Ang Unang Adan ug ang Ikaduha
Gipamatud-an ngadto sa mga Judio ang kamatuoran sa pagkabanhaw pinaagi sa pagkapareho sa una ug sa ikaduhang Adan.
57 human matawo si Cristo
Biblica® Open Ang Pulong sa Dios™ (OCCB)
45 Kay ang Kasulatan nag-ingon, “Ang una nga tawo nga si Adan gihatagan ug kinabuhi.” Apan ang ulahi nga Adan nga mao si Cristo gihatagan sa espiritu nga naghatag ug kinabuhi. 46 Dili ang langitnon nga lawas ang nauna kondili ang yutan-on nga lawas, ug dayon mosunod ang langitnon nga lawas. 47 Ang unang tawo nga si Adan yutan-on. Gibuhat siya gikan sa yuta. Apan ang ikaduhang tawo nga mao si Cristo gikan sa langit. 48 Ang mga lawas nga yutan-on sama gayod sa lawas sa tawong gibuhat gikan sa yuta, apan ang mga lawas nga langitnon sama gayod sa lawas niadtong naggikan sa langit. 49 Busa ingon nga ang atong lawas nahisama sa lawas ni Adan nga gikan sa yuta, moabot gayod ang adlaw nga ang atong lawas mahisama usab kang Cristo nga gikan sa langit.
Ang Kadaogan Batok sa Sala ug Kamatayon
Gipahayag ni Pablo nga ang atong mga lawas karon dili makasulod sa espirituhanong kahimtang. Gihulagway niya kon unsaon pagkahitabo sa pagkabanhaw ug ang mahimayaong kausaban nga mahitabo sa kahimtang nga dili na mamatay, uban sa hingpit nga kadaogan batok sa sala ug kamatayon. Tungod niini, giawhag ang mga taga-Corinto sa usa ka aktibo ug lig-ong pagtuo.
50 Mga igsoon, ang buot kong ipasabot mao kini: kining atong lawas nga yutan-on dili mahimo nga makapanunod sa gingharian sa Dios. Ug kining lawas nga madunot dili makapanunod sa kinabuhi nga walay kataposan. 51 Paminaw kamo kay sultihan ko kamo niini nga tinago: dili kitang tanan mamatay, apan tanan kita, ang atong lawas, bag-ohon sa Dios. 52 Kini kalit kaayo nga mahitabo, sama kakalit sa usa ka pagpamilok. Kay sa pagtingog sa kataposang trumpeta, ang mga patay banhawon dayon ug hatagan sa lawas nga dili na madunot. Ug kita nga buhi pa, bag-ohon usab ang atong mga lawas. 53 Tungod kay kining lawas nga madunot ug mamatay kinahanglan nga ilisan sa lawas nga dili na madunot ug dili na mamatay. 54 Busa kon kining lawas nga madunot mailisan na sa dili madunot, ug kon kining lawas nga mamatay mailisan na sa dili mamatay, matuman na ang giingon sa Kasulatan:
“Giwagtang na sa Dios ang kamatayon”
55 “Gipildi na ang kamatayon,
ug wala nay gahom.”
56 Ang kamatayon aduna lay gahom kanato tungod sa sala, ug adunay gahom ang sala tungod kay aduna may Kasugoan. 57 Apan salamat sa Dios tungod kay pinaagi sa atong Ginoong Jesu-Cristo gihatagan niya kita ug kadaogan nianang mga butanga.
58 Busa, mga hinigugma ko nga mga igsoon kang Cristo, pagpakalig-on kamo ug dili gayod matarog sa inyong pagtuo. Pagmakugihon kamo sa buluhaton nga gihatag kaninyo sa Ginoo, kay nasayod kamo nga aduna gayoy kapuslanan ang inyong mga paghago alang sa Ginoo.
Naghatag si Pablo og Panudlo sa Pag-amot alang sa mga Kabos
Sa pagtubag sa kataposang pangutana sa mga taga-Corinto, naghatag si Pablo og mga panudlo kon unsaon sa mga Cristohanon pagtagana alang sa mga kabos, ug misaad nga ipadala ang ilang mga amot ngadto sa Jerusalem.
1 Bahin sa inyong pagtabang sa mga tumutuo sa Judea, buhata usab ninyo ang akong gipabuhat sa mga tumutuo sa Galacia. 2 Kada Dominggo, ang matag-usa kaninyo maggahin ug kantidad gikan sa inyong kinitaan. Tigoma ninyo kini aron sa pag-abot ko diha maandam na ang inyong hinabang. 3 Inig-abot ko diha ipadala ko sa Jerusalem ang mga tawo nga inyong gipili nga modala sa inyong mga hinabang ug ang akong sulat nga magpaila kanila. 4 Apan kon kinahanglanon gayod nga moadto usab ako didto sa Jerusalem, mouban na lang sila kanako.
Ang Kataposang mga Mensahe ug Pangumusta ni Pablo
Gitapos ni Pablo ang iyang sulat pinaagi sa nagkalainlaing mga mensahe ug pangumusta. Gisultihan niya sila bahin sa iyang anak nga si Timoteo, ug nga nagtinguha si Apolos sa pag-anha aron makigkita kanila. Girekomendar niya kanila si Timoteo. Giawhag niya sila sa pagtuo ug gugma. Girekomendar niya kanila sila si Estefanas, Fortunato, ug Acaico. Gitapos niya kini pinaagi sa mga pangumusta ug maayong mga pangandoy.
5 Molahos ako diha sa Corinto pagkagikan ko sa Macedonia, tungod kay moagi ako didto. 6 Ug posibleng magdugay ako diha uban kaninyo. Basin kon diha pa ako magpalabay sa tingtugnaw aron matabangan ako ninyo sa akong mga kinahanglanon sa akong pagbiyahe kon asa man ako moadto. 7 Dili ko gusto nga kadiyot lang ako diha. Gusto ko nga magdugay ako diha sa inyo, kon itugot sa Ginoo. 8 Apan karon magpabilin una ako dinhi sa Efeso hangtod sa adlaw sa Pentecostes, 9 tungod kay daghan dinhi ang gustong maminaw sa Maayong Balita, ug nagtuo ako nga daghan ang motuo dinhi bisan tuod ug daghan ang nagbatok.
10 Kon moabot diha si Timoteo, abi-abiha ninyo siya aron dili siya mataha, tungod kay sama man usab siya kanako nga nag-alagad sa Ginoo. 11 Tahora ninyo siya. Ug kon mobiya na siya diha, tabangi usab ninyo siya sa iyang mga kinahanglanon sa iyang paglakaw aron makabalik siya dinhi kanako. Magpaabot ako kaniya kuyog sa uban pa nga mga igsoon kang Cristo.
12 Bahin sa atong igsoon nga si Apolos, gihangyo ko gayod siya nga mobisita diha kaninyo kuyog sa uban nga mga igsoon kang Cristo. Apan dili pa kuno siya makaanha karong mga panahona. Moanha siya kon adunay higayon.
13 Pagbantay kamo kanunay ug barogi ang inyong pagtuo. Pagmaisogon ug pagmalig-on, 14 ug bisan unsa ang inyong buhaton, buhata ninyo kini nga adunay paghigugma.
15 Mga igsoon, nasayran ninyo nga ang unang mga Cristohanon diha sa Acaya walay lain kondili si Estefanas ug ang iyang pamilya. Gihalad nila ang ilang kaugalingon sa pag-alagad sa mga tumutuo. Mao kana nga naghangyo ako kaninyo 16 nga magpasakop kamo kanila ug sa tanang sama kanila nga gahago.
17 Nalipay gayod ako sa pag-anhi nilang Estefanas, Fortunato, ug Acaico. Kay bisan wala kamo, ania sila puli kaninyo. 18 Nakahatag silag kadasig kanako ug ingon man kaninyo. Ang mga tawo nga sama kanila angayng pasidunggan.
19 Ang mga tumutuo dinhi sa probinsya sa Asia nangumusta kaninyo.
Si Aquila ug si Priscila ug ang mga tumutuo nga nagtigom sa ilang balay nangumusta gayod kaninyo tungod kay managsama kamo nga anaa sa Ginoo.
20 Nangumusta usab kaninyo ang tanang mga tumutuo dinhi.
Pagkumustahay kamo isip managsoon kang Cristo.
21 Ako si Pablo, nangumusta usab kaninyo, ug ako mismo ang nagsulat niini nga pangumusta.
22 Hinaut nga silotan sa Dios si bisan kinsa nga wala mahigugma kaniya.
Ginoo, balik na!
23 Ang grasya sa atong Ginoong Jesus mag-uban kaninyo.
24 Gihigugma ko kamong tanan sa atong pagkahiusa kang Cristo Jesus. Amen.