Mibalik ang mga Judio gikan sa Pagkabihag (continued)

536 sa wala pa si Cristo

Biblica® Open Ang Pulong sa Dios™ (OCCB)

Mga Salmo 116–117

1 Gihigugma ko ang Ginoo,

kay gidungog niya ang akong pagpangayo ug tabang kaniya.

2 Tungod kay gipatalinghogan niya ako,

dili ako moundang sa pagtawag kaniya samtang nagkinabuhi pa ako.

3 Nahadlok ako kay nabati ko nga murag hapit na akong mamatay;

ang kamatayon daw pisi nga naglambod kanako.

Nahasol gayod ako ug naguol,

4 busa nanawag ako sa Ginoo, “Ginoo, luwasa ako!”

5 Ang Ginoo nga atong Dios maluloy-on, matarong, ug adunay kahangawa.

6 Gipanalipdan niya ang mga walay alamag.

Sa dihang wala na gayod akoy mahimo, giluwas niya ako.

7 Karon makapahulay na ako ug magmalinawon tungod kay maayo kaayo ang Ginoo kanako.

8 Tungod kay giluwas niya ako sa kamatayon,

sa kasubo, ug sa kalaglagan.

9 Busa magkinabuhi ako nga duol sa Ginoo dinhi sa kalibotan sa mga buhi.

10 Mituo gihapon ako,

bisan pa kon nakaingon ako,

“Labihan gayod ang akong pag-antos.”

11 Sa akong kahadlok miingon ako,

“Wala gayoy tawo nga kasaligan.”

12 Unsay ibalos ko sa Ginoo sa tanan niyang kaayo kanako?

13 Mosimba ako sa Ginoo ug magdala ako ug ilimnon sa kopa

ingon nga halad sa pagpasalamat kaniya sa iyang pagluwas kanako.

14 Tumanon ko ang akong mga saad kaniya atubangan sa tanan niyang katawhan.

15 Masakitan ang Ginoo kon adunay mamatay sa iyang matinumanong katawhan.

16 Ginoo, ubos mo ako nga alagad.

Giluwas mo ako sa pagkabihag.

17 Mosimba ako ug mohalad ug halad sa pagpasalamat kanimo.

18 Tumanon ko ang akong mga saad kanimo

atubangan sa tanan mong katawhan,

19 didto sa mga hawanan sa imong Templo sa Jerusalem.

Dayega ang Ginoo!

117:1 Dayega ang Ginoo, kamong tanan nga katawhan sa mga nasod!

2 Kay dako kaayo ang gugma sa Ginoo kanato,

ug ang iyang pagkamatinumanon walay kataposan.

Dayega ang Ginoo!

Mga Salmo 125

Ang awit samtang gatungas.

1 Ang mga tawo nga nagsalig sa Ginoo sama sa Bukid sa Zion nga dili matarog,

kondili magpabilin sa walay kataposan.

2 Maingon nga ang mga bukid sa palibot sa Jerusalem

nagpanalipod sa maong siyudad,

ang Ginoo nagpanalipod usab

sa iyang katawhan karon ug hangtod sa kahangtoran.

3 Ang daotan dili gayod magpadayon

sa pagdumala sa yuta nga alang sa mga matarong,

kay tingalig mohimo usab ug daotan ang mga matarong.

4 Ginoo, himoa ang maayo ngadto sa mga tawo nga maayo, ug sa nagkinabuhi nga matarong.

5 Apan siloti uban sa mga daotan ang imong mga katawhan nga nagsunod sa daotan.

Hinaut nga magmalinawon ang Israel!

Mga Salmo 127–128

Ang awit samtang gatungas kini ni Solomon.

1 Kon wala ang tabang sa Ginoo sa pagtukod ug balay,

walay kapuslanan ang kahago sa nagtukod niini.

Kon dili panalipdan sa Ginoo ang siyudad,

walay kapuslanan ang pagtukaw sa tigbalantay.

2 Walay kapuslanan ang pagmata ug sayo

ug pagbilar sa gabii sa paghago aron adunay pagkaon,

kay ang Ginoo mohatag sa mga kinahanglanon sa iyang mga hinigugma, samtang natulog sila.

3 Ang mga anak gasa ug panalangin gikan sa Ginoo.

4 Ang mga anak nga natawo sa batan-on pa

ang amahan sama sa mga pana diha sa mga kamot sa usa ka sundalo.

5 Bulahan ang tawo nga adunay daghang mga anak,

kay dili siya mapildi kon makig-atubang siya sa iyang mga kaaway sa hukmanan.

Ang awit samtang gatungas.

128:1 Bulahan kamong tanan nga nagtahod sa Ginoo,

ug nagkinabuhi subay sa iyang mga pamaagi.

2 Mapahimuslan ninyo ang inyong hinagoan;

magmalipayon kamo ug magmauswagon.

3 Ang inyong asawa

mahisama sa usa ka mabungahong ubas

diha sa inyong panimalay,

ug ang inyong mga anak magtigom libot sa inyong mga lamisa

nga daw mga saha sa kahoyng olibo.

4 Ingon niini ang panalangin nga madawat sa mga tawo nga nagtahod sa Ginoo.

5 Hinaut pa nga panalanginan kamo sa Ginoo

gikan sa Zion.

Hinaut pa nga makita ninyo

ang pag-uswag sa Jerusalem sa tibuok ninyong kinabuhi,

6 ug hinaut nga makita pa ninyo ang inyong mga apo.

Hinaut pa nga makasinati sa maayo nga kahimtang ang Israel.

Mga Salmo 134

Ang awit samtang gatungas.

1 Dayega ninyo ang Ginoo,

kamong tanan nga nag-alagad kaniya diha sa iyang Templo panahon sa kagabhion.

2 Ibayaw ninyo ang inyong mga kamot sa inyong pag-ampo diha sa sulod sa Templo,

ug dayega ninyo ang Ginoo.

3 Hinaut nga panalanginan kamo sa Ginoo nga anaa sa Zion,

nga mao ang naghimo sa kalangitan ug sa kalibotan.