Ang Pagkabahinbahin Tungod sa mga Alagad Moguba sa Espirituhanong Kinabuhi
Gipakita ni Pablo nga ang pagkabahinbahin sa usa ka iglesia, nga naggikan sa mga opinyon sa mga tawo bahin sa nagkalainlaing gasa sa ilang mga alagad, moguba sa espirituhanong kinabuhi.
57 human matawo si Cristo
Biblica® Open Ang Pulong sa Dios™ (OCCB)
1 Mga igsoon, kaniadto dili ako makatudlo kaninyo ingon nga mga tawo nga gitultolan sa Espiritu kondili ingon nga mga tawo nga nagkinabuhi sa tawhanon nga kinaiya ug bata pa sa pagtuo kang Cristo. 2 Mao kana nga simple lang gayod nga mga pagtulon-an ang akong gitudlo kaninyo tungod kay dili pa ninyo masabtan ang laglom nga mga pagtulon-an. Ug bisan gani karon dili pa kamo makasabot. 3 Kay hangtod karon, nagkinabuhi pa kamo sa inyong tawhanon nga kinaiya tungod kay gasinahay kamo ug nanggiaway. Kining inyong gibuhat nagpamatuod lang nga sama pa gihapon kamo sa mga tawo niining kalibotana. 4 Kung moingon ang usa, “Kang Pablo ako,” ug kung moingon usab ang usa, “Kang Apolos ako.” Dili ba pareho man lang kamo sa mga tawo niining kalibotana?
5 Hinuon si kinsa ba gayod si Apolos? Ug si kinsa ba gayod si Pablo? Kami mga alagad lang sa Ginoo nga iyang gigamit aron motuo kamo. Ang matag-usa kanamo nagtuman lang sa buluhaton nga gisalig sa Ginoo kanamo. 6 Ako ang nagtanom, ug si Apolos ang nagbisbis, apan ang Dios mao ang nagpatubo. 7 Dili mahinungdanon ang nagtanom ug ang gabisbis. Ang Dios lang gayod ang mahinungdanon kay siya man ang nagpatubo. 8 Ang nagtanom ug ang gabisbis pareho nga mga alagad, ug ang matag-usa kanila gantihan sa Dios sumala sa ilang pagpangabudlay. 9 Ako ug si Apolos nagtinabangay sa buluhaton alang sa Dios. Sama kamo sa uma nga gipauma kanamo sa Dios. Sama usab kamo sa usa ka balay nga iyang gipatukod.
10 Ug ako, sama sa usa ka hanas nga nangulo sa mga panday, mao ang nagtukod sa pundasyon sumala sa katakos nga madagayaong gihatag sa Dios kanako. Ang uban nga panday mao ang nagpadayon sa pagtrabaho niini. Apan kinahanglan gayod nga magmatngon ang matag panday nga maayo ang iyang trabaho.
Si Cristo ang Bugtong Pundasyon
Si Jesus Cristo ang bugtong pundasyon sa Kristiyanismo. Ang mga nagtukod ibabaw niini nga pundasyon gipasidan-an nga mag-amping, kay kinahanglan silang moagi sa usa ka grabeng pagsulay. Ang magtutudlo nga nagpasulod ug bakak nga mga doktrina makakita nga ang iyang mga kinabig motalikod sa panahon sa paglutos, sama sa kahoy, uga nga sagbot, ug uhot diha sa kalayo, ug siya mismo makalingkawas lamang uban sa kalisod. Sa laing bahin, kadtong nagtukod ug husto ug maayong doktrina ibabaw niini nga pundasyon makakita nga ang ilang mga kinabig, sama sa plata ug bulawan, makalahutay sa pagsulay sa kalayo, ug ang magtutudlo mismo makadawat sa ganti sa iyang mga paghago.
11 Kay dili mahimo nga magbutang ug lain pa nga pundasyon gawas sa gipahimutang na, nga mao si Jesu-Cristo.
12 Adunay mga tawo nga nagpatukod ug pundasyon nga migamit ug mga materyales nga bulawan, plata, o kaha mga mahalong mga bato. Ang uban usab migamit ug mga materyales nga kahoy, kugon, ug dagami. 13 Apan sa adlaw sa paghukom makit-an kon unsa nga matang sa mga materyales ang gigamit sa matag-usa, kay pagasulayan kini pinaagi sa kalayo. 14 Kon ang gipatukod diha sa pundasyon dili masunog, makadawat ug ganti ang nagpatukod niini. 15 Apan kon kini masunog, wala gayod siyay madawat nga ganti; igo lang nga maluwas ang iyang kaugalingon. Mahisama siya sa tawo nga nakalingkawas sa iyang nasunog nga balay, apan wala gayod siyay nadala.
Ang Kaalam Niining Kalibotana Kabuang
Gipahayag ni Pablo nga ang magtutudlo nga tinuyong nagpasulod ug bakak nga doktrina sa iglesia pagalaglagon, bisan unsa pa siya kamalampuson. Ang kaalam niining kalibotana kabuang sa panan-aw sa Dios. Busa dili nila angay ipanghambog ang ilang mga magtutudlo o ang ilang gipanghambog nga pilosopiya, nga nagpatunghag pagkabahinbahin sa iglesia. Ang tinuod nga himaya sa usa ka Cristohanon anaa kang Cristo, nga iya sa Dios, ug pinaagi lamang kaniya atong madawat ang mga saad sa kaluwasan, nga dili ikahatag sa mga magsasangyaw sa Maayong Balita.
16 Dili ba templo man kamo sa Dios ug ang Espiritu nagpuyo diha kaninyo? 17 Busa kon gub-on ninyo ang puloy-anan sa Dios, silotan niya kamo tungod kay ang templo sa Dios balaan. Ug kana nga templo walay lain kondili kamo mismo.
18 Ayaw limbongi ang inyong kaugalingon. Kon aduna kaninyoy naghuna-huna nga maalamon siya basi sa tawhanong kaalam, angay niyang isalikway kana nga kaalam aron mahimo siyang maalamon sa mata sa Dios. 19 Kay alang sa Dios, ang kaalam niining kalibotan binuang lang. Kay ang Kasulatan nag-ingon, “Dakpon sa Dios ang mga maalamon sa ilang pagkalimbongan.” 20 Ug adunay nasulat pa gayod sa Kasulatan nga nag-ingon, “Nasayod ang Dios nga ang mga rason sa mga tawo nga maalamon walay pulos.” 21 Busa ayaw na ninyo ipasigarbo ang mga tawo nga inyong ginasunod, tungod kay ang tanan gihatag sa Dios alang sa inyong kaayohan. 22 Kay si Pablo, Apolos ug si Pedro inyoha. Bisan kining kalibotan ug ang panghitabo karon ug sa umaabot, apil na ang inyong kinabuhi ug kamatayon, kining tanan alang sa inyong kaayohan. 23 Ug kamo sab, iya ni Cristo, ug si Cristo iya sa Dios.
Ang Dios Lamang ang Maghukom sa Iyang mga Alagad
Ang mga apostol, isip mga alagad ni Cristo, gikinahanglang mopadayag sa mga misteryo sa Maayong Balita sumala sa pagkaandam sa mga tawo sa pagdawat niini. Sa pagtubag sa pagsaway kaniya sa bakak nga mga magtutudlo tungod kay wala niya tudloi ang mga taga-Corinto sa mas lawom nga mga doktrina sa Kristiyanismo, gipahayag ni Pablo nga dili kaayo hinungdanon kon kondenahon siya sa mga tawo sumala sa ilang paghukom, kay ang Dios lamang ang makahukom sa husto, ug siya lamang ang nahibalo sa mga sekreto sa kasingkasing. Busa giawhag niya sila nga dili hukman ang ilang espirituhanong mga magtutudlo.
1 Busa isipa ninyo kami nga mga alagad ni Cristo nga gisaligan sa Dios sa pagpasabot sa kamatuoran nga iyang gitago kaniadto. 2 Ug ang tawo nga gisaligan kinahanglan magpakita nga kasaligan gayod siya. 3 Walay bili kanako kon unsa ang pag-ila ninyo o ni bisan kinsa kanako. Ako gani mismo dili makaingon nga ang akong pag-alagad sa Dios maayo o dili. 4 Hinuon limpyo ang akong konsensya, apan wala kana magkahulogan nga wala na akoy sala. Ang Ginoo lang gayod ang makaingon kon husto o dili ang akong gibuhat. 5 Busa ayaw kamo paghukom sa dili pa moabot ang husto nga panahon. Hulata ninyo ang pag-abot sa Ginoo. Sa iyang pag-abot, ipadayag niya ang mga sekreto ug mga motibo sa kada usa. Ug niana usab nga panahon, madawat sa matag-usa ang pagdayeg gikan sa Dios.
Gitamay ang mga Apostol, Gipasidunggan ang Bakak nga mga Magtutudlo
Gipahayag ni Pablo nga gigamit niya ang iyang kaugalingong ngalan ug ang ngalan ni Apolos aron makat-on sila nga dili hatagag hilabihan ka taas nga pagtan-aw ang ilang tagsatagsa ka mga pangulo, ug sa ingon dili magmapahitas-on uban sa kasuko ug pagtamay sa usag usa. Si Pablo ug si Apolos mga alagad lamang ni Cristo, nga pinaagi sa ilang pag-alagad mituo ang mga Cristohanon. Gisalikway nila ang tanang titulo ug kalainan sa ranggo taliwala nila, aron pinaagi sa ilang panig-ingnan makat-on ang mga taga-Corinto nga dili pabilhan ang ilang mga magtutudlo labaw sa iyang gisulat. Unya gipasabot ni Pablo ang bakak nga mga magtutudlo. Ang mga apostol gitawag nga walay alamag ug buang tungod kay gisangyaw nila ang unang punto sa Cristohanong pagtuo, samtang ang bakak nga mga magtutudlo, tungod sa ilang mga pangagpas ug tradisyon, giisip nga maalamong mga tawo ug mga pilosopo. Gitamay ang mga apostol; gipasidunggan ang bakak nga mga magtutudlo. Ang mga apostol nabutyag sa tanang matang sa katalagman, samtang ang bakak nga mga magtutudlo nagpahimulos sa bahandi ug tanang kaharuhay.
6 Mga igsoon, gigamit nako ang akong kaugalingon ug si Apolos isip sumbanan, aron makat-onan ninyo ang giingon nga “Ayaw pasobrahi ang giingon sa Kasulatan.” Busa ayaw ninyo ipasigarbo ang usa sa pag-ingon nga mas maayo siya kaysa usa. 7 Nganong naghuna-huna kamo nga mas maayo gayod kamo kaysa uban? Unsa ang anaa kaninyo nga wala maggikan sa Dios? Ug kon naggikan man kana sa Dios, nganong ipasigarbo ninyo nga daw sa inyo gayod?
8 Naghuna-huna kamo nga wala nay nakulang kaninyo, mga adunahan na kamo ug naghari na sa gingharian sa Dios bisan kon kami wala pa. Maayo gayod unta kon naghari na kamo aron makahari usab kami uban kaninyo. 9 Alang kanako, kaming mga apostoles murag gibutang sa Dios sa labing ubos nga kahimtang. Sama kami sa mga hinukman nga patyon ug nahimong talan-awon sa tibuok kalibotan, sa tanang mga tawo ug sa tanang mga anghel. 10 Tungod kang Cristo, nakaingon ang mga tawo nga buang kami. Apan kamo naghuna-huna nga mga maalamon kamo tungod kay anaa kamo kang Cristo. Mga luya kami ug lig-on kamo. Ginatahod kamo, apan kami ginatamay lang. 11 Hangtod gani karon giantos namo ang kagutom ug kauhaw, ug kulang kami sa bisti. Gidagmalan kami sa mga tawo, ug wala kamiy kaugalingong balay. 12 Nagtrabaho kami ug nagpasingot aron lang mabuhi. Giampo namo ang mga tawo nga nagpasipala kanamo nga kaloy-an sila sa Dios. Giantos lang namo ang mga paglutos sa mga tawo. 13 Gipakaulawan kami, apan gibalosan namog kalumo. Hangtod karon, sa huna-huna sa mga tawo kami labing ubos ug murag basura lang.
Gipasidan-an Sila ni Pablo Isip Ilang Amahan
Gipahayag ni Pablo nga gisulat niya kining mga butanga dili aron pakaulawan sila kondili aron tudloan sila ug pasidan-an batok sa bakak nga mga magtutudlo, nga dili mahimong sama kaniya alang kanila, ang ilang espirituhanong amahan. Busa giawhag niya sila nga sundogon siya, ug gipadala niya si Timoteo ngadto kanila aron pahinumdoman sila sa iyang pagtulon-an.
14 Wala ako magsulat niini sa tuyo nga pakaulawan kamo, kondili gusto ko nga matudloan kamo isip mga hinigugma ko nga mga anak. 15 Kay bisan liboan ang naggiya kaninyo sa inyong pagkinabuhi diha kang Cristo, usa lang ang inyong amahan sa pagtuo. Ako lang ang nahimong inyong amahan sa pagtuo kang Cristo Jesus pinaagi sa Maayong Balita nga akong giwali kaninyo. 16 Busa gihangyo ko kamo nga sundon ninyo ang akong gibuhat. 17 Mao kana ang hinungdan nga gipadala ko diha kaninyo si Timoteo nga akong hinigugma ug kasaligan nga anak sa Ginoo, aron magpahinumdom siya kaninyo sa akong mga pamaagi sa pagkinabuhi isip sumusunod ni Cristo Jesus. Kini nga mga pamaagi, gitudlo usab nako sa mga tumutuo sa bisan asang lugar.
Moanhi si Pablo, aron Mosilot o uban sa Gugma
Miangkon ang bakak nga magtutudlo nga nahadlok si Pablo sa pag-atubang sa ingon ka maalamon ug hanas manulti nga mga kaatbang. Gipahayag ni Pablo nga nagtinguha siyang mobisita kanila sa dili madugay, ug niadto susihon niya dili ang sinultihan kondili ang labaw-sa-kinaiyahan nga mga gahom sa iyang mga kaatbang, kay ang Maayong Balita napamatud-an dili pinaagi sa gipanghambog nga kaalam sa mga magsasangyaw niini kondili pinaagi sa milagrosong mga gahom nga gihatag kanila aron pamatud-an kini. Unya gipangutana niya sila kon gamiton ba niya ang iyang kaugalingong labaw-sa-kinaiyahan nga mga gahom sa pagsilot kanila, o moanha kanila uban sa espiritu sa kalinaw ug gugma tungod kay gitul-id na nila ang ilang mga sayop.
18 Ang uban kaninyo mapahitas-on na, kay abi nila ug dili na ako moanha diha. 19 Apan kon itugot sa Ginoo, moanha ako diha sa labing madali. Ug tan-awon ko gayod kon unsa ang mahimo nianang mga tawhana nga hilabihan kamapahitas-on manulti. 20 Kay ang tinuod, kon ang Dios mao ang naghari sa atong kinabuhi, masayran usab kini sa uban pinaagi sa atong mga binuhatan ug dili lang sa atong pagsulti. 21 Busa unsa ang inyong pilion? Moanha ba ako diha nga masuk-anon o mahigugmaon ug adunay kalumo?