Bahin 7: Ang Sala ni Solomon (continued)

980 hangtod sa 975 sa wala pa si Cristo

Biblica® Open Ang Pulong sa Dios™ (OCCB)

Ecclesiastes 8–9

1 Pagkaanindot nga mahimong maalamon

ug mahibalong mobatbat sa tanang butang.

Ang kaalam makapasadya sa dagway sa usa ka tawo,

ug makapahanaw sa pagmug-ot.

2 Tumana ang sugo sa hari tungod kay misaad ka sa Dios nga himuon kini. 3 Ayaw pagdali-dali ug biya sa imong katungdanan sa hari, ug ayaw pag-uban sa mga nagplano ug daotan batok kaniya, kay mahimo sa hari ang bisan unsa nga iyang gusto. 4 Gamhanan kaayo ang mga sugo sa hari, ug walay makasupak niini.

5 Walay daotang mahitabo sa tawo nga nagtuman niini.

Ang maalamon nga tawo nakahibalo kon kanus-a

ug unsaon niya paghimo ang usa ka butang.

6 Kay adunay hustong panahon ug pamaagi sa paghimo sa matag butang,

luyo sa daghang mga kalisod nga ginaatubang sa tawo.

7 Tungod kay walay tawo nga nakahibalo sa umaabot,

walay makasulti kang bisan kinsa kon unsa ang mahitabo.

8 Maingon nga dili mapugngan sa tawo ang hangin,

dili usab niya mapugngan ang iyang kamatayon.

Usa kini ka pagpakigbisog nga dili nato malikayan.

Ug atubangan sa kamatayon, ang kadaotan sa usa ka tawo

dili gayod makaluwas kaniya.

9 Nakita ko kining tanan samtang gihuna-huna ko ang bahin sa mga butang nga ginahimo dinhi sa kalibotan diin ang usa ka tawo adunay gahom sa pagpasakit sa iyang isigka-tawo. 10 Nakita ko usab ang mga tawong daotan nga gilubong ug gikalimtan. Kanhi, kanunay silang magsulod-gawas sa balaan nga siyudad sa Jerusalem diin naghimo silag daotan, ug gidayeg sila didto mismo sa dapit diin naghimo sila niini. Wala usab kini kapuslanan.

11 Kon dili dayon mahukman ang tawo nga nakasala, mosamot paghuna-huna ang uban sa paghimo ug daotan. 12 Bisan makasala sa makadaghan ang tawong daotan ug mabuhi ug taas, nasayod ako nga mas maayo ang dangatan sa tawo nga nagtahod sa Dios. 13 Dili mouswag ang tawong daotan kay wala siya motahod sa Dios, ug dili siya makaangkon ug taas nga kinabuhi. 14 Apan adunay mga butang nga dili masabtan dinhi sa kalibotan. Usahay ang matarong nga mga tawo mao ang makadawat sa silot nga alang unta sa daotang mga tawo, ug ang daotan mao ang makadawat sa ganti nga alang unta sa mga matarong. Makaingon ako nga wala usab kini kapuslanan.

15 Busa alang kanako, mas maayo alang sa tawo nga magpahimulos sa iyang kinabuhi kay walay laing maayo alang kaniya dinhi sa kalibotan kondili ang pagkaon, pag-inom, ug paglipay. Niining paagiha makasinati siya ug kalipay samtang gahago siya sa tibuok kinabuhi nga gihatag sa Dios kaniya dinhi sa kalibotan.

16 Adlaw ug gabii dili ako makatulog sa pagpaninguha nga makaangkon ug kaalam aron masabtan ko ang mga nahitabo sa kalibotan. 17 Nakita ko ang tanan nga ginahimo sa Dios dinhi sa kalibotan, ug wala gayoy tawo nga makasabot niini. Bisan pa ug unsaon pagpaningkamot sa tawo nga makasabot niini, dili gayod niya kini masabtan. Bisag moingon pa ang tawong maalamon nga makasabot siya, ang tinuod dili siya makasabot.

9:1 Gipamalandongan ko gayod kadtong tanang mga butang, ug nasuta ko nga ilalom sa pagbuot sa Dios ang mga matarong ug maalamon nga tawo, apil ang ilang mga binuhatan. Apan wala masayod ang tawo kon gugma ba o kasilag ang naghulat kaniya. 2 Usa lang ang dangatan sa tanang klasi sa tawo kung matarong o daotan, maayo o dili maayo, mga tawong giisip nga hinlo ug ang giisip nga hugaw, ug ang gahalad o wala gahalad.

Managsama ra ang tawong maayo

ug ang makasasala,

ang tawong gapanumpa

ug ang naglikay sa pagpanumpa.

3 Mao kini ang nakadaot sa tanang nahitabo sa kalibotan: usa lang ang dangatan sa tanan. Ug dugang pa niana, puno usab sa kadaotan ug kabuang ang huna-huna sa tawo samtang buhi pa siya, ug human niana, mamatay siya. 4 Maingon nga mas maayo pa ang buhi nga iro kaysa patay nga liyon, ang buhi nga tawo mas maayo pa kaysa patay nga tawo. Kay ang buhi aduna pay paglaom.

5 Sa tinuod, nasayod ang buhi nga tawo nga mamatay siya,

apan ang patay walay nahibaloan.

Wala na siyay ganti nga madawat,

ug malimtan na siya.

6 Nawala na ang iyang gugma, kasilag ug kasina,

ug wala na siyay labot sa tanang nahitabo

dinhi sa kalibotan hangtod sa hangtod.

7 Sige paglipay, kaon ug inom ug bino, kay gitugotan nang daan sa Dios nga himuon mo kini. 8 Pagsadya ug paglipay sa kanunay. 9 Pagkinabuhi nga malipayon uban sa hinigugma mong asawa samtang gipahimuslan mo ang lumalabay nga kinabuhi nga gihatag sa Dios kanimo dinhi sa kalibotan. Mao kana ang imong ganti sa imong paghago dinhi sa kalibotan. 10 Pagkugi sa tanan mong buluhaton, kay didto sa dapit sa mga patay nga imong padulngan wala nay trabaho, panghuna-huna, kaalam o kahibalo.

11 Adunay nakita pa gayod ako dinhi sa kalibotan:

Dili tanang kusog modagan makadaog sa lumba,

ug dili tanang maisog makadaog sa gira.

Dili tanang maalamon makakita ug pangabuhian,

dili tanang utokan maadunahan,

ug dili tanang adunay abilidad paboran.

Kay moabot sa matag tawo ang panahon nga wala niya damha.

12 Ug dugang pa niana, wala usab siya masayod kon kanus-a moabot ang iyang panahon.

Sama sa langgam nga nalit-agan

o sa isda nga napukotan;

mabiktima usab ang tawo sa daotang mga hitabo

nga kalit lang moabot kanila.

13 Nakita ko usab dinhi sa kalibotan ang usa ka panig-ingnan sa kaalam nga giangayan ko gayod: 14 Adunay usa ka gamay nga lungsod diin gamay lang ang mga lumulupyo. Gilibotan kini sa usa ka gamhanang hari kauban ang iyang mga sundalo. Nangandam sila sa pagguba sa mga paril niini, ug unya misulong sila. 15 Didto sa maong lungsod, adunay usa ka tawo nga kabos apan maalamon, ug giluwas niya ang maong siyudad pinaagi sa iyang kaalam. Apan pagkahuman niadto, wala na siya hinumdomi sa mga tawo. 16 Busa nakaingon ako nga mas maayo ang kaalam kaysa kusog, apan ang kaalam sa tawong kabos ginatamay ug walay mohatag ug pagtagad sa iyang mga tambag.

17 Mas maayo pa nga mamati sa hinay nga sulti sa maalamon nga tawo

kaysa mamati sa singgit sa pangulo sa mga buang-buang.

18 Mas maayo ang kaalam kaysa mga armas sa gira.

Apan ang usa ka makasasala makadaot sa daghang kaayohan.