Ang Paglaglag sa Tiro

587 sa wala pa si Cristo

Biblica® Open Ang Pulong sa Dios™ (OCCB)

Ezekiel 26–27

1 Karon, sa nahaunang adlaw sa bulan, sa ika-11 nga tuig sa amo nga pagkabihag, miingon ang Ginoo kanako, 2 “Tawo, naglipay ang mga taga-Tiro sa pagkalaglag sa Jerusalem. Miingon sila, ‘Nalaglag na ang importante nga agianan sa mga negosyante sa mga nasod. Kita na usab karon ang ilhon nga importante. Ug tungod kay nalaglag na ang Jerusalem, kita na usab ang mouswag.’ 3 Busa ako, ang Ginoong Dios, nag-ingon nga kontrahon ko ang Tiro. Pasulongon ko kanila ang daghang nasod nga mohasmag sama sa mga balod. 4 Gub-on nila ang iyang mga paril ug lumpagon ang iyang mga tore. Kahigon nila ang iyang yuta hangtod nga bato na lang ang mahibilin. 5 Mahimo na lang kini nga bularanan ug mga pukot sa mga mangingisda. Mahitabo gayod kini, kay ako, ang Ginoong Dios, ang nag-ingon niini. Itugyan ko ang Tiro sa uban nga mga nasod nga moilog sa iyang mga kabtangan, 6 ug ang iyang mga nagpuyo sa kapatagan pamatyon pinaagi sa espada. Unya mahibaloan nila nga ako mao ang Ginoo.”

7 Nagpadayon sa pag-ingon ang Ginoong Dios, “Mga taga-Tiro, pasulongon ko kaninyo ang hari sa Babilonia nga si Nebucadnezar, nga hari sa mga hari. Mosulong siya gikan sa amihan dala ang daghang mga sundalo, mga karwahi, mga kabayo, ug mga tigkabayo. 8 Ipapatay niya ang inyong mga nagpuyo sa kaumahan pinaagi sa espada. Mosulong ang iyang mga sundalo nga adunay dalang mga tore-tore ug mga taming, ug tambakan nilag yuta ang kilid sa inyong mga paril aron sa pagsulod sa lungsod. 9 Ipabungkag niya ang inyong mga paril pinaagi sa dagkong mga troso ug ipalumpag ang inyong mga tore pinaagi sa mga maso. 10 Matabonan kamo sa abog tungod sa iyang mga kabayo nga labihan kadaghan. Matay-og ang inyong mga paril tungod sa iyang naghaguros nga mga kabayo ug mga karwahi nga pasulod sa mga pultahan sa guba ninyong lungsod. 11 Yatak-yatakan sa iyang mga kabayo ang tanan ninyong mga kadalanan. Ipapatay niya ang inyong mga nagpuyo pinaagi sa espada, ug ang inyong lig-ong mga haligi mangalumpag. 12 Ilogon nila ang inyong mga bahandi ug ang inyong mga baligya. Gub-on nila ang inyong mga paril ug ang nindot ninyong mga balay. Unya ilabay nila sa dagat ang mga bato, mga kahoy ug ang tanang nahibilin sa nangaguba. 13 Paundangon ko ang inyong mga pag-awit ug ang pagtukar sa inyong mga harpa. 14 Himuon ko na lang ang inyong dapit nga usa ka lapad nga bato nga bularanan ug mga pukot. Dili na gayod tukoron pag-usab ang inyong siyudad. Mahitabo gayod kini, kay ako ang Ginoong Dios, ang nag-ingon niini.”

15 Nag-ingon pa gayod ang Ginoong Dios sa mga taga-Tiro, “Ang mga nagpuyo sa mga isla magkurog sa kahadlok kon madungog nila ang inyong pagkalaglag ug pagkamatay, ug ang inagulo sa inyong mga samaran. 16 Ang mga pangulo sa mga dapit nga anaa sa daplin sa dagat manganaog sa ilang trono ug manghubo sa ilang harianong bisti ug sa ilang matahom nga pangsulod nga bisti. Ug manglingkod sila sa yuta nga nagkurog sa kahadlok tungod sa inyong gidangatan. 17 Unya mag-awit silag awit sa pagbangotan alang kaninyo,

“ ‘Dili katuohan ang imo nga pagkalaglag,

ikaw nga bantogan nga siyudad nga ginapuy-an sa mga tawo

nga ang ilang panginabuhian anaa sa dagat.

Gamhanan gayod kamo sa kadagatan ug gikalisangan

sa tanang mga tawo nga nagpuyo duol sa dagat.

18 Karon, nagkurog sa kahadlok ang mga nagpuyo

sa mga isla tungod sa inyong pagkalaglag.’ ”

19 Nag-ingon pa gayod ang Ginoong Dios, “Tiro, himuon ka nako nga awaaw nga lungsod; usa ka lungsod nga walay nagpuyo. Palapawan ka nako sa lawom nga tubig. 20 Ilubong ka nako sa kinahiladman tipon niadtong mga tawo sa karaang panahon. Magpabilin ka nga guba ilalom sa yuta tipon niadtong mga tawo nga nangadto sa kinahiladman. Dili ka na makabalik sa dapit sa mga buhi. 21 Tapuson ko na ikaw, ug makalilisang ang imo nga kataposan. Mahanaw ka na. Bisan ug pangitaon ka pa, dili ka na gayod makita. Ako, ang Ginoong Dios, ang nag-ingon niini.”

27:1 Miingon ang Ginoo kanako, 2 “Tawo, pag-awit ug usa ka awit sa pagbangotan alang sa Tiro, 3 ang lungsod nga dunggoanan sa mga barko ug sentro sa negosyo sa mga nagpuyo sa mga isla. Ingna siya nga ako, ang Ginoong Dios, nag-ingon,

“ ‘Tiro, nagpasigarbo ka

nga hingpit ang imo nga katahom.

4 Gipalapad mo ang imo nga teritoryo sa kadagatan.

Gipatahom ka pag-ayo sa mga nagtukod kanimo.

5 Nahisama ka sa usa ka barko nga hinimo sa mga kahoy

nga sipres nga gikan sa Senir.

Ang imo nga palo hinimo gikan sa kahoy

nga sedro nga gikan sa Lebanon.

6 Ang imo nga mga bugsay hinimo gikan sa mga kahoy

nga terebinto nga gikan sa Basan.

Ug ang imo nga salog hinimo sa mga kahoy

nga gikan sa mga isla sa Kitim,

ug gihaklapan kini sa materyales nga gikan sa bangkil sa elepante.

7 Ang imo nga layag binordahan

nga lino nga gikan sa Ehipto,

ug daw sa bandera kini nga tan-awon.

Ang imo nga trapal kolor asul ug ube

nga gikan sa mga isla sa Elisha.

8 Taga-Sidon ug taga-Arvad ang imo nga mga tigbugsay,

ug ang imong hanas nga mga tripulante

gikan mismo sa Tiro.

9 Ang mga eksperyensyadong panday gikan sa Gebal

ang tig-ayo sa imo nga mga guba.

Moanha kanimo ang mga tripulante

sa mga barko ug makignegosyo kanimo.

10 “ ‘Ang imo nga mga sundalo mga taga-Persia, Lydia, ug Put.

Gisab-it nila ang ilang mga taming

ug mga helmet diha sa imo nga dingding,

ug nakahatag kini kanimog kadungganan.

11 Mga taga-Arvad ug taga-Helech ang nagbantay

palibot sa imo nga mga paril, ug ang mga taga-Gammad

ang nagbantay sa imo nga mga tore.

Gisab-it nila ang ilang mga taming palibot sa imo nga bongbong,

ug nakapahingpit kini sa imo nga kadungganan.

12 “ ‘Nakignegosyo ang mga taga-Tarshish kanimo kay daghan kag bahandi. Gibayloan nila ang imo nga mga baligya ug plata, puthaw, lata, ug tingga. 13 Nakignegosyo usab kanimo ang taga-Grecia, Tubal, ug Meshec. Gibayloan nila ang imo nga mga baligya ug mga ulipon ug mga kagamitan nga hinimo sa bronsi. 14 Ang gibaylo usab sa mga taga-Bet Togarma sa imo nga mga baligya mga kabayo nga pangtrabaho, mga kabayo nga panggubat, ug mga mula.

15 “ ‘Nakignegosyo usab kanimo ang mga taga-Dedan, ug daghan kag mga suki sa mga isla. Ang ilang gibayad kanimo mga bangkil sa elepante ug kahoy nga ebony.

16 “ ‘Nakignegosyo usab kanimo ang mga taga-Aram tungod sa imo nga daghang mga produkto. Ang ilang gibaylo sa imo nga mga baligya mga emerald, mga panapton nga kolor ube, mga binordahang panapton, mahalon nga lino, koral, ug mga rubi.

17 “ ‘Nakignegosyo usab kanimo ang mga taga-Judah ug Israel. Gibayloan nila ang imo nga mga baligya ug mga igos, dugos, lana, haplas, ug trigo nga gikan sa Minit.

18 “ ‘Nakignegosyo usab kanimo ang mga taga-Damasco tungod sa kadaghan sa imo nga mga bahandi ug mga produkto. Ang ilang gibaylo sa imo nga baligya mga bino nga gikan sa Helbon ug delana nga gikan sa Sahar. 19 Ang mga taga-Dan ug taga-Javan nga gikan sa Uzal nakignegosyo usab kanimo. Gibayloan nila ang imo nga mga baligya ug mga puthaw ug mga panakot nga casia ug calamus.

20 “ ‘Ang gibaylo sa mga taga-Dedan sa imo nga mga baligya mga panapton nga panghapin sa buko-buko sa mananap aron lingkoran.

21 “ ‘Nakignegosyo usab kanimo ang mga taga-Arabia ug ang tanang pangulo sa Kedar. Ang ilang gibaylo sa imo nga mga baligya mga karnero ug mga kanding.

22 “ ‘Nakignegosyo usab kanimo ang mga negosyante sa Sheba ug Raama. Ang ilang gibaylo sa imo nga mga baligya mao ang tanang klasi sa maayo nga mga panakot, mahalong mga bato, ug bulawan.

23 “ ‘Nakignegosyo usab kanimo ang mga taga-Haran, Cane, Eden, ug ang mga negosyante sa Sheba, Ashur, ug Kilmad. 24 Ang ilang gibaylo sa imo nga mga baligya mga mahalong bisti, mga panapton nga kolor asul, mga binordahang panapton, ug lain-laing kolor sa carpet nga giparibitihan ug maayo ang pagkatahi.

25 “ ‘Ang mga barko sa Tarshish mao ang tigkarga sa imo nga mga baligya.

Nahisama ka sa usa ka barko nga puno

sa mga kargamento samtang naglawig sa kadagatan.

26 Apan dad-on ka sa imo nga mga tigbugsay ngadto sa lawod,

ug bungkagon ka sa makusog nga hangin nga gikan sa sidlakan.

27 Ang tanang anaa kanimo mangalunod: ang imo nga bahandi,

mga baligya, mga tripulante, mga marinero, mga panday,

mga negosyante, ug ang tanan mo nga mga sundalo.

Mangalunod kini nga tanan sa lawod sa adlaw nga mabungkag ka.

28 Mangurog sa kalisang ang mga nagpuyo duol sa dagat

inigkadungog nila sa singgit sa mga tripulante nga nangalunod.

29 Biyaan sa mga tigbugsay ang ilang mga sakayan

ug manindog sila sa baybayon uban sa mga marinero

ug mga tripulante,

30 ug magminatay silag hilak tungod sa nahitabo kanimo.

Sabwagan nilag abog ang ilang mga ulo ug moligid

sila sa abo sa pagpakita sa ilang pagsubo.

31 Magpa-upaw ug magbistig sako

samtang magdangoy-ngoy sila sa kasubo.

32 Sa ilang pagsubo mag-awit sila

niini nga awit sa pagbangotan:

“O Tiro, walay nalunod sa lawod sama sa imo nga pagkalunod!”

33 Naglawig ka dala ang imo nga mga baligya,

ug nakatabang kini sa panginahanglan sa daghang mga nasod.

Nangadato ang mga hari sa kalibotan

tungod sa imo nga bahandi ug mga baligya.

34 Apan karon nabungkag ka na ug uban kanimo

nga nalunod ilalom sa dagat ang imo nga mga baligya

ug ang tanan mo nga mga tripulante.

35 Ang tanang nagpuyo sa mga isla

nalisang gayod sa imo nga gidangatan.

Ang ilang mga hari nangalisang,

ug makita gayod kini sa ilang mga panagway.

36 Nagpanglingo ang mga negosyante

sa kanasoran sa imo nga gidangatan.

Makalilisang ang imo nga kataposan,

ug mahanaw ka na sa hingpit.’ ”