Nanawagan si Jeremias sa Paghinulsol ug Nagbangotan (continued)

Giawhag ni Jeremias ang katawhan sa paghinulsol, ug gibangotan niya ang ilang mga pag-antos samtang nagkaduol ang pagkabihag.

612 sa wala pa si Cristo

Biblica® Open Ang Pulong sa Dios™ (OCCB)

Jeremias 9–10

1 Kon ang akong ulo tinubdan pa sa tubig,

ug ang akong mga mata tuboran sa mga luha,

mohilak ako adlaw ug gabii alang sa akong

mga katagilungsod nga gipamatay.

2 Kon aduna lang unta akoy kadayonan didto sa disyerto

aron makapalayo ako sa akong mga katagilungsod.

Kay maluibon silang tanan sa Ginoo.

Sama sila sa mga babayeng mananapaw.

3 Miingon ang Ginoo, “Mga bakak ang naggawas

gikan sa mga baba sa akong katawhan,

daw mga udyong kini gikan sa pana.

Bakak ug dili kamatuoran

ang nagpatigbabaw dinhi niini nga yuta.

Migrabe na gayod ang ilang pagpakasala,

ug wala nila ako ilha.”

4 Mao kini ang giingon sa Ginoo: “Pagbantay kamo sa inyong isigka-tawo,

ug ayaw kamo pagsalig sa inyong paryente,

kay ang matag-usa limbongan ug tigbutang-butang.

5 Ang matag-usa manglimbong sa iyang isigka-tawo,

ug walay usa nga nagsulti sa tinuod.

Naanad na ang ilang dila sa pagpamakak,

ug nahago sila sa pagpakasala.

6 Pulos pagpanglimbong ang ilang ginahimo,

ug nagdumili sila sa pag-ila kanako.”

7 Busa ako, ang Ginoo nga Makagagahom nag-ingon:

“Putlion ko ang akong katawhan ug sulayan ko sila.

Kay unsa pa may mahimo ko kanila?

8 Ang ilang mga dila daw makamatay nga mga pana.

Pulos bakak ang ilang gisulti.

Mosulti silag maayo ngadto sa ilang isigka-tawo,

apan sulod sa ilang kasing-kasing nagplano sila sa pagdaot kanila.

9 Dili ko ba diay sila silotan tungod niini?

Dili ko ba diay panimaslan ang nasod nga sama niini?

Ako, ang Ginoo, ang nag-ingon niini.”

10 Miingon ako:

Magminatay ako alang sa mga bukid.

Magbangotan ako alang sa mga sabsabanan sa kamingawan.

Kay naawaaw na kini ug wala nay nangagi niini.

Dili na madungog ang pag-inga sa mga baka, ug mipalayo na

ang mga langgam ug ang ihalas nga mga iro.

11 Kay miingon ang Ginoo,

“Laglagon ko ang Jerusalem,

ug mahimo na lang kining puloy-anan sa ihalas nga mga iro.

Himuon kong awaaw ang mga lungsod sa Juda ug wala nay magpuyo didto.”

12 Nangutana ako sa Ginoo, “Kinsang tawhana nga maalamon ang makasabot niini nga mga hitabo? Kinsay gisaysayan mo bahin niini aron iyang ipasabot kon nganong nalaglag kining yutaa ug nahimong daw disyerto nga wala nay gaagi?”

13 Mitubag ang Ginoo, “Nahitabo kini kay wala nila tumana ang balaod nga akong gihatag kanila. Wala sila mamati kanako o motuman sa akong balaod. 14 Gisunod hinuon nila ang mga tinguha sa gahi nila nga mga kasing-kasing, ug misimba sa mga imahen ni Baal sumala sa gitudlo kanila sa ilang mga katigulangan. 15 Busa ako, ang Ginoo nga Makagagahom, ang Dios sa Israel, nag-ingon nga pakan-on ko kining mga tawhana ug pait nga mga pagkaon ug paimnon ug tubig nga adunay hilo. 16 Katagon ko sila ngadto sa ubang mga nasod nga sila ug ang ilang mga katigulangan wala masuhito. Ipagukod ko sila sa ilang mga kaaway hangtod mahurot silag pamatay.”

17 Nagpadayon sa pag-ingon ang Ginoo nga Makagagahom,

“Pamalandongi ninyo ang mga panghitabo! Panawga ninyo

ang mga babaye nga tigbangotan,

labi na gayod kadtong hanas niini.

18 Padalia sila sa pag-anhi sa pagminatay alang sa akong katawhan

hangtod nga motulo ang ilang mga luha.

19 Paminawa ang pagminatay didto sa Jerusalem. Nag-ingon ang mga tawo,

‘Nalaglag kita! Makauulaw kining nahitabo kanato!

Kinahanglang biyaan ta ang atong yuta

kay gipangguba ang atong mga balay!’ ”

20 Karon, kamong mga babaye, paminawa ninyo ang giingon sa Ginoo.

Paminawa gayod ninyo kini pag-ayo.

Tudloi ninyo ang inyong mga anak nga babaye

ug ang inyong silingan sa pagbangotan

ug sa pag-awit ug mga awit alang sa patay.

21 Miabot ang kamatayon sa atong panimalay

ug sa lig-ong mga bahin sa atong lungsod.

Gipamatay ang mga kabataan nga nagdula sa kadalanan

ug ang mga batan-ong lalaki diha sa mga plasa.

22 Ug miingon ang Ginoo,

“Magkatag ang mga patayng lawas

nga daw sa mga tae diha sa kaumahan,

o daw sa mga uhay nga gigalab sa mga mag-aani,

apan wala nay mohipos niini.”

23 Miingon pa gayod ang Ginoo,

“Dili angayng magpasigarbo sa iyang kaalam ang maalamon,

o ang kusgan sa iyang kusog,

ni ang adunahan sa iyang bahandi.

24 Kon buot siyang magpasigarbo,

mao kini ang angay niyang ipasigarbo:

Nga nakasabot siya ug nakaila kanako

nga mao ang Ginoo nga mahigugmaon,

nga nagbuhat sa husto ug matarong dinhi sa kalibotan,

kay mao kini ang makapalipay kanako.”

25 Miingon pa ang Ginoo, “Moabot ang panahon nga silotan ko ang tanan nga tinuli kansang kinabuhi wala mausab ug 26 ang mga taga-Ehipto, Juda, Edom, Amon, Moab, ug ang tanan nga nagpuyo sa layong dapit. Ang tinuod, ang mga lumulupyo sa tanang mga nasod apil ang tanang katawhan sa Israel murag dili mga tinuli kay dili maayo ang ilang mga kasing-kasing.”

10:1 Kamo nga katawhan sa Israel, paminawa ninyo ang gisulti sa Ginoo. 2 Miingon siya,

“Ayaw kamo pagsunod sa binuhatan sa ubang mga nasod,

ug ayaw kamo kahadlok sa mga timailhan sa langit,

bisan pag ang uban nga mga nasod nahadlok niini.

3 Wala gayoy pulos ang tinuohan nianang mga tawhana.

Nagputol silag kahoy sa kalasangan,

unya kuliton kini sa usa ka magkukulit.

4 Panindoton dayon kini ginamit ang plata ug bulawan,

ug lansangan pag-ayo aron dili matumba.

5 Kini nga mga dios-dios sama sa tawo-tawo sa uma nga dili makasulti.

Kinahanglan pa gayong sakwaton kay dili makalakaw.

Ayaw kamo kahadlok niini nga mga dios-dios

kay dili sila makahimog kadaot ni makahimog maayo.”

6 O Ginoo, wala gayoy sama kanimo.

Gamhanan ka ug halangdon ang imong ngalan.

7 Kinsay dili motahod kanimo,

O Hari sa mga nasod? Takos ka nga tahoron.

Wala gayoy sama kanimo sa tanang mga tawong maalamon

sa nagkalain-laing mga nasod, ug sa tanan nilang mga hari.

8 Mga hungog silang tanan ug mga buang-buang.

Ang mga pagtulon-an sa ilang mga dios-dios nga kahoy walay pulos.

9 Nagpahimo sila sa mga panday ug dios-dios,

ug gipahaklapan nila kini sa mga platero

ug plata nga gikan sa Tarshish

ug bulawan nga gikan sa Ufas.

Unya gisul-oban nila kinig bisti nga kolor asul

ug kolor ube nga tinahi sa mga hanas nga mananahi.

10 Apan ang Ginoo mao ang tinuod nga Dios.

Siya ang buhi nga Dios ug Hari hangtod sa kahangtoran.

Kon masuko siya, matay-og ang kalibotan

ug walay nasod nga makaharong sa iyang kasuko.

11 Sultihi kanang nagsimba sa ubang mga dios niini: “Mahanaw sa kalibotan ang inyong mga dios nga dili maoy nagmugna sa kalibotan ug kalangitan.”

12 Apan ang Dios maoy naghimo sa langit

ug sa kalibotan pinaagi sa iyang gahom ug kaalam.

13 Sa iyang pagmando, naggawas ang mga panganod

ug mga kilat sa kalangitan, ug nag-ulan ug kusog.

Nagpadala siya ug hangin gikan sa iyang mga tipiganan.

14 Mga hungog ug buang-buang ang mga tawong nagsimba sa mga dios-dios.

Maulawan ang mga platero tungod sa ilang mga

dios-dios, kay mini kini. Wala kini kinabuhi.

15 Talamayon kini ug walay pulos.

Sa panahon sa pagsilot malaglag silang tanan.

16 Apan ang Dios ni Jacob dili sama niana.

Siya ang naghimo sa tanang butang, apil ang Israel,

ang katawhan nga iyang gipanag-iyahan.

Ginoo nga Makagagahom ang iyang ngalan.

17 Mga katawhan sa Jerusalem, hiposa ninyo ang inyong mga butang

ug pangandam sa pagbiya,

kay hapit nang sulongon ang inyong siyudad.

18 Kay mao kini ang giingon sa Ginoo,

“Paminaw! Papahawaon ko kamo niining yutaa.

Paantuson ko kamo aron nga matagamtaman ninyo

ang akong kasuko.”

19 Miingon ang mga taga-Jerusalem, “Alaot kita!

Grabe kaayo ang atong samad.

Dili na kini maulian.

Apan kinahanglan nga antoson nato kini.

20 Guba na ang atong tolda;

nangabugto na ang tanang mga higot niini.

Wala na ang atong mga anak.

Wala nay nahibilin aron pagpatindog pag-usab

sa tolda nga atong puy-an.”

21 Nahitabo kini kanato kay mga hungog ang atong mga pangulo.

Wala nila susiha ang kabubut-on sa Ginoo,

busa wala sila mouswag ug ang tanan nilang mga sakop nagkatibulaag.

22 Paminawa ninyo ang balita!

Madungog na ang dahunog sa nagpaingon

nga mga sundalo nga gikan sa amihan!

Laglagon nila ang mga lungsod sa Juda,

ug mahimo na lang kining puloy-anan

sa ihalas nga mga iro.

23 Ginoo, nasayod ako nga ang kinabuhi sa tawo dili iya.

Dili siya makabuot sa iyang kapalaran.

24 Disiplinaha kami, Ginoo, apan ayaw lang intawon palabihi.

Ayaw kini buhata samtang nasuko ka kay basin ug mangahurot kami.

25 Ipatagamtam ang imong kasuko sa mga nasod

ug sa mga katawhan nga wala moila ug modangop kanimo.

Kay gilaglag nila ang mga kaliwat ni Jacob

ug gipangguba ang ilang mga pinuy-anan.