Bahin 10: Ang Paghari ni Uzias

Ang Gingharian sa Juda

Ang Unang Bahin sa Paghari ug Kauswagan ni Uzias

810 sa wala pa si Cristo

Biblica® Open Ang Pulong sa Dios™ (OCCB)

2 Cronicas 26:1–4

1 Ang gipuli sa katawhan sa Juda kang Amazia ingon nga hari mao ang iyang 16 ka tuig nga anak nga si Uzias. 2 Siya ang nagbawi sa Elat ug nagpatukod pag-usab niini human mamatay ang iyang amahan nga si Amazia. 3 Nag-edad si Uzias ug 16 ka tuig sa dihang nahimo siyang hari. Naghari siya sa Jerusalem sulod sa 52 ka tuig. Ang iyang inahan mao si Jecolia nga taga-Jerusalem. 4 Gihimo ni Uzias ang maayo atubangan sa Ginoo, sama sa gihimo sa iyang amahan nga si Amazia.

2 Mga Hari 15:1

1 Nahimong hari sa Juda si Azaria nga anak ni Amazia sa ika-27 nga tuig sa paghari ni Jeroboam II sa Israel.

2 Cronicas 26:5–15

5 Midangop siya sa Dios sa panahon ni Zacarias, nga mao ang nagtudlo kaniya sa pagtahod sa Dios. Samtang nagpadayon siya sa pagdangop sa Ginoo, gipauswag usab siya sa Dios.

6 Nakig-gira siya sa mga Filistihanon ug giguba niya ang mga paril sa Gat, Jabne, ug Ashdod. Unya nagpatukod siyag bag-o nga mga lungsod duol sa Ashdod ug sa uban pa nga mga lungsod sa Filistia. 7 Gitabangan siya sa Dios sa iyang pagpakig-gira sa mga Filistihanon, mga Meunhon, ug sa mga Arabo nga nagpuyo sa Gur Baal. 8 Nagbayad ug buhis ang mga Amonihanon ngadto kaniya, ug nabantog siya bisan sa utlanan sa Ehipto, tungod kay nahimo siyang labihan ka gamhanan.

9 Gipalig-on pag-ayo ni Uzias ang Jerusalem pinaagi sa pagpatukod ug mga tore sa pultahan sa may eskina, sa pultahan nga nag-atubang sa patag, ug sa eskina diin magtagbo ang duha ka paril. 10 Nagpatukod usab siyag mga tore sa kamingawan ug nagpakalot ug daghan mga bangag nga pundohanan ug tubig, tungod kay daghan siyag mga kahayopan sa kabungtoran sa kasadpan ug sa kapatagan. Mahiligon usab siya sa pagpanguma. Aduna siyay mga tawo nga nag-atiman sa iyang uma ug tamnanan sa ubas sa kabungtoran ug sa kapatagan.

11 Adunay mga hanas nga sundalo si Uzias nga andam sa pagpakig-gira. Kini sila giorganisar ug gigrupo-grupo ni Jeiel nga sekretaryo ug ni Maasea nga opisyal, ubos sa pagdumala ni Hanania nga usa sa mga opisyal sa hari. 12 2,600 ka mga pangulo sa pamilya ang komander niining maisog nga mga sundalo. 13 Ang gidaghanon sa mga sundalo mga 307,500. Hanas kaayo sila sa pagpakig-gira ug andam sa pagpanalipod sa hari batok sa iyang mga kaaway. 14 Gihatagan sila ni Uzias ug mga taming, bangkaw, helmet, bisti nga panagang sa lawas, pana, ug mga bato alang sa lambayog. 15 Nagpahimo usab si Uzias sa iyang hanas nga mga trabahante ug mga makina nga gamiton sa pagpamana ug sa paglabay ug dagkong mga bato gikan sa mga tore ug sa mga eskina sa mga paril. Nahimong inila si Uzias bisan asa, tungod kay gitabangan siya pag-ayo sa Ginoo hangtod nga nahimo siyang gamhanan.

Gitagna ni Joel ang Pagkapukan sa Juda mga 787 sa wala pa si Cristo

Sa dihang gipadaghan ni Uzias ang iyang kasundalohan, gitagna ni Joel nga moabot ang adlaw nga ang usa ka langyawng kasundalohan mopukan sa gingharian sa Juda.

Joel 1

1 Mao kini ang mensahe sa Ginoo nga gipadayag kang Joel nga anak ni Petuel.

2 Kamong mga tigdumala sa Juda

ug tanang mga lumulupyo niini,

pamatia ninyo kining isugilon ko kaninyo.

Wala pay nahitabo nga sama niini

sa panahon sa inyong mga katigulangan

o sa inyong panahon.

3 Kinahanglang isugilon kini sa matag henerasyon

sa inyong mga kaliwat.

4 Nagpulipuli sa pag-ataki sa mga tanom

ang mga panon sa dulon.

Ang mga tanom nga salin sa usa ka panon gitilok

sa misunod nga panon hangtod nga nahurot.

5 Kamong mga palahubog, bangon kamo

ug pagminatay ug hilak kay wala na kamoy mainom;

wala nay mga ubas nga himuong bag-ong bino.

6 Kay ang yuta sa Ginoo giataki sa makadaot

nga mga dulon nga labihan kadaghan.

Hait ang ilang mga ngipon sama sa ngipon sa liyon.

7 Gipangdaot nila ang mga tanom nga ubas

ug ang mga kahoy nga igos sa Ginoo.

Gikit-kit nila ang mga panit niini hangtod

nga miputi ang mga sanga.

8 Pagminatay kamog hilak sama sa dalagang putli nga nagbistig sako

sa pagpakita sa iyang pagsubo sa pagkamatay sa iyang pamanhonon.

9 Wala nay mga trigo ug mga bino nga ikahalad

sa Templo sa Ginoo; mao nga nagsubo ang mga pari

nga nag-alagad sa Ginoo.

10 Nangadaot ang mga kaumahan

ug daw sama kini sa tawo nga nasubo.

Nangadaot ang mga trigo

ug wala nay duga sa ubas ug lana.

11 Kamong mga mag-uuma, pagsubo kamo!

Kamong nag-atiman sa tamnanan sa mga ubas,

pagminatay kamog hilak, kay nahurot ug kadaot ang mga ani

sa kaumahan lakip ang mga trigo ug mga barley,

12 ug nangalaya ang mga punoan sa ubas ug ang tanang mga kahoy,

apil na ang mga igos, pomegranata, palma, ug mansanas.

Tinuod gayod nga nawala na ang kalipay sa mga tawo.

13 Kamong mga pari nga nag-alagad sa halaran sa akong Dios,

pagbisti kamog sako ug adto sa Templo,

ug pagminatay kamog hilak tibuok gabii,

kay wala nay mga trigo ug mga bino

nga ihalad sa Templo sa inyong Dios.

14 Sultihi ninyo ang mga tigdumala sa Juda

ug ang tanang mga lumulupyo niini nga magtigom

ug magpuasa silang tanan

sa Templo sa Ginoo nga inyong Dios.

Mangayo sila ug tabang sa Ginoo.

15 Hapit na ang adlaw nga manglaglag

ang Ginoo nga Makagagahom.

16 Ato mismong nasaksihan kon sa unsang paagi kita nawad-an ug pagkaon

ug kon sa unsang paagi nawala ang kasadya sa Templo sa Dios.

17 Nangamatay ang mga binhi sa yuta.

Ug tungod kay nanguyos ang mga trigo,

wala nay sulod ang mga bodega,

busa nangaguba na lang kini.

18 Nag-agulo ang mga mananap tungod sa kagutom.

Naglibot-libot ang mga baka kay wala na silay sibsiban;

bisan pa ang mga karnero nag-antos.

19 Nagpanawag ako kanimo, Ginoo,

kay nangalaya ang mga sibsiban

ug ang tanang kahoy sa kaumahan

nga daw sa gilamoy sa kalayo.

20 Bisan ang ihalas nga mga mananap nagpanawag kanimo,

kay mihubas na gayod ang mga suba ug tuboran,

ug nangalaya na ang mga sabsabanan nga daw sa gilamoy sa kalayo.