ఇశ్రాయేలు రాజ్యం
హోషేయ రాజ్యంపై షల్మనేసెరు దండయాత్ర
ఇశ్రాయేలు రాజైన హోషేయ పాలన కొనసాగింపు. హోషేయ భూభాగాలపై షల్మనేసెరు దండయాత్ర చేస్తాడు.
సుమారు క్రీ.పూ. 725
ఇండియన్ రివైజ్డ్ వెర్షన్ (IRV) - తెలుగు -2019 (IRVTEL)
3 అతని మీద అష్షూరురాజు షల్మనేసెరు యుద్ధానికి రాగా, హోషేయ అతనికి దాసోహమై కప్పం కట్టేవాడిగా అయ్యాడు.
4 అతడు ఐగుప్తు రాజు సో దగ్గరికి వార్తాహరులను పంపి, ఇంత వరకూ తాను ప్రతి సంవత్సరం చేస్తున్నట్టు అష్షూరు రాజుకు కప్పం కట్టడం ఆపి వేశాడు. హోషేయ చేసిన కుట్ర అష్షూరు రాజు తెలుసుకుని అతనికి సంకెళ్లు వేయించి ఖైదు చేశాడు.
పది గోత్రాల చెర గురించి హోషేయ ప్రవచించడం క్రీ.పూ. 725
హోషేయ పది గోత్రాల చెర గురించి ప్రవచించి, పశ్చాత్తాపపడమని ప్రజలను కోరుతాడు.
1 నేను ఇశ్రాయేలును బాగు చేద్దామని కోరినప్పుడల్లా ఎఫ్రాయిము దోషం కనిపిస్తూ ఉంది.
షోమ్రోను దుష్కార్యాలు బయటపడుతున్నాయి.
వారు మోసం అభ్యాసం చేస్తారు.
దొంగతనానికి చొరబడతారు.
బంది పోటు దొంగల్లా వీధుల్లో దోచుకుంటారు.
2 తమ క్రియలు వారి చుట్టూ ఉన్నప్పటికీ,
అవి నా ఎదుటనే జరిగినప్పటికీ,
వారి దుర్మార్గత నేను జ్ఞాపకం చేసుకోనని తమలో తాము అనుకుంటారు.
3 వారి దుష్టత్వానికి, వారి అధికారుల అబద్ధాలకు వారి రాజు సంతోషిస్తాడు.
4 వారంతా కాముకులే.
రొట్టెలు కాల్చే వాడు ముద్ద పిసికిన తరువాత.
ముద్దంతా పొంగే దాకా పొయ్యిని బాగా వేడిచేసి.
ఊరుకున్నట్టు వారంతా కాముకులే.
5 మన రాజు ఉత్సవ దినాన అధికారులు అతని ద్రాక్షారసం కాకతో మత్తెక్కి జబ్బుపడిపోయారు.
రాజు తానే అపహాసకులతో చెయ్యి కలిపాడు.
6 పొయ్యి లాంటి తమ హృదయాలతో కపటపు ఆలోచనలు చేస్తారు.
వారి క్రోధం రాత్రంతా మండుతూనే ఉంటుంది.
ఉదయాన అది తీవ్రమైన జ్వాలగా మండుతుంది.
7 వారంతా పొయ్యిలాగా కాలుతూ ఉంటారు.
తమపై పరిపాలన చేసే వారిని వారు మింగేస్తారు.
వారి రాజులంతా కూలిపోయారు.
నన్ను స్మరించే వాడు ఒక్కడు కూడా లేడు.
8 ఎఫ్రాయిము అన్యజనులతో కలిసిపోయాడు.
ఎఫ్రాయిము రెండో వైపుకు తిప్పని అట్టు వంటి వాడయ్యాడు.
9 పరాయి వారు అతని బలాన్ని మింగేసినా అది అతనికి తెలియలేదు.
తలమీద నెరసిన జుట్టు కనబడుతున్నా అది అతనికి తెలియదు.
10 ఇశ్రాయేలువారి ప్రతిష్టే అతని మీద సాక్ష్యం పలుకుతుంది.
ఇంత జరిగినా వారు తమ దేవుడైన యెహోవా వైపు తిరుగడం లేదు.
ఆయనను వెతకడం లేదు.
11 ఎఫ్రాయిము బుద్ధిలేని పిరికి గుండె గల గువ్వ అయిపోయింది.
అది ఐగుప్తీయులను పిలుస్తుంది.
తరువాత అష్షూరీయుల దగ్గరికి ఎగిరిపోతుంది.
12 వారు వెళ్ళినప్పుడు నేను వారిపై నా వల వేస్తాను.
పక్షులను కొట్టినట్టు వారిని పడగొడతాను.
వారు గుమిగూడిన చోట వారిని శిక్షిస్తాను.
13 వారికి బాధ!
వారు నన్ను విడిచిపెట్టి తప్పిపోయారు.
వినాశం వారి మీదికి ముంచుకు వస్తోంది.
వారు నా మీద తిరుగుబాటు చేశారు.
వారిని రక్షించేవాడినే.
కానీ వారు నా మీద అబద్ధాలు చెప్పారు.
14 హృదయ పూర్వకంగా నన్ను బతిమాలుకోలేదు గానీ.
మంచాల మీద పడుకుని ఆక్రోశిస్తారు.
ధాన్యం, కొత్త సారాయి కావాలని తమను కత్తితో గాయపరచుకుంటారు.
కానీ నా నుండి దూరంగా వెళ్ళిపోతారు.
15 నేను వారి చేతులు బలపరచి శిక్షణ ఇచ్చినా వారు నా మీద కుట్రలు చేస్తారు.
16 వారు తిరిగి వస్తారు గానీ,
సర్వోన్నతుని దేవుని వైపుకు తిరగరు.
వారు పనికిరాని విల్లులాగా ఉన్నారు.
వారి అధికారులు తాము పలికిన గర్వపు మాటల మూలంగా కత్తి పాలవుతారు.
ఇలా వారు ఐగుప్తుదేశంలో ఎగతాళికి గురి అవుతారు.
8:1 “బాకా నీ నోట ఉంచుకో.
ప్రజలు నా నిబంధన అతిక్రమించారు. నా ధర్మశాస్త్రాన్ని ఉల్లంఘించారు.
కాబట్టి యెహోవానైన నా ఇంటి మీద వాలడానికి గద్ద వస్తూ ఉంది అని ప్రకటించు.”
2 వారు నాకు మొర్రపెడతారు. “మా దేవా, ఇశ్రాయేలు వారమైన మేము నిన్ను ఎరిగిన వారమే.”
3 కానీ ఇశ్రాయేలీయులు సన్మార్గమును విసర్జించారు. కాబట్టి శత్రువు వారిని తరుముతాడు.
4 వారు రాజులను నియమించుకున్నారు. కానీ నేను వారిని నియమించలేదు.
వారు అధికారులను పెట్టుకున్నారు. కానీ వారెవరూ నాకు తెలియదు.
తమ వెండి బంగారాలతో తమ కోసం విగ్రహాలు చేసుకున్నారు.
కానీ అదంతా వారు నాశనమై పోవడానికే.
5 ప్రవక్త ఇలా అంటున్నాడు “షోమ్రోనూ, ఆయన నీ దూడను విసిరి పారేశాడు.”
యెహోవా ఇలా అంటున్నాడు. నా కోపం ఈ ప్రజల మీద మండుతూ ఉంది.
ఎంత కాలం వారు అపవిత్రంగా ఉంటారు?
6 ఈ విగ్రహం ఇశ్రాయేలువారి చేతి పనే గదా?
కంసాలి దాన్ని తయారు చేశాడు.
అది దేవుడు కాదు.
షోమ్రోను దూడ ముక్కలు చెక్కలైపోతుంది.
7 ప్రజలు గాలిని విత్తనాలుగా చల్లారు. పెనుగాలిని వారు కోసుకుంటారు.
కనిపించే పైరులో కంకులు లేవు.
దాన్ని గానుగలో వేస్తే పిండి రాదు. ఒకవేళ పంట పండినా విదేశీయులు దాన్ని కోసుకుంటారు.
8 ఇశ్రాయేలు వారిని శత్రువులు కబళిస్తారు.
ఎవరికీ ఇష్టంలేని ఓటికుండల్లా వారు అన్యజనుల్లో చెదిరి ఉంటారు.
9 వారు ఒంటరి అడవి గాడిదలాగా అష్షూరీయుల దగ్గరికి పోయారు.
ఎఫ్రాయిము తన కోసం విటులను డబ్బిచ్చి పిలిపించుకుంది.
10 వారు కానుకలు ఇచ్చి అన్యజనాల్లో విటులను పిలుచుకున్నా ఇప్పుడే నేను వారిని సమకూరుస్తాను.
చక్రవర్తి పీడన పెట్టే బాధ కింద వారు కృశించి పోతారు.
11 ఎఫ్రాయిము పాపపరిహారం కోసం ఎన్నెన్నో బలిపీఠాలను కట్టింది.
కానీ అతడు పాపం చేయడానికి అవే దోహదం చేశాయి.
12 నేను పదివేల సార్లు అతని కోసం నా ధర్మశాస్త్రాన్ని రాయించి నియమించినా,
అయినా దాన్ని ఎప్పుడూ చూడనట్టుగా అతడు ఉంటాడు.
13 నాకు అర్పించిన పశువుల విషయానికి వస్తే, వారు వాటిని వధించి ఆ మాంసం వారే తింటారు.
అలాటి బలులను నేను, అంటే యెహోవాను అంగీకరించను.
వారి దోషాన్ని జ్ఞాపకానికి తెచ్చుకుని వారి పాపాలను బట్టి వారిని శిక్షిస్తాను.
వారు మళ్లీ ఐగుప్తుకు వెళ్లవలసి వస్తుంది.
14 ఇశ్రాయేలువారు తమ సృష్టికర్త అయిన దేవుని మర్చి పోయారు. తమ కోసం భవనాలు కట్టించుకున్నారు.
యూదావారు, చాలా పట్టణాలకు కోటలు కట్టుకున్నారు.
అయితే నేను వారి పట్టణాలను తగలబెడతాను.
వారి కోటలను ధ్వంసం చేస్తాను.