Ang Kataposang mga Tagna ni Zacarias
457 sa wala pa si Cristo
Biblica® Open Ang Pulong sa Dios™ (OCCB)
1 Mao kini ang mensahe sa Ginoo:
Miingon ang Ginoo nga silotan niya ang mga siyudad sa Hadrac ug Damasco,
tungod kay kinahanglan nga modangop sa Ginoo ang tanang katawhan
ug ilabina ang tanang mga tribo sa Israel.
2 Silotan usab sa Ginoo ang Hamat,
nga kasikbit nga siyudad sa Hadrac ug sa Damasco,
ug ang mga siyudad sa Tiro ug Sidon,
bisan pa ug adunay abilidad ang mga lumulupyo niini.
3 Nagpatindog ang mga lumulupyo sa Tiro ug paril,
ug nagtapok sila ug plata ug bulawan
nga daw sa nagtapok lang sila ug yuta.
4 Apan kuhaon sa Ginoo ang ilang mga kabtangan
ug ilabay niya ang ilang bahandi ngadto sa dagat.
Ug ang ilang siyudad lamyon sa kalayo.
5 Makita kini sa mga lumulupyo sa Ashkelon ug mahadlok sila.
Magluko sa kasakit ang mga lumulupyo sa Gaza,
ingon man ang mga lumulupyo sa Ekron
kay ang ilang ginasaligan mawala.
Mamatay ang hari sa Gaza,
ug ang Ashkelon dili na mapuy-an.
6 Ang Ashdod pagapuy-an sa mga tawong nagkalain-laing kaliwat.
Laglagon sa Ginoo ang gipasigarbo sa mga Filistihanon.
7 Dili na sila mokaon ug karne nga adunay dugo
o sa mga pagkaon nga gidili.
Ang mahibilin kanila isipon sa atong Dios nga iyang katawhan,
ug mahimo na silang kabahin sa katawhan sa Juda.
Ang mga lumulupyo sa Ekron mahimong kabahin
sa katawhan sa Ginoo sama sa mga Jebusihanon.
8 Panalipdan sa Ginoo ang iyang templo
batok sa mga mosulong niini.
Wala nay modaog-daog sa iyang katawhan
kay karon gibantayan na niya sila.
9 Miingon ang Ginoo, “Panghugyaw gayod kamo sa kalipay,
kamong mga lumulupyo sa Zion,
kay ang inyong hari moabot.
Matarong siya ug madaogon.
Mapainubsanon siya ug moabot nga
nagsakay sa nating asno.
10 Kuhaon ko ang mga karwahi ug mga kabayo
nga panggira gikan sa Israel ug sa Juda.
Ang mga pana nga gigamit sa gira balion.
Ang moabot nga hari magdala
ug kalinaw ngadto sa mga nasod.
Mohari siya gikan sa usa ka dagat
hangtod sa usa pa gayod ka dagat,
ug gikan sa Suba sa Eufrates
hangtod sa kinatumyan sa yuta sa Israel.”
11 Miingon pa ang Ginoo, “Bahin kaninyo nga mga Israelinhon,
tungod sa akong kasabotan kaninyo nga gipalig-on pinaagi sa dugo,
hatagan ko ug kagawasan ang nangabihag
nga gihulog sa atabay nga walay tubig.
12 Kamong mga nabihag nga naglaom,
balik na kamo sa dapit diin
luwas kamo sa katalagman.
Karon sultihan ko kamo nga ibalik ko
nga doble ang nawala kaninyo.
13 Gamiton ko ang Juda ug ang Israel nga daw pana.
Himuon ko ang katawhan sa Zion nga daw espada sa sundalo,
ug laglagon nila ang katawhan sa Grecia.”
14 Unya magpakita ang Ginoo ibabaw sa iyang katawhan.
Mokilab ang iyang pana sama sa kilat.
Patingogon sa Ginoong Dios ang budyong;
ug moabot siya uban sa bagyo nga gikan sa habagatan.
15 Panalipdan sa Ginoo nga Makagagahom ang iyang katawhan.
Tunob-tunoban lang nila ang mga bato
nga gilambuyog kanila sa ilang mga kaaway.
Mangaon sila ug moinom sa pagsaulog sa ilang kadaogan.
Manghugyaw sila nga murag mga hubog.
Mapuno ang ilang tiyan sa ilimnon
sama sa yahong nga puno sa dugo nga iwisik-wisik
sa tumoy sa mga eskina sa halaran.
16-17 Nianang adlawa luwason sila sa Ginoo
nga ilang Dios isip iyang mga karnero.
Pagkaanindot ug pagkatahom nilang
sud-ongon diha sa ilang yuta.
Sama sila sa mahalong mga bato
nga naggilak-gilak diha sa korona.
Ang ilang madagayaong abot makahatag
ug kusog sa ilang mga pamatan-on.
10:1 Pangayo sa Ginoo ug ulan sa panahon
sa tingtubo sa mga tanom,
kay siya ang naghimo sa dag-om.
Siya ang naghatag ug ulan ngadto
sa mga tawo ug sa tanom sa kaumahan.
2 Sa pagkatinuod, dili matuohan
ang mga dios-dios ug ang mga manalagna.
Naghatag sila ug sayop nga kahulogan sa mga damgo.
Walay pulos ang ilang mga pulong sa pagdasig.
Busa naglatagaw ang katawhan sa Israel sama sa karnero.
Nag-antos sila tungod kay wala silay pangulo.
3 Miingon ang Makagagahom nga Ginoo,
“Nasuko ako pag-ayo sa mga taga-laing dapit nga nangulo
sa akong katawhan; silotan ko gayod sila.
Kay hinumdoman ko ang mga karnero,
nga mao ang katawhan sa Juda.
Himuon ko ang Juda nga daw mga kabayo
nga panggira nga makahatag ug kadungganan.
4 Maggikan kanila ang mga pangulo nga daw pundasyon,
ugsok sa tolda, ug pana nga alang sa gira.
5 Maghiusa ang katawhan sa Juda ug mahisama sila
sa kusgang mga sundalo nga mobuntog
sa ilang mga kaaway nga daw mga lapok
lang nga tunob-tunoban nila diha sa kadalanan.
Makig-gira sila tungod kay kauban nila ako,
ug buntogon nila ang mga tigkabayo.
6 “Lig-onon ko ang katawhan sa Juda
ug luwason ko ang katawhan sa Israel.
Pabalikon ko sila sa ilang dapit
tungod kay naluoy ako kanila.
Ug tungod kay ako ang Ginoo nga ilang Dios,
tubagon ko ang ilang pag-ampo.
Busa daw sama ra nga wala ko sila isalikway.
7 Ang katawhan sa Israel mahisama sa kusgang mga sundalo.
Magmalipayon sila sama sa tawo nga nakainom ug bino.
Kini nga kadaogan mahinumdoman sa ilang mga kaliwat
ug maglipay sila tungod sa akong gihimo.
8 Tawgon ko ang akong katawhan ug tigomon ko sila.
Luwason ko gayod sila, ug modaghan sila sama kaniadto.
9 Bisan gipatibulaag ko sila sa ubang mga nasod,
mahinumdoman nila ako didto.
Magpabilin sila nga buhi apil ang ilang kabataan,
ug mopauli sila sa ilang dapit.
10 Papaulion ko sila gikan sa Ehipto ug Asiria,
ug papuy-on ko sila sa Gilead ug sa Lebanon.
Manobra ang ilang gidaghanon
hangtod dili na sila moigo sa ilang yuta.
11 Motabok sila ug dagat nga baloron
apan moundang ang mga balod.
Ug bisan ang Suba sa Nilo momala.
Ang mapasigarbohon nga Asiria ipaubos
ug ang gahom sa Ehipto mahanaw.
12 Lig-onon ko ang akong katawhan tungod kay anaa sila kanako,
ug mosunod sila kanako.
Ako, ang Ginoo, ang nag-ingon niini.”
11:1 Kamong mga lumulupyo sa Lebanon,
ablihi ninyo ang mga pultahan sa inyong mga siyudad
aron lamyon sa kalayo ang inyong mga kahoyng sedro.
2 Ug sa samang paagi nangapukan ang matahom
ug labong nga mga kahoyng sedro,
nangapukan usab ang mga kahoyng sipres
ug ang mga kahoyng terebinto sa Basan.
3 Nanghilak ang mga magbalantay sa karnero
kay nangadaot ang ilang tambok nga mga sabsabanan.
Nagngulob ang mga liyon kay nangadaot
ang kalasangan sa Walog sa Jordan nga ilang gipuy-an.
4 Mao kini ang giingon sa Ginoo nga akong Dios:
“Atimana ang mga karnerong ihawonon. 5 Ang mga nagpalit ug nag-ihaw kanila dili silotan. Ang mga nagbaligya kanila nag-ingon, ‘Dalaygon ang Ginoo! Adunahan na ako!’ Bisan ang ilang mga magbalantay wala maluoy kanila.
6 “Atimana ang akong katawhan kay ako, ang Ginoo, nag-ingon nga dili ko na kaloy-an ang mga tawo sa kalibotan. Ako mismo ang motugyan sa matag tawo nga masakop sa iyang isigka-tawo ug sa iyang hari. Ug kini sila ang magdala ug kalaglagan sa kalibotan, ug wala akoy luwason gikan sa ilang mga kamot.”
7 Busa giatiman ko ang mga karnerong ihawonon alang sa mga nagbaligya ug mga karnero. Nagkuha ako ug duha ka baston; ang usa gitawag ko ug Kaayo ug ang usa gitawag ko ug Paghiusa.
8 Nawad-an akog pasensya sa tulo ka magbalantay sa karnero nga nasuko kanako. Busa gipapahawa ko silang tanan sulod lang sa usa ka bulan. 9 Unya miingon ako sa mga karnero, “Dili na ako moatiman kaninyo. Pasagdi nga mamatay ang kamatyonon ug malaglag ang kalaglagon. Ug ang mahibilin pasagdi nga magkinan-anay sa unod sa usag usa.”
10 Unya gikuha ko ang baston nga gitawag ug Kaayo, ug gibali ko kini isip simbolo nga gibawi na sa Ginoo ang iyang kasabotan sa tanang mga katawhan. 11 Busa nianang adlawa nawad-an ug bili ang kasabotan. Ang mga nagbaligya sa mga karnero nga nagtan-aw kanako nahibalo nga adunay mensahe ang Ginoo pinaagi niining akong gihimo. 12 Giingnan ko sila, “Kon sa inyong huna-huna angay akong suholan, ihatag kanako ang akong suhol. Apan kon dili, inyo na lang kana.” Busa gibayran nila ako ug 30 kabuok nga pilak isip akong suhol. 13 Miingon ang Ginoo kanako, “Ihulog kanang kuwartaha sa tago-anan sa kuwarta sa templo.” Busa gikuha ko ang 30 kabuok nga pilak, nga alang kanila dako na kaayo nga isuhol kanako, ug gihulog ko kini sa tago-anan sa kuwarta sa Templo sa Ginoo. 14 Unya gibali ko ang ikaduha nga baston nga gitawag ug Paghiusa isip simbolo nga naputol na ang maayong relasyon sa Juda ug Israel.
15 Miingon pag-usab ang Ginoo kanako, “Pagpakaaron-ingnon nga usa ikaw ka walay pulos nga magbalantay sa karnero. 16 Kay magbutang ako ug pangulo sa Israel nga sama sa usa ka walay pulos nga magbalantay sa karnero nga dili moatiman sa mga himalatyon, ni mangita sa mga nangawala, o motambal sa mga samdan, o mopasabsab sa mga niwang. Apan mokaon siya sa karne sa tambok nga karnero ug laksion pa gani niya ang mga kuko niini aron daginuton.
17 “Alaot kanang walay pulos nga magbalantay
sa karnero nga mibiya sa akong mga karnero!
Tigbason ug espada ang iyang kamot
ug tuslokon ang iyang tuong mata.
Dili na gayod mapuslan ang iyang kamot
ug dili na makakita ang iyang tuong mata.”