Nagsulat si Pablo ngadto sa mga taga-Colosas

Gisulat ni Pablo ang iyang sulat ngadto sa mga taga-Colosas isip tubag sa mensahe ni Epafras. Nagsulat siya aron pamatud-an nga ang paglaom sa kaluwasan sa katawhan nagsalig lamang sa paghalad ni Cristo sa iyang kaugalingon aron mapasaylo ang sala, ug aron mawagtang ang mga sayop sa mga nagpasiugda sa pagsunod sa relihiyon sa mga Judio pinaagi sa pagpatin-aw sa mga kamatuoran nga supak niini. Giwali nila dili lamang ang Kasugoan ni Moises kondili usab ang mga opinyon sa mga pilosopong pagano, taga-Sidlakan, o Esenyo bahin sa pagsimba sa mga anghel, tungod sa gituohang ilang papel sa mga kalihokan sa tawo, ug bahin sa panginahanglan nga likayan ang pagkaon og karne.

62 human matawo si Cristo

Biblica® Open Ang Pulong sa Dios™ (OCCB)

Nangumusta si Pablo sa mga taga-Colosas

Gisugdan ni Pablo ang iyang sulat pinaagi sa pagpasalig sa mga taga-Colosas nga gitudlo siya nga apostol ni Cristo pinaagi sa kabubut-on sa Dios. Nangumusta kanila si Pablo ug si Timoteo. Wala sila mohunong sa pag-ampo nga ang mga taga-Colosas mapuno sa hingpit nga kahibalo sa mga butang sa Dios, nga makasabot sa espirituhanong kaalam sa Dios; nga mamunga sila sa matag maayong buhat ug motubo sa ilang kasinatian sa pagkaila sa gugma ug kamatuoran sa Dios; ug nga mapalig-on ang ilang espiritu pinaagi sa iyang mahimayaong gahom, aron makaantos sila sa tanang butang uban sa labing dakong pailob ug paglahutay, ug bisan uban sa kalipay, nga nasayod nga pinaagi niini makapahimuot sila sa Dios; ug nga magpasalamat sila sa Dios, nga tungod sa iyang kaugalingong walay bayad nga kalooy, pinaagi sa buhat sa iyang Espiritu nga nagbalaan kanila, naghimo kanila nga takos sa pag-ambit sa espirituhanong panulondon nga giandam alang sa mga nagkinabuhi diha sa kahayag sa Maayong Balita. Giluwas niya sila gikan sa gahom sa sala ug pagkawalay alamag, ug gikuha niya kita gikan sa gingharian sa kangitngit ngadto sa gingharian sa kahayag, nga gimandoan sa iyang hinigugmang Anak, nga mibayad sa bili sa pagtubos pinaagi sa iyang kaugalingong dugo, nga mao ang kapasayloan sa mga sala.

Mga Taga-Colosas 1:1–14

1 Gikan kang Pablo nga nahimong apostol ni Cristo Jesus tungod sa kabubut-on sa Dios. Ako ug si Timoteo nga atong igsoon kang Cristo.

2 Nangumusta kaninyo diha sa Colosas, kamong mga katawhan sa Dios ug matinumanon nga mga igsoon diha kang Cristo.

Hinaut nga madawat ninyo ang grasya ug kalinaw gikan sa Dios nga atong Amahan.

3 Sa matag ampo namo alang kaninyo, kanunay kaming nagpasalamat sa Dios nga Amahan sa atong Ginoong Jesu-Cristo. 4 Kay nabalitaan namo nga lig-on ang inyong pagtuo kang Cristo Jesus ug dako ang inyong paghigugma sa tanang katawhan sa Dios. 5 Ingon kamo niini tungod kay nagpaabot man kamo sa inyong gilaoman nga gitagana alang kaninyo didto sa langit. Kining inyong gilaoman nadunggan na ninyo kaniadto sa dihang gisangyaw kaninyo ang kamatuoran, nga mao ang Maayong Balita. 6 Kining Maayong Balita nagpadayon pagkaylap sa tibuok kalibotan, ug daghan ang nakadawat sa bag-ong kinabuhi nga sama usab sa inyong nadawat sa dihang nasabtan ninyo ang kamatuoran mahitungod sa grasya sa Dios. 7 Gitudlo kini ni Epafras kaninyo. Pinangga namo siya ug sama usab siya kanamo nga alagad ni Cristo. Gipaanha namo siya diha isip puli kanamo, ug kasaligan siya nga alagad. 8 Siya mao ang nagsugilon kanamo mahitungod sa inyong pagkamahigugmaon tungod sa gugma nga gihatag kaninyo sa Espiritu.

9 Busa sa pagkasayod namo niini, kanunay kaming nag-ampo alang kaninyo. Naghangyo kami sa Dios nga ang iyang Espiritu mohatag kaninyo sa tanang kaalam ug pagsabot aron masayran ninyo sa hingpit kon unsa ang iyang kabubut-on alang kaninyo. 10 Pinaagi niini, makakinabuhi kamo nga maangayan sa Ginoo, nga makahatag ug kalipay kaniya. Ug mahimo usab ninyo kanunay ang maayo, ug madugangan pa gayod ang inyong kahibalo mahitungod sa Dios. 11 Kay lig-onon kamo sa Dios pinaagi sa iyang kahibulongang gahom, aron nga bisan unsa ang mahitabo makalahutay kamo nga adunay kalipay. 12 Ug makapasalamat kamo sa Amahan tungod kay gihimo niya kamo nga takos sa pagdawat sa panulondon nga alang sa iyang mga katawhan, ang panulondon nga anaa sa kahayag. 13 Giluwas niya kita gikan sa gahom sa kangitngit ug gipahiluna didto sa gingharian sa iyang pinanggang Anak. 14 Pinaagi sa iyang Anak gitubos niya kita. Kini nagpasabot nga gipasaylo na niya ang atong mga sala.

Si Cristo, ang Dagway sa Dili Makita nga Dios

Aron pamatud-an kanila nga ang kamatayon ni Cristo adunay gahom sa pag-angkon og kapasayloan alang sa sala sa tawo, gihulagway ni Pablo ang pagkadios ug labing taas nga dungog ni Cristo. Siya ang dagway o tukmang pagkasama sa dili makita nga Dios, ang magbubuhat ug Hinungdan sa tanang butang nga adunay sinugdanan, makita man o dili makita. Gibuhat niya ang tanan pinaagi sa iyang kaugalingon ug alang sa iyang kaugalingon. Naglungtad na siya sa wala pa ang tanang binuhat, ug busa kinahanglan nga siya ang tinuod nga Dios nga naglungtad sa iyang kaugalingon. Ingon nga ang iyang gahom maoy nagbuhat sa tanan, kini usab ang nagpadayon sa ilang paglungtad: ingon nga ang tanang naglungtad naggikan kaniya, pinaagi usab kaniya kinahanglan kining magpadayon. Siya ang Ulo sa iglesia, nga iyang giisip nga iyang espirituhanong lawas. Pinaagi sa iyang pagkatawo isip tawo, siya ang unang hinungdan o sinugdanan sa iglesia, ug ang unang nabanhaw gikan sa mga patay diha sa usa ka gihimayang tawhanong lawas, aron sa tanang butang, diha sa iyang pagkadios ug sa iyang pagkatawo, siya ang mag-una sa tanan. Kay gikahimut-an sa Amahan nga ang tanang kahalangdon, gahom, ug kalooy sa pagka-Dios ipadayag diha kaniya, o mopuyo diha kaniya. Human niya mapahiuli ang kalinaw tali sa Dios ug sa tawo pinaagi sa dugo nga iyang giula sa krus, ug sa ingon mabungkag ang paril nga nagbulag sa mga Judio ug sa mga dili Judio, gipasig-uli niya sila ngadto sa iyang kaugalingon, uban sa tanang butang sa langit ug sa yuta, mga tawo man o mga anghel, nga gihugpong niya ngadto sa usa ka balaan ug espirituhanong panag-ambitay. Ug ang mga dili Judio, nga kaniadto nahimulag sa Dios ug kansang mga buhat nagpamatuod nga ang ilang hunahuna supak kaniya, gipasig-uli na niya karon pinaagi sa kamatayon sa iyang tawhanong lawas, aron iyang ikapresentar sila nga balaan ug walay ikasaway, gawasnon sa tanang sumbong sa iyang atubangan, sa adlaw sa paghukom. Sigurado gayod niya kining buhaton kon magpabilin silang lig-on ang sukaranan sa pagtuo kang Jesus Cristo ug malig-on diha sa iyang mga pagtulon-an, nga dili mapahilayo sa mga bakak nga magtutudlo gikan sa bulahang paglaom ug mga saad sa Maayong Balita, nga giwali ngadto sa Judio ug dili Judio, ug diin gitudlo si Pablo nga alagad.

Mga Taga-Colosas 1:15–23

15 Si Cristo mao gayod ang hulagway sa dili makita nga Dios, ug anaa na siya sa wala pa gihimo ang tanan. 16 Kay pinaagi kaniya ug alang kaniya gibuhat sa Dios ang tanan nga anaa sa langit ug dinhi sa yuta, ang makita ug ang dili makita, sama sa mga espiritu nga adunay kagahom o katungod, mga espiritu nga nangulo o naghari. 17 Sa wala pa ang bisan unsa nga butang, si Cristo anaa na, ug pinaagi kaniya nahimutang ug nahiusa ang tanan sa ilang hustong dapit. 18 Siya ang ulo sa mga tumutuo nga mao ang iyang lawas. Siya ang sinugdanan, ang una nga nabanhaw aron mapaila nga siya mao gayod ang una sa tanan. 19 Kay buot sa Dios nga ang kinatibuk-an sa iyang pagka-Dios makita tanan diha kang Cristo. 20 Ug pinaagi kang Cristo napasig-uli sa Dios ang iyang maayong relasyon sa tanan niyang binuhat, sa langit ug dinhi sa yuta. Gihimo niya kini pinaagi sa dugo ni Cristo sa krus.

21 Kaniadto layo kamo sa Dios, ug nahimo niya kamong mga kaaway tungod sa inyong daotang mga huna-huna ug mga binuhatan. 22 Apan karon napasig-uli na kamo sa Dios sa iyang kaugalingon pinaagi sa kamatayon sa tawhanong lawas ni Cristo. Karon madala na niya kamo sa iyang presensya nga walay sala, hinlo, ug walay ikasaway. 23 Apan kinahanglan nga magpadayon kamong lig-on sa inyong pagtuo ug dili matarog sa paglaom nga inyong nahuptan sa dihang nadunggan ninyo ang Maayong Balita nga giwali ngadto sa tibuok kalibotan. Ug ako, si Pablo, nahimong alagad aron magwali niining Maayong Balita.

Nalipay si Pablo sa Pag-antos alang sa mga dili Judio

Isip alagad ni Cristo ngadto sa mga dili Judio, gipasaligan sila ni Pablo nga nalipay siya sa iyang mga pag-antos, subay sa katungdanan sa pagdumala sa Maayong Balita nga gihatag sa Dios kaniya alang sa ilang kaayohan, aron iyang matuman ang katuyoan sa Dios sumala sa gitagna sa iyang mga propeta. Kana nga katuyoan mao ang tinago nga plano sa pagtubos pinaagi sa pagtuo alang sa mga dili Judio, nga gitago sulod sa daghang kaliwatan apan karon hingpit nang gipadayag: si Cristo nga nagpuyo diha kanila, nga pinaagi sa iyang dugo naghatag og kapasayloan sa mga sala, ug pinaagi sa iyang Espiritu naghatag sa paglaom nga himayaon sila. Siya ang giwali sa mga apostol, nga nagpasidaan sa tanan bahin sa ilang sala ug kakuyaw ug nagtudlo kanila sa tanang espirituhanong kaalam. Alang niini naghago si Pablo, nga naningkamot sa tibuok niyang kusog. Isip pamatuod niini, gusto niyang masayran nila ang mga paglutos ug mga pag-antos nga iyang giantos tungod sa pagwali sa Maayong Balita ngadto sa iglesia sa mga dili Judio, ngadto sa tanang matinuohong mga dili Judio. Gusto niya nga sila, nga nahiusa sa gugma ug hingpit nga nakasiguro sa kadato sa Cristohanong pagtuo, moila sa tinago nga plano sa Dios pinaagi kang Cristo alang sa kaluwasan sa mga Judio ug mga dili Judio; diha kaniya ug sa iyang Maayong Balita natago ang tanang bahandi sa diosnong kaalam ug kahibalo. Gisulti niya kini aron walay makalingla kanila pinaagi sa malantip nga mga pangatarongan o madanihong mga pulong sa tawhanong pilosopiya. Bisan wala siya uban kanila sa lawas, uban siya kanila pinaagi sa Espiritu, nga nalipay sa pagkakita sa ilang maayong kahapsay ug disiplina ug sa ilang lig-ong pagtuo. Tungod kay gidawat nila ang Maayong Balita ni Cristo, giawhag niya sila nga magpadayon sa pagtuo kaniya, nga nakagamot diha kaniya ug nagtukod diha kaniya sa tanan nilang paglaom sa kapasayloan ug kaluwasan, aron, nga malig-on diha sa kaputli sa pagtuo kaniya sumala sa gitudlo kanila, magmadagayaon pa gayod sila sa mga bunga niini, uban sa pagpasalamat sa Dios sa pagtawag kanila sa pag-ambit sa mga panalangin niini.

Mga Taga-Colosas 1:24–2:7

24 Karon malipayon ako sa akong mga pag-antos alang kaninyo. Kay pinaagi sa mga pag-antos sa akong lawas, makatabang ako nga mahingpit ang mga pag-antos ni Cristo alang sa kaayohan sa iyang lawas nga mao ang mga tumutuo. 25 Gihimo ako sa Dios nga alagad alang sa mga tumutuo, ug ang buluhaton nga iyang gihatag kanako mao ang pagsugilon kaninyong sa kinatibuk-an sa iyang pulong. 26 Ang iyang pulong mao ang iyang tinago nga plano nga wala niya isugilon kaniadto, apan karon gibutyag na niya kanato nga iyang katawhan. 27 Buot niya nga masayod na kamo karon nga mga dili Judio, kon unsa katahom ang plano nga giandam niya alang sa tanang katawhan. Ug kining tinago nga plano mao nga si Cristo anaa kaninyo. Ug tungod kay si Cristo anaa na kaninyo aduna kamoy paglaom nga mahimong nindot kaayo ang inyong kahimtang sa umaabot.

28 Busa gisangyaw namo si Cristo sa tanang katawhan. Gipahimangnoan namo ug gitudloan ang tanan sa kamatuoran aron mahimo namo silang i-atubang sa presensya sa Dios nga hingpit sa ilang pakighiusa kang Cristo. 29 Naghago gayod ako aron mahimo ko kini, ug ang gahom ni Cristo mao ang nagpalig-on kanako.

2:1 Gusto ko nga masayran ninyo nga labihan gayod ang akong paghago alang kaninyo ug sa mga taga-Laodicea, ingon man usab sa uban nga wala pa makakita kanako sa personal. 2 Gihimo ko kini aron madasig kamo ug lakip usab sila. Gitudloan ko kamo nga adunay paghigugma, ug gipaabot ko nga masabtan gayod ninyo ug masayran ang tinago nga plano sa Dios bahin kang Cristo, 3 nga mao ang tinubdan sa tanan nga kaalam ug pagsabot.

4 Gisugilon ko kini kaninyo aron dili kamo matunto sa ilang madanihon nga mga pulong. 5 Kay bisan wala ako diha uban kaninyo, kanunay ko kamong gihandom, ug nalipay ako kaayo tungod kay maayo ang inyong panag-uban ug lig-on gayod ang inyong pagtuo kang Cristo.

6 Tungod kay giila na ninyo si Cristo Jesus ingon nga Ginoo, padayon kamo diha kaniya. 7 Panggamot kamo kaniya ug pagtubo. Pagmalig-on kamo diha sa pagtuo nga gitudlo kaninyo, ug pagpasalamat usab kamo kanunay sa Dios.

Gituli diha kang Cristo, Gilubong diha sa Bautismo

Gipasidan-an sila ni Pablo batok sa mga magtutudlo nga nag-awhag sa pagsunod sa mga tulumanong Judio, nga nagtudlo sa pagsimba sa mga anghel ug sa paglikay sa pagkaon og karne. Kining mga butanga nagsunod sa mga tradisyon sa tawo ug sa unang mga pagtulon-an sa relihiyon nga gihatag sa Kasugoan ni Moises; apan ang ilang kaluwasan nahingpit diha kang Cristo, nga mao ang labing gamhanang Ulo ug Magmamando sa tanang binuhat, bisan unsa pa ang ilang ranggo. Diha kaniya, ug dili diha sa mga anghel, gituli usab sila, ug pinaagi sa buhat sa Balaang Espiritu gihatagan silag gahom sa pagsalikway sa tanang binuhatan sa makasasala nga unod. Gipakita kini kanila pinaagi nianang tulumanon nga mahimong isipon nga mao ang pagtuli nga gikinahanglan ni Cristo diha sa ebanghelyo: diha niini gilubong sila ilalom sa tubig aron mamatay ngadto sa sala, maingon nga si Cristo gilubong ilalom sa yuta tungod sa sala, ug gibanhaw sila uban kaniya gikan sa tubig ngadto sa espirituhanong kinabuhi, pinaagi sa pagtuo sa katingalahang gahom sa Dios, nga nagbanhaw usab kang Cristo gikan sa lubnganan sa kamatayon ngadto sa kinabuhing walay kataposan. Ug ang mga dili Judio usab, nga patay sa mga sala ug sa pagkadili-tinuli sa unod, gibuhi sa Dios uban kaniya pinaagi sa iyang Espiritu ngadto sa kinabuhing walay kataposan. Gipapas niya ang sinulat nga kodigo sa mga tulumanon nga misupak sa Judio ug sa dili Judio ug sa ilang kaluwasan, kay gipailalom silang tanan niini sa tunglo sa walay kataposang kamatayon tungod sa sala. Ug sa nahikawan na niya sa ilang pagdumala ang mga magmamando ug ang tinudlong mga kagamhanan sa kangitngit, gipadayag niya sa tanan ang iyang pagdaog, nga nagmadaugon batok sa ilang gahom pinaagi sa iyang mahimayaong pagkabanhaw gikan sa lubnganan.

Mga Taga-Colosas 2:8–15

8 Pagbantay sa mga tawo nga buot modala kaninyo sa ilang grupo sa pinilusopo nga pamaagi ug malimbongon nga mga pagtulon-an. Kini nga mga pagtulon-an dili gikan kang Cristo kondili napanunod lang nila sa mga katigulangan ug sa mga kalibotanon lang nga pamaagi.

9 Ang tinuod, si Cristo nahimong tawo, apan bisan pa niini, anaa gihapon kaniya ang iyang pagka-Dios. 10 Ang madagayaon nga kinabuhi anaa kaninyo tungod kay kamo anaa kang Cristo nga mao ang naggahom sa tanan nga espiritu nga naghari ug adunay gahom.

11 Tungod kay kamo anaa kang Cristo, natuli na kamo. Apan dili sama sa pagtuli sa mga Judio nga adunay ilang kuhaon sa lawas sa tawo, kondili ang gikuha ni Cristo mao ang daotang mga tinguha sa inyong lawas nga makasasala. 12 Kay ang pagbautismo kaninyo nagkahulogan nga gilubong kamo uban ni Cristo. Ug tungod kay anaa na kamo kang Cristo, gibanhaw usab kamo uban kaniya, kay nagtuo kamo sa gahom sa Dios nga nagbanhaw kaniya.

13 Kaniadto, mga patay kamo atubangan sa Dios tungod sa inyong makasasala nga kinabuhi. Apan karon gihatagan kamog kinabuhi sa Dios uban ni Cristo. Gipasaylo niya ang tanan natong mga sala. 14 Adunay tulubagon unta kita sa Dios tungod kay wala nato matuman ang iyang mga kasugoan. Apan pinaagi sa pagpalansang ni Cristo sa krus gipapas sa Dios ang listahan sa atong mga sala, ug karon dili na kita silotan. 15 Didto usab sa krus gipildi sa Dios ang mga espiritu nga naghari ug adunay gahom, ug gipakita niya sa tanan nga sila nabihag na niya.

Ang Pagkaon ug mga Pista mga Landong ni Cristo

Kay ang katawhan giluwas gikan sa gahom sa sala ug sa walay kataposang kamatayon pinaagi kang Cristo lamang, giawhag sila ni Pablo nga dili motugot nga hukman sila ni bisan kinsa tungod sa mga kalainan tali sa mga pagkaon ug mga ilimnon diha sa Kasugoan ni Moises, o tungod sa mga pista ug mga Adlaw nga Igpapahulay niini. Kining mga pagtuman mga hulagway o mga landong lamang sa maayong mga butang nga umaabot; ang ilang katinuoran natuman sa hingpit diha sa persona ni Cristo ug sa espirituhanong mga panalangin sa iyang relihiyon. Ug kay si Cristo lamang, pinaagi sa halad sa krus, gihimong Ulo ug Magmamando sa tanang butang ug ang paagi sa kaluwasan, gipasidan-an niya sila nga dili magpalimbong sa ilang bakak nga mga magtutudlo o mga pilosopo aron magpakaaron-ingnon sa pagpaubos pinaagi sa pagsimba sa mga anghel, nga mapangahason nga nangusisa sa mga butang sa dili makita nga kalibotan ug nagpasigarbo sa walay sulod nga kahibalo sa ilang kaugalingong kalibotanong mga hunahuna. Ang maong mga tawo wala moila kang Jesus Cristo ingong bugtong Manluluwas ug Magmamando sa katawhan, nga gikan kaniya ang iyang tibuok lawas, ang iglesia, nagadawat og espirituhanong pagkaon ug kusog ug gihiusa, ug nagatubo sa grasya ug pagkabalaan samtang nagkadaghan ang mga gasa sa iyang Balaang Espiritu.

Mga Taga-Colosas 2:16–19

16 Busa ayaw pasagdi nga diktahan kamo ni bisan kinsa kon unsa ang angay ninyo nga kaonon o imnon, o unsa ang angay ninyong buhaton sa mga pista sa pagsubang sa bulan o sa Adlaw nga Igpapahulay. 17 Kini nga mga tulomanon anino lang sa mga gipaabot kaniadto nga mao si Cristo. 18 Adunay mga tawo usab nga nagpasigarbo nga nakakita kuno sila ug mga panan-awon, ug buot nilang pugson ang uban nga magpakaubos ug mosimba sa mga anghel. Ayaw kamo pagpadaog niana nga mga tawo. Walay kapuslanan ang ilang pagpasigarbo, kay tawhanon lang kana nga mga panghuna-huna. 19 Dili nila gusto nga magpasakop kang Cristo nga atong ulo nga mao ang naghatag kanato nga iyang lawas sa mga kinahanglanon, iyang gihiusa ang mga bahin sa lawas sama sa usa ka lawas nga gisuportahan ug gihiusa pinaagi sa mga lutahan ug mga ugat niini, ug pinaagi niini nagtubo kita sumala sa kabubut-on sa Dios.