Nagsulat si Juan Batok sa Bakak nga mga Magtutudlo

Gisulat ni Juan kini nga sulat aron pamatud-ang sayop ang mga pagtulon-an sa bakak nga mga magtutudlo ug sa ilang nagkalainlaing mga sekta. Nagsulat siya batok sa mga Dosetista, nga naglimod sa pagkatawo ni Cristo (1 Juan 4:3), nga nag-angkon nga ang iyang lawas ug mga pag-antos dili tinuod kondili hinanduraw lamang; batok sa mga Serintiano ug mga Ebionita, nga nagtuo nga siya usa lamang ka tawo, ug nga ang iyang pagka-Dios gidugang lamang kaniya, ug busa mibiya kaniya panahon sa iyang Pag-antos (1 Juan 2:22); ug batok sa mga Nicolaita (Pinadayag 2:15), o mga Gnostiko, nga nagtudlo nga ang kahibalo bahin sa Dios ug kang Cristo igo na alang sa kaluwasan, ug nga, tungod kay gipakamatarong sila pinaagi sa pagtuo ug gipagawas gikan sa mga pagpugong sa Balaod, mahimo silang magpatuyang sa sala nga walay silot. Gipasidan-an niya ang mga Cristohanon nga dili magpahisalaag niining mga pagtulon-an ug mga binuhatan, ug gikondenar niya kini sa labing kusgan nga mga pulong. Gitandi niya kini sa mga kamatuoran ug mga pagtulon-an sa ebanghelyo nga gitudlo kanila, ug nga giawhag sila sa pagpadayon niini.

96 human matawo si Cristo

Biblica® Open Ang Pulong sa Dios™ (OCCB)

Ang Pulong sa Kinabuhi Dihay Tinuod nga Lawas

Batok sa bakak nga mga magtutudlo, nagsugod si Juan pinaagi sa pagpamatuod nga si Jesus Cristo, nga naglungtad gikan sa kahangtoran, adunay tinuod nga lawas isip tawo. Isip pamatuod gipahayag niya nga nadungog nila siya nga misulti, nakita nila siya, ug nahikap nila siya human sa iyang pagkabanhaw, ug nakombinsir sila pinaagi sa pamatuod sa ilang mga igbalati nga siya mao gihapon ang maong persona. Ang Tuboran sa Kinabuhi, ang Anak o Pulong sa Dios, gipadayag diha sa unod ngadto sa tanan ug nakita sa mga apostoles. Nagpamatuod sila sa kinabuhing dayon nga iyang nabatonan uban sa Amahan, nga gipahibalo kanila sa iyang bautismo ug pagkausab sa dagway. Gipahayag sa mga apostoles ang mga milagro ug mga pagtulon-an nga ilang nakita ug nadungog, aron ang tanan nga motuo sa ilang pagpamatuod makaambit uban kanila sa pakig-ambitay sa Dios ug kang Cristo. Kini nga panaghiusa uban sa diosnong kinaiya maghingpit sa ilang kalipay.

1 Juan 1:1–4

1 Ang gipahayag namo kaninyo mao ang mahitungod kaniya nga anaa nang daan sukad pa sa sinugdanan. Nadunggan ug nakita namo siya. Nakita gayod namo siya ug nakagunit gayod kaniya. Siya mao ang Pulong sa Dios nga naghatag ug kinabuhi. 2 Siya nga tinubdan sa kinabuhi gipadayag, ug nakita namo. Gipamatud-an ug gisangyaw namo siya kaninyo. Uban siya sa Amahan, apan karon nagpakita siya kanamo. 3 Gisugilon namo kaninyo ang among nakita ug nadungog aron aduna kitay panag-ambitay sa usag usa, ug sa Dios nga Amahan ug kang Jesu-Cristo nga iyang Anak. 4 Busa gisulat namo kini kaninyo aron mahingpit ang atong kalipay.

Ang Dios Kahayag, ug ang Sala Kangitngit

Aron pamatud-an nga sayop ang mga pagtulon-an niadtong naghimo sa grasya sa Dios nga pasangil sa imoralidad, gipahayag ni Juan nga ang Dios hingpit nga kahayag, ug busa hingpit nga kahibalo ug walay buling nga pagkabalaan, nga walay bisan gamayng pagkadili-hingpit o pagkawalay alamag. Busa kadtong nag-angkon nga adunay pakig-ambit sa Dios apan nagkinabuhi sa sala nagbuhat ug supak sa iyang balaang kinaiya, sama nga ang kangitngit supak sa kahayag. Kadtong naglakaw sumala sa kahayag nga ilang nadawat gikan kaniya, kansang kinaiya hingpit nga putli ug balaan, adunay pakig-ambit sa Dios, ug ang dugo ni Cristo nga nagpasig-uli kanila ngadto sa Dios maghinlo kanila gikan sa sala. Kadtong nag-ingon nga wala silay sala, ug busa wala magkinahanglan ug Manluluwas, walay kahibalo sa ilang kaugalingong mga kasingkasing o sa dakong kamatuoran sa Maayong Balita, ang pagkahulog ug pagpahiuli sa katawhan. Apan kadtong, tungod sa lawom nga pagbati sa ilang pagkasad-an, mosugid sa ilang mga sala ngadto sa Dios, nga matinumanon sa iyang mga saad sa kalooy (Salmo 32:5; Panultihon 28:13) ug matarong sumala sa iyang kaugalingong kahingpitan, mapasaylo ang ilang mga sala ug mahinloan ang ilang mga kasingkasing pinaagi sa makapabalaan nga gahom sa Balaang Espiritu, kay pinaagi sa paghalad ni Cristo natagbaw ang balaang hustisya. Kadtong nag-angkon nga wala sila makasala naghimo sa Dios nga bakakon, ug dili gayod makabaton ug kahibalo bahin sa iyang pulong, nga sa tibuok niyang pagpadayag nagpahayag nga ang tanang katawhan anaa sa daotang kahimtang, ubos sa pagkasad-an ug pagkahinukman sa silot.

1 Juan 1:5–10

5 Mao kini ang among nadunggan nga gitudlo ni Jesu-Cristo ug mao usab kini ang among gisangyaw kaninyo, nga ang Dios kahayag ug wala gayoy kangitngit diha kaniya. 6 Busa kon moingon kita nga nakighiusa kita sa Dios, apan nagkinabuhi kita diha sa kangitngit, namakak kita, ug wala kita nagkinabuhi sumala sa kamatuoran. 7 Apan kon nagkinabuhi kita diha sa kahayag, ingon nga ang Dios kahayag, aduna kitay panaghiusa, ug ang dugo ni Jesus nga Anak sa Dios naghinlo kanato sa tanan natong mga kasal-anan.

8 Kon moingon kita nga wala kitay sala, gilimbongan lang nato ang atong kaugalingon, ug wala kanato ang kamatuoran. 9 Apan kon isulti nato sa Dios ang atong mga sala, kasaligan siya nga mopasaylo kanato sa atong mga sala ug sa paghinlo kanato sa tanan natong mga kalapasan tungod kay matarong siya. 10 Kon moingon kita nga wala kita makasala, gihimo natong bakakon ang Dios, ug wala kanato ang iyang pulong.

Ang Atong Tigpanalipod, ug ang Ilhanan sa Tinuod nga Pagtuo

Isip ilang espirituhanong amahan, nakigsulti si Juan sa bag-ong mga nakabig. Gipakita niya nga ang mga kalooy sa Dios sa pagtubos pinaagi sa dugo ni Cristo angay magpugong kanila sa pagpakasala imbes nga magdasig niini (Salmo 130:4). Kadtong makasala tungod sa kahuyang adunay tigpanalipod nga nagpabilin uban sa Amahan, nga mao ang halad sa pagpasaylo sa mga sala sa tanang magtutuo, mga Judio man o mga dili Judio. Ang bugtong kasaligang ilhanan sa tinuod nga pagtuo ug tinuod nga pag-ila sa Dios mao ang pagtuman sa iyang mga sugo. Kay si bisan kinsa nga nag-angkon nga nakaila sa Dios (sama sa gibuhat sa mga Gnostiko) apan nagpatuyang sa sala usa ka bakakon ug nagbuhat ug supak sa kamatuoran. Apan diha sa mga nagtuman sa iyang mga pagtulon-an, mahingpit ang katuyoan sa gugma sa Dios diha sa kamatayon ni Cristo, ug nahibalo sila nga adunay sila pakig-ambit kaniya pinaagi sa pagbuhat sa iyang Espiritu sa ilang mga kasingkasing ug mga kinabuhi. Kay si bisan kinsa nga nag-angkon nga nahiusa kang Cristo pinaagi sa iyang Espiritu angay maglakaw, o magkinabuhi, sama sa gibuhat ni Cristo samtang dinhi pa siya sa yuta.

1 Juan 2:1–6

1 Gisulatan ko kamo nga akong giisip nga mga anak, aron dili kamo magpakasala. Apan kon adunay makasala, adunay magpakiluoy sa Amahan alang kanato, ug siya mao si Jesu-Cristo nga mao ang matarong. 2 Ang iyang kaugalingon mismo ang iyang gihalad isip bayad alang sa atong mga sala aron mapasaylo kita, ug dili lang alang kanato kondili alang usab sa mga sala sa mga tawo sa tibuok kalibotan.

3 Masiguro gayod nato nga nakaila kita sa Dios kon nagtuman kita sa iyang mga sugo. 4 Ang nag-ingon nga nakaila siya sa Dios apan wala magtuman sa iyang mga sugo bakakon, ug wala kaniya ang kamatuoran. 5 Apan ang tawo nga nagtuman sa pulong sa Dios, tinuod nga nahingpit diha kaniya ang gugma sa Dios. Ug sa ingon niini masiguro nato nga kita anaa gayod sa Dios: 6 ang nag-ingon nga siya anaa sa Dios kinahanglan nga magkinabuhi sama kang Jesu-Cristo.

Usa ka Daang Sugo nga Gihimong Bag-o

Sa pag-awhag kanila sa pagkabalaan ug pagtuman kang Cristo, si Juan wala magsulat ug bag-ong sugo, kondili usa nga gitudlo sa balaod sa kinaiyahan ug sa kahikayan sa Dios pinaagi kang Moises (Deuteronomio 18:15). Sa laing bahin, matawag kini nga bag-ong sugo, kay gibag-o kini ug gipalig-on pinaagi sa mas hataas nga mga hinungdan ug mga katungdanan: milabay na ang mga simbolo sa kahikayan pinaagi kang Moises, ug nagdan-ag na ang kahayag sa kamatuoran, nga nagpakita sa ilang kahulogan ug katumanan. Si bisan kinsa nga nagdumot sa iyang igsoon walay pakig-ambit sa Dios, apan, sama sa mga Judio nga nagdumot sa mga dili Judio, anaa siya sa kangitngit ug pagkawalay alamag, bisan unsa pa ang iyang giangkon. Apan si bisan kinsa nga nahigugma sa iyang igsoon nagpamatuod nga nagkinabuhi siya diha kang Cristo. Kay anaa siya sa kahayag, makita niya ang iyang dalan, ug malikayan niya ang pagkapandol o ang pagpahinabo nga makasala ang uban (Juan 11:9). Apan si bisan kinsa nga naglakaw sa kangitngit anaa sa kinadak-ang peligro nga mahulog ngadto sa iyang kaugalingong kalaglagan, kay wala siya mahibalo kon asa siya padulong. Gisulatan ni Juan ang gagmayng mga anak, kadtong bag-ong natawo ngadto sa panimalay sa ilang langitnong Amahan, kay gipasaylo na ang ilang mga sala tungod kang Cristo. Gisulatan niya kadtong labing dugay na sa Cristohanong pagtuo, kay nakab-ot na nila ang labing dakong kahibalo sa mga pagtulon-an ug paagi sa pagkinabuhi ni Cristo, nga naglungtad na sukad sa walay kataposan; kadtong anaa sa kalagsik sa ilang espirituhanong kinabuhi, kay nabuntog na nila ang daotan; ug kadtong wala pa kaayo mouswag, kay gisagop sila ingong mga anak ug nakadawat sa Balaang Espiritu. Gipasidan-an niya ang tibuok panimalay sa Dios, sa tanang nagkalainlaing ang-ang niini, nga dili higugmaon ang kalibotan, o ang yutan-ong mga butang, nga dili ikadungan sa gugma sa Dios ug sa uban. Kay ang tanang kalipayan, katahom, ug kadungganan niini wala maggikan sa Dios ni magdala ngadto kaniya, kondili gipukaw sa mga butang sa kalibotan, nga mahanaw uban sa mga sumusunod niini. Apan kadtong nagbuhat sa kabubut-on sa Dios, nga nagpatay sa ilang kalibotanong mga tinguha, mabuhi sa walay kataposan.

1 Juan 2:7–17

7 Mga hinigugma, dili bag-o nga sugo kining gisulat ko kaninyo, hinuon, daan na kini nga sugo nga nadungog ninyo ug nahibaloan sukad nga kamo mituo. Kining daan nga sugo nga maghigugmaay kamo susama lang nga mensahe nga inyong nadungog kaniadto. 8 Apan makaingon usab kita nga kini nga sugo bag-o, kay ang kangitngit nahanaw na ug ang tinuod nga kahayag nagsidlak na, ug ang kamatuoran mahitungod niini makita na diha sa kinabuhi ni Cristo ug diha usab kaninyo.

9 Ang nag-ingon nga siya anaa sa kahayag, apan wala naghigugma sa iyang igsoon, kana nga tawo anaa pa sa kangitngit. 10 Ang tawo nga naghigugma sa iyang igsoon nagpadayon sa pagkinabuhi diha sa kahayag, ug walay bisan unsa diha sa iyang kinabuhi nga mahimong hinungdan sa pagpakasala sa uban. 11 Apan ang tawo nga wala naghigugma sa iyang igsoon anaa sa kangitngit. Naglakaw siya sa kangitngit ug wala masayod kon asa siya padulong, kay gibutaan siya sa kangitngit.

12 Nagsulat ako kaninyo nga mga anak sa Dios,

kay gipasaylo na ang inyong mga sala pinaagi kang Cristo.

13 Nagsulat ako kaninyo, mga amahan,

tungod kay nailhan na ninyo siya,

nga anaa nang daan sukad pa sa sinugdanan.

Nagsulat usab ako kaninyo, mga batan-on nga lalaki,

kay napildi na ninyo si Satanas.

14 Nagsulat ako kaninyo, mga amahan,

tungod kay nailhan na ninyo siya,

nga anaa nang daan sukad pa sa sinugdanan.

Nagsulat usab ako kaninyo,

mga batan-on nga lalaki diha sa pagtuo,

kay lig-on kamo.

Gituman ninyo ang pulong sa Dios

ug napildi na ninyo si Satanas.

15 Ayaw ninyo higugmaa ang kalibotan o ang kalibotanon nga mga butang. Kon gihigugma ninyo ang kalibotan, wala kamo naghigugma sa Amahan. 16 Kay ang tanan nga kalibotanon, nga gipangandoy sa tawhanong pagbati, nga gikaibgan sa mga mata, ug gipasigarbo sa mga tawo, dili gikan sa Amahan kondili iya sa kalibotan. 17 Ang kalibotan ug ang tanang mga butang niini nga gitinguha sa mga tawo mahanaw, apan ang nagtuman sa kabubut-on sa Dios mabuhi sa walay kataposan.

Ang Anticristo Naglimod nga si Jesus Mao ang Cristo

Gipasaligan ni Juan ang iyang mga nakabig nga miabot na ang kataposan sa panahon sa mga apostoles. Gipahinumdoman niya sila sa panagna ni Cristo (Mateo 7:15; 24:11–12, 24–25), nga natuman na karon diha sa ilang bakak nga mga magtutudlo, nga miapil sa Cristohanong iglesia aron tumanon ang ilang kaugalingong mga katuyoan ug dayon mibiya niini. Gisulatan niya sila dili tungod kay wala silay alamag sa mga kamatuoran bahin sa pagkahimong tawo sa Pulong ug sa panginahanglan sa balaang kinabuhi, kondili tungod kay nahibalo sila niini, ug makapamatuod nga ang matag pagtulon-an nga supak niini bakak gayod. Busa kinsa man ang bakakon, o bakak nga propeta, nga gitagna sa atong Manluluwas, kondili ang naglimod nga si Jesus, nga mianhi ingon nga tawo, mao ang Cristo, ang Mesiyas sa Dios? Siya mao ang anticristo, nga naglimod nga ang Dios mao ang Amahan sa Ginoong Jesus Cristo, ug naglimod sa pagka-Dios ug pagkatawo sa Anak. Si bisan kinsa nga naglimod nga si Jesus mao ang Anak sa Dios walay pagtahod sa Amahan, nga nagpahayag nga mao kini siya sa iyang bautismo ug sa pag-usab sa iyang panagway; apan si bisan kinsa nga nag-ila kaniya gidawat usab sa Amahan. Giawhag sila ni Juan nga magpadayon sa mga pagtulon-an bahin kang Cristo nga ilang nadawat gikan sa mga apostoles, ug makig-ambit sila sa Anak ug sa Amahan, ug makaambit sa saad sa Dios nga kinabuhing walay kataposan pinaagi sa Anak. Gisulat niya kining mga butanga bahin niadtong mosulay sa pagpahisalaag kanila, aron pasidan-an sila batok niining mga mangingilad. Apan nakadawat na sila sa Balaang Espiritu ug wala na magkinahanglan nga tudloan kon unsaon pag-ila sa tinuod ug bakak nga mga pagtulon-an, kay hingpit na silang gitudloan sa Espiritu sa kamatuoran. Kinahanglan magpabilin sila nianang kamatuorana, ug mahiusa kang Cristo pinaagi sa mao gihapong Espiritu, kon buot silang adunay pagsalig sa iyang atubangan sa iyang pag-anhi. Kay ingon nga nahibalo sila nga ang Dios hingpit nga matarong, kadto lamang nagbuhat sa pagkamatarong ang natawo sa iyang Balaang Espiritu ug nahimong iyang mga anak.

1 Juan 2:18–29

18 Mga anak, nakadungog na kamo nga moabot ang anti-Cristo. Ug kon moabot na siya, haduol na kita sa kataposan nga mga adlaw. Bisan gani karon daghan na ang mga anti-Cristo, busa nahibaloan nato nga haduol na kita sa kataposan nga mga adlaw. 19 Bisan uban sila kanato kaniadto, dili nato sila tinuod nga mga kauban. Kay kon tinuod pa nato silang kauban, wala unta sila mobiya kanato. Apan mibiya sila, ug kini nagpaila nga dili nato sila tinuod nga mga kauban.

20 Apan kamo gihatagan ni Cristo sa Espiritu Santo. Busa nasayod kamong tanan sa kamatuoran. 21 Nagsulat ako kaninyo, dili tungod kay wala kamo masayod sa kamatuoran, kondili tungod kay kamo nahibalo na, ug nahibaloan usab ninyo nga walay bakak nga naggikan sa kamatuoran. 22 Kinsa ang bakakon? Siya nga nag-ingon nga si Jesus dili mao ang Cristo. Mao kini ang anti-Cristo, ang naglimod sa Amahan ug sa Anak. 23 Ang naglimod sa Anak wala diha kaniya ang Amahan, apan ang nag-ila sa Anak anaa diha kaniya ang Amahan.

24 Busa ayaw gayod ninyo kalimti ang mga gitudlo kaninyo sukad nga kamo mituo. Kon gituman ninyo kini, magpabilin kamo sa panaghiusa diha sa Anak ug sa Amahan. 25 Ug ang gisaad ni Cristo kanato mao ang kinabuhi nga walay kataposan.

26 Nagsulat ako kaninyo bahin niini tungod sa mga tawo nga gustong magpahisalaag kaninyo. 27 Apan kamo, ang Espiritu nga nadawat ninyo gikan kang Cristo nagpabilin kaninyo, busa dili na kinahanglan nga tudloan pa kamo sa uban nga mga tawo. Kay ang iyang Espiritu mao ang nagtudlo kaninyo sa tanang mga butang, ug ang iyang gitudlo tinuod ug dili bakak. Busa, sama sa iyang giingon kaninyo, pabilin kamo kang Cristo.

28 Mga anak, pabilin kamo kaniya, aron dili kita mahadlok o magtago tungod sa kaulaw kon moabot na siya.

29 Nahibaloan ninyo nga si Cristo matarong, busa makasiguro gayod kamo nga ang tanang mga tawo nga nagbuhat ug matarong mga anak sa Dios.

Ang Gugma sa Dios Naghimo Kanato nga Iyang mga Anak

Giawhag sila ni Juan nga palandongon ang kahibulongang gugma sa Dios sa pagsagop ingong iyang mga anak niadtong nagpadayon sa pagkamatarong, nga wala ilha sa kalibotan, kay wala usab niini ilha si Cristo. Wala pa ikapadayag kon unsa ka mahimayaon ang mga anak sa Dios; apan nahibaloan nga sa pagpadayag ni Cristo aron hukman ang kalibotan, mahimo silang sama kaniya sa lawas ug hunahuna, ug tugotan silang makaila ug makatagamtam sa iyang himaya ug mga kahingpitan. Ang tanan nga adunay niini nga paglaom maningkamot sa pagsundog sa iyang pagkabalaan. Apan kadtong nagpadayon sa sala sigurado nga silotan, kay ang sala mao ang paglapas sa balaod sa Dios; kay ang Anak sa Dios gipadayag ingon nga tawo aron tubson ang katawhan gikan sa gahom ug silot sa sala. Tungod kay siya mismo walay sala, dili niya maangkon alang sa uban ang kagawasan sa pagpakasala, sumala sa gipasabot sa bakak nga mga magtutudlo. Busa kadtong adunay pakig-ambit kang Cristo naglikay sa sala, apan kadtong nagpadayon sa sala wala makaila kaniya. Giawhag niya sila nga dili magpalimbong niini: kadtong nagbuhat sa matarong matarong sulod sa ilang limitado nga kinaiya ug katakos, sama nga ang Dios matarong tungod sa pagkawalay kinutoban sa iyang kinaiya. Si bisan kinsa nga nagpadayon sa sala anak sa yawa, nga nagdala sa sala ngadto sa kalibotan; ug tungod niini ang Anak sa Dios gipadayag ingon nga tawo, aron bungkagon, o laglagon, ang mga buhat sa yawa, ug ipahiuli ang katawhan ngadto sa pagkabalaan ug sa pabor sa Dios.

1 Juan 3:1–8

1 Huna-hunaa ninyo kon unsa kadako ang paghigugma sa Amahan kanato! Gitawag niya kita nga iyang mga anak, ug tinuod gayod kini. Wala makaila kanato ang mga tawo dinhi sa kalibotan tungod kay wala man sila makaila sa Dios. 2 Mga hinigugma, karon mga anak na kita sa Dios. Apan wala pa mapadayag kon unsa kita sa kaulahian. Nahibaloan nato nga kon moabot na si Cristo mahisama kita kaniya, kay makita gayod nato siya sa iyang pagka-siya. 3 Busa ang matag-usa nga adunay paglaom nga sama niini diha kang Cristo kinahanglan nga hinlo ug kinabuhi ingon nga si Cristo hinlo.

4 Si bisan kinsa nga nagpakasala naglapas sa mga sugo sa Dios, kay ang sala mao ang pagkamalapason sa mga sugo sa Dios. 5 Nahibaloan ninyo nga si Cristo nga wala gayoy sala mianhi dinhi sa kalibotan sa pagpapas sa atong mga sala. 6 Busa ang mga tawo nga nagkinabuhi diha kang Cristo dili magpadayon sa pagpakasala. Apan si bisan kinsa nga magpadayon sa pagpakasala wala gayod makakita o makaila kaniya.

7 Mga anak, ayaw kamo pagtugot nga pahisalaagon kamo ni bisan kinsa! Ang tawo nga nagbuhat ug matarong nagpaila nga siya matarong, ingon nga si Cristo matarong. 8 Apan ang tawo nga nagpadayon sa pagpakasala, iya sa Yawa, kay ang Yawa nagpakasala sukad pa sa sinugdanan. Tungod niana, ang Anak sa Dios mianhi dinhi aron sa pagguba sa binuhatan ni Satanas.

Ang mga Anak sa Dios Nahigugma sa Ilang mga Igsoon

Gitandi ni Juan ang panggawi sa mga anak sa Dios ug ang panggawi sa mga anak sa yawa. Gipakita niya nga ang mga anak sa Dios mailhan pinaagi sa ilang pagkamatarong ug gugma sa mga igsoon, nga mao ang sugo sa Dios sukad pa sa sinugdan. Dili sila angayng magbuhat sama sa mga natawo gikan sa daotang usa, sama kang Cain, nga mipatay sa iyang igsoon tungod kay matarong ang mga buhat sa iyang igsoon; ni angay silang mahibulong, human sa maong panig-ingnan, kon ang kalibotan modumot ug molutos kanila. Apan dili kini igsapayan sa mga Cristohanon, kay nasiguro nila nga nakalabang na sila gikan sa kahimtang sa kamatayon ngadto sa kahimtang sa kinabuhi, tungod kay gihigugma nila ang ilang mga igsoon. Apan bisan kinsa nga wala mahigugma sa iyang igsoon nagpabilin pa sa kahimtang sa espirituhanong kamatayon, wala makabig ug wala matawo pag-usab. Bisan kinsa nga nagdumot sa iyang igsoon adunay samang pagkamadinaoton ug daotang prinsipyo nga diha kang Cain, ug kon dili pa siya pugngan sa mga balaod sa tawo, mamumuno gayod siya sama kang Cain. Walay bisan kinsa nga nag-amuma sa maong mga pagbati nga adunay diosnong kinabuhi nga nagpuyo sulod kaniya. Gipaila ang dakong gugma sa Dios pinaagi sa paghalad sa iyang Anak sa iyang kinabuhi alang sa katawhan, ug ang mga Cristohanon angayng andam, tungod sa ilang gugma ngadto sa Dios, sa paghalad sa ilang kinabuhi alang sa kaayohan sa katawhan. Apan kon, imbes nga buhaton kini, kadtong adunay mga maayong butang niining kalibotana magdumili sa pagpaambit sa usa ka bahin niini ngadto sa usa ka igsoon nga nanginahanglan, dili mahimong magpuyo diha kanila ang gugma sa Dios.

1 Juan 3:9–17

9 Ang tawo nga nahimong anak sa Dios dili magpadayon sa pagpakasala, kay ang kinaiya sa Dios anaa na kaniya. Ug tungod kay ang Dios mao ang iyang Amahan, dili na siya mahimong magpadayon sa pagpakasala. 10 Sa ingon niini maila kon kinsa gayod ang mga anak sa Dios ug kon kinsa ang mga anak sa Yawa: ang tawo nga wala nagbuhat ug matarong o wala naghigugma sa iyang igsoon dili anak sa Dios.

11 Mao kini ang pagtulon-an nga inyong nadunggan sukad nga kamo mituo: kinahanglan gayod nga maghinigugmaay kita. 12 Dili kita angay nga mahisama kang Cain. Sakop siya ni Satanas, busa gipatay niya ang iyang igsoon. Apan nganong gipatay man gayod niya ang iyang igsoon? Tungod kay ang iyang mga binuhatan daotan, ug sa iyang igsoon matarong. 13 Busa mga igsoon ko kang Cristo, ayaw katingala kon dumtan kamo sa mga tawo sa kalibotan. 14 Nahibaloan nato nga nakalatas na kita sa kamatayon ngadto sa kinabuhi tungod kay nahigugma kita sa atong mga igsoon. Ang wala mahigugma anaa pa sa kamatayon. 15 Ang tawo nga wala mahigugma sa iyang igsoon mamumuno. Ug nahibaloan ninyo nga walay mamumuno nga makaangkon ug kinabuhi nga walay kataposan.

16 Gihatag ni Cristo ang iyang kinabuhi alang kanato ug pinaagi niini nahibaloan nato ang tinuod nga paghigugma. Busa kita angay usab nga magpakamatay alang sa atong mga igsoon. 17 Kon hamugaway ang atong kinabuhi apan wala kita motabang bisan nakita nato nga naglisod ang atong igsoon, makaingon ba kita nga ang gugma sa Dios ania kanato?