Gipanalipdan ni Pablo ang Iyang mga Katungod Ingong Apostol

Dinhi gipanalipdan ni Pablo ang iyang pagkaapostol pinaagi sa pagpahinumdom kanila sa ilang kaugalingong pagkakabig gikan sa paganismo ug sa espirituhanong mga gasa nga iyang gihatag kanila. Gitubag niya ang mga pagsupak batok sa iyang pagkatawo ingong apostol nga gihimo sa iyang mga kaaway, kansang mga panglantaw ug pamatasan hingpit nga sukwahi sa iya. Gipahayag niya nga, bisan tuod mibalibad siya sa pagdawat og suporta gikan sa mga taga-Corinto, hingpit siyang adunay katungod sa pagpangayo niini alang sa iyang kaugalingon ug sa iyang igsoon nga babaye, o asawa, sama sa ubang mga apostol. Gipanalipdan niya ang iyang katungod nga suportahan pinasikad sa kasagarang batasan sa katawhan, sa Kasugoan ni Moises, ug sa tin-aw nga sugo ni Cristo.

57 human matawo si Cristo

Biblica® Open Ang Pulong sa Dios™ (OCCB)

1 Mga Taga-Corinto 9:1–14

1 Dili ba gawasnon man ako? Dili ba apostol man ako? Dili ba nga nagpakita man kanako si Jesus nga atong Ginoo ug kamo nahimo mang mga tumutuo sa Ginoo tungod kanako? 2 Bisan kon alang sa uban dili ako usa ka apostol, apostol gayod ako alang kaninyo tungod kay kamo mismo ang magpamatuod, kay pinaagi kanako kamo anaa na sa Ginoo.

3 Mao kini ang akong ikatubag sa mga tawo nga dili motuo nga apostol ako.

4 Sa among pagka-apostol, wala ba kamiy katungod sa pagdawat sa pagkaon ug ilimnon gikan sa mga tawo nga nakadawat sa among pagpanudlo? 5 Ug wala ba kamiy katungod sa pagpauban sa asawa nga tumutuo sa among mga pagbiyahe sama sa gibuhat sa mga igsoon sa Ginoo, ni Pedro ug sa ubang mga apostoles? 6 Unsa ba diay, kami lang ba ni Bernabe ang kinahanglan nga maghago aron adunay panginabuhian?

7 Aduna bay sundalo nga siya ra mismo ang nagsuhol sa iyang kaugalingong panerbisyo? Aduna bay nagtanom ug ubasan nga dili makapahimulos sa bunga sa iyang gitanom? Ug aduna bay nag-alima ug mga mananap nga walay bahin?

8 Kining akong gipanulti dili iya sa tawhanon nga panghuna-huna, kondili mao usab kini ang gitudlo sa Kasugoan. 9 Kay nasulat sa Kasugoan ni Moises, “Ayaw busali ang baka nga gagiok.” Ug dili kita maghuna-huna nga baka lang ang buot ipasabot sa Dios niini. 10 Kay apil usab kami sa iyang buot ipasabot. Ang mga tawo magdaro ug mangani, tungod kay nagpaabot sila nga makadawat ug bahin sa abot niini. 11 Nagpugas kami diha kaninyo ug espirituhanong mga binhi; bug-at na ba alang kaninyo kon magpaabot kami nga inyong hatagan sa mga butang nga among gikinahanglan sa matag adlaw? 12 Kon ang uban nga mga magtutudlo adunay katungod sa pagpaabot niini gikan kaninyo, labaw na gayod kami. Apan bisan kon aduna kamiy katungod sa pagpaabot ug tabang gikan kaninyo, wala namo pahimusli ang maong katungod. Hinuon gipalabi namo nga antoson ang tanan aron dili mababagan ang pagpakaylap sa Maayong Balita mahitungod kang Cristo.

13 Dili ba nasayod man kamo nga ang mga nag-alagad diha sa templo diha usab mokuha sa ilang pagakan-on? Ug ang mga nag-alagad diha sa halaran mokuha usab sa ilang bahin sa mga gihalad diha sa halaran. 14 Sa samang pamaagi, nagsugo ang Ginoo nga ang mga nakadawat sa Maayong Balita angay nga motabang sa paghatag sa mga panginahanglan sa mga magwawali sa Maayong Balita aron sila mabuhi.

Gibiyaan ni Pablo ang Iyang Katungod nga Suportahan

Gihatag ni Pablo ang iyang mga hinungdan sa dili pagpangayo sa iyang katungod nga suportahan sa Cristohanong iglesia sa Corinto: nahadlok siya nga kon mahimo siyang palas-anon kanila, mahimong dili kaayo molampos ang Maayong Balita. Gipahayag niya ang iyang dakong tinguha nga molabaw sa iyang ministeryo. Kontento sa katungdanan nga dili niya mahimong pasagdan, nga mao ang pagsangyaw, gipakita niya kon giunsa niya pagpahiuyon sa mga kahuyang ug pagpihig sa tanang matang sa mga tawo aron madala niya sila ngadto kang Cristo. Sugod sa bersikulo 24, gipakita ni Pablo nga husto ang iyang pag-atubang sa mga kalisdanan ug dili kinahanglang mga kahago pinaagi sa pagtudlo sa usa ka batasan sa ilang mga katagilungsod, nga naglaom nga makadaog lamang og usa ka koronang madunot. Gidapit niya ang tanang kinabig nga mosunod sa iyang panig-ingnan, nga gidasig sa seguradong paglaom sa usa ka koronang dili madunot. Giawhag sila sa pagkinabuhi nga kanunayng magdumili ug magpugong sa kaugalingon.

1 Mga Taga-Corinto 9:15–27

15 Apan wala ko pahimusli ang maong katungod. Ug wala usab ako magsulat karon sa pagpamasin nga hatagan ninyo. Maayo pa nga mamatay na lang ako kaysa himuon ko kini. Sigurohon ko nga walay bisan kinsa nga makakuha niining akong gipasigarbo. 16 Wala ko ipasigarbo ang akong pagwali sa Maayong Balita, kay mao kini ang akong katungdanan. Dili mahimo nga dili ko kini buhaton tungod kay alaot ako kon dili ko iwali ang Maayong Balita. 17 Kon nagwali ako tungod kay mao kini ang akong gipili nga trabaho, magpaabot unta ako ug suhol. Apan ang tinuod, gituman ko lang ang akong katungdanan nga magwali tungod kay mao kini ang gitugyan kanako sa Dios. 18 Unsa karon ang balos nga akong mapaabot? Ang giisip ko nga balos mao ang kalipay nga sa akong pagwali sa Maayong Balita wala ako magpasuhol, bisan tuod ug aduna akoy katungod nga magpasuhol sa akong paghago sa pagsangyaw sa Maayong Balita.

19 Bisan walay nag-ulipon kanako nagpaulipon ako sa tanan aron daghan pa gayod ang akong makabig ngadto kang Cristo. 20 Mao kana nga kon kauban ko ang mga Judio nagkinabuhi ako sama sa Judio, aron makabig ko sila ngadto kang Cristo. Busa bisan dili ako sakop sa kasugoan sa mga Judio, gisunod ko kini aron makabig ko sila sa atong pagtuo. 21 Ug mao usab kon kauban ko ang mga dili Judio. Wala ko sunda ang kasugoan nga alang sa mga Judio kondili gisunod ko ang pagkinabuhi sa mga dili Judio aron makabig ko sila ngadto kang Ginoong Jesus. Wala kini magpasabot nga wala ko sunda ang mga sugo sa Dios, kay ang tinuod gisunod ko ang mga sugo ni Cristo. 22 Nakig-angay ako sa mga tumutuong maluya pa ug pagtuo aron mapalig-on ko sila diha sa Ginoo. Nakig-angay ako sa tanan bisan unsa ang ilang kahimtang, aron sa bisan unsa nga pamaagi maluwas ko ang uban kanila. 23 Gihimo ko kining tanan tungod kay gusto ko nga makaambit sa mga panalangin uban sa mga nakadawat sa Maayong Balita.

24 Sa lumba, dili ba daghan man ang moapil apan usa lang kanila ang makadawat ug ganti? Busa ayoha ninyo ang inyong pagdagan aron makadawat kamo ug ganti. 25 Ang matag magdadagan nagbansay gayod ug maayo inubanan ug disiplina sa iyang kaugalingon. Gibuhat niya kini aron makadawat siyag ganti nga lumalabay lamang. Apan ang ganti nga atong gitinguha dili gayod mawala. 26 Mao kana nga diretso gayod ang akong pagdagan paingon sa dag-anan. Wala ako gasumbag sa hangin. 27 Busa kon adunay dili maayo nga pangandoyon ang akong lawas, gipaningkamotan ko gayod nga pugngan kini kay basin kon human ko matudloi ang uban, ako pa unya ang dili makadawat ug ganti gikan sa Dios.

Ang Panig-ingnan sa Israel Nagpasidaan sa mga taga-Corinto

Pinaagi sa pamatasan sa mga Israelinhon kaniadto, buot ipakombinsir ni Pablo sa mga taga-Corinto nga, sama nga ang katawhang gipaboran sa Dios gisilotan pag-ayo tungod sa ilang kagubot ug pagsimba sa mga diosdios, sa ingon usab ang mga Cristohanon nga ubos sa Maayong Balita ug nagpatuyang sa samang mga sala ug kalipayan seguradong silotan sama sa mga Israelinhon nga ubos sa Kasugoan. Pinaagi niining mga panig-ingnan, gipasidan-an niya sila nga likayan ang samang mga kalapasan. Gipasidan-an niya sila nga dili mosalig pag-ayo sa ilang kaugalingon ingong mga sakop sa Cristohanong iglesia, kondili magbantay aron dili usab sila mahulog sa sala.

1 Mga Taga-Corinto 10:1–12

1 Mga igsoon, gusto ko nga masayran ninyo ang nahitabo sa among mga katigulangan. Gitultolan sila sa Dios pinaagi sa panganod ug gitabangan niya sila sa ilang pagtabok sa Pulang Dagat. 2 Pinaagi sa maong panganod ug dagat sama ra nga nabautismohan silang tanan isip mga sumusunod ni Moises. 3 Silang tanan mikaon sa samang balaang pagkaon nga gikan sa Dios. 4 Ug silang tanan miinom sa samang balaang tubig nga iyang gihatag, kay nanginom sila sa tubig nga gikan sa Bato nga gipatubod sa Dios. Kadtong Bato nga nag-uban-uban kanila mao si Cristo mismo. 5 Apan bisan ug gitabangan sila sa Dios, ang kadaghanan kanila wala gayod magbuhat sa husto nga makapalipay sa Dios. Tungod niini namatay sila ug ang ilang mga patayng lawas nagkatag didto sa kamingawan.

6 Kadtong mga nahitabo kanila nagpasidaan kanato aron dili kita magtinguha sa pagbuhat ug mga daotan sama sa ilang gibuhat. 7 Ayaw kamo pagsunod sa gihimo sa uban kanila nga nagsimba sa mga dios-dios. Kay sumala sa Kasulatan, “Ang mga tawo nanagkombira, nanag-inom, ug nanagsayaw sa ilang pagsimba sa dios-dios.” 8 Ug dili gayod kita makighilawas gawas sa kaminyoon, sama sa gibuhat sa uban kanila. Tungod niini nangamatay ang 23,000 kanila sa usa lang ka adlaw. 9 Dili usab nato sundon ang uban kanila nga mihimo sa pagsulay sa Ginoo, maong gipapaak niya sila sa mga halas ug nangamatay sila. 10 Ayaw kamo pagsunod sa gihimo sa uban kanila nga nagbagulbol. Mao nga gipapatay sila sa Dios pinaagi sa Anghel sa Kamatayon.

11 Kining tanan nahitabo aron masayran nato nga wala kadto ikalipay sa Dios. Ug gisulat kadto nga mga panghitabo aron sa pagpasidaan kanato nga nagkinabuhi sa panahon nga hapit na gayod moabot ang kataposan. 12 Busa kon naghuna-huna kamo nga ang inyong pagtuo lig-on na, pagbantay kamo kay basin kon makasala usab kamo.

Kinahanglang Likayan sa mga taga-Corinto ang Pagsimba sa mga Diosdios

Ang mga taga-Corinto, nga nag-atubang lamang sa samang mga tentasyon nga giatubang sa uban, giawhag nga mopahilayo sa pagsimba sa mga diosdios ug sa pagkaon sa mga gihalad niini. Gipamatud-an ni Pablo, pinasikad sa atong kaugalingong Komunyon ug sa kasugoan bahin sa mga seremonya, nga ang maong buhat usa ka dayag nga pagsimba sa mga demonyo, kansang mga halad ilang gikaon sa kombira ug kang kinsa sila nakighiusa. Ang pagsimba sa tinuod nga Dios ug ang pagsimba sa mga diosdios dili mahimong mag-uban, ug kini makapasipala kang Cristo.

1 Mga Taga-Corinto 10:13–22

13 Walay pagsulay nga moabot kaninyo nga wala usab naabot sa ubang mga tawo. Apan kasaligan ang Dios sa iyang saad nga dili niya tugotan nga sulayan kamo labaw sa inyong maantos. Ug kon moabot ang mga pagsulay kaninyo, maghatag siyag pamaagi aron maantos ninyo kini.

14 Busa, mga hinigugma ko, ayaw gayod kamo pagsimba sa mga dios-dios. 15 Nagsulti ako kaninyo ingon nga mga tawo nga adunay salabotan. Busa timbang-timbanga ninyo ang akong gisulti kaninyo. 16 Kon magtigom kita aron sa paghinumdom sa kamatayon ni Cristo, aduna kitay giinom sa kopa nga atong gipasalamatan sa Dios, ug aduna usab kitay pan nga atong gipikas-pikas ug gikaon. Dili ba nga pinaagi niini nakig-ambit kita sa dugo ug sa lawas ni Cristo? 17 Kitang tanan, bisan daghan, usa lang ka lawas tungod kay usa lang ka pan ang atong giambitan.

18 Tan-awa ra gud ninyo ang katawhan sa Israel. Ang mga nangaon sa mga halad nakig-ambit sa buluhaton sa halaran. 19 Buot ko bang ipasabot nga ang mga dios-dios ug ang pagkaon nga gihalad ngadto kanila adunay bili? 20 Dili! Ang buot kong ipasabot mao nga ang mga gihalad sa mga tawong wala makaila sa Dios, gihalad ngadto sa daotang mga espiritu ug dili ngadto sa Dios. Busa dili ko gusto nga makig-ambit kamo sa daotan nga mga espiritu. 21 Dili mahimo nga moinom kamo sa kopa sa Ginoo ug sa kopa sa daotang mga espiritu. Ug dili mahimo nga mokaon kamo sa kan-anan sa Ginoo ug sa kan-anan sa daotang mga espiritu. 22 Unsa, gusto ba nato nga mangabugho ang Ginoo? Nasayod kita nga kon masuko na siya, dili gayod kita makalikay sa iyang silot.