Gipahayag ni Job ang Iyang Pagkawalay Sala
2130 sa wala pa si Cristo
Biblica® Open Ang Pulong sa Dios™ (OCCB)
1 Unya mitubag si Job,
2 “Nadungog ko na kana kaniadto pa.
Imbis nga lipayon ninyo ako,
gipasubo pa hinuon ninyo ako.
3 Dili na ba kamo moundang sa pagsultig walay pulos?
Unsa ba gayoy nakapahasol kaninyo
nga nagsige man kamog pakiglalis kanako?
4 Kon kamoy ania sa akong sitwasyon ug ako sa inyo,
makasulti usab akog sama sa inyong gipanulti kanako.
Makadawat usab kamog daghang
mga pagsaway gikan kanako,
ug magpanglingo usab ako kaninyo.
5 Apan dili ko kana buhaton. Mosulti hinuon akog mga pulong
nga makapadasig ug makalipay kaninyo.
6 “Apan sa pagkakaron, nagpadayon ang akong kasakit
bisag unsa pay akong isulti.
Ug kon mohilom usab ako dili gihapon kini mawala.
7 “O Dios, gipaluya mo gayod ako.
Gilaglag mo ang tibuok kong panimalay.
8 Gipaniwang mo ako; bukog ug panit na lang ako.
Sumala pa sa uban, nagpamatuod lang kini
nga nakasala ako.
9 Sa imong kasuko, O Dios, gihasmagan mo ako.
Daw mabangis nga mananap ka
nga mikunis-kunis sa akong unod.
Gipakagotan mo ako sa imong ngipon
ug gisimagan nga daw sa imo akong kaaway.
10 “Gibiay-biay ako ug gikataw-an sa mga tawo.
Gisagpa nila ako sa pagtamay kanako.
Naghiusa sila batok kanako.
11 Gitugyan ako sa Dios ngadto sa kamot
sa mga tawong daotan ug makasasala.
12 Maayo ang akong kahimtang kaniadto,
apan gilaglag niya ako. Daw gituok niya ako ug gidugmok.
Gihimo niya akong iyang targetanan.
13 Gilibotan ako sa iyang mga tigpana,
ug gipana sa walay kaluoy.
Natuhog ang akong bato-bato,
ug miawas sa yuta ang akong apdo.
14 Wala niya ako hunongi sa pag-ataki.
Mihasmag siya kanako nga daw usa ka sundalo.
15 “Nagbisti akog sako ug naglingkod
sa yuta agig pagsubo.
16 Namula ang akong nawong ug nanghubag
ang akong mga mata sa labihan nga paghilak.
17 Apan wala gayod akoy nahimo nga sala,
ug kinasing-kasing ang akong pag-ampo.
18 “Sama ako sa tawong gipatay,
nga naghangyo sa yuta nga dili tabonan ang iyang dugo
sa dili pa maangkon ang hustisya!
19 Bisan karon ang akong saksi atua sa langit.
Siya ang moingon nga ako walay sala.
20 Gitamay ako sa akong mga higala,
apan gahilak ako nga nangayo ug tabang sa Dios.
21 Ang akong saksi mao
ang magpakiluoy sa Dios alang kanako,
sama sa usa ka tawo
nga nagpakiluoy alang sa iyang higala.
22 “Kay sa dili madugay motaliwan na ako
ug dili na mobalik.
17:1 “Hapit na akong mamatay;
daw sa mabugto na ang akong gininhawa.
Andam na ang lubnganan alang kanako.
2 Gipalibotan ako sa mga mabiay-biayon.
Dayag kaayo ang ilang pagtamay kanako.
3 “Labani ako, O Dios, kay wala nay laing mobarog
sa pagtabang kanako kondili ikaw lang.
4 Gisirad-an mo ang panghuna-huna
sa akong mga higala aron dili sila makasabot.
Busa ayaw sila tugoti nga magmadaogon sa ilang pag-akusar kanako.
5 Sama sila sa tawo nga nagluib
sa iyang mga higala aron makakuwarta,
nga mao ang hinungdan nga mag-antos ang iyang kabataan.
6 “Gihimo ako sa Dios nga kataw-anan taliwala sa mga tawo,
ug gilud-an nila ako sa nawong.
7 Mingitngit na ang akong panan-aw sa kasubo;
mura na ug tukog ang tibuok kong lawas sa kaniwang.
8 Ang mga tawo nga miisip sa ilang kaugalingon nga matarong,
nangatingala niining nahitabo kanako.
Gitunglo nila ako sama sa usa ka dili diosnon nga tawo.
9 Alang kanila ang matarong nga tawo lig-on
sa iyang pagkinabuhi ug mas magkalig-on pa gayod.
10 “Apan ginaaghat ko sila sa pagsusi pag-usab kanako.
Sigurado ako nga walay bisan usa kanila nga nakasabot.
11 Hapit na matapos ang akong mga adlaw.
Napakyas ang akong mga plano ug mga tinguha.
12 Apan nag-ingon sila nga basig mamaayo ra usab
ang akong kahimtang sa umaabot.
Miingon sila, ‘Luyo sa kangitngit
adunay moabot nga kahayag.’
13 Kon molaom man ako, ang akong laoman mao
ang pagpuyo sa dapit sa mga patay.
Gusto ko nang ipahimutang ang akong higdaanan
niining mangitngit nga dapit.
14 Isipon ko ang lubnganan nga akong amahan,
ug ang mga ulod nga mokaon kanako isipon ko
nga akong inahan ug mga igsoong babaye.
15 Aduna pa akoy paglaom?
Kinsay makasulti nga aduna akoy paglaom?
16 Ang akong paglaom mouban kanako sa dapit sa mga patay.
Mag-uban kami didto ilalom sa yuta.”