പ്രവാസവും ബാബേലിന്റെ നാശവും മുൻകൂട്ടി പ്രവചിക്കപ്പെടുന്നു

ബാബേലിലെ പ്രവാസത്തെയും ബാബേലിന്റെ നാശത്തെയും കുറിച്ചുള്ള ഒരു പ്രവചനം.

ക്രി.മു. 710

Biblica® Open Malayalam Contemporary Version™ (OMCV)

യെശയ്യാവ് 46–47

1 ബേൽ വണങ്ങുന്നു, നെബോ കുനിയുന്നു;

അവരുടെ വിഗ്രഹങ്ങൾ ഭാരംവഹിക്കുന്ന മൃഗങ്ങൾ ചുമക്കുന്നു.

അവ ചുമന്നുനടക്കുന്ന ഈ പ്രതിമകൾ അവയ്ക്ക് ഒരു വലിയ ചുമടും

തളർന്നുപോയ മൃഗങ്ങൾക്കു താങ്ങാനാകാത്ത ഭാരവുമാണ്.

2 അവ കുനിയുന്നു, ഒരുമിച്ചു മുട്ടുമടക്കുന്നു;

ആ ചുമട് സുരക്ഷിതസ്ഥാനത്ത് എത്തിക്കാൻ കഴിയുന്നില്ല,

അവ സ്വയം ബന്ധനത്തിലേക്കു പോകുകയും ചെയ്യുന്നു.

3 “ജനനംമുതൽ ഞാൻ ചുമന്നിട്ടുള്ളവരും

ഗർഭംമുതൽ ഞാൻ വഹിച്ചിട്ടുള്ളവരുമായ,

യാക്കോബുഗൃഹമേ, ഇസ്രായേലിൽ ശേഷിച്ചിട്ടുള്ള എല്ലാവരുമേ,

ഞാൻ പറയുന്നതു കേൾക്കുക.

4 നിങ്ങളുടെ വാർധക്യകാലംവരെയും ജരാനരകൾ ബാധിക്കുംവരെയും

ഞാൻ മാറ്റമില്ലാത്തവൻ, ഞാനാണ് നിന്നെ സംരക്ഷിക്കുന്നവൻ.

ഞാൻ നിന്നെ സൃഷ്ടിച്ചു, ഞാൻ നിന്നെ ചുമക്കും;

ഞാൻ നിന്നെ സംരക്ഷിക്കും, ഞാൻ നിന്നെ മോചിപ്പിക്കും.

5 “നിങ്ങൾ എന്നെ ആരോട് ഉപമിക്കും? എന്നെ ആർക്കു തുല്യനാക്കും?

നിങ്ങൾ എന്നെ ആരോടു താരതമ്യപ്പെടുത്തി എന്നെ ഉപമിക്കും?

6 ചിലർ സഞ്ചിയിൽനിന്നു സ്വർണം കുടഞ്ഞിടുന്നു,

തുലാസിൽ വെള്ളി തൂക്കിനോക്കുന്നു;

അതിനെ ഒരു ദേവതയാക്കുന്നതിന് ഒരു സ്വർണപ്പണിക്കാരനെ അവർ കൂലിക്കു നിർത്തുന്നു,

അവർ സാഷ്ടാംഗം വീണ് അതു നമസ്കരിക്കുകയുംചെയ്യുന്നു.

7 അവർ അതിനെ തോളിലെടുത്തുവെച്ച് ചുമന്നുനടക്കുന്നു;

അവർ അതിനെ അതിന്റെ സ്ഥാനത്തു നിർത്തുന്നു, അത് അവിടെത്തന്നെ നിൽക്കുന്നു.

ആ സ്ഥാനത്തുനിന്ന് അതിനു വ്യതിചലിക്കാൻ കഴിയുകയുമില്ല.

ആരെങ്കിലും അതിനോടു നിലവിളിച്ചാൽപോലും, അത് ഉത്തരം പറയുന്നില്ല.

അവരുടെ കഷ്ടതയിൽനിന്ന് രക്ഷിക്കാൻ അതിനു കഴിവുമില്ല.

8 “ഇത് ഓർത്തുകൊള്ളുക, ധൈര്യസമേതം നിലകൊള്ളുക,

നിഷേധികളേ, ഇതു ഹൃദയത്തിൽ സൂക്ഷിക്കുക.

9 കഴിഞ്ഞകാലസംഭവങ്ങൾ ഓർക്കുക, പൗരാണിക കാര്യങ്ങൾതന്നെ;

ഞാൻ ആകുന്നു ദൈവം, വേറൊരു ദൈവവുമില്ല;

ഞാൻ ആകുന്നു ദൈവം; എന്നെപ്പോലെ ഒരുവനുമില്ല.

10 ആരംഭത്തിൽത്തന്നെ ഞാൻ അവസാനം പ്രഖ്യാപിക്കുന്നു,

പൂർവകാലത്തുതന്നെ ഭാവിയിൽ സംഭവിക്കാനുള്ളതും.

അവിടന്ന് അരുളുന്നു, ‘എന്റെ ആലോചന നിലനിൽക്കും,

എനിക്കു ഹിതമായതൊക്കെയും ഞാൻ നിറവേറ്റും.’

11 ഒരു ഇരപിടിയൻപക്ഷിയെ കിഴക്കുനിന്നു ഞാൻ വരുത്തും;

എന്റെ ആലോചന നിറവേറ്റുന്ന പുരുഷനെ ദൂരദേശത്തുനിന്നും.

ഞാൻ സംസാരിച്ചിരിക്കുന്നു, ഞാൻ അതു നിറവേറ്റും;

ഞാൻ ലക്ഷ്യം വെച്ചിരിക്കുന്നു, ഞാൻ അതു നടത്തും.

12 എന്റെ നീതിയിൽനിന്ന് അകന്നിരിക്കുന്ന

കഠിനഹൃദയരേ, എന്നെ ശ്രദ്ധിക്കുക.

13 എന്റെ നീതിനിർവഹണം സമീപിച്ചിരിക്കുന്നു,

അത് അകലെയല്ല,

എന്റെ രക്ഷ താമസിക്കയുമില്ല.

ഞാൻ സീയോന് എന്റെ രക്ഷയും

ഇസ്രായേലിന് എന്റെ മഹത്ത്വവും നൽകും.

47:1 “ബാബേൽപുത്രിയായ കന്യകേ,

ഇറങ്ങി പൊടിയിൽ ഇരിക്കുക.

ബാബേല്യരുടെ നഗരറാണിയായവളേ,

സിംഹാസനത്തിൽനിന്നും നിഷ്കാസിതയായി തറയിൽ ഇരിക്കുക.

ഇനിയൊരിക്കലും നീ പേലവഗാത്രിയെന്നോ

കോമളാംഗിയെന്നോ വിളിക്കപ്പെടുകയില്ല.

2 തിരികല്ലെടുത്തു മാവു പൊടിക്കുക;

നിന്റെ മൂടുപടം നീക്കുക.

നിന്റെ വസ്ത്രം ഉയർത്തുക,

തുട മറയ്ക്കാതെ നദി കടക്കുക.

3 നിന്റെ നഗ്നത അനാവൃതമാക്കപ്പെടും,

നിന്റെ ഗുഹ്യഭാഗം വെളിപ്പെടും.

ഞാൻ ഒരു മനുഷ്യനെയും ആദരിക്കാതെ

പ്രതികാരം നടത്തും.”

4 ഞങ്ങളുടെ വീണ്ടെടുപ്പുകാരൻ ഇസ്രായേലിന്റെ പരിശുദ്ധനാകുന്നു,

സൈന്യങ്ങളുടെ യഹോവ എന്നാകുന്നു അവിടത്തെ നാമം.

5 “ബാബേല്യപുത്രീ,

നിശ്ശബ്ദയായിരിക്കൂ, അന്ധകാരത്തിലേക്കു കടക്കൂ;

രാജ്യങ്ങളുടെ തമ്പുരാട്ടി എന്ന്

ഇനി നീ വിളിക്കപ്പെടുകയില്ല.

6 ഞാൻ എന്റെ ജനത്തോടു കോപിച്ചു,

എന്റെ അവകാശത്തെ ഞാൻ മലിനമാക്കി;

നിന്റെ കൈയിൽ ഞാൻ അവരെ ഏൽപ്പിച്ചു,

നീ അവരോടു കരുണ കാണിച്ചില്ല.

വൃദ്ധരുടെമേൽപോലും

നീ നിന്റെ ഭാരമേറിയ നുകം വെച്ചു.

7 ‘ഞാൻ എന്നേക്കും ഒരു തമ്പുരാട്ടിതന്നെ ആയിരിക്കും,’

എന്നു നീ പറഞ്ഞു.

ഈ കാര്യങ്ങൾ നീ ഹൃദയത്തിൽ കരുതുകയോ

അതിന്റെ പരിണതഫലം എന്താകുമെന്ന് ചിന്തിക്കുകയോ ചെയ്തില്ല.

8 “എന്നാൽ ഇപ്പോൾ, സുഖലോലുപയായവളേ, കേൾക്കുക,

നിങ്ങളുടെ സുരക്ഷയിൽ വിശ്രമിക്കുന്നവളേ,

‘ഞാൻ ആകുന്നു, എന്നെക്കാൾ മികച്ച ആരുമില്ല,

ഞാൻ ഒരിക്കലും ഒരു വിധവയാകുകയില്ല,

പുത്രനഷ്ടം അനുഭവിക്കുകയുമില്ല,’

എന്ന് സ്വയം പറയുന്നവളേ,

9 ഒരൊറ്റ നിമിഷംകൊണ്ട്, ഒരേദിവസംതന്നെ

ഇവ രണ്ടും നീ നേരിടും.

നിനക്ക് അസംഖ്യം ക്ഷുദ്രപ്രയോഗങ്ങളും

ശക്തിയേറിയ എല്ലാ ആഭിചാരങ്ങളും ഉണ്ടായിരുന്നിട്ടും

പുത്രനഷ്ടവും വൈധവ്യവും

അതിന്റെ പൂർണതയിൽ നിനക്കു നേരിടേണ്ടിവരും.

10 നീ നിന്റെ ദുഷ്ടതയിൽ ആശ്രയിച്ചു,

‘ആരും എന്നെ കാണുന്നില്ല,’ എന്നു നീ പറഞ്ഞു.

നിന്റെ ജ്ഞാനവും നിന്റെ വിദ്യയും നിന്നെ വഴിതെറ്റിച്ചു.

‘ഞാൻ ആകുന്നു, എന്നെക്കാൾ മികച്ച ആരുമില്ല’

എന്നു നീ ഹൃദയത്തിൽ പറഞ്ഞപ്പോൾത്തന്നെ.

11 അതിനാൽ അനർഥം നിന്റെമേൽ പതിക്കും,

മന്ത്രവാദംകൊണ്ട് അതു നീക്കാൻ നിനക്കു കഴിയുകയില്ല.

നിനക്കു പരിഹരിക്കാനാകാത്ത

ആപത്തു നിന്റെമേൽ വരും;

നിനക്കു ചിന്തിക്കാൻപോലും കഴിയാത്ത വിനാശം

നിന്റെമേൽ പെട്ടെന്നുതന്നെ വീഴും.

12 “ഇപ്പോൾ, നീ ബാല്യംമുതൽ ചെയ്തുവന്ന

നിന്റെ ആഭിചാരങ്ങളും

ക്ഷുദ്രപ്രയോഗങ്ങളുടെ ബാഹുല്യവും തുടരുക.

ഒരുപക്ഷേ നിനക്കു ഫലം ലഭിച്ചേക്കാം,

ഒരുപക്ഷേ നീ ഭീതി ജനിപ്പിച്ചേക്കാം.

13 ആലോചനയുടെ ബാഹുല്യംകൊണ്ടു നീ വലഞ്ഞിരിക്കുന്നു!

ഇപ്പോൾ ജ്യോതിഷികൾ മുമ്പോട്ടുവരട്ടെ,

നക്ഷത്രം നോക്കുന്നവരും അമാവാസി കണ്ടു പ്രവചിക്കുന്നവരും,

നിനക്കു സംഭവിക്കാൻ പോകുന്നവയിൽനിന്ന് നിന്നെ വിടുവിക്കട്ടെ.

14 ഇതാ, അവർ വൈക്കോൽക്കുറ്റിപോലെ ആകും;

തീ അവരെ ദഹിപ്പിച്ചുകളയും.

അഗ്നിജ്വാലയുടെ ശക്തിയിൽനിന്നു

തങ്ങളെത്തന്നെ രക്ഷിക്കാൻ അവർക്കു കഴിവില്ല.

അതു കുളിർമാറ്റുന്നതിനുള്ള കനലോ

കായുവാൻ തക്ക തീയോ അല്ല.

15 ബാല്യംമുതൽ നിന്നോടു ചേർന്ന് അധ്വാനിച്ചിരുന്നവരും

നിന്നോടു ചേർന്നു കച്ചവടംചെയ്തവരും

അതിലപ്പുറമാകുകയില്ല.

അവർ ഓരോരുത്തരും അവരവരുടെ ദിശയിലേക്കു ചിതറിപ്പോകും;

നിന്നെ രക്ഷിക്കാൻ ആരും അവശേഷിക്കുകയില്ല.