బాప్తిసం క్రైస్తవులను పరిశుద్ధతకు కట్టుబడేలా చేస్తుంది
ఆదాము చేసిన ఒక అపరాధం వల్ల అందరికీ మరణశిక్ష విధించబడిందని చూపించిన తరువాత, పాపంలో కొనసాగితే నిత్యజీవానికి నడిపించే దేవుని ఉచిత కృప మరింత ఎక్కువగా లభిస్తుందని బోధించడం సరైనదేనా అని పౌలు అడుగుతాడు. తాము అలా బోధిస్తున్నామని వారిపై నింద మోపబడింది (రోమీయులు 3:6). విస్తృతంగా వ్యాపించిన ఈ తప్పును ఖండించడానికి, బాప్తిసమనే ఆచారం ఆధారంగా క్రైస్తవుడు పరిశుద్ధంగా జీవించవలసిన బాధ్యతను అతడు నిర్ధారిస్తాడు. క్రీస్తు సిలువ వేయబడి పాపం కోసం తన శరీరాన్ని బలిగా అప్పగించినట్టే, ఆయనలోకి బాప్తిసం పొందినవారు పాపం విషయంలో తమ శరీరాలు ఆయనతో చనిపోయి పాతిపెట్టబడ్డాయని భావించాలని బాప్తిసం క్రైస్తవులకు నేర్పింది. అలాగే క్రీస్తు మృతదేహాన్ని సమాధి నుండి లేపిన అదే జీవమిచ్చే ఆత్మ ద్వారా తాము ఆయనతో పాటు నూతన జీవానికి లేపబడ్డామని భావించాలని నేర్పింది. పాత స్వభావం, అంటే సహజ స్వభావం, క్రీస్తుతో పాటు చంపబడడంతో పాపశక్తి నాశనమై, మనిషి దాని పాలన నుండి విడుదల పొందుతాడు. క్రీస్తుతో పాటు పాపం విషయంలో చనిపోయినవారు ఆయనతో కలిసి దేవుని కోసం శాశ్వతంగా జీవిస్తారు. ఈ విషయాలను ఆలోచించమని రోమీయులను ప్రోత్సహిస్తున్నాడు.
క్రీ.శ. 58
ఇండియన్ రివైజ్డ్ వెర్షన్ (IRV) - తెలుగు -2019 (IRVTEL)
1 కాబట్టి ఏమందాం? కృప విస్తరించడం కోసం పాపంలోనే కొనసాగుదామా? 2 అలా ఎన్నటికీ జరగకూడదు. పాపపు జీవితం విషయంలో చనిపోయిన మనం దానిలో ఎలా కొనసాగుతాం? 3 క్రీస్తు యేసులోకి బాప్తిసం పొందిన మనమంతా ఆయన మరణంలోకి కూడా బాప్తిసం పొందామని మీకు తెలియదా?
4 తండ్రి మహిమ వలన క్రీస్తు చనిపోయిన వారిలోనుండి ఏ విధంగా లేచాడో, అదే విధంగా మనం కూడా నూతన జీవం పొంది నడుచుకొనేలా, మనం బాప్తిసం ద్వారా మరణించి, ఆయనతో కూడా సమాధి అయ్యాము. 5 ఆయన చావు పోలికలో ఆయనతో ఐక్యం గలవారమైతే, ఆయన పునరుత్థానంలో కూడా ఆయనతో ఐక్యం కలిగి ఉంటాం. 6 ఎందుకంటే, మనకు తెలుసు, మనం ఇకమీదట పాపానికి దాసులుగా ఉండకుండాా పాపశరీరం నాశనం అయ్యేలా, మన పాత స్వభావం క్రీస్తుతో కలిసి సిలువ మరణం పాలైంది. 7 చనిపోయిన వ్యక్తి పాపం విషయంలో నీతిమంతుడని తీర్పు పొందాడు.
8 మనం క్రీస్తుతో కూడా చనిపోతే, ఆయనతో కూడా జీవిస్తామని నమ్ముతున్నాము. 9 చనిపోయిన వారిలో నుండి లేచిన క్రీస్తు ఇంక చనిపోడనీ, చావుకి ఆయన మీద అధికారం లేదనీ మనకు తెలుసు. 10 ఎందుకంటే ఆయన చనిపోవడం పాపం విషయంలో ఒక్కసారే చనిపోయాడు గాని, ఆయన జీవించడం మాత్రం దేవుని విషయమై జీవిస్తున్నాడు.
11 ఇదే మీకూ వర్తిస్తుంది. మీరు పాపం విషయంలో చనిపోయిన వారిగా, దేవుని విషయంలో క్రీస్తు యేసులో మిమ్మల్ని సజీవులుగా ఎంచుకోండి.
పాపాన్ని మళ్ళీ ఏలనివ్వకండి
క్రీస్తు మరణం ఇప్పుడు వారిని పాపపు పాలన నుండి విమోచించింది కాబట్టి, తమ మర్త్యశరీరాలను పాపం మళ్ళీ ఏలనివ్వకుండా వాటిని అదుపులో ఉంచుకోవాలని పౌలు రోమీయులను ప్రోత్సహిస్తున్నాడు. పాపం ప్రలోభపెట్టే శక్తిని ఎదిరించి, తమ ఆత్మలను, శరీరాలను దేవుని కోసం నీతిసేవకు అప్పగించమని వారిని కోరుతున్నాడు. ఎందుకంటే వారు ఇకపై కనికరం లేకుండా పాపరహిత విధేయతను కోరే ధర్మశాస్త్రం కింద లేరు. బదులుగా క్షమాపణను, కృపను ఇచ్చే సువార్త కిందికి తీసుకురాబడ్డారు.
రోమీయులకు రాసిన పత్రిక 6:12–14
12 కాబట్టి శరీర దురాశలకు లోబడేలా చావుకు లోనైన మీ శరీరాల్లో పాపాన్ని ఏలనియ్యకండి. 13 మీ అవయవాలను దుర్నీతి సాధనాలుగా పాపానికి అప్పగించవద్దు. అయితే చనిపోయిన వారిలో నుండి బతికి లేచినవారుగా, మీ అవయవాలను నీతి సాధనాలుగా దేవునికి అప్పగించుకోండి.
14 మీరు కృప కిందే గానీ ధర్మశాస్త్రం కింద లేరు కాబట్టి పాపాన్ని మీ మీద అధికారం చెలాయించ నియ్యవద్దు.
కృప పాపం చేయడానికి అనుమతి ఇవ్వదు
క్షమాపణకు అవకాశమేమీ ఇవ్వకుండా సంపూర్ణ విధేయతను కోరిన ధర్మశాస్త్రం నుండి యూదులు విడుదల పొంది, కనికరపు ఏర్పాటులోకి తీసుకురాబడ్డారు కాబట్టి పాపం విస్తరించవచ్చని కొందరిలా భావించడం సమంజసమేనా అని పౌలు తరువాత అడుగుతాడు. దానికి విరుద్ధంగా, దేవుని ప్రతి ఏర్పాటులోనూ పాపంలో కొనసాగేవారు పాపానికి బానిసలుగా ఉండి నిత్యమరణానికి లోనవుతారని అతడు నిర్ధారిస్తాడు. సువార్తలోని విశ్వాసానికి విధేయులయ్యేవారు మాత్రమే నీతికి ప్రతిఫలమైన నిత్యజీవమనే ఉచిత బహుమానాన్ని పొందుతారు. ఒకప్పుడు పాపానికి బానిసలుగా ఉన్న రోమీయులు ఇప్పుడు బాప్తిసంలో తమకు అప్పగించిన బోధనారూపానికి, అంటే అచ్చుకు, విధేయులయ్యారని అతడు ఆనందిస్తున్నాడు. దాని ద్వారా వారు పాపపు బానిసత్వం నుండి విడుదల పొంది నీతికి బానిసలయ్యారు.
రోమీయులకు రాసిన పత్రిక 6:15–18
15 అలాగైతే, మనం కృప కిందే గాని ధర్మశాస్త్రం కింద లేము కాబట్టి పాపం చేద్దామా? అలా ఎన్నటికీ చేయకూడదు. 16 మీరు దేనికి లోబడి మిమ్మల్ని మీరు దాసులుగా అప్పగించుకొంటారో, అది చావు కోసం పాపానికైనా, నీతి కోసం విధేయతకైనా, దేనికి లోబడతారో దానికే దాసులౌతారని మీకు తెలియదా? 17 దేవునికి కృతజ్ఞతలు! మీరు గతంలో పాపానికి దాసులుగా ఉన్నారు. కానీ ఏ ఉపదేశానికి మిమ్మల్ని మీరు అప్పగించుకున్నారో దానికి హృదయపూర్వకంగా లోబడ్డారు. 18 తద్వారా పాపవిమోచన పొంది నీతికి దాసులయ్యారు.
పాపపు పాలనను రోమీయుల బానిస వ్యవస్థగా చిత్రిస్తున్న పౌలు
రోమీయులతో తర్కించేటప్పుడు పౌలు వారి సొంత ఆచారాల నుండే పోలికలను ఉపయోగిస్తున్నాడు. బానిసత్వానికి సంబంధించిన చట్టాలు వారికి తెలిసినవి కాబట్టి, పాపం తమ శరీరాలపై చెలాయించిన నిరంకుశ పాలనను వారు మరింత బాగా అర్థం చేసుకోగలుగుతారు. ఒకప్పుడు నీతికి బంధం లేకుండా ఉన్నట్టే ఇప్పుడు పాపం నుండి విడుదల పొందారు కాబట్టి, మరణమే అంతంగా ఉన్న పాపసేవలో ఒకప్పుడు ఉపయోగించిన తమ శరీర అవయవాలను ఇప్పుడు నిత్యజీవమే అంతంగా ఉన్న నీతిసేవకు అప్పగించమని అతడు వారిని ప్రోత్సహిస్తున్నాడు.
రోమీయులకు రాసిన పత్రిక 6:19–23
19 మీ శరీర బలహీనతను బట్టి మానవరీతిగా మాట్లాడుతున్నాను. ఇంతకు ముందు అక్రమం జరిగించడానికి ఏ విధంగా అపవిత్రతకు, దుర్మార్గానికి మీ అవయవాలను దాసులుగా అప్పగించారో, ఆలాగే పవిత్రత కలగడానికి వాటిని ఇప్పుడు నీతికి దాసులుగా అప్పగించండి. 20 మీరు పాపానికి దాసులుగా ఉన్నప్పుడు నీతి విషయంలో మీకేమీ ఆటంకం లేదు. 21 అప్పుడు చేసిన పనుల వలన మీకేం ప్రయోజనం కలిగింది? వాటి గురించి మీరిప్పుడు సిగ్గుపడుతున్నారు కదా? చావే వాటి ఫలితం. 22 అయితే మీరు ఇప్పుడు పాపవిమోచన పొంది దేవునికి దాసులయ్యారు. పవిత్రతే దాని ఫలితం. దాని అంతిమ ఫలం శాశ్వత జీవం. 23 ఎందుకంటే పాపానికి జీతం మరణం. అయితే దేవుని కృపావరం మన ప్రభువైన క్రీస్తు యేసులో శాశ్వత జీవం.
వివాహంలాగే ధర్మశాస్త్రం మరణంతో ముగుస్తుంది
ధర్మశాస్త్రం నీతిమంతులుగా తీర్చలేదని యూదులను మరింత ఒప్పించడానికి, వివాహ చట్టంలాగే మోషే ధర్మశాస్త్రం కూడా ఇరువురిలో ఎవరు మరణించినా రద్దవుతుందని పౌలు నిర్ధారిస్తున్నాడు. క్రీస్తు శరీరంలో ధర్మశాస్త్రం ద్వారా వారు మరణానికి అప్పగించబడ్డారు కాబట్టి, మరొక భర్తను, అంటే మరణానికి అప్పగించబడినా మృతులలో నుండి లేచినవానిని, వివాహం చేసుకోవడానికి స్వతంత్రులయ్యారు. తద్వారా వారు ఆయనతో కలిసి దేవుని కోసం జీవించవచ్చు. వారు శరీరరీతిగా క్రీస్తుతో మరణించక ముందు, ధర్మశాస్త్రం ద్వారా తెలిసిన వారి దుష్టకోరికలు వారిని మరణానికి లోబరచాయని అతడు చెబుతున్నాడు. కానీ ఇప్పుడు వారు క్రీస్తుతో పాటు పాపపు శరీరాన్ని విడిచిపెట్టారు. ఆ శరీరమే వారిని ధర్మశాస్త్రపు శాపం కింద బంధించి ఉంచింది. ఆ విధంగా వారు ధర్మశాస్త్రపు అధికారం నుండి విడుదల పొందారు. కాబట్టి వారు పాత ఆచారాల ప్రకారం, ధర్మశాస్త్రపు అక్షరం ప్రకారం కాకుండా, సువార్తకు ఆధ్యాత్మిక విధేయతతో దేవుణ్ణి సేవించవచ్చు.
1 సోదరులారా, ధర్మశాస్త్రం మనిషి జీవించి ఉన్నంత వరకే అధికారం చెలాయిస్తుందని మీకు తెలియదా? ధర్మశాస్త్రం తెలిసిన మీతో మాట్లాడుతున్నాను. 2 వివాహిత అయిన స్త్రీ, తన భర్త జీవించి ఉన్నంత వరకే ధర్మశాస్త్రం వలన అతనికి బద్ధురాలు గాని, భర్త చనిపోతే వివాహ సంబంధమైన ధర్మశాస్త్ర నియమం నుండి ఆమె స్వేచ్ఛ పొందుతుంది. 3 కాబట్టి భర్త జీవించి ఉండగా ఆమె వేరే పురుషుణ్ణి కలిస్తే ఆమె వ్యభిచారి అవుతుంది గాని, భర్త చనిపోతే ఆమె ధర్మశాస్త్రం నుండి స్వేచ్ఛ పొందింది కాబట్టి వేరొక పురుషుణ్ణి పెళ్ళి చేసికొన్నప్పటికీ ఆమె వ్యభిచారిణి కాదు.
4 కాబట్టి నా సోదరులారా, మనం దేవుని కోసం ఫలించ గలిగేలా చనిపోయి తిరిగి లేచిన క్రీస్తును చేరుకోడానికి మీరు కూడా ఆయన శరీరం ద్వారా ధర్మశాస్త్ర విషయంలో చనిపోయారు. 5 ఎందుకంటే మనం శరీర సంబంధులుగా ఉన్నప్పుడు చావు ఫలాన్ని ఫలించడానికి ధర్మశాస్త్రం ద్వారా కలిగే పాపపు కోరికలు మన అవయవాల్లో పని చేస్తూ ఉండేవి. 6 ఇప్పుడైతే ఏది మనలను బంధించి ఉంచిందో దాని విషయంలో చనిపోయి, ధర్మశాస్త్రం నుండి స్వేచ్ఛ పొందాము. కాబట్టి మనం దాని అక్షరార్ధమైన పాత విధానంలో కాక దేవుని ఆత్మానుసారమైన కొత్త విధానంలో సేవ చేస్తున్నాము.
ధర్మశాస్త్రం పాపానికి కారణం కాదు
ఇక్కడ ధర్మశాస్త్రం పాపానికి కారణమా అని ఒక యూదుడు అడుగుతున్నట్టు పౌలు ఊహిస్తున్నాడు. ధర్మశాస్త్రం పాపాన్ని నిషేధించింది కాబట్టి అది పాపానికి కారణం కాదని అతడు జవాబిస్తున్నాడు. చెడు కోరిక మనిషిలోనే ఉంది; ధర్మశాస్త్రం దాన్ని బయటపెట్టడానికి మాత్రమే ఉపయోగపడింది. ఎవరికీ అభ్యంతరం కలగకుండా ఉండడానికి, ధర్మశాస్త్రం కింద పునర్జన్మ పొందని యూదుని స్థితిని పౌలు తన సొంత స్థితిగా వర్ణిస్తున్నాడు. ధర్మశాస్త్రం చెడు ఏమిటో తెలియజేసి దాన్ని నిషేధించిందనీ, దానివల్ల మనిషి పాపస్వభావం దాని ఆజ్ఞలకు అవిధేయత చూపి తిరుగుబాటు చేయడానికి బలంగా ప్రేరేపించబడిందనీ అతడు చూపిస్తున్నాడు. కాబట్టి ధర్మశాస్త్రం, ఆజ్ఞ పాపాన్ని నిషేధిస్తున్నందున అవి పరిశుద్ధమైనవి, నీతియుక్తమైనవి, మంచివి. అయినప్పటికీ, పౌలు సూచించినట్టుగా, అవి శిక్షావిధికి నడిపిస్తాయే గానీ రక్షణకు కాదు.
7 కాబట్టి ఏం చెప్పాలి? ధర్మశాస్త్రం పాపమా? కానే కాదు. ధర్మశాస్త్రం వలన కాకపోతే నాకు పాపమంటే ఏమిటో తెలిసేది కాదు. ఇతరులకు చెందిన దాన్ని ఆశించవద్దని ధర్మశాస్త్రం చెప్పకపోతే దురాశ అంటే ఏమిటో నాకు తెలిసేది కాదు. 8 అయితే పాపం ఆజ్ఞను ఆధారంగా చేసుకుని అన్ని రకాల దురాశలను నాలో పుట్టించింది. ధర్మశాస్త్రం లేకపోతే పాపం చనిపోయినట్టే. 9 ఒకప్పుడు నేను ధర్మశాస్త్రం లేనప్పుడు జీవంతోనే ఉన్నాను గాని, ఆజ్ఞ రావడంతోనే పాపానికి మళ్ళీ జీవం వచ్చి నేను చనిపోయాను. 10 అప్పుడు జీవాన్ని తెచ్చే ఆజ్ఞ నాకు చావును కలిగించేదిగా కనబడింది. 11 ఎందుకంటే పాపం ఆజ్ఞను ఆధారంగా చేసుకుని మోసం చేసి నన్ను చంపింది. 12 కాబట్టి ధర్మశాస్త్రం పవిత్రం. ఆజ్ఞ కూడా పవిత్రం, నీతివంతం, ఉత్తమం.
ధర్మశాస్త్రం కింద పోరాడే రెండు స్వభావాలు
ఇప్పుడు ఎంతో మంచిదీ పరిశుద్ధమైనదీ అయిన ధర్మశాస్త్రమే తమ మరణానికి కారణమా అని యూదుడు అడుగుతున్నట్టు ఊహించబడుతోంది. మరణానికి కారణం ధర్మశాస్త్రం కాదు, పాపమేనని పౌలు జవాబిస్తున్నాడు. పరిశుద్ధమైనదీ నీతియుక్తమైనదీ మంచిదీ అయిన ధర్మశాస్త్రం ద్వారా పాపం పాపులను మరణానికి లోబరచినప్పుడు, పాపం ఎంత చెడ్డదో వెల్లడైందని చెబుతున్నాడు. ధర్మశాస్త్రం స్వయంగా ఆధ్యాత్మిక జీవాన్ని పెంపొందిస్తుందని అతడు నిర్ధారిస్తున్నాడు. అయితే అతీంద్రియ సహాయం లేకుండా ఎవరినీ పరిశుద్ధులుగా చేయడానికి దానికి శక్తి లేదని చూపించడానికి, ధర్మశాస్త్రం కింద పునర్జన్మ పొందని యూదుణ్ణి పాపానికి బానిసగా అమ్మబడినవానిగా, అంటే దాని సేవ నుండి తప్పించుకునే శక్తి లేనివానిగా, ఇంకా తన సొంత వ్యక్తిత్వంలోనే చిత్రిస్తున్నాడు. మానవ స్వభావంలో ఎప్పుడూ ఒకదానితో ఒకటి పోరాడే రెండు విరుద్ధ సూత్రాలను అతడు వర్ణిస్తున్నాడు. ధర్మశాస్త్రం కింద శరీరస్వభావం అంతరంగ పురుషునిపై, అంటే ఆధ్యాత్మిక స్వభావంపై, గెలుస్తుంది. మోషే ధర్మశాస్త్రం మనిషికి తన కర్తవ్యం ఏమిటో తెలియజేస్తుంది గానీ దాన్ని చేయడానికి శక్తినివ్వదు. అతడు పాపమరణాల నియమానికి లోబరచబడతాడు. ఈ దయనీయ స్థితిలో పౌలు, “ఈ మరణశరీరం నుండి నన్ను ఎవరు విడిపిస్తారు?” అని మొరపెడుతున్నాడు. ఆ శరీరం పాపానికి అమ్మబడి దాని సొత్తుగా ఉంది. మన ప్రభువైన యేసు క్రీస్తు కృపే రక్షణకు ఏకైక మార్గమని అతడు ఆనందంగా ప్రకటిస్తున్నాడు.
రోమీయులకు రాసిన పత్రిక 7:13–25
13 మరి ఉత్తమమైంది నాకు చావును తెచ్చిందా? కానే కాదు. అయితే పాపం ఉత్తమమైన దాని ద్వారా పాపంగా కనిపించాలని, అది నాకు చావును తీసుకు వచ్చింది. అంటే పాపం ఆజ్ఞ మూలంగా మరింత ఎక్కువ పాపం కావడం కోసం, అది నాకు చావును తెచ్చిపెట్టింది. 14 ధర్మశాస్త్రం ఆత్మ సంబంధమైందని మనకు తెలుసు. అయితే నేను పాపానికి అమ్ముడుబోయిన శరీర సంబంధిని.
15 ఎందుకంటే నేను చేసేది నాకు తెలియదు. నేను దేనిని ఇష్టపడతానో దాన్ని కాక దేన్ని ద్వేషిస్తానో దానినే చేస్తున్నాను. 16 నేను ఇష్టపడని దాన్ని చేస్తున్నట్టయితే ధర్మశాస్త్రం మంచిదే అని ఒప్పుకుంటున్నాను. 17 కాబట్టి దాన్ని చేసేది నాలోని పాపమే గాని నేను కాదు. 18 నాలో, అంటే నా శరీరంలో మంచిదేదీ లేదని నాకు తెలుసు. మంచిని చేయాలనే కోరిక నాకు కలుగుతుంది గాని, దాన్ని చేయడం నా వల్ల కావడం లేదు. 19 నేను చేయాలని కోరే మంచిని చేయకుండా, నేను చేయగోరని చెడును జరిగిస్తున్నాను. 20 నేను కోరని దాన్ని చేస్తే అది నాలోని పాపమే గాని నేను కాదు. 21 అందువల్ల, “నేను మంచి చెయ్యాలని అనుకొన్నప్పుడు చెడు నాలోనే ఉంటుంది” అనే ఈ నియమం నాలో పని చేస్తున్నట్లు గమనిస్తున్నాను.
22 అంతరంగ పురుషుణ్ణి బట్టి దేవుని ధర్మశాస్త్రంలో నేను ఆనందిస్తున్నాను. 23 కానీ వేరొక నియమం నా అవయవాల్లో ఉన్నట్టు నాకు కనబడుతున్నది. అది నా మనసులోని ధర్మశాస్త్రంతో పోరాడుతూ నా అవయవాల్లోని పాప నియమానికి నన్ను బందీగా చేస్తున్నది. 24 అయ్యో, నేనెంత నికృష్టుణ్ణి? చావుకు లోనైన ఈ శరీరం నుండి నన్నెవరు విడిపిస్తారు? 25 మన ప్రభు యేసు క్రీస్తు ద్వారా దేవునికి కృతజ్ఞతా స్తుతులు చెబుతున్నాను. కాగా మనసు విషయంలో నేను దైవనియమానికీ, శరీర విషయంలో పాప నియమానికీ దాసుణ్ణి.