Mga Salmo ni David, Wala Mailhi ang mga Petsa (continued)

Mga salmo nga gisulat ni David nga wala mailhi ang mga petsa ug mga higayon sa pagsulat niini.

1015 sa wala pa si Cristo

Biblica® Open Ang Pulong sa Dios™ (OCCB)

Mga Salmo 65

Ang awit alang sa maestro sa mga mag-aawit. Awit ni David.

1 O Dios, angay ka namong dayegon didto sa Zion!

Ug tumanon namo ang among mga saad kanimo.

2 Ang tanang mga tawo moduol kanimo kay ginatubag mo ang ilang mga pag-ampo.

3 Bisan ug daghan na kaayo ang among mga sala,

gipasaylo mo gihapon kami.

4 Bulahan ang tawo nga imong gipili

ug giagda nga mopuyo sa imong Templo.

Matagbaw kami sa mga kaayohan diha sa imong balay

nga mao ang imong balaan nga Templo.

5 O Dios nga among manluluwas,

gitubag mo kami pinaagi sa katingalahang mga butang

nga imong gihimo sa pagluwas kanamo.

Ikaw ang paglaom sa mga tawo, bisan pa kadtong namuyo

sa pinakalayong dapit sa kalibotan o kadagatan.

6 Gamhanan ka ug gipahimutang mo ang kabukiran

pinaagi sa imong gahom.

7 Gipahilom mo ang haguros sa mga balod

ug ang kaguliyang sa katawhan.

8 Gibati ug kahadlok kanimo

bisan pa kadtong nagpuyo sa layong dapit

tungod sa katingalahan mong binuhatan.

Ang imong mga buhat makapahugyaw sa kalipay

sa mga tawo sa tibuok kalibotan.

9 Giatiman mo ang yuta ug gipadad-an ug ulan;

gihimo mo kining mabungahon.

Ang imong mga sapa, O Dios, walay paghubas.

Gihatagan mo ug abot ang mga tawo.

Giandam mo ang yuta aron nga mohatag ug abot.

10 Gipaulanan mo pag-ayo ang dinarong yuta

hangtod nga mihumok kini,

ug gipanalanginan mo ang mga tanom nga nanubo niini.

11 Gipadagaya mo ang mga abot sa tibuok tuig.

Ang tanang dapit nga agian mo makaangkon ug kadagaya.

12 Ang mga sabsabanan sa kamingawan

abundansya sa lunhawng mga sagbot;

ang mga bungtod daw mga tawo nga naglipay.

13 Ang mga sabsabanan napuno ug mga kahayopan.

Ang mga walog nalukop sa mga uhay.

Kining mga dapita daw mga tawo nga nanaghugyaw

ug nanag-awit sa kalipay.

Mga Salmo 69

Ang awit alang sa maestro sa mga mag-aawit. Awita kini sa tono sa awit nga “Mga Liryo.” Ang awit ni David.

1 Luwasa ako, O Dios,

kay nahisama ako sa tawo nga hapit nang malumos.

2 Daw naunlod ako sa lawom nga lapok

ug walay matugkaran.

Mura ug anaa ako sa lawom nga tubig

ug daw maanod na sa baha.

3 Gikapoy na ako sa pagpangayog tabang

ug sakit na ang akong tutunlan.

Mingitngit na ang akong panan-aw

sa pagpaabot sa imong tabang, O Dios ko.

4 Pagkadaghan gayod sa nagdumot

ug buot mopatay kanako sa walay igong hinungdan.

Mas daghan pa sila kaysa akong buhok.

Gibutang-butangan nila ako ug gipugos sa pag-uli

sa mga butang nga wala ko kawata.

5 Nahibalo ka, O Dios, sa akong mga kabuang;

wala matago kanimo ang akong mga sala.

6 Ginoong Dios nga Makagagahom, Dios sa Israel,

hinaut nga dili maulawan tungod kanako ang mga nagsalig

ug nagdangop kanimo.

7 Kay tungod kanimo giinsulto

ug gipakaulawan ako.

8 Nahisama ako sa usa ka langyaw ngadto

sa akong mga kadugo;

daw sama ako sa usa ka estranghero ngadto

sa akong mga igsoon.

9 Tungod sa paghigugma ko sa imong balay,

ginalaglag ako,

ug gisakitan ako sa mga pagpanamastamas

sa mga tawo kanimo.

10 Kon maghilak ako ug magpuasa,

pakaulawan nila ako.

11 Kon magbisti akog sako sa pagpakita nga nagsubo ako,

biay-biayon nila ako.

12 Ginalibak ako sa mga tawo nga nanglingkod diha

sa pultahan sa lungsod,

ug naghimo-himo ang mga hubog ug awit

sa pagbiay-biay kanako.

13 Apan nag-ampo ako kanimo, Ginoo.

Nanghinaut nga sa panahon nga kaloy-an mo ako,

tubagon mo ang akong pag-ampo sumala

sa imong dakong gugma kanako.

Tungod kay matinumanon ka

sa imong saad sa pagluwas,

14 haw-asa ako gikan sa lapok.

Ayaw itugot nga maunlod ako.

Luwasa ako sa mga nagdumot kanako

ug sa lawom nga tubig.

15 Ayaw itugot nga maanod ako sa baha,

o malumos sa mga balod, o mamatay.

16 Tubaga ako, Ginoo,

tungod sa imong kaayo

ug gugma kanako.

Tagda ako sumala

sa imong dakong kaluoy kanako.

17 Ayaw pagtago gikan kanako nga imong sulugoon.

Tubaga dayon ako kay ania ako sa kalisod.

18 Duol kanako ug luwasa ako gikan

sa akong mga kaaway.

19 Nasayod ka kon giunsa nila ako sa pagpakaulaw,

pag-insulto, ug pagpanamastamas.

Nakita mo ang tanan kong mga kaaway.

20 Nasakitan ako sa ilang pagpakaulaw kanako

ug nawad-an akog kadasig.

Nagpaabot ako nga kaloy-an,

apan wala gayoy naluoy kanako.

Nagpaabot ako nga lipayon,

apan wala gayoy milipay kanako.

21 Gibutangan hinuon nila

ug hilo ang akong pagkaon,

ug sa dihang giuhaw ako gihatagan nila ako ug suka.

22 Samtang magkombira sila,

hinaut pa nga mangalaglag sila

ug ang ilang mga bisita.

23 Hinaut pa nga mabuta sila

ug kanunayng magkurog.

24 Ibubo ang imong kasuko kanila, Ginoo.

Ipahiagom sila sa imong kapungot.

25 Hinaut unta nga maawaaw ang dapit nga ilang gipuy-an,

ug wala nay mopuyo sa ilang mga tolda.

26 Kay gilutos nila ang mga tawo nga imong gisilotan,

ug gipanabi nila ang mga pag-antos sa mga samdan.

27 Idugang pa gayod kini sa ilang mga sala

ug ayaw sila luwasa.

28 Panasa ang ilang mga ngalan sa libro

nga gilistahan sa mga buhi;

ayaw sila ilista uban sa mga matarong.

29 Nasakitan ako ug nag-antos,

busa panalipdi ako, O Dios, ug luwasa.

30 Dayegon ko ang Dios pinaagi sa awit.

Pasidunggan ko siya uban ang pagpasalamat.

31 Mas makapalipay kini sa Ginoo

kaysa mga halad nga baka.

32 Kon makita kini sa mga kabos, malipay sila;

ang mga nagdangop sa Dios molig-on.

33 Maminaw ang Ginoo sa mga kabos

ug dili niya kalimtan ang iyang mga katawhan nga nabilanggo.

34 Dayega ninyo ang Dios,

kamong tanan nga anaa sa kalangitan,

sa kalibotan, ug sa kadagatan.

35 Kay luwason sa Dios ang Zion,

ug pabarogon niya pag-usab ang mga lungsod sa Juda.

Mopuyo didto ang iyang katawhan

ug panag-iyahon nila kini.

36 Ang mga kaliwat sa iyang mga alagad mao ang manunod niini,

ug ang mga naghigugma kaniya mopuyo didto.