Gitagna ang Pagpaubos ug Pagbayaw sa Mesiyas
Gitagna ang pagpaubos, mga pag-antos, ug pagbayaw sa Mesiyas.
710 sa wala pa si Cristo
Biblica® Open Ang Pulong sa Dios™ (OCCB)
13 Miingon ang Ginoo, “Pamati! Magmauswagon ang akong alagad.
Mahimo siyang inila ug pinasidunggan.
14 Daghan ang mahibulong kaniya.
Kay mausab ang iyang panagway
ug murag dili na kini hitsurag tawo.
15 Hangtod ang mga nasod mahibulong usab kaniya.
Dili makasulti ang mga hari tungod kaniya,
kay makita man nila ug masabtan ang mga butang
nga wala sukad masugilon.”
53:1 Kinsa ang makatuo sa among mensahe?
Kang kinsa gipadayag sa Ginoo ang iyang gahom?
2 Kabubut-on sa Ginoo nga mouswag ang iyang alagad.
Sama kini sa tanom nga nagtubo,
nga nagpanggamot diha sa malang yuta.
Wala siyay kaambong o pamarog nga mahimong
makadani kanato ngadto kaniya.
3 Gibiay-biay siya ug gisalikway sa mga tawo.
Daghan ang iyang nasinati nga mga kasakit ug pag-antos.
Ato siyang gitalikdan, gitamay, ug gipakawalay-bili.
4 Sa pagkatinuod, giantos niya ang mga kasakit
ug mga pag-antos nga alang unta kanato.
Apan abi natog gisilotan siya sa Dios tungod sa iyang mga sala.
5 Ang tinuod, gisamaran siya tungod sa atong mga kalapasan.
Nabun-og siya tungod sa atong pagkadaotan.
Ang silot nga iyang giantos mao ang nakahatag
kanatog maayong kahimtang.
Ug pinaagi sa iyang mga samad kita nangaayo.
6 Kitang tanan sama sa mga karnero nga nasaag;
matag-usa kanato nagpatuyang lang sa pagbuhat sa atong gusto.
Apan siya ang gipaantos sa Ginoo sa silot
nga alang unta kanatong tanan.
7 Gidaog-daog siya ug gisakit,
apan wala gayod siya moreklamo.
Sama siya sa karnero nga gidala sa ihawanan.
Ug sama sa karnero nga walay timik samtang gialotan,
nagpakahilom lang siya.
8 Gidakop siya, gihukman, ug gipatay. Wala gayoy nakaamgo
sa iyang mga katagilungsod nga siya gipatay tungod sa ilang mga sala,
ug giantos niya ang silot nga alang unta kanila.
9 Bisag wala siyay sala nga nahimo ug wala siya nanglimbong,
gilubong siya nga daw usa ka kriminal;
gilubong siya uban sa mga adunahan.
10 Pagbuot sa Ginoo nga sakiton ug paantuson siya.
Bisan tuod ug gihimo sa Ginoo ang iyang kinabuhi
nga halad aron mabayran ang sala sa mga tawo,
makita gihapon niya ang iyang mga kaliwat
ug makaangkon siya ug taas nga kinabuhi.
Ug pinaagi kaniya, matuman ang kabubut-on sa Ginoo.
11 Kon makita niya ang mga bunga sa iyang mga pag-antos,
malipay siya. Miingon ang Ginoo,
“Pinaagi sa iyang kaalam daghan ang pakamatarungon
sa akong matarong nga alagad;
mag-antos siya alang sa ilang mga sala.
12 Busa ihatag ko kaniya ang pasidungog
nga alang sa tawong bantogan ug gamhanan,
kay gihatag niya ang iyang kinabuhi.
Giisip siya nga usa sa mga makasasala.
Nag-antos siya alang sa daghang mga makasasala
ug nag-ampo siya nga pasayloon sila.”
Gitagna ang Pagtubo ug Kadaugan sa Iglesia
1 Miingon ang Ginoo, “Pag-awit,
O Jerusalem, ikaw nga sama sa usa ka babayeng baog.
Pag-awit ug paghugyaw sa kalipay,
ikaw nga wala gayod makasinati sa kasakit sa pagpanganak.
Tungod kay bisan biniyaan ka,
mas daghan pa unya ang imong mahimong anak
kay sa babayeng nagpuyo uban sa iyang bana.
2 Padak-i ug lig-ona ang imong puloy-anan.
Ayaw pugngi ang pagpalapad niini.
3 Kay padak-an ang imong mga utlanan,
sakopon sa imong mga katawhan ang ubang mga nasod,
ug puy-an nila ang mga giabandonang siyudad niini.
4 “Ayaw kahadlok, kay dili ka maulawan.
Malimtan mo na gayod ang kaulawan sa imong pagkabatan-on
ug ingon man sa imong pagkabalo.
5 Kay ako nga imong Magbubuhat mahimong
ingon sa usa ka bana kanimo.
Makagagahom nga Ginoo ang akong ngalan.
Ako, ang Balaan nga Dios sa Israel mao
ang imong Manluluwas.
Gitawag ako
nga ‘Dios sa tibuok kalibotan.’
6 Jerusalem, sama ka sa batan-ong asawa
nga naguol tungod kay gibiyaan sa iyang bana.
Apan karon tawgon ka nako nga mobalik kanako.
7 Sa mubong panahon gibiyaan ka nako,
apan sa dakong kaluoy kuhaon ka nako pag-usab.
8 Tungod sa labihan kong kapungot kanimo,
gitalikdan ka nako sulod sa mubong panahon.
Apan tungod sa akong walay kataposang gugma,
kaloy-an ka nako. Ako, ang Ginoo
nga imong Manluluwas, ang nag-ingon niini.
9 “Alang kanako, sama kini sa panahon ni Noe diin nanumpa ako
nga dili na gayod molunop dinhi sa kalibotan.
Ug karon, nanumpa usab ako
nga dili na gayod ako masuko o mosilot kanimo.
10 Bisag mangatumpag pa ang mga bukid ug mga bungtod,
ang akong gugma magpabilin,
ingon man ang akong kasabotan uban kaninyo nga panalanginan ko kamo.
Ako, ang Ginoo nga naluoy kanimo, ang nag-ingon niini.
11 “O Jerusalem, daw gikuso-kuso ka sa bagyo.
Nag-antos ka ug wala gayoy midasig kanimo.
Apan tukoron ka nako pag-usab sa mga patukoranan nga hinimo gikan
sa mga batong sapiro ug gamiton ko ang mahalong mga bato
sa paghimo sa mga bongbong sa imong balay.
12 Gamiton ko ang mga batong rubi alang sa imong tore,
ug ang matahom nga mga bato sa paghimo
sa imong mga pultahan ug mga paril.
13 Ako mismo ang motudlo sa imong katawhan,
ug magmauswagon gayod sila pag-ayo.
14 Molig-on ka tungod kay magkinabuhi
nga matarong ang imong katawhan.
Mahilayo ka na sa modaog-daog kanimo,
busa wala kanay kahadlokan.
Dili na moduol kanimo ang imong mga kaaway,
busa dili ka na malisang.
15 Kon adunay mosulong kanimo, dili kini akong kagustohan.
Moampo kanimo ang mosulong kanimo.
16 “Pamati! Ako mismo ang naghimo sa mga panday
nga maoy naghuyop sa gabagang uling ug naghimog armas.
Ug ako usab ang naghimo sa mga sundalo
nga naggamit niining mga armas sa pagpanglaglag.
17 Walay hinagiban nga gihimo sa pagpakigbatok kanimo ang makaunsa kanimo.
Matubag mo ang mga sumbong batok kanimo.
Mao kini ang panulondon sa akong mga alagad;
molaban ako kanila.
Ako, ang Ginoo, ang nag-ingon niini.”
Ang Madagayaong mga Panalangin sa Maayong Balita
Ang kahupnganan ug kahalangdon sa mga panalangin sa maayong balita.
1 Miingon ang Ginoo,
“Duol kamo, kamong tanan nga giuhaw, ania ang tubig!
Bisan wala kamoy kuwarta, duol kamo ug kaon!
Dali kamo, kuha kamog bino ug gatas nga walay bayad!
2 Nganong mogasto man kamo sa inyong kuwarta sa dili makaon?
Ug nganong maghago man kamo sa mga butang nga dili makatagbaw?
Pamati kamo kanako ug makakaon kamo
sa lamiang pagkaon ug mabusog gayod kamo.
3 Duol kamo ug pamati kanako aron mabuhi kamo.
Mohimo akog walay kataposang kasabotan uban kaninyo.
Ipakita ko kaninyo ang akong dakong gugma
ug pagkamatinumanon nga gisaad ko kang David.
4 Gihimo ko siyang pangulo sa mga nasod,
ug pinaagi kaniya gipakita ko kanila ang akong gahom.
5 Tawgon ninyo ang mga nasod nga wala ninyo mailhi,
ug magdali-dali sila pag-anha kaninyo.
Kay ako, ang Ginoo nga inyong Dios,
ang Balaan nga Dios sa Israel, nagpasidungog kaninyo.”
6 Dangop kamo sa Ginoo ug tawag kamo kaniya
samtang anaa pa siya nga motabang kaninyo.
7 Pabiyaa na ang mga daotan sa ilang daotang binuhatan
ug ipasalikway ang ilang daotang panghuna-huna.
Pabalika na sila sa Ginoo nga atong Dios
kay kaloy-an niya sila ug pasayloon.
8 Miingon ang Ginoo, “Ang akong panghuna-huna dili
sama sa inyong panghuna-huna.
Ang akong kinaiya dili sama sa inyong kinaiya.
9 Maingon nga mas habog ang langit kaysa yuta,
layo ra usab kaayo ang inyong kinaiya
ug panghuna-huna kay kanako.
10 Ang ulan ug ang snow gikan sa langit
ug dili na kini mobalik didto;
naghatag kinig tubig sa kalibotan,
ug nagpatubo sa mga tanom
nga mohatag ug binhi sa mga magpupugas
ug pagkaon sa mga tawo.
11 Mao usab ang mga pulong nga akong gisulti,
dili kini makawang,
kondili tumanon niini ang akong tumong;
ug molampos kini sa katuyoan sa akong pagpadala niini.
12 Mga Israelinhon, pamiya kamo sa Babilonia
nga malipayon ug malinawon.
Daw sa mag-awit sa tumang kalipay ang mga bukid ug mga bungtod,
ug daw sa mamakpak ang tanang kakahoyan.
13 Manurok ang kahoyng sipres ug mirto ilis sa mga sampinit.
Kining hitaboa maghatag ug pasidungog kanako;
mahimo kining timailhan sa akong pagkagamhanan
hangtod sa kahangtoran.”
56:1 Mao kini ang giingon sa Ginoo,
“Patunhaya ninyo ang hustisya ug buhata ninyo ang matarong,
kay sa dili madugay luwason ko na kamo ug hatagan ug kadaogan.
2 Bulahan ang tawo nga naghimo ug nagtuman niini
ug wala magpasipala sa Adlaw nga Igpapahulay.
Ug bulahan usab ang tawo nga wala maghimog daotan.”
3 Ang mga dili Israelinhon nga nagtugyan sa ilang kinabuhi
sa Ginoo dili angay maghuna-huna nga dili gayod
sila isipon sa Ginoo nga iyang mga tawo.
Ug ang mga kinapon dili angay maghuna-huna nga dili sila mahimong bahin
sa katawhan sa Dios tungod kay dili sila makaanak.
4 Kay mao kini ang giingon sa Ginoo,
“Panalanginan ko ang mga tawong kinapon
nga nagtuman sa akong mga gipahimo sa Adlaw nga Igpapahulay,
ug naghimo sa mga butang nga makapalipay kanako
ug nagtuman sa akong kasabotan.
5 Tugotan ko sila nga mosulod sa akong Templo ug hatagan ko sila sa pasidungog
nga labaw kay sa pasidungog nga madawat nila kon aduna silay mga anak.
Dili gayod sila malimtan sa mga tawo hangtod sa hangtod.
6 Panalanginan ko usab ang mga dili Israelinhon nga nagtugyan
sa ilang kinabuhi kanako aron alagaran ako, higugmaon,
ug simbahon, ug nagtuman sa akong mga gipahimo sa
Adlaw nga Igpapahulay ug nagtuman sa akong kasabotan.
7 Dad-on ko sila sa akong balaan nga bukid,
ug lipayon ko sila didto sa akong balay nga alampoanan.
Dawaton ko sa akong halaran ang ilang mga halad nga sinunog
ug uban pang mga halad, kay ang akong balay tawgon
nga balay nga alampoanan sa mga tawo sa tanang nasod.”
8 Miingon usab ang Ginoong Dios
nga nagtigom sa mga binihag nga Israelinhon,
“Tigomon ko pa gayod ang uban,
gawas niadtong natigom ko nang daan.”