பவுல் பிலேமோனுக்கு எழுதுகிறார்

பவுல் தமது நண்பரான பிலேமோனின் அடிமையான ஒநேசிமுவுக்காக அவரிடம் பரிந்துபேச அவருக்குக் கடிதம் எழுதுகிறார். ஒநேசிமு தனது எஜமானின் பணியைவிட்டு ரோமாபுரிக்கு ஓடிப்போயிருந்தார். அந்த நகரத்தில் பவுலின் ஊழியத்தின் மூலம் ஒநேசிமு கிறிஸ்தவ விசுவாசத்திற்கு மாறியிருந்தார்.

கி.பி. 62

இண்டியன் ரிவைஸ்டு வெர்ஸன் (IRV) - தமிழ் (IRVTAM)

பவுல் பிலேமோனை வாழ்த்துகிறார்

ஒரு தனிப்பட்ட காரியத்தைப் பற்றி எழுதுவதால், பவுல் ஓர் அப்போஸ்தலனின் நிலையுடனும் அதிகாரத்துடனும் அல்லாமல், ஒரு நண்பராகப் பிலேமோனுக்கு எழுதுகிறார். பிலேமோனுக்கும், அன்புக்குரிய அப்பியாளுக்கும், அர்க்கிப்புவுக்கும் (கொலோசெயர் 4:17), பிலேமோனின் வீட்டிலுள்ள சபைக்கும் வாழ்த்துத் தெரிவிப்பதில் தீமோத்தேயுவும் இணைந்துகொள்கிறார். பவுல் தமது ஆசீர்வாதத்தை வழங்குகிறார். இயேசு கிறிஸ்துவின்மீதுள்ள பிலேமோனின் விசுவாசமும் கிறிஸ்தவச் சகோதரர்கள்மீதுள்ள அன்பும் வளருவதற்காகத் தமது ஜெபங்களில் எப்போதும் தேவனுக்கு நன்றி செலுத்தியதாக அவரிடம் கூறுகிறார். மிகுந்த விசுவாசத்தின் கனியாகிய அவரது தாராள குணத்தைப் பகிர்ந்துகொள்வது, கிறிஸ்து இயேசுவுக்குள் அவரிடம் உள்ள ஒவ்வொரு நல்ல மனப்பாங்கையும் மற்றவர்கள் அறிந்துகொள்வதற்குப் பயனுள்ளதாக இருக்கும்படியும் ஜெபிக்கிறார். ஏனெனில், அவரது அன்பினால் அவர்களுக்கே மிகுந்த மகிழ்ச்சியும் ஆறுதலும் உண்டாகின்றன; குறிப்பாக, கிறிஸ்துவின் நாமத்திற்காகத் தங்கள் வீடுகளிலிருந்து துரத்தப்பட்டு, நற்செய்தியைப் பிரசங்கித்துக்கொண்டு திரிந்த ஏழைப் பரிசுத்தவான்களுக்குப் பிலேமோனின் செல்வம் உதவியதால் இவ்வாறு மகிழ்கிறார்கள்.

பிலேமோன் 1:1–7

1 கிறிஸ்து இயேசுவுக்காக சிறைச்சாலையில் கட்டப்பட்டவனாக இருக்கிற பவுலும், சகோதரனாகிய தீமோத்தேயும், எங்களுக்குப் பிரியமுள்ளவனும் உடன்வேலையாளுமாக இருக்கிற பிலேமோனுக்கும், 2 பிரியமுள்ள அப்பியாளுக்கும், எங்களுடைய உடன் போர்வீரனாகிய அர்க்கிப்புவிற்கும், உம்முடைய வீட்டிலே கூடிவருகிற சபை விசுவாசிகளுக்கும் எழுதுகிறதாவது: 3 நம்முடைய பிதாவாகிய தேவனாலும், கர்த்தராகிய இயேசுகிறிஸ்துவினாலும், உங்களுக்குக் கிருபையும் சமாதானமும் உண்டாவதாக.

4 கர்த்தராகிய இயேசுவிடம் உள்ள உம்முடைய விசுவாசத்தையும், எல்லாப் பரிசுத்தவான்களிடமும் உள்ள உம்முடைய அன்பையும் நான் கேள்விப்பட்டு, 5 என் ஜெபங்களில் உம்மை நினைத்து, எப்பொழுதும் என் தேவனுக்கு நன்றி செலுத்தி, 6 கிறிஸ்துவில் நமக்குள் உள்ள எல்லா நன்மைகளும் தெரியப்படுகிறதினாலே உம்முடைய விசுவாசத்தின் ஐக்கியம் கிறிஸ்து இயேசுவுக்காகப் பயன்படவேண்டுமென்று வேண்டுதல் செய்கிறேன். 7 சகோதரனே, பரிசுத்தவான்களுடைய உள்ளங்கள் உம்மாலே உற்சாகமானதினால், உம்முடைய அன்பினாலே அதிக சந்தோஷமும் ஆறுதலும் அடைந்திருக்கிறேன்.

பவுல் ஒநேசிமுவுக்காகப் பரிந்துபேசுகிறார்

பிலேமோனின் கனிவான, தாராளமான முயற்சிகளுக்காக அவர்மீது கொண்ட அன்பின் காரணமாக, தாம் எடுத்துரைக்கப்போகும் காரியத்தில் சரியானதைச் செய்யும்படி கிறிஸ்துவின் அப்போஸ்தலனாகக் கட்டளையிட முடிந்தாலும், அவரிடம் மன்றாடுவதையே விரும்புவதாகப் பவுல் தெரிவிக்கிறார். பிலேமோன்மீது தமக்குள்ள அன்பையும், பரிசுத்தவான்கள்மீது பிலேமோன் காட்டிய அன்பையும் முன்னிட்டு, தமது மகனான ஒநேசிமுவுக்காக இவ்வாறு மன்றாடுகிறார். அவரை ஆன்மீகப் புதிய படைப்பாகப் பெற்றெடுத்த பவுல், தமது சொந்த விருப்பத்தின்படி அவரைத் திருப்பி அனுப்பியிருக்கிறார். பவுல் இவ்வாறு மன்றாடுகிறார்: “ஆகவே அவரை உமது வீட்டில் ஏற்றுக்கொள்ளும். அவர் என் இருதயமே போன்றவர், என் மகன், என்னிலேயே ஒரு பகுதி. அவர் எனக்கு மிகவும் பயனுள்ளவராக இருப்பதால், நற்செய்திக்காக நான் சங்கிலிகளால் கட்டப்பட்டிருக்கையில், உமது ஆன்மீகத் தகப்பனான எனக்கு ஊழியம் செய்யவும், நீர் ரோமாபுரியில் இருந்திருந்தால் செய்திருப்பதைச் செய்யவும் அவரை என்னுடனேயே வைத்துக்கொள்ள விரும்பியிருப்பேன். ஆனால், இந்தக் காரியத்தில் உமது மனதை அறியாமல் அவரை வைத்துக்கொள்ள நான் விரும்பவில்லை. அவரை மன்னிப்பதன் மூலம் நீர் எனக்குக் காட்டும் தயவு கட்டாயத்தினால் அல்லாமல், உமது சொந்த நல்லெண்ணத்திலிருந்து வரவேண்டும் என்பதே இதன் நோக்கம். ஏனெனில், தேவனுடைய பராமரிப்பினால் அவர் என்றென்றைக்கும் உமக்குத் திரும்பக் கிடைக்கும்படி சிறிதுகாலம் பிரிந்து சென்றார்; இனி ஓர் அடிமையாக அல்ல, கர்த்தருக்குள் அன்புக்குரிய சகோதரராகவே கிடைக்கிறார். அவர் எனக்கு மிகவும் பிரியமானவர்; ஆனால் உமது உடைமையாகவும் உமது வீட்டின் ஓர் அங்கமாகவும் இருப்பதோடு, இப்போது உமது பரலோகக் குடும்பமாகிய உமது வீட்டிலுள்ள சபையின் உறுப்பினராகவும் ஆக்கப்பட்டிருப்பதால், உமக்கு இன்னும் எவ்வளவு அதிகமாகப் பிரியமானவராக இருப்பார்! உமது அன்பில் என்னைப் பங்காளியாகக் கருதினால், என்னை ஏற்றுக்கொள்வதுபோல அவரை ஏற்றுக்கொள்ளும். ஏனெனில், அவர் என்னிலேயே ஒரு பகுதியைப் போன்றவர்; அவரை ஏற்றுக்கொள்வதில் என்னையே ஏற்றுக்கொள்கிறீர். அவர் உமக்கு ஏதேனும் அநியாயம் செய்திருந்தாலோ, ஏதேனும் கடன்பட்டிருந்தாலோ, அவையெல்லாவற்றையும் என் கணக்கில் சேர்த்துக்கொள்ளும். அவர் உமக்குச் செலுத்தவேண்டிய அனைத்தையும் நான் செலுத்துவேன்; திருப்பிச் செலுத்துவதாக என் சொந்தக் கையால் உறுதியளிக்கிறேன். ஏனெனில், நீர் எனக்கு எவ்வளவு கடன்பட்டிருக்கிறீர் என்பதற்காக இந்த உதவி செய்யப்படுவதை நான் விரும்பவில்லை; என்றாலும், உம்மையே, ஒரு கிறிஸ்தவனாக உமது வாழ்வையே, நீர் எனக்குக் கடன்பட்டிருக்கிறீர். ஆகவே, கர்த்தருக்குள் உம்மிடமிருந்து எனக்குச் சிறிது பயன் கிடைக்கட்டும்: இந்தக் காரியத்தில் என் ஆத்துமாவின் ஆழ்ந்த ஏக்கத்தை நிறைவேற்றி, அவரை மீண்டும் உமது வீட்டில் ஏற்றுக்கொள்ளும். உமது கிறிஸ்தவ நற்குணங்களைப் பற்றி நான் அறிந்திருப்பதால், நீர் கீழ்ப்படிவீர் என்ற நம்பிக்கையுடன் உமக்கு எழுதினேன்; நான் கேட்பதைவிடவும் அதிகமாக நீர் செய்வீர் என்று முழுமையாக உறுதிகொண்டிருக்கிறேன்.” அவர்களுடைய ஊழியரான எப்பாப்பிராவின் வாழ்த்துகளையும் தம்முடன் இருக்கும் மற்றவர்களின் வாழ்த்துகளையும் தெரிவித்து, பிலேமோனுக்கும் அவரது வீட்டிலுள்ள சபைக்கும் தமது ஆசீர்வாதத்தை வழங்கி முடிக்கிறார்.

பிலேமோன் 1:8–25

8 ஆகவே, பவுலாகிய நான் முதிர்வயதானவனாகவும், இயேசுகிறிஸ்துவுக்காக இப்பொழுது சிறைச்சாலையில் கட்டப்பட்டவனாகவும் இருக்கிறதினால், 9 நீர் செய்யவேண்டியதை உமக்குக் கட்டளையிடுவதற்குக் கிறிஸ்துவிற்குள் நான் துணிவுள்ளவனாக இருந்தாலும், அப்படிச் செய்யாமல், அன்பினாலே மன்றாடுகிறேன். 10 என்னவென்றால், சிறைச்சாலையில் கட்டப்பட்டிருக்கும்போது நான் பெற்ற என் மகனாகிய ஒநேசிமுக்காக உம்மை மன்றாடுகிறேன். 11 முன்னே அவன் உமக்குப் பிரயோஜனமில்லாதவனாக இருந்தான், இப்பொழுதோ உமக்கும் எனக்கும் பிரயோஜனமாக இருக்கிறான். 12 அவனை நான் உம்மிடம் அனுப்புகிறேன்; என் இருதயம்போல் இருக்கிற அவனை நீர் ஏற்றுக்கொள்ளும். 13 நற்செய்திக்காகக் கட்டப்பட்டிருக்கிற எனக்கு ஊழியம் செய்வதற்காக உமக்குப் பதிலாக அவனை என்னோடு வைத்துக்கொள்ளவேண்டும் என்று நினைத்தேன். 14 ஆனாலும் நீர் செய்யும் நன்மையைக் கட்டாயத்தினால் இல்லை, மனப்பூர்வமாகச் செய்வதற்காக, நான் உம்முடைய சம்மதம் இல்லாமல் ஒன்றும் செய்வதற்கு எனக்கு மனமில்லை. 15 அவன் என்றென்றைக்கும் உம்முடையவனாக இருப்பதற்காகவும், இனிமேல் அவன் அடிமையானவனாக இல்லை, அடிமையானவனுக்கு மேலானவனாகவும் பிரியமுள்ள சகோதரனாகவும் இருப்பதற்காகவும் கொஞ்சக்காலம் உம்மைவிட்டுப் பிரிந்துபோனான். 16 அவன் எனக்குப் பிரியமான சகோதரனென்றால், உமக்கு சரீரத்தின்படியும் கர்த்தருக்குள்ளும் எவ்வளவு பிரியமுள்ளவனாக இருக்கவேண்டும்! 17 ஆகவே, நீர் என்னை உம்முடைய உடன்ஊழியனாக ஏற்றுக்கொள்வதுபோல அவனையும் ஏற்றுக்கொள்ளும். 18 அவன் உமக்கு ஏதாவது அநியாயம் செய்ததும், உம்மிடம் கடன்பட்டதுமிருந்தால், அதை என் கணக்கிலே வைத்துக்கொள்ளும். 19 பவுலாகிய நான் இதை என் சொந்தக் கரத்தினாலே எழுதுகிறேன், நான் அதைத் திரும்பச்செலுத்துவேன். நீர் உன்னைநீயே எனக்குக் கடனாகச் செலுத்தவேண்டும் என்று நான் உமக்குச் சொல்லவேண்டியது இல்லையே. 20 ஆம், சகோதரனே, கர்த்தருக்குள் உம்மாலே எனக்குப் பிரயோஜனம் உண்டாகட்டும்; கிறிஸ்துவிற்குள் என் இருதயத்தை ஆறுதல் செய்யும். 21 நான் சொல்லுகிறதைவிட அதிகமாகச் செய்வீர் என்று அறிந்து, இதற்கு நீர் சம்மதிப்பீர் என்கிற உறுதியோடு, உமக்கு எழுதியிருக்கிறேன். 22 மேலும், உங்களுடைய ஜெபங்களினாலே நான் உங்களிடம் அனுப்பப்படுவேன் என்று நம்பியிருக்கிறதினால், நான் தங்குவதற்காக ஒரு அறையை எனக்காக ஆயத்தம்பண்ணும். 23 கிறிஸ்து இயேசுவுக்காக என்னோடு சிறைக்காவலில் வைக்கப்பட்டிருக்கிற எப்பாப்பிராவும், 24 என் உடன்வேலையாட்களாகிய மாற்குவும், அரிஸ்தர்க்கும், தேமாவும், லூக்காவும் உமக்கு வாழ்த்துதல் சொல்லுகிறார்கள். 25 நம்முடைய கர்த்தராகிய இயேசுகிறிஸ்துவின் கிருபை உங்களுடைய ஆவியோடு இருப்பதாக. ஆமென்.