കഷ്ടതയുടെ സങ്കീർത്തനങ്ങൾ, പ്രധാനമായും പ്രവാസകാലത്തുനിന്നുള്ളവ (continued)

സഭയുടെ കഷ്ടതകളുടെയും ദുരിതങ്ങളുടെയും കാലത്ത്, പ്രധാനമായും ബാബേൽപ്രവാസകാലത്ത്, എഴുതപ്പെട്ട സങ്കീർത്തനങ്ങൾ.

ക്രി.മു. 539

Biblica® Open Malayalam Contemporary Version™ (OMCV)

സങ്കീർത്തനങ്ങൾ 92–93

ശബ്ബത്ത് നാളിനുള്ള ഒരു ഗീതം; ഒരു സങ്കീർത്തനം.

1-2 യഹോവയെ വാഴ്ത്തുന്നതും

അത്യുന്നതനേ, അവിടത്തെ നാമത്തിന്

പത്തുകമ്പിയുള്ള വീണയുടെയും

കിന്നരത്തിന്റെ മധുരനാദത്തിന്റെയും അകമ്പടിയോടെ സംഗീതമാലപിക്കുന്നതും

3 പ്രഭാതത്തിൽ അവിടത്തെ അചഞ്ചലസ്നേഹവും

രാത്രിയിൽ അവിടത്തെ വിശ്വസ്തതയും വർണിക്കുന്നതും വിശിഷ്ടമത്രേ.

4 യഹോവേ, അവിടത്തെ പ്രവൃത്തികളാൽ അവിടന്ന് എന്നെ ആനന്ദിപ്പിക്കുന്നല്ലോ;

തിരുക്കരങ്ങളുടെ പ്രവൃത്തിനിമിത്തം ഞാൻ ആനന്ദഗീതം ആലപിക്കും.

5 യഹോവേ, അവിടത്തെ പ്രവൃത്തികൾ എത്രയോ ഉന്നതം

അവിടത്തെ ചിന്താഗതികൾ എത്രയോ ഗഹനം!

6 വിവേകഹീനനായ മനുഷ്യൻ അത് അറിയുന്നില്ല,

ഭോഷർ അതു ഗ്രഹിക്കുന്നതുമില്ല,

7 ദുഷ്ടർ പുല്ലുപോലെ തഴച്ചുവളരുന്നതും

അധർമികൾ അഭിവൃദ്ധിപ്രാപിക്കുന്നതും,

എന്നേക്കും നശിച്ചുപോകേണ്ടതിനുതന്നെ.

8 എന്നാൽ യഹോവേ, അവിടന്ന് എന്നേക്കും ഉന്നതനായിരിക്കുന്നു.

9 യഹോവേ, അങ്ങയുടെ ശത്രുക്കൾ,

അതേ, അങ്ങയുടെ ശത്രുക്കൾ നശിച്ചുപോകും, നിശ്ചയം;

എല്ലാ അധർമികളും ചിതറിക്കപ്പെടും.

10 എന്നാൽ അവിടന്ന് എന്റെ കൊമ്പ് കാട്ടുകാളയുടെ കൊമ്പുപോലെ ഉയർത്തി;

പുതിയ തൈലം എന്റെമേൽ ഒഴിച്ചിരിക്കുന്നു.

11 എന്റെ കണ്ണ് എന്റെ ശത്രുക്കളുടെ പതനം കണ്ടു;

എന്റെ കാത് ദുഷ്ടരായ എന്റെ എതിരാളികളുടെ പരാജയം കേട്ടിരിക്കുന്നു.

12 നീതിനിഷ്ഠർ ഒരു പനപോലെ തഴച്ചുവളരുന്നു,

അവർ ലെബാനോനിലെ ദേവദാരുപോലെ വളരും;

13 അവരെ യഹോവയുടെ ആലയത്തിൽ നട്ടുപിടിപ്പിച്ചിരിക്കുന്നു,

നമ്മുടെ ദൈവത്തിന്റെ ആലയാങ്കണത്തിൽ അവർ തഴച്ചുവളരും.

14 അവർ തങ്ങളുടെ വാർധക്യത്തിലും ഫലം കായ്ച്ചുകൊണ്ടിരിക്കും,

അവർ നിത്യനൂതനരും നിത്യഹരിതരും ആയിരിക്കും,

15 “യഹോവ നീതിനിഷ്ഠനാകുന്നു;

അവിടന്ന് ആകുന്നു എന്റെ പാറ, അനീതി അങ്ങയിൽ ലവലേശവുമില്ല!” എന്ന് അവർ ഘോഷിക്കും.

93:1 യഹോവ വാഴുന്നു, അവിടന്ന് പ്രതാപം അണിഞ്ഞിരിക്കുന്നു;

യഹോവ പ്രതാപം അണിയുകയും ശക്തികൊണ്ട് അരമുറുക്കുകയും ചെയ്തിരിക്കുന്നു;

നിശ്ചയമായും ഭൂലോകം ഇളകാതെ ഉറച്ചുനിൽക്കും.

2 അങ്ങയുടെ സിംഹാസനം അതിപുരാതനകാലത്തുതന്നെ സ്ഥാപിതമായതാണ്;

അവിടന്ന് അനാദികാലംമുതൽതന്നെ ഉള്ളവനും ആകുന്നു.

3 യഹോവേ, നദികളിൽ പ്രളയജലം ഉയരുന്നു,

നദികൾ അവയുടെ ആരവം ഉയർത്തുന്നു;

തിരകൾ അലച്ചുതിമിർക്കുന്നു.

4 വൻ ജലപ്രവാഹത്തിന്റെ ഗർജനത്തെക്കാളും

ശക്തിയേറിയ തിരകളെക്കാളും

ഉന്നതനായ യഹോവ ശക്തൻതന്നെ.

5 അവിടത്തെ നിയമവ്യവസ്ഥകൾ സ്ഥിരമായിരിക്കുന്നു;

യഹോവേ, വിശുദ്ധി അങ്ങയുടെ ആലയത്തിന്

എന്നെന്നേക്കും ഒരു അലങ്കാരമാണ്.

സങ്കീർത്തനങ്ങൾ 123

ആരോഹണഗീതം.

1 സ്വർഗത്തിൽ സിംഹാസനസ്ഥനായിരിക്കുന്ന അങ്ങയിലേക്ക്,

ഞാൻ എന്റെ കണ്ണുകൾ ഉയർത്തുന്നു.

2 അടിമകളുടെ കണ്ണുകൾ തങ്ങളുടെ യജമാനന്റെ കൈയിലേക്കും

ദാസിയുടെ കണ്ണുകൾ അവരുടെ യജമാനത്തിയുടെ കൈയിലേക്കും എന്നതുപോലെ,

ഞങ്ങളുടെ കണ്ണുകൾ ഞങ്ങളുടെ ദൈവമായ യഹോവയിലേക്ക്,

കരുണ കാണിക്കുന്നതുവരെ നോക്കിക്കൊണ്ടിരിക്കും.

3 ഞങ്ങളോടു കരുണതോന്നണമേ, യഹോവേ, ഞങ്ങളോടു കരുണതോന്നണമേ,

കാരണം ഇപ്പോൾത്തന്നെ ഞങ്ങൾ നിന്ദകളാൽ മടുത്തിരിക്കുന്നു.

4 അഹന്തനിറഞ്ഞവരുടെ പരിഹാസവും

വിമതരുടെ വെറുപ്പും

ഞങ്ങൾ ആവോളം സഹിച്ചിരിക്കുന്നു.