Nagtudlo ug Nang-ayo si Jesus sa Daghang mga Tawo sa Daplin sa Dagat

Nagtudlo ug nang-ayo si Jesus sa daghang mga tawo sa daplin sa Dagat sa Galilea.

Dinhi makita nato ang Mesiyas nga nagpili sa napulog duha ka apostoles ug nagpahayag sa Wali sa Bukid ngadto kanila ug sa mga panon sa katawhan.

27 hangtod sa 29 human matawo si Cristo

Biblica® Open Ang Pulong sa Dios™ (OCCB)

Mateo 12:15–21

12:15 Apan nahibaloan ni Jesus ang plano sa mga Pariseo busa mibiya siya niadto nga dapit. Daghan ang nagsunod kaniya ug giayo niya ang tanang mga masakiton.

16 Gipasidan-an niya sila nga dili mosulti ngadto sa uban bahin kaniya. 17 Katumanan kini sa giingon ni Propeta Isaias mahitungod kaniya:

18 “Mao kini ang akong gipili nga alagad.

Gimahal ko siya ug nalipay gayod ako kaniya.

Gamhan ko siya pinaagi sa akong Espiritu.

Ug sultihan niya ang mga tawo sa tanan nga nasod bahin sa katarong.

19 Dili siya makiglalis sa mga tawo, o mosinggit,

ni madungog diha sa kadalanan ang iyang tingog.

20 Dili niya pasagdan ang mga luya sa pagtuo,

kay tabangan niya ang tanan bisan ang gamay ra gayod ug pagtuo.

Dili siya moundang hangtod matuman ang mga sugo sa Dios.

21 Ug ang iyang pangalan

mahimong paglaom sa tibuok kalibotan.”

Marcos 3:7–12

3:7 Si Jesus ug ang iyang mga tinun-an miadto sa daplin sa Linaw sa Galilea. Misunod kanila ang daghang mga tawo nga gikan sa Galilea ug Judea. 8 Daghan usab ang gikan sa Jerusalem, sa Idumea, sa tabok Suba sa Jordan ug sa palibot sa Tiro ug Sidon, kay nadungog nila ang iyang gipangbuhat. 9 Tungod sa kadaghan sa mga tawo giingnan niya ang iyang mga tinun-an nga mag-andam ug sakayan alang kaniya, aron aduna siyay masakyan kon magduot kaniya ang mga tawo.

10 Tungod kay daghan na ang iyang gipang-ayo, ang tanan nga adunay sakit nag-ilog sa paghikap kaniya. 11 Ug kon makita siya sa mga tawo nga adunay daotan nga mga espiritu, mohapa sila sa iyang atubangan ug mosinggit, “Ikaw ang Anak sa Dios!”

12 Apan gipahimangnoan gayod niya ang mga daotang espiritu nga dili mosugilon kon kinsa siya.

Gipili ni Jesus ang Napulog Duha ka Apostoles

Human sa usa ka gabii sa pag-ampo, gipili ni Jesus ang napulog duha ka apostoles.

Marcos 3:13–19

3:13 Human niadto, mitungas si Jesus sa bukid ug iyang gitawag ang gusto niya nga pilion, ug miduol sila kaniya.

14 Ug iyang gipili ang dose nga mahimo niyang kauban [nga iya usab gitawag mga apostoles]. Gipadala niya sila aron sa pagsangyaw ug 15 gihatagan niyag gahom sa paghingilin sa mga daotang espiritu.

16 Mao kini ang dose nga iyang gipili:

si Simon (nga iyang ginganlan ug Pedro),

17 sila si Santiago ug si Juan nga mga anak ni Zebedeo (nga ginganlan niya ug Boanerges nga ang buot ipasabot, mga anak sa dalogdog),

18 si Andres,

si Felipe,

si Bartolome,

si Mateo,

si Tomas,

si Santiago nga anak ni Alfeo,

si Tadeo,

si Simon (nga kaniadto rebelde sa gobyerno sa Roma),

19 ug si Judas Iscariote nga sa kaulahian mitraydor kaniya.

Lucas 6:12–16

6:12 Niadtong panahona, mitungas si Jesus sa bukid aron mag-ampo. Ug didto nag-ampo siya sa Dios sa tibuok gabii.

13 Pagkabuntag, gitawag niya ang iyang mga tinun-an ug mipili siya ug dose kanila, ug gitawag niya sila nga mga apostoles.

14 Ang ilang mga ngalan mao

si Simon (nga ginganlan ni Jesus ug Pedro),

si Andres nga iyang igsoon,

si Santiago,

si Juan,

si Felipe,

si Bartolome,

15 si Mateo,

si Tomas,

si Santiago nga anak ni Alfeo,

si Simon nga kaniadto rebelde sa gobyerno sa Roma,

16 si Judas nga anak sa laing Santiago,

ug si Judas Iscariote nga mao ang nagluib kang Jesus.