Misulat si Pablo kang Filemon

Gisulat ni Pablo ang iyang sulat ngadto sa iyang higala nga si Filemon, aron mangamuyo kaniya alang sa iyang ulipon nga si Onesimo, nga milayas gikan sa pag-alagad sa iyang agalon ug miadto sa Roma. Niadtong siyudara si Onesimo nahimong Cristohanon pinaagi sa pag-alagad ni Pablo.

62 human matawo si Cristo

Biblica® Open Ang Pulong sa Dios™ (OCCB)

Nangumusta si Pablo kang Filemon

Sa pagsulat bahin sa usa ka pribadong butang, nakigsulti si Pablo kang Filemon isip usa ka higala, ug dili uban sa katungdanan ug awtoridad sa usa ka apostol. Nakig-uban si Timoteo sa pagpangumusta kang Filemon, sa hinigugmang si Apia, kang Arquipo (mga taga-Colosas 4:17), ug sa iglesia sa iyang balay. Gihatag ni Pablo ang iyang panalangin. Gisultihan niya si Filemon nga kanunay siyang nagpasalamat sa Dios diha sa iyang mga pag-ampo tungod sa pagtubo sa pagtuo ni Filemon kang Jesus Cristo ug sa iyang paghigugma sa mga igsoong Cristohanon. Nag-ampo usab siya nga ang pagpaambit ni Filemon sa iyang pagkamanggihatagon, nga bunga sa dakong pagtuo, mahimong epektibo sa pagpaila sa uban sa matag maayong kinaiya nga anaa kaniya diha kang Cristo Jesus. Kay sila mismo adunay dakong kalipay ug kahupayan tungod sa iyang gugma, ilabina tungod sa kabos nga mga balaan nga gipapahawa gikan sa ilang mga panimalay tungod sa ngalan ni Cristo, nga naglibot sa pagsangyaw sa Maayong Balita, ug nga gitabangan pinaagi sa bahandi ni Filemon.

Filemon 1:1–7

1 Gikan kang Pablo nga binilanggo tungod kang Cristo Jesus.

Ako ug si Timoteo nga atong igsoon diha kang Cristo nangumusta kanimo Filemon isip pinalangga namo nga igsoon ug kauban sa pagpangalagad. 2 Nangumusta usab kami kang Apia nga atong igsoon, kang Arquipo nga atong kauban isip sundalo ni Cristo, ug sa tanang mga tumutuo nga nagtigom diha sa imong balay aron sa pagsimba sa Dios.

3 Hinaut nga madawat ninyo ang grasya ug kalinaw gikan sa Dios nga atong Amahan ug kang Ginoong Jesu-Cristo.

4 Mapasalamaton ako kanunay sa Dios sa matag ampo ko alang kanimo, 5 tungod kay nadungog ko nga lig-on ang imong pagtuo kang Ginoong Jesus ug mahigugmaon ka sa tanang katawhan sa Dios. 6 Giampo ko nga ang imong pagkamanggihatagon nga bunga sa imong pagtuo mopalambo sa imong pagsabot ug kasinatian sa matag panalangin nga nahimong ato tungod kay anaa kita kang Cristo. 7 Minahal ko nga igsoon, tungod sa imong paghigugma sa mga katawhan sa Dios nadasig sila, ug kini nakapalipay ug nakapadasig usab kanako.

Nangamuyo si Pablo alang kang Onesimo

Gipahayag ni Pablo nga, tungod sa iyang gugma kang Filemon alang sa maloloy-on ug manggihatagong mga paningkamot niini, bisan tuod isip apostol ni Cristo mahimo niyang sugoon kini sa pagbuhat sa matarong sa butang nga iyang hisgotan, gipalabi niya ang pagpangamuyo kaniya, pinaagi sa iyang kaugalingong gugma kang Filemon ug sa gugma nga gipakita ni Filemon ngadto sa mga balaan, alang sa iyang anak nga si Onesimo, nga pinaagi kaniya nahimong bag-ong binuhat sa espirituhanong paagi ug nga iyang gipabalik sumala sa iyang kaugalingong tinguha. Nangamuyo si Pablo, “Busa dawata siya sa imong panimalay. Siya daw mao gayod ang akong kasingkasing, akong anak, usa ka bahin sa akong kaugalingon. Mapuslanon kaayo siya kanako nga buot ko untang ipabilin siya uban kanako aron moalagad kanako, nga imong espirituhanong amahan, samtang ginapos ako tungod sa Maayong Balita, ug aron buhaton ang imong buhaton unta kon ania ka sa Roma. Apan kon wala ko mahibaloi ang imong hunahuna bahin niini, dili ko siya ipabilin, aron ang kaayo nga ipakita kanako pinaagi sa pagpasaylo kaniya dili gikan sa pagpugos kondili sa imong kaugalingong maayong kabubut-on. Kay mibiya siya sa makadiyot aron, pinaagi sa pagbuot sa Dios, ikabalik siya kanimo hangtod sa kahangtoran: dili na isip ulipon, kondili isip hinigugmang igsoon diha sa Ginoo. Hinigugma ko siya pag-ayo, apan labi na gayod nimo, isip imong kabtangan ug kabahin sa imong panimalay, ug karon nahimo nang sakop sa imong langitnong panimalay, ang iglesia sa imong balay. Kon giisip mo ako nga kaambit sa imong paghigugma, dawata siya sama sa imong pagdawat kanako, kay daw kabahin siya nako, ug sa pagdawat kaniya gidawat usab nimo ako. Kon nakasala siya kanimo o adunay bisan unsang utang kanimo, ipatungod kining tanan sa akong ngalan. Bayran ko ang tanan niyang utang kanimo, ug pinaagi sa akong kaugalingong sinulat mosaad ako nga bayran ka, kay dili ko gusto nga ihatag kining pabor tungod sa kadako sa imong utang kanako, bisan tuod utang nimo kanako ang imong kaugalingon mismo, ang imong kinabuhi isip Cristohanon. Busa tugoti ako nga makabaton ug pipila ka kaayohan gikan kanimo diha sa Ginoo: tagbawa niini ang lalom nga pangandoy sa akong kalag, ug dawata siya pag-usab sa imong panimalay. Kay masaligon ako sa imong pagkamasinugtanon, tungod sa akong nahibaloan bahin sa imong mga hiyas isip Cristohanon, misulat ako kanimo, nga bug-os nga nagtuo nga buhaton mo bisan pa ang labaw sa akong gipangayo.” Gipadala niya ang mga pangumusta ni Epafras, nga ilang alagad, ug sa uban nga kauban niya, ug gitapos niya kini sa iyang panalangin kang Filemon ug sa iglesia sa iyang balay.

Filemon 1:8–25

8-9 Nasayod ako nga tungod sa katungod nga gihatag kanako ni Cristo makasugo ako kanimo sa angay mong buhaton. Apan tungod kay gihigugma ka nako, mohangyo na lang ako kanimo. Ingon nga usa ka tigulang ug binilanggo nga alagad ni Cristo Jesus, 10 nanghangyo ako kanimo alang kang Onesimo, nga giisip kong akong anak. Nahimo niya ako nga iyang amahan samtang ania ako dinhi sa bilanggoan. 11 Kaniadto wala siyay kapuslanan alang kanimo, apan karon duha na kita nga makapahimulos kaniya.

12 Karon pabalikon ko diha kanimo ang akong minahal nga si Onesimo. 13 Gusto ko unta nga magpabilin na lang siya uban kanako aron pinaagi kaniya matabangan mo ako samtang ania pa ako sa bilanggoan tungod sa akong pagwali sa Maayong Balita. 14 Apan dili ko kini buhaton nga walay pagtugot gikan kanimo, aron dili pinugos ang pagtabang mo kanako. Gusto ko nga kon motabang ka man gayod, motabang ka nga kinasing-kasing.

15 Pagbuot tingali sa Dios nga mahilayo una si Onesimo kanimo, aron nga sa pagbalik niya dili na gayod kamo magkabulag hangtod sa hangtod. 16 Karon dili na siya ulipon lamang, kondili imo pang minahal nga igsoon sa pagtuo. Gimahal ko siya, apan mas labaw mo siyang mahalon tungod kay karon dili lang siya imong ulipon, kondili imo usab nga igsoon diha sa Ginoo.

17 Busa, kon giila mo ako nga imong kauban sa pagtuo, dawata siya sama sa imong pagdawat kanako. 18 Kon nakasala siya o nakautang kanimo ako ang mobayad niana. 19 Ako si Pablo ang nangunay sa pagsulat niini. Ako ang mobayad kon aduna siyay utang kanimo. Hinuon nasayod ka man nga aduna ka usab dako nga utang kanako, kay pinaagi kanako nadawat mo ang kaluwasan. 20 Busa Filemon, tumana kining akong gihangyo kanimo tungod kay managsama kita nga nagtuo sa Ginoo. Lipaya ako isip imong igsoon kang Cristo. 21 Dako ang akong pagsalig nga tumanon mo ang akong gihangyo, mao nga nagsulat ako kanimo. Ug nagtuo ako nga labaw pa gayod niining akong gihangyo ang imong buhaton ngadto kaniya.

22 Aduna pa gayod akoy ihangyo kanimo. Kon mahimo andami ako sa akong kasak-an, kay nagsalig ako nga pinaagi sa inyong mga pag-ampo makaanha ako diha kaninyo.

23 Ang akong kauban nga si Epafras nga nabilanggo usab tungod kang Cristo Jesus nangumusta kanimo.

24 Nangumusta usab ang akong mga kauban sa pagpangalagad nga sila si Marcos, Aristarco, Demas, ug Lucas.

25 Hinaut nga ang grasya sa atong Ginoong Jesu-Cristo mag-uban kaninyo.