Gibalhin ang Kahon ngadto sa Jerusalem

Gidala ang Kahon gikan sa Kiriat-Jearim

1045 sa wala pa si Cristo

Biblica® Open Ang Pulong sa Dios™ (OCCB)

2 Samuel 6:1–11

1 Gitigom na usab ni David ang labing maayong mga sundalo sa Israel, nga 30,000 ang gidaghanon. 2 Unya miadto sila sa Baala nga sakop sa Juda aron sa pagkuha sa Sudlanan sa Dios, diin anaa ang presensya sa Ginoo nga Makagagahom. Nagpuyo ang Ginoo taliwala sa mga kerubin diha sa ibabaw sa Sudlanan. 3-4 Ang Sudlanan sa Dios didto sa balay ni Abinadab sa bungtod. Gikuha kini ni David ug sa iyang mga tawo, ug gikarga sa usa ka bag-ong karomata. Si Uza ug Ahio nga mga anak ni Abinadab mao ang gagiya sa karomata. Si Ahio ang gauna sa karomata. 5 Gaselebrar si David ug ang tanan nga katawhan sa Israel sa presensya sa Ginoo sa tibuok nila nga kusog. Nag-awit sila ug nagtukar sa mga harpa, lira, tamborin, kastanitas, ug simbal.

6 Sa pag-abot nila sa giokanan ni Nacon, gikab-ot ug gigunitan ni Uza ang Sudlanan sa Dios, tungod kay napandol ang mga baka. 7 Nasuko pag-ayo ang Ginoo kang Uza tungod sa iyang gihimo. Busa gisilotan siya sa Dios ug namatay siya tapad sa Sudlanan.

8 Nasuko si David tungod kay gisilotan sa Ginoo si Uza. Mao kana nga hangtod karon gitawag kadtong dapita ug Perez Uza.

9 Nahadlok si David sa Ginoo niadtong adlawa, ug miingon siya, “Unsaon na lang pagdala sa akong lungsod ang Sudlanan sa Ginoo?” 10 Busa nakahukom siya nga dili na lang niya dad-on ang Sudlanan sa Ginoo ngadto sa iyang lungsod. Gibilin hinuon niya kini sa balay ni Obed Edom nga taga-Gat. 11 Didto kini sa balay ni Obed Edom sulod sa tulo ka bulan, ug gipanalanginan sa Ginoo si Obed Edom ug ang iyang tibuok panimalay.

Usa ka Salmo nga Gisulat sa Unang Pagbalhin sa Kahon

Mga Salmo 68

Ang awit alang sa maestro sa mga mag-aawit. Awit ni David.

1 Sige na, O Dios, kataga ang imong mga kaaway.

Hinaut pa nga moikyas ang nasilag kanimo.

2 Aboga sila sama sa aso nga gipalid sa hangin.

Sama sa kandila nga matunaw sa kalayo,

mahanaw unta ang mga daotan sa imong atubangan.

3 Apan ang mga matarong maghugyaw sa kalipay sa imong atubangan.

4 Awiti ninyo ang Dios; awiti ninyo siya ug mga pagdayeg.

Dayega ninyo siya nga nagsakay sa panganod.

Ang iyang ngalan mao ang Ginoo;

paglipay kamo sa iyang presensya.

5 Ang Dios, nga nagpuyo sa iyang balaan nga puloy-anan,

nag-atiman sa mga nangailo sa amahan ug nanalipod sa mga biyuda.

6 Gihatagan niyag pamilya ang mga nag-inusara,

ug gihatagan niyag kagawasan ug kalipay ang mga binilanggo.

Apan ang mga gahig ulo mopuyo sa yuta nga dili mapuslan.

7 O Dios, sa dihang gipangulohan mo

ang imong katawhan sa ilang lakaw sa kamingawan,

8 natay-og ang yuta ug miulan

tungod kay miabot ka, O Dios sa Israel,

Dios nga nagpadayag sa imong kaugalingon sa Sinai.

9 Nagpadala ka ug abundansyang ulan

ug naulian ang nagmalang yuta nga gihatag mo sa imong katawhan.

10 Didto na namuyo ang imong mga katawhan,

ug sa imong kaayo gihatagan mo ang mga kabos

sa ilang mga gikinahanglan.

11 Nagpadala ang Ginoo ug mensahe,

ug daghang mga kababayen-an ang nagbalita niini:

12 “Nangagiw ang mga hari ug ang ilang mga sundalo,

ug ang ilang mga kabtangan gibahin-bahin

sa mga babaye nga Israelinhon.

13 Bisan ang mga nagpabilin sa toril sa mga karnero,

gibahinan ug mga estatuwang salampati

nga ang mga pako hinaklapan ug pilak ug ang mga balhibo

hinaklapan ug purong bulawan.”

14 Sa dihang gikatag sa Dios nga Makagagahom

ang mga hari, gipaulanan niya ug snow ang bukid sa Zalmon.

15 Pagkatahom sa bukid sa Basan;

pagkadaghan sa iyang mga bungtod.

16 Nganong kining mga bungtod nasina man sa bukid

nga gipili sa Ginoo nga iyang puy-an hangtod sa kahangtoran?

17 Miabot ang Ginoong Dios sa iyang balaang puloy-anan

gikan sa Sinai uban sa linibong mga karwahi.

18 Pagsaka niya sa taas nga dapit

nagdala siyag daghang mga bihag

ug midawat siyag mga gasa gikan sa mga tawo,

bisan mga gahig ulo.

Ug didto magpuyo ang Ginoong Dios.

19 Dalaygon ang Ginoo, ang Dios nga atong manluluwas,

kay adlaw-adlaw ginatabangan niya kita sa atong mga suliran.

20 Ang atong Dios, Dios nga nagluwas.

Siya ang Ginoong Dios nga nagluwas kanato

gikan sa kamatayon.

21 Sigurado gayod nga dugmokon sa Dios

ang ulo sa iyang mga kaaway nga nagpadayon sa pagpakasala.

22 Miingon ang Ginoo,

“Pabalikon ko ang akong mga kaaway gikan sa Basan;

pabalikon ko sila gikan sa kinahiladman sa dagat,

23 aron pamatyon sila ug tunob-tunoban ninyo

ang ilang mga dugo ug ang inyong mga iro makapatuyang pagtilap niini.”

24 O Dios ug Hari ko,

nakita sa tanan ang imong parada sa kadaogan

paingon sa imong balaang puloy-anan.

25 Gauna ang mga mag-aawit, ug sa luyo, ang mga musikero;

sa tunga-tunga nila anaa ang mga dalaga nga gatamborin.

26 Naninggit sila, “Dayega ninyo ang Dios diha sa inyong panagtigom!

Dayega ninyo ang Ginoo, kamong tanang mga kaliwat ni Israel!”

27 Gauna ang gamay nga tribo ni Benjamin,

sunod mao ang mga pangulo sa Juda uban sa ilang panon,

ug nagsunod ang mga pangulo sa Zabulon ug Neftali.

28 O Dios, ipakita ang imong gahom

sama sa gihimo mo kaniadto kanamo.

29 Tungod sa imong Templo sa Jerusalem magdala ang mga hari

ug mga gasa alang kanimo.

30 Badlonga kanang nasod nga sama

sa bangis nga hayop sa kabugangan.

Badlonga usab ang mga katawhang sama sa mga torong baka

uban sa mga toriyo.

Hangtod nga moampo sila ug mohalad sa ilang mga pilak kanimo.

Kataga ang mga katawhan nga nalipay sa pagpakig-gira.

31 Ang mga taga-Ehipto ug mga taga-Etiopia

magkarag-karag sa paghatag sa ilang mga gasa kanimo.

32 Pag-awit kamo sa Dios,

kamong mga gisakopan

sa mga gingharian sa kalibotan.

Pag-awit kamo ug pagdayeg sa Ginoo,

33 nga nagsakay sa kalangitan nga anaa na sukad pa kaniadto.

Pamatia ninyo ang iyang nagdahunog nga tingog.

34 Imantala ninyo ang pagkagamhanan sa Dios nga naghari sa Israel.

Ang kalangitan nagpadayag sa iyang pagkagamhanan.

35 Kahibulongan gayod ang Dios sa Israel diha sa iyang balaang puloy-anan.

Gihatagan niyag gahom ug kusog ang iyang katawhan.

Dalaygon ang Dios!