Ang Paghari ni Jehoyakin ug ang Pagkabihag ni Ezekiel

603 sa wala pa si Cristo

Biblica® Open Ang Pulong sa Dios™ (OCCB)

2 Mga Hari 24:6–9

6 Sa dihang namatay si Jehoyakim, si Jehoyakin nga iyang anak mao ang mipuli kaniya ingon nga hari.

7 Wala na mosulong pag-usab ang hari sa Ehipto, kay nailog na sa hari sa Babilonia ang tanan niyang teritoryo, gikan sa Yuta sa Ehipto hangtod sa Suba sa Eufrates.

8 Nag-edad si Jehoyakin ug 18 ka tuig sa dihang nahimo siyang hari. Sa Jerusalem siya nagpuyo, ug naghari siya sulod sa tulo ka bulan. Ang iyang inahan mao si Nehusta nga anak ni Elnatan nga taga-Jerusalem. 9 Daotan ang iyang gihimo atubangan sa Ginoo, sama sa gihimo sa iyang amahan.

Jeremias 22:24–23:40

24 “Ako, ang buhi nga Ginoo, manumpa nga isalikway ka nako, Jehoyakin nga hari sa Juda, nga anak ni Jehoyakim. Bisan pag ikaw ang simbolo sa akong gahom kuhaan ka gayod nako niana nga katungod. 25 Itugyan ka nako sa mga kamot sa nagtinguha sa pagpatay kanimo, nga imong gikahadlokan. Oo, itugyan ka nako kang Nebucadnezar nga hari sa Babilonia ug sa iyang mga sundalo. 26 Ipabihag ka nako ug ang imong inahan ngadto sa dapit nga dili ninyo yutang natawhan, ug didto mangamatay kamong duha. 27 Dili na kamo makabalik sa yuta nga inyong gihandom nga balikan.”

28 Jehoyakin, nahisama ka sa buak nga kolon

nga gilabay kay dili na mapuslan.

Mao kana ang hinungdan kon nganong ikaw

ug ang imong mga kabataan

bihagon ngadto sa dapit nga wala kamo masuhito.

29 Kamo nga mga taga-Juda, paminawa ang pulong sa Ginoo.

30 Kay mao kini ang giingon sa Ginoo:

“Isulat nga kini si Jehoyakin walay anak.

Kay walay bisan usa sa iyang mga anak nga molampos

sa paglingkod sa trono ni David ingon nga hari sa Juda.

Kining tawhana dili magmauswagon sa iyang kinabuhi.”

23:1-2 Miingon ang Ginoo, nga Dios sa Israel, “Alaot kamong mga pangulo sa akong katawhan! Sama unta kamo sa mga magbalantay sa karnero nga moatiman sa akong katawhan, apan gipasagdan ninyo sila nga mamatay ug magkatibulaag. Busa tungod kay gipatibulaag ninyo ang akong katawhan ug wala ninyo sila atimana, silotan ko kamo sa daotan ninyong gihimo. 3 Ako mismo ang motigom sa mga nahibilin kong katawhan gikan sa mga dapit diin ko sila gipatibulaag, ug dad-on ko sila balik sa ilang yuta, ug didto modaghan gayod sila ug magmauswagon. 4 Hatagan ko silag mga pangulo nga moatiman kanila, ug dili na sila mahadlok o malisang, ug wala nay mawala kanila. Ako, ang Ginoo, ang nag-ingon niini.”

5 Miingon pa ang Ginoo,

“Moabot ang panahon nga paharion ko ang usa ka matarong nga hari nga kaliwat ni David.

Maghari siya nga adunay kaalam,

ug patunhayon niya ang katarong ug hustisya niini nga yuta.

6 Ug nianang panahona maluwas ang Juda ug makaangkon ug kalinaw ang Israel.

Pagatawgon siya nga ‘Ginoo nga atong kaluwasan.’

7 “Ug nianang panahona ang mga tawo dili na manumpa nga magkanayon, ‘Manumpa ako sa buhing Ginoo nga nagpagawas sa mga Israelinhon gikan sa Ehipto.’ 8 Kondili, moingon sila, ‘Manumpa ako sa buhing Ginoo nga nagpagawas sa mga kaliwat ni Israel sa nasod sa amihan ug sa tanang nasod diin niya sila gipatibulaag.’ Unya magpuyo sila sa ilang kaugalingong yuta.”

9 Murag nadugmok ang akong kasing-kasing

tungod sa bakakon nga mga propeta.

Nagpangurog ang akong kabukogan, ug nahisama ako

sa hubog tungod sa balaan nga mensahe nga gilitok sa Ginoo batok kanila.

10 Napuno gayod ang yuta sa mga tawong nagsimba sa mga dios-dios,

kay ang mga propeta naghimog daotan ug nag-abuso sa ilang gahom.

Tungod niini, gitunglo sa Ginoo ang yuta,

busa nagmala kini ug nangalaya ang mga tanom.

11 Kay mao kini ang giingon sa Ginoo:

“Ang mga pari ug mga propeta managsama nga dili diosnon

ug naghimog daotan bisan diha mismo sa akong Templo.”

12 Busa mahimong danlog

ug ngitngit ang ilang dalan.

Magkapandol-pandol ug mangasukamod sila

kay padad-an ko silag kalaglagan sa panahon nga silotan ko sila.

Ako, ang Ginoo, ang nag-ingon niini.

13 “Nakita ko ang hilabihan nga kadaotan sa mga propeta sa Samaria;

nanagna sila sa ngalan ni Baal

ug gipahisalaag nila ang akong katawhan nga mga Israelinhon.

14 Apan nakita ko nga mas daotan pa gayod ang mga propeta sa Jerusalem.

Nagsimba sila sa laing mga dios-dios ug namakak pa gayod.

Gidasig nila ang mga daotan sa pagpadayon sa paghimo ug daotan,

busa wala nay namiya sa ilang pagkadaotan.”

Ang katawhan sa Jerusalem sama kadaotan

sa katawhan sa Sodoma ug Gomora.

15 “Busa ako, ang Ginoo nga Makagagahom,

nag-ingon bahin niini nga mga propeta:

Pakan-on ko silag pait nga pagkaon

ug paimnon ug tubig nga adunay hilo.

Kay tungod kanila mikuyanap ang kadaotan sa tibuok yuta.”

16 Miingon ang Ginoo nga Makagagahom sa katawhan sa Jerusalem,

“Ayaw kamo paminaw sa gisulti niining bakakon nga mga propeta.

Gipalaom nila kamo sa bakak.

Naghisgot silag mga panan-awon

nga bunga lang sa ilang huna-huna ug dili gikan kanako.

17 Mao kini ang kanunay nilang isulti ngadto sa mga tawong nagtamay

sa akong mga pulong ug nagsunod sa ilang gahing kasing-kasing:

‘Makaangkon kamog maayong kahimtang, ingon sa Ginoo.

Walay daotang mahitabo kaninyo.’

18 Apan kinsa man niining maong mga propeta ang nasayod sa akong huna-huna?

Kinsa man kanila ang nakadungog sa akong gipamulong?

Wala kanilay mihatag ug pagtagad sa akong gisulti.

19 Paminaw! Ang akong kasuko daw sa bagyo

o buhawi nga mohapak sa ulo nianang mga tawong daotan.

20 Dili gayod mahupay ang akong kasuko hangtod

dili ko mahuman ang akong gustong buhaton.

Nianang panahona masabtan ra ninyo kini pag-ayo.

21 Wala ko gipadala kini nga mga propeta,

apan nagdali sila sa paglakaw.

Wala ako makigsulti kanila, apan nanagna sila.

22 Apan kon nasayod pa sila kon unsay anaa sa akong huna-huna,

gipamalita na unta nila ang akong mga pulong ngadto sa akong katawhan,

ug gipabiya sa daotan nilang mga gawi ug mga binuhatan.

23 “Dios ako nga anaa bisan asa ug dili lang sa usa ka dapit.

24 Walay tawo nga makatago sa sekretong dapit nga dili ko makita.

Wala ba kamo masayod nga anaa ako bisan asa sa langit ug sa yuta?

Ako, ang Ginoo, ang nag-ingon niini.

25 “Nadungog ko ang bakak nga gipanulti sa mga propeta sa akong ngalan. Nag-ingon sila, ‘Gihatagan kami sa Ginoo ug mensahe pinaagi sa damgo!’ 26 Hangtod kanus-a sila magsultig mga bakak nga bunga lang sa ilang mga malimbongon nga kasing-kasing? 27 Pinaagi sa ilang pagsugilon nianang ilang mga damgo, gitukmod nila ang akong katawhan sa pagkalimot kanako, maingon nga nalimot ang ilang mga katigulangan kanako pinaagi sa pagsimba kang Baal. 28 Pasagdi kini nga mga propeta nga mosugilon sa ilang damgo. Apan kadtong mga propeta nga nakabati sa akong pulong, kinahanglang mosugilon niini nga matinud-anon. Kay ang dagami lahi sa trigo. 29 Dili ba ang akong pulong sama man sa kalayo nga makasunog ug sa martilyo nga makadugmok ug bato?

30 “Busa ako, ang Ginoo, nag-ingon nga kontra ko ang mga propeta nga manguha sa mensahe sa uban ra usab nga mga propeta ug unya moingon nga gikan kini kanako. 31 Kontra ko usab ang mga propeta nga nagsugilon sa ilang kaugalingong mensahe ug unya moingon nga ako kuno ang nagsulti niini. 32 Kontra ko ang mga propeta nga nagsugilon sa ilang mga damgo nga dili tinuod. Gipahisalaag nila ang akong katawhan sa ilang mga bakak. Wala ko gayod sila ipadala o sugoa. Wala gayod silay gihatag nga kaayohan sa katawhan.

33 “Jeremias, kon mangutana kanimo kining mga tawhana, o ang mga propeta, o mga pari kon unsay akong mensahe, ingna sila nga isalikway ko sila. 34 Kon adunay propeta o pari o bisan kinsa nga moingon nga aduna kuno siyay mensahe gikan kanako, silotan ko kanang tawhana ug ang iyang panimalay. 35 Mas maayo pa nga mangutana ang usag usa kaninyo sa iyang mga higala ug mga paryente kon unsay akong mensahe, 36 kaysa moingon siya, ‘Adunay mensahe ako gikan sa Ginoo!’ Ayaw na kamo paggamit nianang mga pulonga kay gigamit kana sa uban aron lang tuohan ang ilang gipanulti. Ug tungod niini natuis ang mga pulong sa buhi nga Dios, ang Ginoo nga Makagagahom.

37 “Jeremias, pananglit mangutana ka sa usa ka propeta kon aduna ba siyay mensahe gikan kanako 38 unya moingon siya, ‘Oo, aduna akoy mensahe ako gikan sa Ginoo,’ kinahanglan nga ingnon mo siya nga mao kini ang akong giingon: ‘Tungod kay nag-ingon ka nga aduna kay mensahe gikan kanako, bisan gidid-an ka nako sa paglitok nianang mga pulonga, 39 kalimtan ka nako sa dayon ug abugon sa akong presensya. Ug pasagdan ko kining siyudad nga gihatag ko sa inyong mga katigulangan. 40 Pakaulawan ko gayod kamo sa walay kataposan, nga dili gayod makalimtan.’ ”

2 Mga Hari 24:10–16

10 Sa panahon sa iyang paghari, ang mga opisyal ni Nebucadnezar nga hari sa Babilonia misulong sa Jerusalem, ug gilibotan nila kini. 11 Miadto si Nebucadnezar sa Jerusalem samtang gilibotan kini sa iyang mga sundalo. 12 Ug mitugyan kaniya sa ilang kaugalingon si Haring Jehoyakin, uban ang iyang inahan, ang iyang mga alagad, ang iyang dungganon nga mga tawo, ug ang iyang mga opisyal.

Sa ikawalo nga tuig sa paghari ni Nebucadnezar sa Babilonia, gibihag niya si Jehoyakin. 13 Sumala sa gipasidaan sa Ginoo, gipanguha ni Nebucadnezar ang tanang bahandi sa Templo sa Ginoo ug sa palasyo, ug ang tanang bulawan nga kagamitan nga gipahimo ni Solomon nga hari sa Israel alang sa Templo sa Ginoo. 14 Gibihag usab niya ang 10,000 ka mga lumulupyo sa Jerusalem, apil ang tanang opisyal ug maisog nga mga sundalo, ug ang tanang hanas nga mga trabahante ug mga platero. Ang mga labing kabos lang ang nabilin.

15 Gibihag usab ni Nebucadnezar si Jehoyakin ngadto sa Babilonia, apil ang inahan niini, mga asawa, mga opisyal, ug ang mga dungganon nga tawo sa Juda. 16 Gibihag usab niya ang 7,000 ka labing isog nga mga sundalo ug 1,000 ka hanas nga mga trabahante ug mga platero nga pulos adunay katakos sa pagpakig-gira.

2 Cronicas 36:9–10

9 Nag-edad si Jehoyakin ug 18 ka tuig sa dihang nahimo siyang hari. Sa Jerusalem siya nagpuyo, ug naghari siya sulod sa tulo ka bulan ug napulo ka adlaw. Daotan ang iyang gihimo atubangan sa Ginoo. 10 Sa unang bulan sa tuig, gipakuha ni Nebucadnezar si Jehoyakin ug gipadala sa Babilonia uban sa mga mahalong kabtangan gikan sa Templo sa Ginoo, ug gihimo niyang hari sa Jerusalem ug sa ubang bahin sa Juda ang uyoan ni Jehoyakin nga si Zedekia.