Mga Salmo sa Kalisdanan, Kadaghanan gikan sa Panahon sa Pagkabihag

Mga salmo nga gisulat panahon sa mga kalisdanan ug mga pag-antos sa iglesia, kasagaran panahon sa pagkabihag sa Babilonia.

539 sa wala pa si Cristo

Biblica® Open Ang Pulong sa Dios™ (OCCB)

Mga Salmo 137

1 Nanglingkod kami sa daplin sa mga suba sa Babilonia

ug nanghilak sa dihang nahinumdom kami sa Zion.

2 Gipangsang-at namo ang among mga harpa sa mga sanga sa mga kahoy didto.

3 Kay gipaawit kami sa mga mibihag kanamo.

Gisugo nila kami sa paglingaw kanila.

Miingon sila, “Awiti ninyo kami ug awit mahitungod sa Zion!”

4 Unsaon namo pag-awit ug mga awit nga alang sa Ginoo

sa yuta sa mga mibihag kanamo?

5 Hinaut pa nga dili na makalihok

ang akong tuong kamot kon kalimtan ka nako, Jerusalem!

6 Hinaut pa nga dili na ako makaawit pag-usab

kon dili ko hinumdoman

ug isipon nga akong dakong kalipay ang Jerusalem.

7 Hinumdomi, Ginoo, ang gihimo sa mga Edomihanon

sa dihang giilog sa Babilonia ang Jerusalem.

Miingon sila, “Gub-a ninyo kana sa hingpit.”

8 Kamong mga lumulupyo sa Babilonia,

laglagon kamo!

Bulahan ang mga tawo nga molaglag kaninyo

sama sa inyong gihimong paglaglag kanamo.

9 Bulahan silang mokuha sa inyong mga gagmayng kabataan

ug molambos kanila sa bato.

Mga Salmo 130

Ang awit samtang gatungas.

1 Tungod sa tumang kalisod nanawag ako kanimo, Ginoo.

2 Pamatia ang akong pagpakiluoy kanimo.

3 Ginoo, kon gilista mo pa ang among mga sala,

kinsa pa kahay mahibilin sa imong presensya?

4 Apan gipasaylo mo kami, busa amo kang ginatahod.

5 Naghulat gayod ako kanimo, Ginoo,

ug nagsalig ako sa imong pulong.

6 Naghulat ako kanimo, Ginoo,

labaw pa sa paghulat sa mga tigbalantay sa kabuntagon.

7 Mga taga-Israel, salig kamo sa Ginoo,

kay mahigugmaon siya ug andam kanunay nga moluwas.

8 Siya mismo ang moluwas kaninyo

gikan sa tanan ninyong mga sala.

Mga Salmo 80

Ang awit alang sa maestro sa mga mag-aawit. Awita kini sa tono sa awit nga “Ang mga Liryo alang sa Kalig-onan sa Kasabotan.” Ang awit ni Asaf.

1 Pamatia kami, O Magbalantay sa Israel,

nga gagiya sa mga kaliwat ni Jose nga daw panon sa mga karnero.

Ikaw nga naglingkod sa imong trono sa taliwala sa mga kerubin,

ipakita ang imong pagkahalangdon

2 sa tribo ni Efraim, ni Benjamin, ug ni Manases.

Ipakita kanamo ang imong gahom.

Dali! Luwasa kami!

3 O Dios, ibalik kanamo

ang among maayong kahimtang kaniadto.

Ipakita kanamo ang imong kaayo

aron kami maluwas.

4 Ginoong Dios nga Makagagahom,

hangtod kanus-a ang imong kasuko sa pag-ampo namo nga imong mga katawhan?

5 Daw sa gipakaon mo kamig kagul-anan

ug gipainom ug daghang mga luha.

6 Gitugot mo nga awayon kami sa among kasikbit nga mga nasod,

ug sila nga among mga kaaway nagbugal-bugal kanamo.

7 O Dios nga Makagagahom,

ibalik kanamo ang among maayong kahimtang kaniadto.

Ipakita kanamo ang imong kaayo

aron kami maluwas.

8 Sama kami sa tanom nga ubas nga gikuha mo gikan sa Ehipto

ug gitanom sa yuta sa mga katawhan nga imong giabog.

9 Gihawanan mo ang maong yuta, ug nanggamot pag-ayo ang ubas

ug nalukop niini ang tibuok yuta.

10 Gilandongan sa iyang mga sanga ang kabukiran

ug ang dagkong mga kahoyng sedro.

11 Nakaabot ang iyang mga sanga sa Dagat sa Mediteraneo

ug ang iyang mga salingsing hangtod sa Suba sa Eufrates.

12 Apan nganong giguba mo man, O Dios, ang mga paril niining ubasan?

Gipamupo na hinuon sa tanang nangagi ang mga bunga niini.

13 Ug gikaon kini sa mga baboy nga ihalas ug sa uban pang ihalas nga mga mananap.

14 O Dios nga Makagagahom, tagda kami pagbalik!

Gikan sa langit, tan-awa pag-ayo ang among kahimtang.

Atimana kami nga imong katawhan,

15 pareho sa tanom nga ubas

nga gitanom mo pinaagi sa imong gahom.

Hinumdomi kami nga imong mga anak

nga gipalig-on mo alang sa imong kadungganan.

16 O Dios, sama kami sa giputol ug gisunog nga ubas.

Nasuko ka kanamo ug gilaglag mo kami.

17 Apan karon, tabangi kaming imong mga pinili

ug gipalig-on alang sa imong kadungganan.

18 Dili na kami mobiya kanimo.

Ibalik kanamo ang among maayong kahimtang,

ug simbahon ka namo.

19 O Ginoong Dios nga Makagagahom,

ibalik kanamo ang among maayong kahimtang kaniadto!

Ipakita kanamo ang imong kaayo aron maluwas kami.

Mga Salmo 77

Ang awit alang sa maestro nga si Jedutun. Ang awit ni Asaf.

1 Misinggit ako sa pagpakitabang sa Dios aron madunggan niya ako.

2 Sa panahon sa kalisod

nag-ampo ako sa Ginoo.

Sa panahon sa kagabhion wala ako gikapoy sa pagbayaw

sa akong mga kamot sa pag-ampo,

apan wala gihapon ako malipay.

3 Kon mamalandong ako sa Dios,

makapanghupaw ako ug mawad-an ug paglaom.

4 Wala niya ako pakatulga;

dili ako makasulti tungod kay nahasol ako.

5 Gihuna-huna ko ang mga adlaw nga nanglabay ug ang dugay nang mga katuigan.

6 Kon gabii, lawom kaayo

ang akong gihuna-huna.

Namalandong ako

ug mao kini ang gipangutana ko

sa akong kaugalingon:

7 “Isalikway na lang ba ako sa Ginoo sa hingpit?

Dili na ba gayod siya malipay kanako?

8 Nawala na ba gayod ang iyang paghigugma kanako?

Dili na ba gayod niya tumanon ang iyang saad?

9 Nalimot na ba siya sa pagpakita ug kaluoy?

Wala na ba siyay kaluoy tungod sa iyang kasuko?”

10 Unya miingon ako, “Ang gikasakit sa akong buot mao nga

ang Labing Halangdong Dios wala na nagtabang.”

11 Ginoo, hinumdoman ko ang imong mga buhat.

Oo, hinumdoman ko ang mga milagro

nga gipanghimo mo kaniadto.

12 Huna-hunaon ko ug pamalandongan ang tanan mong gamhanang mga buhat.

13 O Dios, ang imong pamaagi lahi kaysa uban.

Walay dios nga sama kanimo kagamhanan.

14 Ikaw ang Dios nga naghimo ug mga milagro.

Gipakita mo ang imong gahom sa mga katawhan.

15 Pinaagi sa imong gahom giluwas mo ang imong katawhan

nga mga kaliwat ni Jacob ug ni Jose.

16 Ang katubigan, O Dios, daw sama sa tawo nga

sa dihang nakakita kanimo nahadlok ug nangurog.

17 Mihatag ug ulan ang langit;

nagdalogdog ug nagpangilat sa bisan asang dapit.

18 Madungog ang dinahunog sa dalogdog diha sa bagyo;

ang mga kilat mipadan-ag sa kalibotan;

ug natay-og ang kalibotan.

19 Gilatas mo ang dagkong mga balod sa dagat,

apan wala makita kon asa ka miagi.

20 Gigiyahan mo ang imong katawhan nga daw panon sa mga karnero,

pinaagi kang Moises ug kang Aaron.