Nanawagan si Jeremias sa Paghinulsol ug Nagbangotan
Giawhag ni Jeremias ang katawhan sa paghinulsol, ug gibangotan niya ang ilang mga pag-antos samtang nagkaduol ang pagkabihag.
612 sa wala pa si Cristo
Biblica® Open Ang Pulong sa Dios™ (OCCB)
1 Miingon pa gayod ang Ginoo kang Jeremias, 2 “Tindog sa ganghaan sa akong Templo ug isulti kini nga mensahe:
“ ‘Paminaw kamo nga katawhan sa Juda nga nagsulod dinhi sa pagsimba sa Ginoo. 3 Mao kini ang gisulti sa Ginoo nga Makagagahom, ang Dios sa Israel: Usba na ninyo ang inyong mga gawi ug binuhatan, aron padayon ko kamong papuy-on niining dapita. 4 Ayaw kamo pagtuo sa pagpanglingla sa mga tawong nagsigeg ingon nga dili kamo maunsa tungod kay ania kanato ang Templo sa Ginoo.
5 “ ‘Usba na gayod ninyo ang inyong mga gawi ug binuhatan. Hatagi ninyog makiangayon nga pagtagad ang matag-usa, 6 ug ayaw na ninyo daog-daoga ang mga ilo, mga biyuda, ug ang mga langyaw nga nagpuyo uban kaninyo. Undangi na ninyo ang pagpamatay sa mga inosenteng tawo, ug ayaw na kamo pagsimba sa ubang mga dios nga makadaot lang kaninyo. 7 Kon buhaton ninyo kini, padayon ko kamong papuy-on niining yuta nga gihatag ko sa inyong mga katigulangan hangtod sa hangtod. 8 Apan tan-awa kon unsay inyong gihimo! Nagsalig kamo sa bakak nga mga pulong nga dili makatabang kaninyo.
9 “ ‘Mangawat kamo, mopatay, manapaw, manumpa ug bakak, mosunog ug insenso kang Baal, ug mosimba sa ubang mga dios nga wala gani ninyo mailhi. 10 Unya, moduol kamo ug mobarog sa akong presensya dinhi niini nga Templo diin ginapasidunggan ang akong ngalan, ug moingon kamo, “Dili kita maunsa.” Naghuna-huna ba kamo nga dili kamo maunsa sa padayon ninyo nga paghimo sa tanang mangil-ad nga mga butang? 11 Naghuna-huna ba kamo nga kining Templo diin ginapasidunggan ang akong ngalan tago-anan sa mga tulisan? Nakita ko ang tanang ginahimo diha. Ako, ang Ginoo, ang nag-ingon niini.
12 “ ‘Pangadto kamo sa Silo, ang unang dapit diin gipasidunggan ang akong ngalan, ug tan-awa ninyo kon unsay akong gihimo niadto nga dapit tungod sa kadaotan sa akong katawhan nga mga Israelinhon. 13 Samtang ginahimo ninyo kining daotang mga buhat, gibalik-balik ko ang pagpasidaan kaninyo, apan wala kamo maminaw. Gitawag ko kamo, apan wala kamo motubag. 14 Busa ang gihimo ko sa Silo himuon ko usab sa Templo diin ginapasidunggan ang akong ngalan, ang Templo nga inyong gisaligan, nga gihatag ko kaninyo ug sa inyong mga katigulangan. 15 Abugon ko kamo gikan sa akong presensya sama sa gihimo ko sa inyong mga paryente, ang katawhan sa Israel.’
16 “Busa ikaw, Jeremias, ayaw pag-ampo alang niining mga tawhana. Ayaw gayod pagpakiluoy ug paghangyo ka nako alang kanila, kay dili ka nako paminawon. 17 Wala mo ba makita ang ilang gipanghimo diha sa mga lungsod sa Juda ug sa mga kadalanan sa Jerusalem? 18 Ang mga kabataan nangahoy, ang mga amahan naghaling sa kalayo, ug ang mga babaye nagmasa ug harina, aron maghimog pan alang sa Rayna sa Langit. Naghalad usab silag ilimnon ngadto sa ubang mga dios sa pagpalagot kanako. 19 Apan ako bay madaot? Dili! Sila mismo ang madaot ug maulawan niini.
20 “Busa ako, ang Ginoong Dios nag-ingon: Ipatagamtam ko ang labihan kong kasuko niining dapita, ngadto sa mga tawo, sa mga kahayopan, sa mga kahoy, ug sa mga abot sa yuta. Ang akong kasuko sama sa kalayo nga dili mapalong.”
21 Nagpadayon sa pagsulti ang Ginoo nga Makagagahom, ang Dios sa Israel, “Kuhaa ninyo ang inyong mga halad nga sinunog uban sa lain pa ninyong mga halad, ug kan-a nalang ninyo ang karne niini. 22 Sa dihang gipagawas ko ang inyong mga katigulangan gikan sa Ehipto dili lang ang paghalad ug mga halad nga sinunog ug uban pang halad ang akong gisugo kanila, 23 gihatag ko usab kanila kining maong sugo: ‘Tumana ninyo ako, ug ako mahimong inyong Dios ug kamo mahimong akong katawhan. Pagkinabuhi kamo sumala sa mga pamaagi nga gisugo ko kaninyo aron mamaayo ang inyong kahimtang!’
24 “Apan wala sila mamati o motuman sa akong gisulti. Gisunod hinuon nila ang gahi ug daotan nilang kasing-kasing. Imbis nga moduol sila kanako, nagpahilayo pa hinuon sila. 25 Gikan pa sa panahon sa pagbiya sa inyong mga katigulangan gikan sa Ehipto hangtod karon, padayon akong nagpadala kaninyo sa akong mga alagad nga propeta. 26 Apan wala kamo maminaw o motuo kanila. Mas gahi pa gani kamog ulo ug mas daotan pa kamog binuhatan kaysa inyong mga katigulangan.
27 “Jeremias, kon isulti mo kining tanan kanila, dili sila maminaw kanimo. Kon tawgon mo sila, dili sila motubag. 28 Busa isulti kini kanila: Mao kini ang nasod nga ang mga katawhan dili motuman sa Ginoo nga ilang Dios, ug dili magpadisiplina. Wala na kanila ang kamatuoran; dili na gani sila mosulti sa tinuod.
29 “O mga taga-Jerusalem, pagpakiskis kamo sa inyong ulo ug ilabay ang inyong buhok sa pagpakita sa inyong pagsubo. Pagbangotan kamo didto sa taas nga mga dapit, kay gisalikway ug gipasagdan na sa Ginoo ang inyong henerasyon nga nagpalagot kaniya.”
30 Miingon ang Ginoo, “Naghimog daotan ang katawhan sa Juda. Gipamutang nila ang ilang mangil-ad nga mga dios-dios didto sa Templo diin ginapasidunggan ang akong ngalan, ug tungod niini nahugawan kini. 31 Nagpatindog usab silag simbahanan diha sa habog nga mga dapit sa Tofet, sa Walog sa Ben Hinom, aron didto nila sunogon ang ilang mga anak ingon nga ilang halad. Wala gayod ako magsugo niini kanila. Wala gani kini moabot sa akong huna-huna. 32 Busa pangandam kamo, kay ako, ang Ginoo, nag-ingon nga moabot ang panahon nga ang mga tawo dili na motawag niining lugara ug Tofet o Walog sa Ben Hinom kondili Kapatagan nga Gipamatay. Kay ipanglubong nila didto ang daghan kaayong mga patay hangtod nga wala nay dapit nga malubngan. 33 Ang mga patayng lawas niini nga katawhan pagakan-on sa mga langgam ug mga mananap, ug walay moabog kanila. 34 Undangon ko ang kamaya ug kasadya diha sa kadalanan sa Jerusalem. Ang malipayon nga tingog sa bag-ong kasal dili na madunggan diha sa mga lungsod sa Juda. Kay mahimong awaaw kining yutaa.”
8:1 Nagpadayon sa pagsulti ang Ginoo, “Nianang adlawa, panghabwaon gikan sa mga lubnganan ang mga bukog sa mga hari ug sa mga opisyal sa Juda, apil ang mga bukog sa mga pari, sa mga propeta, ug sa katawhan sa Jerusalem. 2 Ikatag kini diha sa yuta, ilalom sa kahayag sa adlaw, bulan, ug mga bitoon nga mao ilang gihigugma, gialagaran, gisunod, gidangpan ug gisimba. Dili na tigomon ang ilang mga bukog ug ilubong. Magkatag nalang kini diha sa yuta nga murag tae. 3 Ang mabilin nga buhi niining daotan nga nasod katagon ko ngadto sa ubang mga nasod. Ug didto palabihon pa nilang mamatay kaysa mabuhi. Ako, ang Ginoo nga Makagagahom, ang nag-ingon niini.”
4 Miingon ang Ginoo kanako nga isulti ko kini nga mensahe ngadto sa mga tawo:
“Kon matumba ang tawo, dili ba motindog man siya pagbalik?
Kon nasaag siya, dili ba mobalik man siya sa iyang agi?
5 Apan ngano man nga kamong mga taga-Jerusalem
padayon nga mitalikod kanako?
Nganong dili man ninyo mahimong biyaan
ang mga dios-dios nga gatunto kaninyo ug mobalik kanako?
6 Gipaminaw kog maayo ang inyong gipanulti
ug wala kamoy gisulti nga sakto.
Walay bisan usa kaninyo nga naghinulsol sa iyang kadaotan.
Wala gayoy nakaingon, ‘Unsa kining akong nahimo?’
Tanan kaninyo abtik kaayong magpakasala,
daw mga kabayo kamo nga mipaturatoy ug dagan ngadto sa gira.
7 Ang talabon, ang salampati, ang sayaw, ug ang lapay
nahibalo kon kanus-a mobalhin ngadto
sa ubang mga dapit ug kanus-a sila mobalik,
apan kamong akong mga katawhan wala mahibalo sa akong kasugoan.
8 “Nganong moingon man kamo nga maalamon kamo
tungod kay anaa kaninyo ang kasugoan sa Ginoo,
nga ang tinuod, gituis man kini sa inyong mga magtutudlo?
9 Maulawan gayod ang mga nag-ingon nga maalamon.
Malisang gayod sila kay bihagon man sila,
tungod sa ilang pagsalikway sa akong mga pulong.
Nan, unsa mang matanga sa kaalam ang anaa kanila?
10 Busa ihatag ko sa ubang mga tawo ang ilang mga asawa ug mga uma.
Tungod kay silang tanan, gikan sa labing ubos
hangtod sa labing dungganon, nanglimbong aron makasapi.
Bisan mga propeta ug mga pari nanglimbong usab.
11 Wala nila tagda ang samad sa akong mga katawhan,
bisan ug grabe na kini.
Nag-ingon sila nga maayo ra ang tanan
bisan ang tinuod dili kini maayo.
12 Naulaw ba sila sa ilang mangil-ad nga mga batasan?
Wala! Kay wala na silay ulaw!
Dili man lang gani mahilaw ang ilang mga dagway.
Busa ipaubos sila sa panahon nga sila silotan.
Ako, ang Ginoo,
nag-ingon nga mangalaglag sila sama sa uban.
13 “Laglagon ko gayod sila,
apil ang ilang mga abot nga ubas ug mga igera.
Bisan ang mga dahon niini mangalaya.
Ang gipanghatag ko kanila mawala na.
14 “Unya moingon sila, ‘Unsa pa may atong gihulat?
Dali, mangadto kita sa pinarilan nga mga lungsod
ug didto kita magpakamatay,
kay gihukman na kita nga patyon sa Ginoo nga atong Dios.
Daw sama lang nga gihatagan niya kita ug tubig nga adunay hilo
aron atong imnon, tungod kay nakasala kita kaniya.
15 Nangandoy kitag kalinaw, apan walay kalinaw nga miabot.
Nangandoy kitag kaayohan, apan kalisang ang miabot.
16 Gikan sa Dan mabatian ang pagpangusmo
sa mga kabayo sa mga kaaway.
Sa tingog lang sa ilang mga kabayo
mangurog na sa kahadlok ang tibuok kayutaan.
Mianhi sila aron sa paglaglag niini nga yuta
ug sa tanan nga anaa niini,
ang mga lungsod ug ang tanang mga lumulupyo niini.’ ”
17 Miingon ang Ginoo, “Pamati! Ipadala ko diha kaninyo kining mga kaaway
nga daw sa malala nga mga bitin nga dili mapaamo,
unya pamaakon nila kamo.”
18 Unya miingon ako: Dili gayod mahupay ang akong kasubo.
Sakit gayod ang akong kasing-kasing.
19 Paminawa ang pagpakitabang sa akong mga katagilungsod;
madungog kini sa tibuok kayutaan.
Nag-ingon sila, “Wala na ba sa Jerusalem ang Ginoo?
“Wala na ba dinhi ang Dios nga Hari sa Jerusalem?”
Mitubag ang Ginoo, “Nganong gipalagot ninyo ako
pinaagi sa pagsimba sa mga dios-dios nga walay pulos?”
20 Mireklamo ang mga tawo, “Human na man unta ang ting-init,
ug nahuman na usab ang ting-ani,
apan wala gihapon kami maluwas!”
21 Hilabihan ang akong kasakit tungod sa kasakit
nga nahiagoman sa akong mga katagilungsod.
Nagbangotan ako ug hilabihan ang akong kaguol.
22 Wala bay tambal sa Gilead? Wala bay mananambal didto?
Nganong wala man maayo ang samad sa akong mga katagilungsod?