarongan gibase sa pamatuod sa balaang pagpadayag, nga gipamatud-an sa gahom sa mga milagro. Busa ang ilang pagtuo dili angay ibase sa kaalam o pilosopiya sa mga tawo.
1 Mga igsoon ko kang Cristo, sa pag-anha ko diha kaninyo aron sa pagwali sa mga tinago nga kamatuoran sa Dios, wala ako maggamit ug laglom nga mga pulong o kaha lawom nga kaalam. 2 Kay gituyo ko nga wala na akoy lain pa nga iwali kaninyo kondili si Jesu-Cristo lang ug ang iyang pagpalansang sa krus. 3 Mianha ako kaninyo nga adunay kaluyahon ug nagkurog pa gani ako sa kahadlok. 4 Sa pagwali ko kaninyo wala ako maggamit ug binulak-bulakan nga mga pulong aron lang madani kamo, kondili ang Espiritu ang nagpamatuod sa akong gipanulti pinaagi sa iyang gahom, 5 aron nga ang inyong pagtuo dili mabasi sa kaalam sa tawo kondili sa gahom sa Dios.
Ang Tinagong Kaalam sa Dios Gipadayag sa Espiritu
Sunod gipakita ni Pablo nga, bisan wala siya mogamit sa kalibotanong kaalam, walay katarongan ang mga taga-Corinto nga ipanghambog ang ilang bakak nga mga magtutudlo. Kay gisulti niya ang tinagong misteryo sa Dios nga gipadayag kaniya sa Espiritu, nga dili maabot sa bisan unsang paningkamot o pagtuon sa tawo. Pinaagi sa pagsangyaw sa Espiritu Santo gipahayag niya kanila ang lawom nga mga butang sa Dios, nga mapadayag lamang sa Espiritu sa Dios. Dili gani kini madawat sa kinaiyanhon ug dili espirituhanong tawo, nga walay laing ikatabang gawas sa iyang tawhanong mga katakos.
6 Hinuon, nagtudlo kami ug kaalam ngadto sa mga lig-on ug pagtuo sa Dios, apan kini nga kaalam dili iya sa tawo ni sa mga nagdumala niining kalibotana nga gitakdang mahanaw. 7 Kining kaalam nga akong giingon mao ang tinago nga kaalam sa Dios nga wala ipadayag ngadto sa mga tawo kaniadto. Sa dihang wala pa mamugna sa Dios ang kalibotan giplano na niya kini aron mapasidunggan niya kita. 8 Ang mga nagdumala dinhi sa kalibotan wala makasabot sa plano sa Dios. Kay kon nasabtan pa nila, wala na unta nila ilansang sa krus ang Ginoo nga makagagahom. 9 Apan sumala sa giingon sa Kasulatan:
“Wala pa gayoy nakita, nadungog,
o kaha nahuna-huna ang tawo
nga angay ikatandi ngadto
sa mga giandam sa Dios alang sa mga nahigugma kaniya.”
10 Kini nga plano sa Dios gipahibalo na kanato pinaagi sa iyang Espiritu.
Kay ang tanan nasayran sa Espiritu, bisan pa ang mga lawom nga huna-huna sa Dios. 11 Ingon kanatong mga tawo, walay nasayod sa gihuna-huna sa usa ka tawo gawas lang sa iyang kaugalingon nga espiritu. Mao usab sa Dios, walay nasayod sa iyang huna-huna gawas lang sa Espiritu sa Dios. 12 Ug kita nga mga tumutuo gihatagan niini nga Espiritu nga dili gikan sa kalibotan kondili gikan sa Dios aron masabtan nato ang kamatuoran mahitungod sa mga panalangin nga gihatag sa Dios kanato.
13 Busa ang mga pulong nga among gisulti gikan sa Espiritu ug dili gikan sa kaalam sa tawo. Gipasabot namo ang mga pagtulon-an nga gikan sa Espiritu ngadto sa mga tawo nga nakaangkon sa Espiritu. 14 Apan ang tawo nga wala kaniya ang Espiritu dili modawat sa mga pagtulon-an nga gikan sa Espiritu sa Dios, tungod kay alang kaniya binuang lang kini. Ug dili niya kini masabtan tungod kay ang Espiritu lang gayod sa Dios mao ang makatabang kaniya sa pagsabot niini. 15 Ang tawo nga nakabaton sa Espiritu ang nagsusi niining tanan, apan dili siya ubos sa pagsusi sa ubang tawo. 16 Ang Kasulatan nag-ingon:
“Kinsa ba ang nasayod sa huna-huna sa Ginoo?
Ug kinsa ba ang makatudlo kaniya?”
Apan kita, ania kanato ang huna-huna ni Cristo.