ஞானஸ்நானம் கிறிஸ்தவர்களைப் பரிசுத்தத்திற்குக் கடமைப்படுத்துகிறது

ஆதாமின் ஒரே குற்றத்தினால் எல்லா மனிதர்களும் மரணத்தீர்ப்புக்கு உட்படுத்தப்பட்டார்கள் என்பதைக் காட்டியபின், மக்கள் பாவத்தில் தொடர்ந்து நிலைத்திருப்பதால் நித்திய ஜீவனுக்கான தேவனுடைய இலவச கிருபையை இன்னும் அதிகமாகப் பெறுவார்கள் என்று பிரசங்கிப்பது சரியாக இருக்க முடியுமா எனப் பவுல் கேட்கிறார்; இவ்வாறு பிரசங்கிப்பதாகவே அவர்கள்மீது குற்றஞ்சாட்டப்பட்டிருந்தது (ரோமர் 3:6). பரவலாக இருந்த இந்தத் தவறை மறுப்பதற்காக, ஞானஸ்நானச் சடங்கிலிருந்து கிறிஸ்தவப் பரிசுத்தத்தின் கடமையை அவர் உறுதிப்படுத்துகிறார். கிறிஸ்து சிலுவையில் அறையப்பட்டுத் தமது சரீரத்தைப் பாவத்திற்கான பலியாக ஒப்புக்கொடுத்ததுபோல, அவருக்குள் ஞானஸ்நானம் பெற்றவர்கள் தங்கள் சரீரங்களைப் பாவத்திற்கு மரித்து அவரோடு அடக்கம்பண்ணப்பட்டவையாகவும், கிறிஸ்துவின் மரித்த சரீரத்தைக் கல்லறையிலிருந்து எழுப்பிய அதே ஜீவனளிக்கும் ஆவியானவரால் அவரோடு புதிய ஜீவனுக்கு எழுப்பப்பட்டவையாகவும் கருதவேண்டும் என்று ஞானஸ்நானம் கிறிஸ்தவர்களுக்குக் கற்பித்தது. பழைய மனிதன், அல்லது இயற்கையான மனிதன், கிறிஸ்துவோடு கொல்லப்படுவதால், பாவத்தின் வல்லமை அழிக்கப்பட்டு, மனிதன் அதன் ஆட்சியிலிருந்து விடுதலையாக்கப்படுகிறான். கிறிஸ்துவோடு பாவத்திற்கு மரித்தவர்கள் அவரோடு தேவனுக்காக என்றென்றும் வாழ்வார்கள். இவற்றைச் சிந்திக்கும்படி ரோமர்கள் வலியுறுத்தப்படுகிறார்கள்.

கி.பி. 58

இண்டியன் ரிவைஸ்டு வெர்ஸன் (IRV) - தமிழ் (IRVTAM)

ரோமர் 6:1–11

1 ஆகவே, என்னசொல்லுவோம்? கிருபை பெருகுவதற்காகப் பாவத்திலே நிலைநிற்கலாம் என்று சொல்லுவோமா? சொல்லக்கூடாதே. 2 பாவத்திற்கு மரித்த நாம் இனி அதிலே எப்படி வாழ்வோம்? 3 கிறிஸ்து இயேசுவிற்குள்ளாக ஞானஸ்நானம் பெற்ற நாம் அனைவரும் அவருடைய மரணத்திற்குள்ளாக ஞானஸ்நானம் பெற்றதை அறியாமல் இருக்கிறீர்களா? 4 மேலும் பிதாவின் மகிமையினாலே கிறிஸ்து மரித்தோரிலிருந்து உயிரோடு எழுப்பப்பட்டதுபோல, நாமும் புதிய ஜீவனுள்ளவர்களாக நடந்துகொள்வதற்கு, அவருடைய மரணத்திற்குள்ளாக்கும் ஞானஸ்நானத்தினாலே கிறிஸ்துவோடு அடக்கம் பண்ணப்பட்டோம். 5 ஆகவே, அவருடைய மரணத்தின் சாயலில் நாம் இணைக்கப்பட்டவர்களானால், அவர் உயிர்த்தெழுதலின் சாயலிலும் இணைக்கப்பட்டிருப்போம். 6 நாம் இனிப் பாவத்திற்கு அடிமையாக இல்லாதபடிக்கு, பாவசரீரம் ஒழிந்துபோவதற்காக, நம்முடைய பழைய மனிதன் அவரோடு சிலுவையில் அறையப்பட்டதென்று அறிந்திருக்கிறோம். 7 மரித்தவன் பாவத்திற்கு நீங்கி விடுதலையாக்கப்பட்டிருக்கிறானே. 8 எனவே, கிறிஸ்துவோடு நாம் மரித்தோம் என்றால், அவரோடு பிழைத்தும் இருப்போம் என்று நம்புகிறோம். 9 மரித்தோரிலிருந்து உயிரோடு எழுந்த கிறிஸ்து இனி இறப்பதில்லை என்று அறிந்திருக்கிறோம்; மரணம் இனி அவரை ஆண்டுகொள்ளுவதில்லை. 10 அவர் மரித்தது, பாவத்திற்கென்று ஒரேமுறை மரித்தார்; அவர் பிழைத்திருக்கிறது, தேவனுக்கென்று பிழைத்திருக்கிறார். 11 அப்படியே நீங்களும், உங்களைப் பாவத்திற்கு மரித்தவர்களாகவும், நம்முடைய கர்த்தராகிய இயேசுகிறிஸ்துவிற்குள் தேவனுக்கென்று பிழைத்திருக்கிறவர்களாகவும் எண்ணிக்கொள்ளுங்கள்.

பாவம் மீண்டும் ஆட்சிசெய்ய இடங்கொடுக்காதீர்கள்

கிறிஸ்துவின் மரணம் இப்போது அவர்களைப் பாவத்தின் ஆட்சியிலிருந்து மீட்டிருப்பதால், மரணத்திற்குரிய தங்கள் சரீரங்கள்மீது பாவம் மீண்டும் ஆட்சிசெய்ய இடங்கொடுக்காமல், தங்கள் சரீரங்களை அடக்கியாளும்படி பவுல் ரோமர்களை வலியுறுத்துகிறார். பாவத்தின் சோதிக்கும் வல்லமையை எதிர்த்து, தங்கள் ஆத்துமாக்களையும் சரீரங்களையும் தேவனுக்காக நீதியின் ஊழியத்திற்கு ஒப்புக்கொடுக்கும்படி அவர் அவர்களை அழைக்கிறார். ஏனெனில் இரக்கமின்றிப் பாவமற்ற கீழ்ப்படிதலைக் கோரும் நியாயப்பிரமாணத்தின்கீழ் அவர்கள் இனி இல்லை; மன்னிப்பையும் கிருபையையும் கொடுக்கும் நற்செய்தியின்கீழ் கொண்டுவரப்பட்டிருக்கிறார்கள்.

ரோமர் 6:12–14

12 ஆகவே, நீங்கள் சரீர இச்சைகளின்படி பாவத்திற்குக் கீழ்ப்படிவதற்காக, மரணத்திற்குரிய உங்களுடைய சரீரத்தில் பாவம் ஆளுகை செய்யாமல் இருக்கட்டும். 13 நீங்கள் உங்களுடைய சரீர உறுப்புகளை அநீதியின் ஆயுதங்களாகப் பாவத்திற்கு ஒப்புக்கொடுக்காமல், உங்களை மரித்தோரிலிருந்து பிழைத்திருக்கிறவர்களாக தேவனுக்கு ஒப்புக்கொடுத்து, உங்களுடைய சரீர உறுப்புகளை நீதிக்குரிய ஆயுதங்களாக தேவனுக்கு ஒப்புக்கொடுங்கள். 14 நீங்கள் நியாயப்பிரமாணத்திற்குக் கீழ்ப்பட்டிராமல் கிருபைக்குக் கீழ்பட்டிருக்கிறதினால், பாவம் உங்களை மேற்கொள்ளமுடியாது.

கிருபை பாவம் செய்ய அனுமதி கொடுப்பதில்லை

மன்னிப்புக்கான எந்த நிபந்தனையும் இன்றிப் பூரண கீழ்ப்படிதலைக் கோரிய நியாயப்பிரமாணத்திலிருந்து யூதர்கள் விடுவிக்கப்பட்டு, இரக்கத்தின் ஏற்பாட்டிற்குள் கொண்டுவரப்பட்டதால் பாவம் பெருகலாம் என்று சிலர் எண்ணியதுபோல எண்ணுவது நியாயமானதா எனப் பவுல் அடுத்துக் கேட்கிறார். மாறாக, எந்த ஏற்பாட்டின்கீழும் பாவத்தில் தொடர்ந்து நிலைத்திருப்பவர்கள் பாவத்தின் அடிமைகளாக இருந்து நித்திய மரணத்திற்கு உட்படுகிறார்கள் என்று அவர் உறுதிப்படுத்துகிறார். நற்செய்தியின் விசுவாசத்திற்குக் கீழ்ப்படிகிறவர்கள் மட்டுமே நீதியின் பலனாகிய நித்திய ஜீவன் என்னும் இலவச ஈவைப் பெறுகிறார்கள். பாவத்தின் அடிமைகளாக இருந்த ரோமர்கள், ஞானஸ்நானத்தில் தங்களுக்கு அளிக்கப்பட்ட போதனையின் வடிவத்திற்கு, அல்லது அச்சிற்கு, இப்போது கீழ்ப்படிந்து, அதன்மூலம் பாவத்தின் அடிமைத்தனத்திலிருந்து விடுவிக்கப்பட்டு நீதியின் அடிமைகளாகியிருப்பதற்காக அவர் மகிழ்கிறார்.

ரோமர் 6:15–18

15 இதினால் என்ன? நாம் நியாயப்பிரமாணத்திற்குக் கீழ்ப்பட்டிராமல் கிருபைக்குக் கீழ்ப்பட்டிருக்கிறதினால், பாவம் செய்யலாமா? செய்யக்கூடாதே. 16 மரணத்திற்குரிய பாவத்திற்கானாலும், நீதிக்குரிய கீழ்ப்படிதலுக்கானாலும், எதற்குக் கீழ்ப்படிவதற்காக உங்களை அடிமைகளாக ஒப்புக்கொடுக்கிறீர்களோ, அதற்கே அடிமைகளாக இருக்கிறீர்கள் என்று தெரியாமல் இருக்கிறீர்களா? 17 முன்பு நீங்கள் பாவத்திற்கு அடிமைகளாக இருந்தும், இப்பொழுது உங்களுக்கு ஒப்புவிக்கப்பட்ட உபதேச சட்டத்திற்கு நீங்கள் மனப்பூர்வமாகக் கீழ்ப்படிந்ததினாலே தேவனுக்கு ஸ்தோத்திரம். 18 பாவத்திலிருந்து நீங்கள் விடுதலையாக்கப்பட்டு, நீதிக்கு அடிமைகளானீர்கள்.

பாவத்தின் ஆட்சியை ரோமர்களின் அடிமைமுறையாகப் பவுல் சித்தரிக்கிறார்

ரோமர்களுடன் நியாயங்களை எடுத்துரைத்துப் பேசும்போது, பாவம் அவர்களுடைய சரீரங்கள்மீது செலுத்திய கொடுங்கோலாட்சியை அவர்கள் நன்றாகப் புரிந்துகொள்ளும்படி, அவர்களுடைய சொந்த வழக்கங்களிலிருந்து பவுல் ஒப்புமைகளைப் பயன்படுத்துகிறார்; அடிமைமுறையின் சட்டங்கள் அவர்களுக்கு நன்கு தெரிந்திருந்தன. முன்பு நீதியிலிருந்து விடுபட்டிருந்ததுபோல, இப்போது அவர்கள் பாவத்திலிருந்து விடுவிக்கப்பட்டிருப்பதால், மரணத்தை முடிவாகக் கொண்ட பாவத்தின் ஊழியத்திற்கு ஒருகாலத்தில் பயன்படுத்திய தங்கள் சரீர உறுப்புகளை, நித்திய ஜீவனை முடிவாகக் கொண்ட நீதியின் ஊழியத்திற்கு ஒப்புக்கொடுக்கும்படி அவர் அவர்களை வலியுறுத்துகிறார்.

ரோமர் 6:19–23

19 உங்களுடைய சரீர பலவீனத்தினால் மனிதர்கள் பேசுகிறதுபோலப் பேசுகிறேன். அக்கிரமத்தைச் செய்வதற்காக முன்பே நீங்கள் உங்களுடைய சரீர உறுப்புகளை அசுத்தத்திற்கும் அக்கிரமத்திற்கும் அடிமைகளாக ஒப்புக்கொடுத்ததுபோல, இப்பொழுது பரிசுத்தமானதைச் செய்வதற்காக உங்களுடைய சரீர உறுப்புகளை நீதிக்கு அடிமையாக ஒப்புக்கொடுங்கள். 20 பாவத்திற்கு நீங்கள் அடிமைகளாக இருந்தகாலத்தில் நீதிக்கு விலகினவர்களாக இருந்தீர்கள்.

21 இப்பொழுது உங்களுக்கு வெட்கமாகத் தெரிகிற காரியங்களினாலே அந்தகாலத்தில் உங்களுக்கு என்ன பலன் கிடைத்தது? அவைகளின் முடிவு மரணமே. 22 இப்பொழுது நீங்கள் பாவத்தில் இருந்து விடுதலையாக்கப்பட்டு, தேவனுக்கு அடிமைகளானதினால், பரிசுத்தமாகுதல் உங்களுக்குக் கிடைக்கும் பலன், முடிவோ நித்தியஜீவன். 23 பாவத்தின் சம்பளம் மரணம்; தேவனுடைய கிருபைவரமோ நம்முடைய கர்த்தராகிய இயேசுகிறிஸ்துவினால் உண்டான நித்தியஜீவன்.

திருமணத்தைப்போல நியாயப்பிரமாணமும் மரணத்தில் முடிவடைகிறது

நியாயப்பிரமாணம் நீதிமானாக்க முடியாது என்பதை யூதர்களுக்கு மேலும் உறுதியாக உணர்த்துவதற்காக, திருமணச் சட்டத்தைப்போலவே மோசேயின் நியாயப்பிரமாணமும் இரு தரப்பினரில் ஒருவரின் மரணத்தால் முடிவுக்கு வந்தது என்று பவுல் உறுதிப்படுத்துகிறார். கிறிஸ்துவின் சரீரத்தில் அவர்கள் நியாயப்பிரமாணத்தினால் மரணத்திற்கு உட்படுத்தப்பட்டதால், வேறொரு கணவரை, அதாவது கொல்லப்பட்டிருந்தாலும் மரித்தோரிலிருந்து எழுப்பப்பட்டவரை, மணந்துகொள்ள அவர்கள் சுதந்திரமானார்கள்; அவரோடு தேவனுக்காக அவர்கள் வாழும்படி இவ்வாறு நடந்தது. அவர்கள் மாம்சத்தில் கிறிஸ்துவோடு மரிப்பதற்கு முன்பு, நியாயப்பிரமாணத்தினால் வெளிப்படுத்தப்பட்ட அவர்களுடைய தீய ஆசைகள் அவர்களை மரணத்திற்கு உட்படுத்தின என்று அவர் கூறுகிறார். ஆனால் இப்போது அதன் சாபத்தின்கீழ் அவர்களைக் கட்டிவைத்திருந்த மாம்சத்திற்குரிய பாவ சரீரத்தைக் கிறிஸ்துவோடு கைவிட்டதால், அவர்கள் நியாயப்பிரமாணத்தின் வல்லமையிலிருந்து விடுவிக்கப்பட்டிருந்தார்கள். ஆகவே, பழைய சடங்குகளின்படியும் நியாயப்பிரமாணத்தின் எழுத்தின்படியும் அல்லாமல், நற்செய்தியின் ஆவிக்குரிய கீழ்ப்படிதலுடன் அவர்கள் தேவனுக்கு ஊழியம் செய்ய முடியும்.

ரோமர் 7:1–6

1 நியாயப்பிரமாணத்தை தெரிந்திருக்கிறவர்களோடு பேசுகிறேன். சகோதரர்களே, ஒரு மனிதன் உயிரோடிருக்கும்வரைக்கும் நியாயப்பிரமாணம் அவனை ஆளுகிறது என்று தெரியாமல் இருக்கிறீர்களா? 2 அது எப்படியென்றால், கணவனையுடைய ஒரு பெண் தன் கணவன் உயிரோடிருக்கும்வரை நியாயப்பிரமாணத்தின்படி அவனுடைய நிபந்தனைக்கு உட்பட்டிருக்கிறாள்; கணவன் மரித்தபின்பு கணவனைப்பற்றிய பிரமாணத்திலிருந்து விடுதலையாகி இருக்கிறாள். 3 ஆகவே, கணவன் உயிரோடிருக்கும்போது அவள் வேறொரு மனிதனை திருமணம்செய்தால் அவள் விபசாரி என்று சொல்லப்படுவாள்; ஆனால், கணவன் மரித்தபின்பு அவள் அந்தப் பிரமாணத்திலிருந்து விடுதலையானபடியால், வேறொரு மனிதனை திருமணம் செய்தாலும் அவள் விபசாரி இல்லை. 4 அதுபோல, என் சகோதரர்களே, நீங்கள் மரித்தோரிலிருந்து உயிரோடு எழுந்த கிறிஸ்து என்னும் வேறொருவருடையவர்களாகி, தேவனுக்கென்று பலன் கொடுப்பதற்காக கிறிஸ்துவின் சரீரத்தினாலே நியாயப்பிரமாணத்திற்கு மரித்தவர்களானீர்கள். 5 நாம் சரீரத்திற்கு உட்பட்டிருந்த காலத்தில் நியாயப்பிரமாணத்தினாலே தோன்றிய பாவ இச்சைகள் மரணத்திற்குரிய பலன்களைக் கொடுக்கக்கூடியதாக நம்முடைய சரீர உறுப்புகளிலே பெலன்செய்தது. 6 இப்பொழுதோ நாம் பழமையான எழுத்தின்படி இல்லை, புதுமையான ஆவியின்படி ஊழியம் செய்வதற்காக, நம்மைக் கட்டியிருந்த நியாயப்பிரமாணத்திற்கு நாம் மரித்தவர்களாகி, அதில் இருந்து விடுதலையாக்கப்பட்டிருக்கிறோம்.

நியாயப்பிரமாணம் பாவத்திற்குக் காரணமல்ல

இங்கே நியாயப்பிரமாணம் பாவத்திற்குக் காரணமா என்று ஒரு யூதர் கேட்பதாகப் பவுல் கற்பனை செய்கிறார். அது பாவத்தைத் தடைசெய்ததால், பாவத்திற்குக் காரணமாக இருக்க முடியாது என்று அவர் பதிலளிக்கிறார். தீய ஆசை மனிதனுக்குள் இருந்தது; நியாயப்பிரமாணம் அதை வெளிப்படுத்த மட்டுமே உதவியது. யாருக்கும் இடறல் உண்டாக்காதபடி, நியாயப்பிரமாணத்தின்கீழுள்ள மறுபிறப்படையாத யூதரின் நிலையைப் பவுல் தம்முடைய சொந்த நிலையாக விவரிக்கிறார். நியாயப்பிரமாணம் தீமையை வெளிப்படுத்தி அதைத் தடைசெய்ததையும், அது மனிதனின் பாவ இயல்பை அதன் கட்டளைகளுக்குக் கீழ்ப்படியாமல் கலகம்செய்ய வலுவாகத் தூண்டியதையும் அவர் காட்டுகிறார். ஆகவே, நியாயப்பிரமாணமும் கட்டளையும் பாவத்தைத் தடைசெய்வதால், அவை பரிசுத்தமும் நீதியும் நன்மையும் உள்ளவை. இருப்பினும், பவுல் மறைமுகமாக உணர்த்தியபடி, அவை இரட்சிப்பிற்கு அல்ல, ஆக்கினைத்தீர்ப்பிற்கே வழிநடத்துகின்றன.

ரோமர் 7:7–12

7 எனவே, என்னசொல்லுவோம்? நியாயப்பிரமாணம் பாவமோ? இல்லையே, பாவம் என்னவென்று நியாயப்பிரமாணத்தினால்தான் நான் தெரிந்துகொண்டேனேதவிர மற்றப்படி இல்லை; “இச்சிக்காமல் இருப்பாயாக” என்று நியாயப்பிரமாணம் சொல்லாதிருந்தால், இச்சை பாவம் என்று நான் தெரியாமல் இருப்பேனே. 8 பாவமானது கட்டளையினாலே வாய்ப்பைப்பெற்று எல்லாவிதமான இச்சைகளையும் எனக்குள் நடப்பித்தது. நியாயப்பிரமாணம் இல்லாவிட்டால் பாவம் செத்ததாக இருக்குமே. 9 முன்பே நியாயப்பிரமாணம் இல்லாதவனாக இருந்தபோது நான் ஜீவனுள்ளவனாக இருந்தேன்; கட்டளை வந்தபோது பாவம் உயிர்கொண்டது, நான் மரித்தவனானேன். 10 இப்படியிருக்க, ஜீவனுக்குரிய கட்டளை எனக்கு மரணத்திற்குரியதாக இருப்பதைப் பார்த்தேன். 11 பாவமானது கட்டளையினாலே வாய்ப்பைப்பெற்று, என்னை ஏமாற்றியது, அதினாலே என்னைக் கொன்றது. 12 எனவே, நியாயப்பிரமாணம் பரிசுத்தமுள்ளது, கட்டளையும் பரிசுத்தமாகவும் நீதியாகவும் நன்மையாகவும் இருக்கிறது.

நியாயப்பிரமாணத்தின்கீழ் போரிடும் இரு இயல்புகள்

இவ்வளவு நன்மையும் பரிசுத்தமும் உள்ள நியாயப்பிரமாணமே தங்கள் மரணத்திற்குக் காரணமா என்று யூதர் ஒருவர் இப்போது கேட்பதாகக் கருதப்படுகிறது. மரணத்தை உண்டாக்குவது நியாயப்பிரமாணம் அல்ல, பாவமே என்று பவுல் பதிலளிக்கிறார். பரிசுத்தமும் நீதியும் நன்மையும் உள்ள நியாயப்பிரமாணத்தின் மூலமாகப் பாவம் பாவிகளை மரணத்திற்கு உட்படுத்தியபோது, பாவத்தின் மிகுந்த தீமை வெளிப்பட்டது என்றும் கூறுகிறார். நியாயப்பிரமாணம் தன்னளவில் ஆவிக்குரிய வாழ்வை வளர்க்கிறது என்று அவர் உறுதிப்படுத்துகிறார். ஆனால் இயற்கைக்கு அப்பாற்பட்ட உதவியின்றி யாரையும் பரிசுத்தமாக்க அதற்கு வல்லமை இல்லை என்பதைக் காட்டுவதற்காக, நியாயப்பிரமாணத்தின்கீழ் இருக்கும் மறுபிறப்படையாத யூதரைத் தன்னுடைய நிலையிலேயே தொடர்ந்து சித்தரிக்கிறார். அவர் பாவத்திற்கு அடிமையாக விற்கப்பட்டவர்; அதாவது அதன் பணிவிடையிலிருந்து தப்பிக்க வலிமையற்றவர். மனித இயல்பில் ஒன்றோடொன்று எப்போதும் போரிடும் இரு எதிரெதிர் நியதிகளை அவர் விவரிக்கிறார். நியாயப்பிரமாணத்தின்கீழ் மாம்ச இயல்பு, உள்ளான மனிதனை, அதாவது ஆவிக்குரிய இயல்பை வெல்கிறது. மோசேயின் நியாயப்பிரமாணம் ஒரு மனிதனுக்குத் தனது கடமையை அறியச் செய்கிறது; ஆனால் அதைச் செய்வதற்கான வல்லமையை அளிப்பதில்லை. அவன் பாவம் மற்றும் மரணத்தின் பிரமாணத்திற்கு அடிமையாக்கப்படுகிறான். இந்தப் பரிதாபமான நிலையில் பவுல், “இந்த மரண உடலிலிருந்து என்னை விடுவிப்பவர் யார்?” என்று கதறுகிறார். இந்த உடல் பாவத்திற்கு விற்கப்பட்டு அதன் உடைமையாக இருக்கிறது. இரட்சிப்பிற்கான ஒரே வழி நம்முடைய கர்த்தராகிய இயேசு கிறிஸ்துவின் கிருபையே என்று அவர் மகிழ்ச்சியுடன் அறிவிக்கிறார்.

ரோமர் 7:13–25

13 இப்படியிருக்க, நன்மையானது எனக்கு மரணமானதோ? அப்படி இல்லை; பாவமே எனக்கு மரணமானது; பாவம் கட்டளையினாலே அதிக பாவமுள்ளதாவதற்கும், அது நன்மையானதைக்கொண்டு எனக்கு மரணத்தை உண்டாக்கினதினாலே, பாவமாகவே இருக்கும்படிக்கும் அப்படியானது. 14 மேலும், நமக்குத் தெரிந்திருக்கிறபடி, நியாயப்பிரமாணம் ஆவிக்குரியதாக இருக்கிறது, நானோ பாவத்திற்குக் கீழாக விற்கப்பட்டு, சரீரத்திற்குரியவனாக இருக்கிறேன். 15 எப்படியென்றால், நான் செய்கிறது எனக்கே புரியவில்லை; நான் விரும்புகிறதைச் செய்யாமல், நான் வெறுக்கிறதையே செய்கிறேன். 16 இப்படி நான் விரும்பாததைச் செய்கிறவனாக இருக்க, நியாயப்பிரமாணம் நல்லது என்று ஏற்றுக்கொள்ளுகிறேனே. 17 எனவே, நான் இல்லை, எனக்குள் வாழ்கிற பாவமே அப்படிச் செய்கிறது. 18 அது எப்படியென்றால், என்னிடம், அதாவது, என் சரீரத்தில், நன்மை வாழ்கிறதில்லையென்று நான் அறிந்திருக்கிறேன்; நன்மை செய்யவேண்டும் என்கிற விருப்பம் என்னிடம் இருக்கிறது, நன்மை செய்வதோ என்னிடம் இல்லை. 19 எனவே, நான் விரும்புகிற நன்மையைச் செய்யாமல், விரும்பாத தீமையையே செய்கிறேன். 20 அதன்படி, நான் விரும்பாததை நான் செய்தால், நான் இல்லை, எனக்குள் வாழ்கிற பாவமே அப்படிச் செய்கிறது. 21 ஆனபடியால் நன்மைசெய்ய விரும்புகிற என்னிடம் தீமை உண்டு என்கிற ஒரு பிரமாணத்தைப் பார்க்கிறேன். 22 உள்ளான மனிதனுக்குத் தகுந்தபடி தேவனுடைய நியாயப்பிரமாணத்தின்மேல் பிரியமாக இருக்கிறேன். 23 ஆனாலும் என் மனதின் பிரமாணத்திற்கு எதிராகப் போராடுகிற வேறொரு பிரமாணத்தை என் உறுப்புகளில் இருக்கிறதைப் பார்க்கிறேன்; அது என் உறுப்புகளில் உண்டாயிருக்கிற பாவப்பிரமாணத்திற்கு என்னைச் சிறையாக்கிக் கொள்ளுகிறது. 24 நிர்பந்தமான மனிதன் நான்! இந்த மரணசரீரத்திலிருந்து யார் என்னை விடுதலையாக்குவார்? 25 நம்முடைய கர்த்தராகிய இயேசுகிறிஸ்துவின் மூலமாக தேவனுக்கு நன்றி செலுத்துகிறேன். எனவே, நானே என் மனதினாலே தேவனுடைய நியாயப்பிரமாணத்திற்கும், சரீரத்தினாலே பாவப்பிரமாணத்திற்கும் சேவை செய்கிறேன்.