పది గోత్రాల చెర గురించి హోషేయ ప్రవచించడం (continued)

హోషేయ పది గోత్రాల చెర గురించి ప్రవచించి, పశ్చాత్తాపపడమని ప్రజలను కోరుతాడు.

క్రీ.పూ. 725

ఇండియన్ రివైజ్డ్ వెర్షన్ (IRV) - తెలుగు -2019 (IRVTEL)

హోషేయ 12–14

1 ఎఫ్రాయిము గాలిని మేస్తున్నాడు.

తూర్పు గాలి వెంట పరిగెడుతున్నాడు.

మానక అబద్ధమాడుతూ బలాత్కారం చేస్తున్నాడు.

ప్రజలు అష్షూరీయులతో సంధి చేస్తారు.

ఐగుప్తునకు ఒలీవనూనె పంపిస్తారు.

2 యూదావారి మీద యెహోవా వ్యాజ్యం వేశాడు.

యాకోబు సంతతి వారు చేసిన దాన్ని బట్టి ఆయన వారిని శిక్షిస్తాడు.

వారి క్రియలను బట్టి వారికి ప్రతీకారం చేస్తాడు.

3 తల్లి గర్భంలో యాకోబు తన సోదరుని మడిమెను పట్టుకున్నాడు.

మగసిరి కలవాడై అతడు దేవునితో పోరాడాడు.

4 అతడు దూతతో పోరాడి గెలిచాడు.

అతడు కన్నీటితో అతని అనుగ్రహానికై బతిమాలాడు.

బేతేలులో అతడు దేవుణ్ణి కలుసుకున్నాడు.

అక్కడ ఆయన అతనితో మాట్లాడాడు.

5 ఈయన యెహోవా, సేనల ప్రభువు. “యెహోవా” అని ఆయన్ను పిలవాలి.

6 కాబట్టి నీవు నీ దేవుని వైపు తిరగాలి.

నిబంధన నమ్మకత్వాన్ని, న్యాయాన్ని అనుసరించు.

నీ దేవుని కోసం ఎడతెగక కనిపెట్టు.

7 కనానీయ వర్తకులు అన్యాయపు త్రాసును వాడుతారు.

దగా చెయ్యడమే వారికి ఇష్టం.

8 “నేను ధనవంతుడినయ్యాను, నాకు చాలా ఆస్తి దొరికింది.

నేను సంపాదించుకున్న దానిలో దేనిని బట్టీ శిక్షకు తగిన పాపం నాలో ఉన్నట్టు ఎవరూ చూపలేరు” అని ఎఫ్రాయిము అనుకుంటున్నాడు.

9 “అయితే ఐగుప్తుదేశంలో నుండి మీరు వచ్చినది మొదలు యెహోవానైన నేనే మీకు దేవుణ్ణి.

నియామక దినాల్లో మీరు డేరాల్లో కాపురమున్నట్టు నేను మళ్లీ మిమ్మల్ని డేరాల్లో నివసింపజేస్తాను.

10 ప్రవక్తలతో నేను మాటలాడాను.

విస్తారమైన దర్శనాలు నేనిచ్చాను.

ఉపమానరీతిగా అనేకసార్లు ప్రవక్తల ద్వారా మాట్లాడాను.

11 గిలాదులో దుర్మార్గం ఉన్నట్టయితే,

అక్కడి ప్రజలు పనికిమాలిన వారు.

గిల్గాలులో ప్రజలు ఎడ్లను బలులుగా అర్పిస్తారు.

వారి బలిపీఠాలు దున్నిన చేని చాళ్ళపై ఉన్న రాళ్లకుప్పల్లాగా ఉన్నాయి.

12 యాకోబు తప్పించుకుని సిరియా దేశంలోకి వెళ్లిపోయాడు.

భార్య కావాలని ఇశ్రాయేలు కొలువు చేశాడు.

భార్య కావాలని అతడు గొర్రెలు కాచాడు.

13 ఒక ప్రవక్త ద్వారా యెహోవా ఇశ్రాయేలీయులను ఐగుప్తు దేశంలో నుండి రప్పించాడు.

ప్రవక్త ద్వారా వారిని కాపాడాడు.

14 ఎఫ్రాయిము యెహోవాకు ఘోరమైన కోపం పుట్టించాడు.

కాబట్టి అతని యజమాని అతని మీద రక్తాపరాధం మోపుతాడు.

అతని సిగ్గులేని పనులను బట్టి అతన్ని అవమానపరుస్తాను.”

13:1 ఎఫ్రాయిము మాటలాడినప్పుడు భయం కలిగింది.

అతడు ఇశ్రాయేలు వారిలో తనను గొప్ప చేసుకున్నాడు.

తరువాత బయలు దేవుణ్ణి బట్టి అపరాధియై అతడు నాశనమయ్యాడు.

2 ఇప్పుడు వారు ఇంకా పాపం చేస్తూ ఉన్నారు.

తమకు చేతనైనంత నైపుణ్యంతో వెండి విగ్రహాలు పోతపోస్తారు.

అదంతా నిపుణులు చేసే పనే.

“వాటికి బలులు అర్పించే వారు దూడలను ముద్దు పెట్టుకోండి” అని చెబుతారు.

3 కాబట్టి వారు ఉదయాన కనబడే మబ్బులాగా,

పెందలకడ ఆరిపోయే ప్రాతఃకాలపు మంచులాగా ఉంటారు.

కళ్ళంలో నుండి గాలి ఎగరగొట్టే పొట్టులాగా,

పొగ గొట్టంలో గుండా వెళ్ళిపోయే పొగలాగా ఉంటారు.

4 మిమ్మల్ని ఐగుప్తు దేశంలో నుండి తెచ్చిన యెహోవానైన నేనే మీ దేవుణ్ణి.

నన్ను తప్ప నీవు ఏ దేవుడినీ గుర్తించ కూడదు.

నేను తప్ప వేరే రక్షకుడు లేడు.

5 మహా ఎండకు కాలిన అరణ్యంలో నిన్నెరిగిన వాణ్ణి నేనే.

6 తరువాత వారికి మేత దొరకగా వారు తిని తృప్తి పొందారు. తృప్తి పొంది గర్వించి నన్ను మర్చి పోయారు.

7 కాబట్టి నేను వారికి సింహం వంటి వాడనయ్యాను.

చిరుత పులి దారిలో పొంచి ఉన్నట్టు నేను వారిని పట్టుకోవడానికి పొంచి ఉంటాను.

8 పిల్లలు పోయిన ఎలుగుబంటి దాడి చేసినట్టు నేను వారి మీద పడి వారి రొమ్మును చీల్చివేస్తాను.

ఆడసింహం మింగివేసినట్టు వారిని మింగివేస్తాను.

క్రూరమృగాల్లాగా వారిని చీల్చివేస్తాను.

9 ఇశ్రాయేలూ, నీ మీదికి వచ్చి పడేది నీ నాశనమే. నీ సహాయకర్తనైన నాకు నీవు విరోధివయ్యావు.

10 నీ రాజు ఏడి? నీ పట్టణాల్లో నీకు సహాయం చేయకుండ నీ రాజు ఏమైపోయాడు?

“రాజును అధిపతులను నా మీద నియమించు” అని నీవు మనవి చేశావు గదా?

11 కోపంతో నీకు రాజును నియమించాను.

క్రోధంతో అతణ్ణి తీసి పారేశాను.

12 ఎఫ్రాయిము దోషం పోగుపడింది.

అతని పాపం పోగుపడింది.

13 ప్రసూతి వేదనలు కలిగినట్టుగా అతనికి వేదన కలుగుతుంది.

ప్రసవం సమయంలో బయటికి రాని శిశువైనట్టుగా అతడు బుద్ధి లేనివాడై వృద్ధికి రాడు.

14 అయినా పాతాళ వశంలో నుండి నేను వారిని విమోచిస్తానా?

మృత్యువు నుండి వారిని రక్షిస్తానా?

ఓ మరణమా, నీవు తెచ్చే బాధలు ఎక్కడ? వాటిని ఇటు తీసుకురా.

పాతాళమా, నీ నాశనం ఏది? దాన్ని ఇటు తీసుకురా.

నాకు కనికరం పుట్టదు.

15 ఎఫ్రాయిము తన సోదరుల్లో వర్థిల్లినా,

తూర్పు గాలి వస్తుంది.

యెహోవా పుట్టించే గాలి అరణ్యంలో నుండి లేస్తుంది.

అది రాగా అతని నీటిబుగ్గలు ఎండి పోతాయి.

ఎఫ్రాయిము ఊటలు ఇంకిపోతాయి.

అతని బావిలో నీరు ఉండదు. అతని శత్రువులు అతని ధననిధులను అతనికి ప్రియమైన వస్తువులన్నిటిని కొల్లగొడతారు.

16 షోమ్రోను తన దేవుని మీద తిరుగుబాటు చేసింది గనక,

ప్రజలు కత్తివాత కూలుతారు.

వారి పిల్లలను రాళ్లకేసి కొడతారు. గర్భవతుల కడుపులు చీరేస్తారు.

14:1 ఇశ్రాయేలూ, నీ పాపం చేత నీవు కూలిపోయావు గనక నీ దేవుడైన యెహోవా వైపు తిరుగు.

2 ఒప్పుకోలు మాటలు సిద్ధపరచుకుని యెహోవా దగ్గరికి తిరిగి రండి.

మీరు చెప్పవలసినదేమిటంటే “మా పాపాలన్నిటిని పరిహరించు. మమ్మల్ని అనుగ్రహంతో స్వీకరించు.

అప్పుడు మేము మా పెదాల ఫలాలను అంటే స్తుతులను అర్పిస్తాము.

3 అష్షూరీయులు మమ్మల్ని రక్షించరు.

మేమిక మీదట గుర్రాలెక్కి యుద్ధానికి పోము.

‘మీరే మాకు దేవుడు’ అని మేమిక మీదట మా చేతి పనితో చెప్పము.

తండ్రిలేని వారికి వాత్సల్యం నీ దగ్గరే దొరుకుతుంది.”

4 వారు నన్ను వదిలి వెళ్ళిపోయిన తరువాత నేను వారిని బాగు చేస్తాను.

వారి మీదనున్న నా కోపం చల్లారింది.

మనస్ఫూర్తిగా వారిని ప్రేమిస్తాను.

5 చెట్టుకు మంచు ఉన్నట్టు నేనతనికి ఉంటాను.

తామర పువ్వు పెరిగేలా అతడు అభివృద్ధి పొందుతాడు.

లెబానోను పర్వతాల్లో దేవదారు వృక్షంలాగా వారు వేరు పారుతారు.

6 అతని కొమ్మలు విశాలంగా పెరుగుతాయి.

ఒలీవచెట్టు కు ఉండే శోభ అతనికి కలుగుతుంది.

లెబానోను దేవదారు చెట్లకు ఉన్నంత సువాసన అతనికి ఉంటుంది.

7 అతని నీడలో నివసించేవారు తిరిగి వస్తారు.

ధాన్యం వలే వారు తిరిగి మొలుస్తారు.

ద్రాక్షచెట్టులాగా వికసిస్తారు.

లెబానోను ద్రాక్షరసానికి ఉన్న కీర్తి వారికి ఉంటుంది.

8 ఎఫ్రాయిము ఇలా అంటాడు “బొమ్మలతో నాకిక పనేమిటి?”

నేనే అతనికి జవాబిచ్చి ఆలకిస్తున్నాను.

నేనే ఎఫ్రాయిమునుగూర్చి విచారణ చేస్తున్నాను.

నేను సతత హరిత సరళ వృక్షం వంటి వాణ్ణి.

నావల్లనే నీకు ఫలం కలుగుతుంది.

9 ఈ సంగతులు వివేచించే జ్ఞానులెవరు?

వాటిని గ్రహించి తెలుసుకునే బుద్ధిమంతులెవరు?

ఎందుకంటే యెహోవా మార్గాలు యథార్థమైనవి.

నీతిమంతులు వాటిలో నడుచుకుంటారు. అయితే తిరుగుబాటు చేసేవారు తడబడి కూలుతారు.