Giawit ni Maria ang Magnificat
Kabukiran sa Judea
7 o 6 sa wala pa si Cristo
Biblica® Open Ang Pulong sa Dios™ (OCCB)
Lucas 1:46–56
1:46 Miingon si Maria:
“Gadayeg gayod ako sa Ginoo!
47 Ug malipayon ang akong espiritu
tungod sa Dios nga akong Manluluwas.
48 Kay gihinumdoman niya ako
nga iyang ubos nga sulugoon.
Sukad karon, magsulti ang tanang mga tawo
nga bulahan ako,
49 tungod sa kahibulongan nga mga butang
nga gihimo sa gamhanang Dios kanako.
Balaan ang iyang ngalan!
50 Aduna siyay kaluoy sa mga tawo
sa matag kaliwatan nga nagtahod kaniya.
51 Gipakita niya ang iyang gahom
pinaagi sa iyang mga gihimo.
Giabog niya ang mga tawo
nga mapahitas-on sa ilang kaugalingon.
52 Gipakanaog niya ang mga gamhanang hari sa ilang trono.
Ug gituboy niya ang mga mapainubsanon.
53 Gitagbaw niya sa mga maayong butang ang mga gigutom.
Apan gihinginlan niya nga wala gayoy dala
ang mga adunahan.
54-55 Gitabangan niya kita nga iyang mga sulugoon,
nga mga kaliwat ni Israel.
Kay wala niya kalimti ang iyang mga saad
sa atong mga katigulangan,
nga kaloy-an niya sa walay kataposan si Abraham
ug ang iyang mga kaliwat!”
56 Ug mipuyo si Maria didto sa ilang Elisabet ug mga tulo ka bulan, ug unya mipauli siya.
Ang Pagkatawo, Pagkabata, ug Kinabuhi ni Juan sa Kamingawan
Ang pagkatawo ug pagkabata ni Juan nga Tigbautismo, ug ang iyang kinabuhi sa kamingawan.
Kabukiran sa Judea. 7 o 6 BC
Lucas 1:57–80
1:57 Unya miabot ang panahon sa pagpanganak ni Elisabet, ug nanganak siya ug lalaki. 58 Sa dihang nakadungog ang iyang mga silingan ug mga paryente nga gikaluy-an siya pag-ayo sa Ginoo, nakigduyog sila sa iyang kalipay.
59 Sa walo na ka adlaw ang bata, mitambong ang mga silingan ug mga paryente sa pagtuli kaniya. Zacarias unta ang ilang ingalan kaniya sama sa iyang amahan, 60 apan wala mosugot si Elisabet. Miingon siya, “Dili mahimo, kinahanglan nga Juan ang ingalan kaniya.”
61 Miingon sila kaniya, “Apan wala gayod kamoy paryente nga sama niana ug ngalan.”
62 Ug ilang gisinyasan ang amahan kon unsay iyang gusto nga ingalan sa iyang anak. 63 Misinyas siya nga hatagan siya ug sulatanan. Ug dayon misulat siya, “Nganli siyag Juan.” Natingala gayod silang tanan. 64 Diha-diha nakasulti si Zacarias ug gidayeg niya ang Dios. 65 Gikulbaan ang tanan niyang mga silingan ug mikaylap sa tanang dapit sa mga bukid sa Judea ang balita mahitungod sa maong panghitabo. 66 Ang tanang mga tawo nga nakadungog niini nakapamalandong ug nakapangutana, “Unsa man kaha kining bataa inigkadako na niya?” Kay klaro kaayo nga ang gahom sa Ginoo anaa kaniya.
67 Si Zacarias nga iyang amahan gigamhan sa Espiritu Santo ug mao kini ang iyang gisulti:
68 “Dayegon nato ang Ginoo nga Dios sa Israel!
Kay mianhi siya aron sa pagluwas kanato
nga iyang mga katawhan.
69 Gipaanhi niya kanato ang makagagahom nga manluluwas
nga kaliwat sa iyang sulugoon nga si David.
70 Mao usab kini ang iyang gisulti kaniadto
pinaagi sa iyang mga balaang propeta.
71 Nagsaad siya nga iya kitang luwason
gikan sa atong mga kaaway
ug sa mga tawo nga nagdumot kanato.
72 Kaloy-an niya ang atong mga katigulangan,
ug tumanon niya ang iyang balaang kasabotan kanila
73 nga iyang gipanumpa sa atong katigulangan
nga mao si Abraham.
74 Luwason niya kita gikan sa atong mga kaaway
aron kita makapangalagad nga walay kahadlok,
75 ug mahimo kitang balaan ug matarong sa iyang atubangan
sa tanan nga adlaw sa atong kinabuhi.”
76 Unya miingon si Zacarias sa iyang anak,
“Ug ikaw anak, tawgon ka nga propeta
sa Labing Halangdong Dios.
Kay mag-una ka sa Ginoo aron imong andamon
ang katawhan sa iyang pag-abot.
77 Tudloan mo ang iyang mga katawhan nga maluwas sila
pinaagi sa kapasayloan sa Dios sa ilang mga sala,
78 kay ang atong Dios maluloy-on ug mahigugmaon.
Ipadala niya ang Manluluwas sama sa misubang nga adlaw,
79 nga maghatag ug kahayag sa mga tawo
nga anaa sa kangitngit
ug gaungaw sa kamatayon.
Tudloan niya kita kon unsaon
nga mahimong maayo ang atong relasyon
sa Dios ug sa atong isigka-tawo.”
80 Unya, ang bata nga si Juan midako ug nalig-on sa espiritu. Nagpuyo siya sa kamingawan hangtod sa adlaw nga nagsugod siya sa iyang pagpanudlo sa mga Israelinhon.