Misulat si Judas ngadto sa Iglesia
Misulat si Judas sa iyang sulat aron pasidan-an ang Cristohanong iglesia batok sa makuyaw nga mga pagtulon-an sa bakak nga mga magtutudlo nga mitungha na, nga naghimo sa pagtulon-an bahin sa grasya nga pagdasig sa imoralidad, ug aron awhagon sila nga mangupot pag-ayo sa pagtuo ug sa pagkabalaan.
66 human matawo si Cristo
Biblica® Open Ang Pulong sa Dios™ (OCCB)
Nangumusta si Judas sa mga Gitawag
Gipahinungod ni Judas ang iyang sulat ngadto sa tanan nga gitawag, gibantayan, ug gigahin alang sa Dios pinaagi sa pagtuo kang Jesu Cristo. Gihatag niya ang iyang panalangin.
1 Ako si Judas, igsoon ni Santiago ug alagad ni Jesu-Cristo.
Nangumusta ako kaninyong mga tinawag sa Dios, kamo nga gihigugma sa Dios nga Amahan ug giampingan ni Jesu-Cristo.
2 Hinaut nga madawat ninyo ang dugang pa gayod nga kaluoy, kalinaw ug gugma sa Dios.
Giawhag Sila ni Judas nga Makigbisog alang sa Pagtuo
Sa pagkadungog sa makadaot nga mga pagtulon-an sa bakak nga mga magtutudlo, kusganong giawhag ni Judas ang mga Cristohanon nga makigbisog alang sa pagtuo nga gitugyan ni Jesu Cristo ngadto sa mga apostoles ug mga propeta pinaagi sa Espiritu. Kay adunay mga tawong dili diosnon nga misulod sa iglesia sa tago. Nagtudlo sila nga dako kaayo ang kaayo sa Dios nga ang mga tawo nga adunay pagtuo makasala nga dili silotan, ug gilimod nila ang Amahan ug ang Anak (1 Juan 2:22). Ang ilang pagkahinukman sa silot gitagna na sa balaod sa Dios sukad pa gayod sa sinugdanan. Aron pamatud-an nga sayop kining makuyaw nga mga pagtulon-an, gipahinumdoman sila ni Judas sa silot nga gipahamtang bisan sa piniling katawhan sa Dios tungod sa ilang mga sala (itandi ang Numeros 14:23 sa mga Hebreo 3:18–19); sa silot nga gitagana alang sa mga anghel nga, tungod kay wala matagbaw sa ilang kahimtang, misulay sa pagpataas sa ilang kaugalingon ug mibiya sa ilang gitakdang mga puloy-anan; ug sa hingpit ug walay kataposang kalaglagan sa mga siyudad sa Sodoma ug Gomora. Gipakita niya nga kining bakak nga mga magtutudlo ug ang ilang mga sumusunod, pinaagi sa samang mga sala sa pagkadili matinuohon, pagkadili masinugtanon, ug imoralidad, magpahamtang sa samang silot sa ilang kaugalingon. Gibutangbutangan o gipasipalahan nila ang tanang natukod nga awtoridad, bisan tuod si Miguel nga pangulong anghel, nga labaw kaayo kanila, wala gani mopasaka ug mapasipalahong sumbong batok sa yawa, kondili nagtugyan kaniya sa paghukom sa Dios. Gipasipalahan nila ang mga balaod ug mga maghuhukom, kay wala sila mahibalo sa gamit ug gigikanan niini. Sama sa mga mananap nga walay pangatarongan, gimandoan sila sa ilang kinaiyanhong mga pagbati, ug gilaglag nila ang ilang kaugalingon pinaagi sa pagpatuyang sa ilang mananapnong mga gana. Gisunod nila ang panig-ingnan ni Cain, nga naglaglag sa mga kalag sa ilang mga igsoon; ni Balaam, pinaagi sa pagtuis sa pulong sa Dios aron makaganansiya; ug ni Kora ug sa iyang mga kauban, pinaagi sa pagsupak sa mga apostoles ug mga alagad ni Cristo sama sa pagsupak sa mga kauban ni Kora kang Moises ug Aaron. Sigurado gayod silang malaglag sama kang Kora ug sa iyang mga sumusunod.
3 Mga hinigugma, gusto ko gayod unta nga magsulat kaninyo bahin sa kaluwasan nga atong giambitan, apan nahuna-hunaan ko nga mas kinahanglan gayod nga sulatan ko kamo ug nag-awhag nga magmaisogon sa pagpakigbatok sa mga tawo nga buot motuis sa mga pagtulon-an mahitungod sa atong pagtuo. Kini nga mga pagtulon-an walay pagkausab ug gihatag kini sa Dios sa mga tawo nga iyang gigahin. 4 Sultian ko kamo niini tungod kay adunay mga tawo nga sa hilom miipon diha kaninyo. Dili sila diosnon ug tuison nila ang tinuod nga mga pagtulon-an mahitungod sa grasya sa atong Dios aron makapatuyang sila sa pagbuhat ug malaw-ay. Gilimod nila si Jesu-Cristo nga mao lamang ang atong Agalon ug Tag-iya. Nahisulat nang daan kaniadto pa nga kini sila silotan.
5 Bisan nasayod na kamo, gusto ko pa gihapon kamong pahinumdoman nga giluwas sa Ginoo ang mga Israelita sa Ehipto, apan sa kaulahian gipamatay niya ang uban kanila tungod kay wala sila motuo kaniya. 6 Hinumdomi usab ninyo ang mga anghel nga wala magpabilin sa ilang naandang katungdanan, ug mibiya hinuon sa ilang puloy-anan. Mao kadto nga gipagapos sila sa Dios sa mga kadena nga dili mabugto ug gibilanggo sa lawom ug mangiob nga dapit hangtod nga moabot ang adlaw nga hukman sila sa Dios. 7 Hinumdomi usab ninyo ang mga tawo sa Sodoma ug Gomora ug ang kasikbit nga mga lungsod niini. Nagpakasala usab sila sama niadtong mga anghel. Kay gusto sa mga tawo sa Sodoma ug Gomora nga makighilawas sa dili nila asawa o bana o bisan gani sa sama nilang lalaki o babaye. Kadtong kalayo nga gisilot kanila pasidaan ngadto sa mga daotan nga sa ulahing mga adlaw adunay silot diha sa kalayo nga walay pagkapalong.
8 Ingon usab niini nga mga tawo ang giingon ko nga miipon sa hilom diha kaninyo. Adunay mga panan-awon sila nga nagtukmod kanila sa pagpakasala sa ilang kaugalingon nga lawas. Ug tungod usab niining ilang mga panan-awon, dili sila magpasakop sa Ginoong Dios ug gitamay nila ang gamhanan nga mga binuhat. 9 Bisan gani si Miguel nga pangulong anghel wala maghimo ug sama niana. Kay paglalis nila sa Yawa kon kinsa kanila ang mokuha sa patayng lawas ni Moises, wala siya mangahas nga hukman si Satanas nga silotan tungod sa iyang pagpasipala kang Moises. Ang giingon lang niya, “Ang Ginoo Dios ang mobadlong kanimo!” 10 Apan kana nga mga tawo nagtamay sa mga butang nga wala nila masabti. Sama sila sa mga mananap nga walay huna-huna, kay wala silay lain nga gisunod kondili ang ilang naandan nga mga gibati, nga maoy maglaglag kanila.
11 Alaot sila! Kay gisunod nila ang batasan ni Cain. Ug gisunod usab nila si Balaam, kay bisan nasayran nila nga daotan ang ilang gibuhat nagpadayon pa gihapon sila tungod sa ilang kahakog sa kuwarta. Sama usab sila kang Kora nga nagrebelde sa Dios, busa silotan usab sila sama kaniya.
Ang Bakak nga mga Magtutudlo mga Panganod nga Walay Tubig
Gisultihan ni Judas ang mga Cristohanon nga kining mga magtutudlo makauulaw sa ilang mga salosalo sa gugma, nga nagpatuyang sa ilang mga gana. Gitandi niya sila sa mga panganod nga walay tubig (Deuteronomio 32:2): ang ilang katungdanan nagsaad ug maayong pagtulon-an, apan wala silay gihatag, ug gianod-anod sila sa ilang mga pangibog. Sakit kaayo sila mismo nga daotan gayod ang ilang mga pagtulon-an. Patay sila sa kinaiyanhon ug espirituhanong paagi, giibot tungod kay walay bunga. Bangis ug mapintas sila sama sa mga balod sa dagat, nga nagpaawas sa ilang kaugalingong pagkadaotan sama sa bula, ug dili makanunayon ug walay kahusay sa ilang paggawi (Gipadayag 1:16; 2:1). Kay walay kahayag, gitagana sila alang sa walay kataposang kangitngit. Batok usab kanila, sumala sa karaang tradisyon, nanagna si Enoc nga ikapito gikan kang Adan (gitawag sa ingon aron mailhan siya gikan kang Enoc nga anak ni Cain, nga mao ang ikatulo), sa dihang gitagna niya ang pagkahinukman sa silot sa mga daotan sa iyang panahon ug ang ilang kalaglagan pinaagi sa Lunop. Kay kining bakak nga mga magtutudlo, sama sa mga tawo sa wala pa ang Lunop, nagbagulbol sa gikatakda kanila sa pagdumala sa Dios ug sa mga pagpugong nga gipahamtang kanila. Mapahitas-on usab sila ug rebelyoso, nga nag-ulog-ulog sa mga tawo alang sa ilang kaugalingong ganansiya.
12 Kana nga mga tawo nagdaot sa inyong panagtigom sa pagpangaon isip managsoon diha kang Cristo. Kay nagpatuyang lang silag kaon ug inom ug wala silay kaulaw. Ang ila lang kaugalingon ang ilang gihuna-huna. Sama sila sa panganod nga walay dalang ulan ug gipalid sa hangin. Sama usab sila sa kahoy nga wala mamunga bisag panahon sa tingpamunga. Gipangibot sila ug patay na gayod. 13 Sama sila sa kusog nga balod, ug ingon nga makita ang bula nga mogawas sa mga balod, makita usab ang ilang mga makauulaw nga binuhatan. Sama sila sa mga bitoon nga nahisalaag. Busa adunay lugar nga mangitngit kaayo nga gitagana alang kanila. Ug didto sila sa walay kataposan.
14 Si Enoc nga ikaunom nga kaliwat ni Adan nanagna na bahin kanila. Miingon siya, “Moabot ang Ginoo kauban sa iyang linibo ka mga anghel 15 sa paghukom sa tanan, ug sa pagsilot sa mga dili diosnon tungod sa ilang daotan nga mga binuhatan, ug tungod sa mga daotan nga pulong nga gisulti nila batok kaniya.” 16 Kana nga mga tawo mga bagulbolan. Dili sila kontento sa ilang kahimtang, ang ila lang kaugalingon nga mga tinguha ang ilang gipalabi, mga hambogiro sila, ug giulog-ulogan nila ang uban aron makuha nila ang ilang gusto.
Hinumdomi ang Gitagna sa mga Apostoles
Imbes mosunod sa bakak nga mga magtutudlo, giawhag sila ni Judas nga hinumdoman ang mga pagtulon-an nga gihatag kanila sa mga apostoles. Gitagna usab sa mga apostoles ang pag-abot niining mga mabiaybiayon nga puno sa pangibog (2 Pedro 3:2), nga mibulag sa ilang kaugalingon gikan sa tinuod nga mga tinun-an ni Cristo, nga nag-angkon nga mas nalamdagan sila, apan sa pagkatinuod kalibotanon lamang nga mga tawo nga walay Espiritu. Apan ang mga Cristohanon kinahanglan magpalig-on sa ilang kaugalingon ug sa usag usa diha sa mga pagtulon-an ni Cristo ug sa mga apostoles, nga naghimo sa mga tawo nga espirituhanon ug balaan. Kinahanglan silang mag-ampo sa Dios ubos sa paggiya sa Espiritu Santo, magpadayon sa ilang kanunayng paghigugma ngadto sa Dios, ug magpaabot sa kapasayloan gikan kang Cristo, uban sa kinabuhing walay kataposan. Kinahanglan nilang ilain ang mga nahisalaag tungod sa pagkawalay alamag ug kahuyang gikan sa mga nahisalaag tungod sa garbo ug daotang kasingkasing. Kinahanglan nilang tul-iron sa kalumo ang unang grupo, ug luwason ang uban gikan sa kalaglagan sa sala pinaagi sa gahom sa kahadlok, nga magpadayon sa labing dakong pagdumot sa ilang mga sala, aron sila mismo dili matakdan niini.
17 Apan mga hinigugma, hinumdomi ninyo ang giingon kaninyo kaniadto sa mga apostoles sa atong Ginoong Jesu-Cristo. 18 Miingon sila, “Sa ulahing mga adlaw motungha ang mga tawong magbiay-biay kaninyo, ug ang ilang sundon mao lang ang ilang daotan nga mga tinguha.” 19 Mao kana nga mga tawo ang gahimo ug pamaagi nga kamong mga tumutuo magkabahin-bahin. Gigamhan sila sa ilang tawhanong kinaiya. Wala kanila ang Espiritu.
20 Apan kamo mga hinigugma, paglig-onay kamo sa inyong pagtuo nga gikan sa Dios. Pag-ampo kamo nga giniyahan sa gahom sa Espiritu Santo. 21 Pabilin gayod kamo diha sa gugma sa Dios samtang naghulat kamo sa kinabuhi nga walay kataposan nga ihatag sa atong Ginoong Jesu-Cristo tungod sa iyang kaluoy.
22 Kaloy-i ninyo ang mga nagduha-duha sa ilang mga pagtuo. 23 Tabangi ninyo ang uban aron maluwas sila gikan sa silot, sama nga nagsakmit kamo sa usa ka butang nga hapit nang masunog. Kaloy-i ninyo bisan ang mga tawo nga daotan ug binuhatan, apan kapungti ninyo ang ilang mga binuhatan. Pagbantay kamo kay bisan gani ang ilang mga bisti hugaw atubangan sa Dios.
Gitugyan Sila ni Judas ngadto sa Dios
Gitapos ni Judas ang iyang sulat pinaagi sa pagtugyan kanila ngadto sa Dios, nga mao lamang ang makapanalipod kanila gikan sa pagkatakod sa sala ug sayop nga pagtulon-an, ug pinaagi sa iyang pagdayeg sa Dios nga atong Manluluwas, kansang himaya ug gahom molungtad sa tanang panahon ug sa kahangtoran.
24 Ang Dios makahimo sa pagbantay kaninyo aron dili kamo mahulog sa pagpakasala, ug madala niya kamo nga walay ikasaway ug malipayon gayod ngadto sa iyang presensya! 25 Dalaygon gayod siya! Siya lang gayod ang Dios ug atong Manluluwas pinaagi kang Jesu-Cristo nga atong Ginoo. Kaniya ang himaya, pagkahalangdon, gahom, ug katungod sukad pa sa sinugdan, karon, ug sa walay kataposan! Amen.