Gisakit ug Sanla si Uzias

787 o 765 sa wala pa si Cristo

Biblica® Open Ang Pulong sa Dios™ (OCCB)

2 Cronicas 26:16–21

16 Apan sa dihang gamhanan na siya, nahimo usab siyang mapasigarbohon. Ug mao kini ang nakapalaglag kaniya. Gisupak niya ang Ginoo nga iyang Dios. Misulod siya sa Templo sa Ginoo ug nangunay sa pagsunog ug insenso sa halaran. 17 Misunod kaniya didto si Azaria nga pangulong pari ug ang 80 pa ka maisog nga mga pari sa Ginoo, 18 ug gibadlong siya. Miingon sila, “Uzias, wala kay katungod nga magsunog ug insenso alang sa Ginoo. Kana nga buluhaton iya lang sa mga pari nga kaliwat ni Aaron. Sila ang gipili nga magsunog ug insenso. Gawas sa balaang puloy-anan kay nakasala ka sa Ginoo! Dili ka panalanginan sa Ginoong Dios tungod niini.”

19 Nasuko pag-ayo si Uzias sa mga pari. Ug samtang naggunit siya sa sudlanan sa insenso didto duol sa halaran sa Templo sa Ginoo, gituboan ug ngilngig nga sakit sa panit ang iyang agtang. 20 Sa dihang nakita ni Azaria nga pangulong pari ug sa mga kauban niya nga pari nga gituboan ug ngilngig nga sakit sa panit ang agtang ni Uzias, gipadali-dali nila siyag gawas. Ug bisan siya mismo midali-dalig gawas, tungod kay gisilotan siya sa Ginoo.

21 Nag-antos sa ngilngig nga sakit sa panit si Haring Uzias hangtod sa adlaw nga namatay siya. Naglain siyag puyo ug wala tugoti nga makasulod sa Templo sa Ginoo. Si Jotam nga iyang anak mao ang midumala sa palasyo ug sa katawhan sa Juda.

Gitudlo si Isaias nga Propeta 758 sa wala pa si Cristo

Isaias 1:1

1 Kini nga libro mahitungod sa gipadayag sa Dios kang Isaias nga anak ni Amos. Bahin kini sa Jerusalem ug sa Juda niadtong panahon sa paghari nila ni Uzias, Jotam, Ahaz, ug Ezequias sa Juda.

Isaias 6

1 Sa tuig nga namatay si Haring Uzias, nakita ko ang Ginoo nga naglingkod sa habog kaayong trono. Ang iyang taas nga bisti milukop sa tibuok Templo. 2 Adunay mga serapin sa ibabaw niya. Ang matag-usa niini adunay unom ka pako: ang duha ka pako gitabon sa ilang nawong, ang duha gitabon sa ilang mga tiil, ug ang laing duha gigamit nila sa paglupad. 3 Nag-ingnanay sila sa usag usa:

“Balaan, balaan, balaan ang Ginoo nga Makagagahom!

Ang iyang gamhanang presensya milukop sa tibuok kalibotan.”

4 Sa ilang mga tingog, natay-og ang mga patukoranan sa Templo ug napuno sa aso ang Templo.

5 Unya miingon ako, “Alaot ako! Sigurado gayod nga laglagon ako, tungod kay daotan ang akong mga ginapanulti ug nagpuyo ako uban sa mga tawong nagsulti usab ug daotan. Ug karon, nakita ko gayod ang Hari, ang Ginoo nga Makagagahom.”

6 Unya ang usa sa mga serapin milupad paingon kanako nga nagdala ug baga nga kinuha niya gikan sa halaran. 7 Gipadapat niya ang baga sa akong baba ug miingon, “Midapat na kini sa imong baba, busa wala kanay sala kay gipasaylo ka na.”

8 Unya nadungog ko ang tingog sa Ginoo nga nag-ingon, “Kinsa ang akong ipadala? Kinsa ang moadto alang kanamo?”

Mitubag ako, “Ania ako. Ipadala ako!”

9 Miingon siya,

“Lakaw ug sultihi ang katawhan sa Israel,

‘Bisan sige kamog pamati,

dili gihapon kamo makasabot.

Bisan sige kamog tan-aw,

dili gihapon kamo makakita.’

10 Pagahia ang kasing-kasing niining mga tawhana.

Bungola sila ug butahi, kay basig makakita,

makadungog, ug makasabot sila,

ug mobalik sila kanako, ug mamaayo sila.”

11 Nangutana ako, “Unsa kadugay, Ginoo?”

Mitubag siya,

“Hangtod nga magun-ob ang mga lungsod sa Israel

ug wala nay tawo.

Hangtod nga wala nay mopuyo sa mga balay

ug ang yuta malaglag sa hingpit.

12 Hangtod nga abugon ko ang mga Israelinhon

ug ang ilang yuta mahimong awaaw.

13 Bisan pag adunay mahibilin nga ikanapulo nga bahin

sa mga Israelinhon sa yuta sa Israel,

laglagon gihapon sila.

Apan aduna akoy gipili gikan kanila nga mahibilin.

Sama sila sa tuod sa kahoyng terebinto nga giputol.”

Isaias 2

1 Mao kini ang mensahe sa Dios nga nakita ni Isaias nga anak ni Amos bahin sa Juda ug Jerusalem:

2 Sa umaabot nga mga adlaw,

ang bukid nga gitukoran sa Templo sa Ginoo

mahimong pinakaimportante

sa mga bukid ug sa mga bungtod.

Ug modagsa niini nga bukid

ang mga tawo nga naggikan sa tanang nasod.

3 Moingon sila,

“Dali, motungas kita sa bukid sa Ginoo,

didto sa Templo sa Dios ni Jacob.

Kay tudloan kita niya sa iyang mga pamaagi

aron magkinabuhi kita sumala niini.”

Busa mopauli ang mga tawo gikan sa Jerusalem

dala ang mga balaod sa Ginoo.

4 Ug pinaagi sa iyang kasugoan,

husayon niya ang mga panagbingkil sa daghang mga nasod.

Busa dili na mag-away ang mga nasod,

ug dili na usab sila magbansay ug mga tawo aron sa pagpakig-gira.

Himuon na lang nilang punta sa mga daro ang ilang mga espada

ug himuon na lang nilang mga sundang ang ilang mga bangkaw.

5 Dali, kamong mga kaliwat ni Jacob,

magkinabuhi kita diha sa kamatuoran nga gihatag sa Ginoo kanato.

6 Tinuod nga gisalikway mo, Ginoo, ang imong katawhan,

ang mga kaliwat ni Jacob,

kay daghan silag mga tinuohan nga gikan sa sidlakan

ug naghimo usab silag mga pagpanagna sama sa mga Filistihanon.

Nakig-uyon sila sa mga kinaiya sa mga langyaw.

7 Abunda sa pilak ug bulawan ang ilang yuta,

ug walay pagkahurot ang ilang bahandi.

Daghan kaayo ang ilang mga kabayo,

ug walay pagkahurot ang ilang mga karwahi.

8 Daghan silag mga dios-dios.

Nagsimba sila niining mga butang

nga hinimo lang nila.

9 Busa ipaubos ang matag-usa kanila

ug pakaulawi sila.

Ayaw silag pasayloa, Ginoo!

10 Mga Israelinhon, panago kamo sa mga langub o sa mga bangag

aron makalikay kamo sa kapungot sa Ginoo

ug sa iyang dakong gahom.

11 Moabot ang adlaw nga ang Ginoo lang gayod ang pagadayegon.

Ipaubos niya ang mga mapasigarbohon ug mapahitas-on.

12 Kay adunay adlaw nga gitagana ang Ginoo nga labing gamhanan

sa pagpaubos sa tanang mga mapasigarbohon,

mga mapahitas-on,

ug sa mga nag-ila sa ilang kaugalingon nga gamhanan.

13 Putlon niya ang tanang tag-as nga mga sedro sa Lebanon,

ug ang tanang mga tugas sa Basan.

14 Patagon niya ang tanang habog nga kabukiran

ug mga bungtod.

15 Gub-on niya ang tanang tag-as nga mga tore

ug mga paril.

16 Lunoron niya ang tanang mga barko nga iya sa Tarshish

ug ang matahom nga mga sakayan.

17 Nianang adlawa, ang Ginoo lamang maoy pasidunggan.

Ipaubos niya ang mga mapasigarbohon

ug ang mga mapahitas-on.

18 Ug mahanaw sa hingpit ang mga dios-dios.

19 Manago ang mga tawo sa mga langub sa bakilid

ug sa mga bangag sa yuta

aron makalikay sa kapungot sa Ginoo

ug sa iyang dakong gahom sa panahon nga

uyogon na niya ang kalibotan.

20 Nianang adlawa, ipanglabay nila ngadto

sa mga ilaga ug sa mga kabog

ang ilang gisimba nga mga dios-dios

nga hinimo nila gikan sa plata ug bulawan.

21 Manago sila sa mga langub sa bakilid

ug sa mga bangag sa dagkong mga bato

aron makalikay sa kapungot sa Ginoo

ug sa iyang dakong gahom sa panahon nga uyogon na niya ang kalibotan.

22 Ayaw na kamo pagsalig sa tawo

kay mamatay ra siya.

Unsa ba gayod ang iyang matabang?