Ang Unang Selyo: Ang Maayong Balita Nagmadaogon
Giablihan ang unang selyo. Ang nagsunod nga panan-awon nagpahibalo sa kaylap nga pagdaog sa Maayong Balita ibabaw sa mga Judio ug mga dili Judio.
96 human matawo si Cristo
Biblica® Open Ang Pulong sa Dios™ (OCCB)
1 Unya nakita ko nga gitangtang sa Karnero ang una sa pito ka mga silyo sa linukot nga basahon. Ug nadungog ko ang tingog nga murag dalogdog gikan sa usa sa upat ka mga nilalang nga nag-ingon, “Dali ngari!” 2 Sa akong pagtan-aw nakita ko ang usa ka kabayo nga puti. Ang nagsakay niini adunay gikuptan nga pana. Gikoronahan siya ug gipadagan dayon niya ang iyang kabayo ug nagpadayon siya sa pagpangdaog.
Ang Ikaduhang Selyo: Ang mga Judio Nagkatibulaag
Giablihan ang ikaduhang selyo. Nagpahibalo kini sa mapintas nga mga paglutos ug sa hingpit nga pagkatibulaag sa mga Judio ilalom ni Trajan ug Hadrian (102–138).
3 Human niadto, gitangtang sa Karnero ang ikaduha nga silyo sa basahon. Ug nadungog ko nga nag-ingon ang ikaduha nga nilalang, “Dali ngari!” 4 Ug migawas ang kabayo nga pula. Ang nagsakay niini gihatagag dakong espada, ug gihatagan usab siyag gahom sa pagdala ug gira sa kalibotan, aron magpinatyanay ang mga tawo.
Ang Ikatulong Selyo: Kalinaw ug Kadagaya
Giablihan ang ikatulong selyo. Nagpahibalo kini sa kalinaw ug kadagaya sa paghari sa pamilya ni Septimius Severus (193–235).
5 Sa pagtangtang sa Karnero sa ikatulo nga silyo, nadungog ko ang ikatulo nga nilalang nga nag-ingon, “Dali ngari!” Ug nakita ko ang kabayo nga itom. Ang nagsakay niini adunay gikuptan nga timbangan. 6 Ug aduna akoy nadungog nga murag tingog nga gikan sa upat ka nilalang nga nag-ingon, “Pamahala ang ilang pagkaon. Ang bili sa tulo ka salmone nga harina sa trigo balig usa ka adlaw nga suhol, ug ang usa ka gantang nga harina nga barley balig usa usab ka adlaw nga suhol. Apan ayaw hilabti ang lana ug ang bino!”
Ang Ikaupat nga Selyo: Gubat, Kagutom, ug Peste
Giablihan ang ikaupat nga selyo. Nagpahibalo kini sa mapintas nga mga gubat, mga kagutom, mga paglutos, ug mga peste nga mikaylap sa mga paghari ni Maximinus, Decius, ug Valerian (255–271).
7 Human niadto gitangtang sa Karnero ang ikaupat nga silyo ug nadungog ko ang ikaupat nga nilalang nga nag-ingon, “Dali ngari!” 8 Ug nakita ko ang kabayo nga luspad. Ang nagsakay niini ginganlag Kamatayon, ug ang Hades nagsunod kaniya. Gihatagan silang duha ug gahom aron pamatyon ang ikaupat nga bahin sa mga tawo sa kalibotan pinaagi sa gira, gutom, mga balatian, ug mabangis nga mga mananap sa kalibotan.
Ang Ikalimang Selyo: Ang Kataposang Paglutos sa mga Pagano
Giablihan ang ikalimang selyo. Nagpahibalo kini sa kataposang paglutos sa mga pagano batok sa Cristianismo, ug sa mga kahadlok sa mga Cristohanon (286–301).
9 Gitangtang sa Karnero ang ikalima nga silyo. Ug nakita ko sa kinaubosang bahin sa halaran ang mga kalag niadtong mga tawo nga gipamatay tungod sa ilang pagsangyaw sa pulong sa Dios. 10 Naninggit silag kusog, “Ginoo nga Makagagahom, balaan ug kasaligan! Kanus-a mo pa ba hukman ug silotan ang mga tawo sa kalibotan tungod sa ilang pagpatay kanamo?” 11 Ang matag-usa kanila gihatagag tag-as nga bisting puti, ug giingnan sila nga maghulat-hulat lang una hangtod makompleto ang gidaghanon sa ilang mga isigka-tumutuo ug kauban nga mga alagad sa Dios nga pamatyon usab sama kanila.
Ang Ikaunom nga Selyo: Ang Paganismo Napukan
Giablihan ang ikaunom nga selyo. Gihulagway niini ang mga kagubot sa Romanhong Imperyo sa kataposang pagkapukan sa paganismo, ug ang madaugong pagkatukod sa Cristohanong iglesia puli niini. Kini nga bahin sa panan-awon nagtudlo usab sa walay kataposang kalipay sa unang mga martir, ug sa pagdayeg nga ilang gihatag sa Dios ug sa Karnero (323).
12 Unya, ang ikaunom na nga silyo ang gitangtang sa Karnero. Diha-diha milinog ug kusog. Miitom ang adlaw sama sa itom nga panapton, ug mipula ang bulan sama sa dugo. 13 Nangahulog sa yuta ang mga bitoon sa langit nga daw sama sa mga ulahi nga bunga sa kahoy nga igos nga mangahulog kon huypon sa kusog nga hangin. 14 Nawala ang langit sama sa papel nga gilukot, ug nangabalhin ang mga bukid ug mga isla sa ilang nahimutangan.
15 Ug unya nanago sa mga langub ug sa ilalom sa dagkong mga bato sa mga bukid ang mga hari sa kalibotan, ang mga pangulo, ang mga opisyal sa kasundalohan, ang mga adunahan, ang mga gamhanan, ug ang tanang matang sa tawo, ulipon o dili. 16 Nag-ingon sila sa mga bukid ug sa mga bato, “Tumpagi ninyo kami ug taboni aron dili kami makita sa naglingkod sa trono ug aron makalingkawas kami gikan sa silot sa Karnero. 17 Kay miabot na ang adlaw nga silotan nila ang mga tawo, ug wala gayoy makasugakod niini.”
7:1 Human niadto, aduna akoy nakita nga upat ka anghel nga nagtindog sa upat ka kanto sa kalibotan. Gipugngan nila ang upat ka hangin sa kalibotan aron walay hangin nga mohuros sa yuta, o sa dagat o kaha sa bisan unsa nga kahoy. 2 Ug nakita ko usab ang laing anghel nga gikan sa sidlakan. Aduna siyay dalang igmamarka nga iya sa buhi nga Dios. Misinggit siyag kusog ngadto sa upat ka anghel nga gihatagan sa Dios ug gahom sa pagdaot sa yuta ug sa dagat. 3 Miingon siya, “Ayaw una ninyo daota ang yuta, o ang dagat o ang mga kahoy samtang wala pa nato mamarkahi ang agtang sa mga alagad sa atong Dios.” 4 Sumala sa gisugilon kanako, 144,000 ang gimarkahan sa marka sa Dios gikan sa tanang mga tribo sa Israel.
5 12,000 gikan sa tribo ni Juda,
12,000 gikan sa tribo ni Ruben,
12,000 gikan sa tribo ni Gad,
6 12,000 gikan sa tribo ni Aser,
12,000 gikan sa tribo ni Neftali,
12,000 gikan sa tribo ni Manases,
7 12,000 gikan sa tribo ni Simeon,
12,000 gikan sa tribo ni Levi,
12,000 gikan sa tribo ni Isacar,
8 12,000 gikan sa tribo ni Zabulon,
12,000 gikan sa tribo ni Jose,
12,000 ang gimarkahan gikan sa tribo ni Benjamin.
9 Human niadto, nakita ko ang mga tawo nga dili maihap ang gidaghanon. Naggikan sila sa tanan nga nasod, tribo, kaliwatan ug pinulongan. Nagtindog sila atubangan sa trono ug sa Karnero. Nagbisti silag tag-as ug pulos puti, ug aduna silay gikuptan nga mga dahon sa palmera. 10 Naninggit sila nga nag-ingon,
“Dalaygon ang Dios nga naglingkod sa trono,
ug dalaygon usab ang Karnero,
kay giluwas nila kami gikan sa silot!”
11 Nagtindog ang tanang mga anghel sa palibot sa trono ug sa mga pangulo, ug sa upat ka nilalang. Ug nangluhod dayon sila atubangan sa trono ug misimba sa Dios. 12 Miingon sila,
“Tinuod gayod
nga ang atong Dios angayan
nga dayegon, pasidunggan,
pasalamatan ug tahoron.
Nasayod siya sa tanan,
ug ang tanang gahom ug kusog anaa kaniya.
Dayegon siya sa walay kataposan! Amen!”
13 Unya, nangutana kanako ang usa sa mga pangulo, “Nasayod ka ba kon kinsa kanang mga tawo nga nagbistig puti, ug kon asa sila gikan?”
14 Mitubag ako, “Sir, wala ako masayod. Suginli ako!”
Miingon siya kanako, “Mao kana ang mga tawo nga nakaagig hilabihang paglutos. Ang ilang mga bisti gilabhan nila ug gipaputi sa dugo sa Karnero. 15 Mao kana ang hinungdan
“nga diha sila nagtindog
atubangan sa trono sa Dios,
ug adlaw ug gabii ang ilang pag-alagad kaniya
diha sa iyang templo.
Ug ang Dios mismo nga naglingkod sa trono
mao ang nag-atiman kanila.
16 Dili na gayod sila gutomon o uhawon.
Ug dili na sila mainitan o masunog sa kainit sa adlaw.
17 Kay ang Karnero nga anaa sa trono
mao na ang magbantay kanila.
Dad-on niya sila ngadto sa mga tuboran
nga naghatag ug kinabuhi,
ug pahiran sa Dios ang tanang mga luha sa ilang mga mata.”
Ang Ikapitong Selyo: Pito ka Anghel nga may mga Trumpeta
Giablihan ang ikapitong selyo. Nagpakita sa langit ang pito ka anghel nga may pito ka trumpeta. Gipahibalo ang mga pag-ampo sa pagpasalamat sa mga Cristohanon nga nagpahulay na karon, ug ang pagdawat sa Dios sa ilang mga pag-ampo, uban sa umaabot nga pagguba sa imperyo sa mga barbaro.
1 Sa pagtangtang sa Karnero sa ikapito nga silyo adunay kahilom sa langit sulod sa mga tunga sa oras.
2 Nakita ko dayon ang pito ka anghel nga nagtindog atubangan sa Dios. Ug ang matag-usa kanila gihatagan ug trumpeta.
3 Adunay lain pang anghel nga miduol sa halaran. Aduna siyay gikuptan nga bulawan nga sudlanan sa insenso. Gihatagan siyag daghang insenso aron iuban sa mga pag-ampo sa tanan nga katawhan sa Dios ug ihalad didto sa halaran nga bulawan nga anaa sa atubangan sa trono. 4 Gikan sa kamot sa anghel nga nagtindog atubangan sa Dios mipaibabaw ang aso sa gisunog nga insenso uban sa mga pag-ampo sa katawhan sa Dios. 5 Ug unya gikuha sa anghel ang sudlanan sa insenso ug gipuno niya kinig kalayo gikan sa halaran ug gilabay niya ngadto sa yuta. Diha-diha, nagpangilat, midahunog ang dalogdog, ug adunay nagkalain-lain pa nga dahunog, ug naglinog.
Ang Unang Trumpeta: Misulong ang mga Nasod sa Amihanan
Ang bag-ong yugto sa pagkapukan sa Romanhong gahom, nga hangtod niining panahona nagpugong sa tawo sa sala, nagsugod sa pagpatingog sa pito ka trumpeta. Mitunog ang unang trumpeta. Ang mga katingalahang misunod naglandong sa pagsulong sa mga barbarong nasod sa Amihanan ngadto sa Romanhong Imperyo (323–412).
6 Unya, ang pito ka anghel nga adunay pito ka trumpeta nangandam na sa pagpatingog sa ilang mga trumpeta.
7 Gipatingog sa unang anghel ang iyang trumpeta, ug miulan ug ice ug kalayo nga adunay sagol nga dugo. Ug nasunog ang ikatulong bahin sa yuta, ang ikatulong bahin sa mga kahoy, ug ang tanan nga sagbot.
Ang Ikaduhang Trumpeta: Nagmadaogon ang mga Vandal
Mitunog ang ikaduhang trumpeta. Ang mga Vandal ug Alan ilalom ni Genseric naglaglag sa politikanhong gahom sa Kasadpang Romanhong Imperyo (395–455).
8 Unya ang ikaduhang anghel mipatingog usab sa iyang trumpeta, ug adunay nahulog sa dagat nga murag usa ka dakong bukid nga nagdilaab ug ang ikatulong bahin sa dagat nahimong dugo. 9 Ang ikatulong bahin sa tanan nga anaa sa dagat nangamatay, ug ang ikatulong bahin sa tanang mga barko nangaguba.
Ang Ikatulong Trumpeta: Ang Katubigan Gipapait
Mitunog ang ikatulong trumpeta. Mahimong gilandongan dinhi ang pagtangtang kang Augustulus, ang kataposang Romanhong emperador sa Kasadpan; o ang pagbiya sa pagtuo o pagkadunot sa ambisyosong mga pangulo sa iglesia; o ang pagkaylap sa mga opinyon ni Augustine, nga labaw sa bisan unsang uban pang opinyon nagpait sa katubigan sa kinabuhi ug naglaglag sa Cristohanong panaghiusa (455–476).
10 Ang ikatulo na usab nga anghel ang mipatingog sa iyang trumpeta, ug adunay dakong bitoon nga nagdilaab nga murag suga nga nahulog gikan sa langit ug mitugpa sa ikatulo nga bahin sa mga suba ug mga tuboran. 11 Ang ngalan niadtong bitoon “Pait.” Busa ang ikatulo nga bahin sa mga tubig mipait, ug daghang mga tawo ang nangamatay tungod sa pag-inom nila niini.
Ang Ikaupat nga Trumpeta: Natapos ang Kataposang Awtoridad sa Roma
Mitunog ang ikaupat nga trumpeta. Gitagna niini ang mga gubat sa Italia tali sa mga mananakop sa Roma, sa mga heneral ni Justinian, ug sa mga Goth, ug ang pagkatukod sa Eksarkado sa Ravenna, nga nagwagtang sa tanang nahibiling awtoridad sa Roma, hangtod sa tuig 606.
12 Ug ang ikaupat nga anghel mipatingog sa iyang trumpeta, ug ang nahitabo, naigo ang ikatulong bahin sa adlaw, ang ikatulong bahin sa bulan, ug ang ikatulong bahin sa mga bitoon, ug nawala ang ikatulong bahin sa ilang kahayag. Busa mingitngit ang ikatulong bahin sa adlaw ug ang ikatulong bahin sa gabii.
Giandam ang Dalan alang sa Duha ka Dagkong Pagbiya sa Pagtuo
Nagsugod na karon ang laing halandumong yugto sa kasaysayan sa katawhan. Ang kaylap nga pagkadunot taliwala sa mga Cristohanon ug ang politikanhong kahuyang sa imperyo nag-andam sa dalan alang sa duha ka dagkong pagbiya sa pagtuo, nga molungtad og 1260 ka tuig ug dungan nga motungha sa sidlakan ug kasadpang mga imperyo (606).
13 Human niadto aduna akoy nakita nga agila nga naglupad sa kahanginan. Nadungog ko kining misinggit sa makusog, “Pagka-alaot! Pagka-alaot gayod sa mga nagpuyo sa kalibotan kon mopatingog pa ang nahibiling tulo ka mga anghel sa ilang mga trumpeta.”