Ang Ikapitong Trumpeta: Naglipay ang Iglesia
Mitunog ang ikapitong trumpeta. Ang tibuok iglesia naglipay sa gipaabot nga kadaugan sa mga saksi sa kataposan sa 1260 ka tuig.
96 human matawo si Cristo
Biblica® Open Ang Pulong sa Dios™ (OCCB)
15 Ang ikapito nga anghel mipatingog sa iyang trumpeta, ug adunay makusog nga mga tingog didto sa langit nga nag-ingon,
“Karon ang atong Ginoo ug ang iyang pinili nga Mesiyas
mao na ang maghari sa kalibotan.
Ug ang iyang paghari walay kataposan!”
16 Ug ang 24 ka mga pangulo nga naglingkod sa ilang mga trono sa atubangan sa Dios nangluhod dayon ug misimba sa Dios, 17 nga nag-ingon:
“Ginoong Dios nga makagagahom sa tanan,
ikaw ang Dios kaniadto, ug ikaw usab ang Dios karon.
Nagpasalamat kami kanimo tungod kay gigamit mo na ang imong gahom,
ug nagsugod ka na sa paghari sa kalibotan.
18 Hilabihan gayod ang kasuko
sa mga tawo nga wala nag-ila kanimo.
Kay miabot na ang panahon nga silotan mo sila,
ug ang mga patay hukman mo na.
Mao na kini ang panahon nga hatagan mo
ug ganti ang imong mga sulugoon,
ang mga propeta, ang imong katawhan,
ug ang tanan nga nagtahod kanimo, inila man o dili.
Panahon na nga pamatyon mo ang mga tawo
nga nagguba sa kalibotan.”
Gilutos sa Dragon ang Iglesia
Ang ikaduhang bahin sa gamayng linukot nga basahon. Pinaagi sa mga hulagway sa usa ka babaye nga nag-antos sa pagpanganak og batang lalaki, ug nga giabog ngadto sa kamingawan sa usa ka dragon nga may pito ka ulo ug napulo ka sungay, gitagna niini ang paglutos sa iglesia ni Cristo, nga nagpatungha og tinuod ug matinumanong mga Cristohanon, pinaagi sa daotang espiritu nga unang nagdala og daotan niining kalibotana. Kini nga pakigbisog molungtad usab og 1260 ka tuig, gikan sa 606 hangtod sa 1866.
19 Unya naabli ang Templo sa Dios didto sa langit, ug sa sulod niini nakita ang sudlanan sa Kasabotan sa Dios. Nagpangilat, adunay mga tingog ug pagdalogdog. Naglinog ug nag-ulan ug dagkong tipak sa ice.
12:1 Adunay kahibulongang butang nga nagpakita sa langit. Nakita ko ang usa ka babaye nga nagbistig adlaw, ug ang bulan anaa ubos sa iyang mga tiil. Ug sa iyang ulo adunay korona nga adunay dose ka bitoon. 2 Manganakay na ang babaye, ug gatiyabaw tungod kay nagbati na siya.
3-4 Adunay usa pa gayod ka kahibulongang butang nga akong nakita sa langit. Duol sa babaye adunay dakong dragon nga pula nga adunay pito ka ulo ug napulo ka sungay, ug sa matag ulo adunay korona. Gikahig sa iyang ikog ang ikatulo nga bahin sa mga bitoon ug gipanglabay sa yuta. Nagtindog siya atubangan sa babaye nga manganakay aron pag-anak sa babaye kaonon dayon niya ang bata. 5 Unya, nanganak ang babaye ug lalaki ang iyang anak. Kining bataa mao ang magdumala sa mga nasod, ug walay makabatok kaniya. Busa pagkatawo sa bata wala kini makaon sa dragon, tungod kay kalit lang kini gikuha ug gidala ngadto sa Dios didto sa iyang trono. 6 Ang babaye nga nanganak miikyas didto sa kamingawan diin adunay lugar nga giandam nang daan sa Dios alang kaniya, aron didto siya atimanon sulod sa 1,260 ka adlaw.
7 Human niadto, nagsugod ang gira didto sa langit. Nakig-away si Miguel ug ang iyang kauban nga mga anghel batok sa dragon. Nakig-away usab ang dragon ug ang iyang sakop nga mga anghel. 8 Apan napildi ang dragon uban sa iyang mga anghel ug gipapahawa sila gikan sa langit. 9 Giabog ang dako nga dragon. Siya mao kadtong halas kaniadto nga gitawag nga Yawa o Satanas, nga nagpahisalaag sa mga tawo sa tibuok kalibotan. Gihulog siya dinhi sa kalibotan lakip ang iyang sakop nga mga anghel.
10 Human niadto, nadungog ko ang kusog nga tingog didto sa langit nga nag-ingon,
“Karon miabot na ang panahon
nga ang mga tawo luwason na sa Dios!
Gipadayag na niya karon ang iyang gahom ingon nga Hari
ug ang gahom sa Mesiyas nga iyang pinili!
Kay gipalayas na gikan sa langit
ang tigpasangil sa atong mga igsoon sa pagtuo.
Walay hunong ang iyang pagpasangil
batok kanila ngadto sa atong Dios.
11 Apan gipildi siya sa atong kauban
nga mga tumutuo pinaagi sa dugo sa Karnero,
ug pinaagi sa kamatuoran nga ilang gisangyaw.
Ug wala sila mahadlok nga motahan sa ilang kinabuhi
tungod sa ilang pagtuo.
12 Busa paglipay kamo, kamo nga nagpuyo sa langit.
Apan alaot kamong mga nagpuyo sa yuta ug sa dagat,
tungod kay mikanaog na ang Yawa diha kaninyo.
Nasuko siya pag-ayo tungod kay nahibaloan niya
nga mubo na lang gayod ang iyang panahon nga nahibilin.”
13 Sa dihang nakamatngon ang dragon nga gihulog na siya sa yuta, gigukod dayon niya ang babaye nga nanganak ug lalaki. 14 Apan gihatagan ang babaye ug duha ka pako nga sama sa pako sa dakong agila, aron makalupad siya paingon sa iyang dapit didto sa kamingawan nga kon asa atimanon siya sulod sa tulo ka tuig ug tunga, ug dili siya mapasipalahan sa dragon. 15 Mibuga dayon ang dragon ug daghang tubig nga murag baha paingon didto sa babaye aron anuron siya. 16 Apan gitabangan sa yuta ang babaye. Miabre ang yuta ug gisuyop ang tubig nga gibuga sa dragon. 17 Ug misamot pa gayod ang kapungot sa dragon ngadto sa babaye, busa ang iyang gibuhat, nakig-gira siya sa uban pang mga kaliwat sa babaye. Sila mao ang tanan nga nagtuman sa mga sugo sa Dios ug nagsunod sa kamatuoran nga gitudlo ni Jesus.
Ang Gahom sa Roma mao ang Ahente sa Daotang Espiritu
Ang ikatulong bahin sa gamayng linukot nga basahon, nga naghulagway, pinaagi sa mga timailhan nga mohaom lamang sa gahom sa Roma, sa ahente sa daotang espiritu nga naglutos sa tinuod nga iglesia sa Dios sulod sa 1260 ka tuig.
12:18 Ug ang dragon mitindog sa baybayon.
1 Unya aduna akoy nakita nga mananap nga mitungha gikan sa dagat. Aduna kini pito ka ulo ug napulo ka sungay. Matag sungay adunay korona, ug sa matag ulo adunay nasulat nga ngalan nga nagpasipala sa Dios. 2 Ang mananap nga akong nakita murag leopardo. Ang iyang tiil murag tiil sa mananap nga oso, ug ang iyang baba murag baba sa liyon. Ug gihatag sa dragon ang iyang gahom ug ang iyang trono sa mananap aron modako ang gahom niini sa paghari. 3 Ang usa sa mga ulo sa mananap adunay grabe nga samad nga murag ikamatay, apan naayo kini. Natingala gayod ang mga tawo sa tibuok kalibotan niining mananapa, ug nagsunod sila kaniya. 4 Gisimba nila ang dragon tungod kay siya mao ang naghatag ug gahom sa mananap. Gisimba usab nila ang mananap. Miingon sila, “Walay sama niini nga mananap ug walay makabatok kaniya.”
5 Gitugotan nga mosulti ang mananap ug daotan kaayo nga mga pulong ug mogahom sulod sa 42 ka bulan. 6 Gipasipalahan niya ang Dios, ang ngalan sa Dios, ang puloy-anan sa Dios, ug ang tanan nga nagpuyo sa langit. 7 Gitugotan usab siya nga girahon ug pildihon ang mga katawhan sa Dios. Ug gihatagan usab siyag gahom nga maghari sa tanan nga tawo sa kalibotan gikan sa bisan unsa nga tribo, kaliwatan, pinulongan, ug kanasoran. 8 Kini nga mananap simbahon sa tanang mga tawo sa kalibotan kansang mga ngalan wala malista sa libro nga gilistahan sa mga adunay kinabuhi. Sa wala pa matuga ang kalibotan, ang ngalan niining mga tawhana daan nang wala nasulat niadtong libro nga gikuptan sa Karnero nga gipatay.
9 Busa kamo nga naminaw angay gayod nga maghuna-huna pag-ayo!
10 “Si bisan kinsa nga gitakda nga dakpon,
dakpon gayod.
Ug si bisan kinsa nga gitakda nga patyon sa espada,
patyon gayod sa espada.”
Busa ang mga katawhan sa Dios kinahanglan nga magmainantuson ug adunay hugot nga pagtuo sa Dios.
Ang Espirituhanong Pagmando sa Iglesia sa Roma
Ang ikaupat nga bahin sa gamayng linukot nga basahon, nga naghulagway sa espirituhanong pagmando sa Iglesia sa Roma, nga gisuportahan ug giuyonan sa sekular nga mga gahom sa Uropa sulod sa 1260 ka tuig.
11 Human niadto, nakita ko ang lain na usab nga mananap nga migula gikan sa yuta. Kini nga mananap adunay duha ka sungay nga sama sa sungay sa karnero, apan kon mosulti kini murag dragon. 12 Gigamit niya ang gahom sa unang mananap aron mapugos niya ang tanang mga tawo sa kalibotan nga magsimba sa unang mananap nga adunay samad nga makamatay apan naayo na. 13 Daghang mga milagro ang gihimo niining ikaduha nga mananap, sama sa pagpaulan ug kalayo gikan sa langit. Gihimo niya kini nga mga milagro aron makita sa mga tawo nga gamhanan siya. 14 Busa pinaagi sa mga milagro nga gipabuhat kaniya sa unang mananap, nalimbongan niya ang mga tawo sa kalibotan. Gisugo niya ang mga tawo nga buhatan ug larawan ang una nga mananap. Ang una nga mananap gitigbas sa espada apan nabuhi pa. 15 Ang ikaduha nga mananap gitugotan sa paghatag ug kinabuhi sa larawan sa una nga mananap aron makasulti ang larawan ug makasugo nga patyon ang tanan nga dili mosimba kaniya. 16 Ug dili kay kana lang, gipugos niya ang tanang mga tawo, inila ug dili, dato ug kabos, ulipon ug dili ulipon, nga magpamarka diha sa ilang tuong kamot o kaha diha sa ilang mga agtang. 17 Ug si bisan kinsa nga dili magpamarka sa ngalan sa mananap o kaha sa numero sa iyang ngalan dili makapalit o kaha makabaligya.
18 Kinahanglan gayod ang kaalam aron masayran kon unsa ang kahulogan sa numero sa mananap, kay kini simbolo sa ngalan sa tawo. Ug mao kini ang numero: 666.