Gipamatuod Pag-usab ni Job ang Iyang Pagkamatarong (continued)

Gipamatuod pag-usab ni Job ang iyang pagkamatarong, ug gitandi ang iyang kanhing kauswagan sa iyang kasamtangang kalisdanan.

2130 sa wala pa si Cristo

Biblica® Open Ang Pulong sa Dios™ (OCCB)

Job 28–29

1 “Adunay mga minahan nga diin makita ang mga plata,

ug may mga dapit diin himuong lunsay ang bulawan.

2 Ang puthaw makuha gikan sa yuta,

ug ang bronsi tunawon gikan sa mga bato.

3 Naggamit ang mga tawo ug suga para hayag

ang ilang pagkutkot sa mga bato sa kinahiladman sa yuta.

4 Nagkutkot silag agianan sa minahan,

sa lugar nga walay namuyo o dili agian sa mga tawo.

Manaog sila didto ginamit ang pisi nga maglabyog-labyog.

5 Sa ibabaw sa yuta nagtubo ang mga tanom nga gigikanan sa pagkaon,

apan sa ilalom sa yuta daw sa gitunaw sa kalayo.

6 Ang mga bato sa yuta adunay mga sapiro

ug ang mga abog niini adunay bulawan.

7 Ang mga agianan ngadto sa minahan wala makit-i

sa mga langgam nga nagpangdagit o mga banog,

8 ug wala maagii sa mabangis nga mga mananap o sa liyon.

9 Kaloton sa mga tawo ang pinakagahi nga mga bato,

bisan pa ang ilawom nga bahin sa mga bukid.

10 Maghimo silag agianan diha sa dagkong mga bato,

ug makaplagan nila ang nagkalain-lain

nga mga mahalong bato.

11 Kutkoton nila ang tinubdan sa mga suba,

ug habwaon nila ang natago nga mga bahandi

ug dad-on sa hayag.

12 “Apan asa man makaplagi ang kaalam ug panabot?

13 Wala mahibalo ang tawo kon asa kini makaplagi.

Dili kini makaplagan dinhi sa kalibotan.

14 Dili usab kini makaplagan bisan sa kinahiladman sa dagat.

15 Dili kini mapalit ug bulawan o pilak.

16 Dili matupngan ang bili niini sa purong bulawan sa Ofir

o sa mahalong mga bato nga onix ug sapiro.

17 Labaw pa kini sa bulawan o kristal.

Dili kini ikabaylo ug alahas nga bulawan.

18 Labaw pa kinig bili sa koral, sa haspe, o sa rubi.

19 Dili kini matupngan sa topas nga gikan sa Etiopia

ug dili kini mapalit ug purong bulawan.

20 “Nan, asa man makaplagi ang kaalam o ang panabot?

21 Walay buhing binuhat nga makakita niini

bisan pa ang mga langgam.

22 Bisan ang dapit sa kalaglagan,

nga mao ang dapit sa mga patay,

pulos hungihong lang ang nadungog bahin niini.

23 Ang Dios lang gayod ang nakahibalo

kon asa makita ang kaalam,

24 kay makita niya bisan pa ang kinalayoan nga bahin sa kalibotan,

ug makita niya ang tanang anaa sa ubos sa langit.

25 Sa dihang gihatagan niya ug gahom ang hangin,

ug gisukod niya kon unsa kakusog sa ulan,

26 ug sa dihang nagdesisyon siya kon asa moulan

ug kon asa mag-agi ang kilat ug dalogdog,

27 gipakita niya ang kaalam ug ang kabililhon niini.

Gitistingan niya kini ug giaprobahan.

28 Unya miingon siya sa mga tawo,

‘Adunay kaalam kamo ug panabot kon magtahod kamo

sa Ginoo ug maglikay sa daotan.’ ”

29:1 Nagpadayon pagsulti si Job,

2 “Kon mobalik lang unta ang nanglabayng mga panahon

diin gibantayan pa ako sa Dios,

3 ug diin gihayagan pa niya ang akong dalan

sa akong paglakaw sa kangitngit.

4 Niadtong panahon nga maayo pa ang akong kahimtang,

ang Dios mao ang suod kong higala,

ug gipanalanginan niya ang akong panimalay.

5 Giubanan pa ako kaniadto sa Makagagahom nga Dios,

ug kauban ko pa ang akong mga anak.

6 Niadtong mga panahona, ang akong mga baka naghatag

ug daghan kaayong gatas, ug ang akong mga olibo naghatag

ug daghan kaayong lana.

7 “Inig-adto ko sa pultahan sa lungsod,

ug moapil sa panaghisgotay sa mga tigdumala niini,

8 magpadaplin ang batan-on nga mga lalaki kon makita nila ako

ug ang mga tigulang manindog sa pagtahod kanako.

9 Manghilom bisan ang mga pangulo

10 ug ang mga dungganon.

11 Si bisan kinsa nga makakita kanako

o makadungog sa akong pagsulti,

gadayeg kanako.

12 Kay ginatabangan ko ang mga kabos nga nanginahanglan

ug tabang ug ang mga ilo nga walay kadangpan.

13 Ginapanalanginan ako sa himalatyon nga tawo nga akong gitabangan,

ug nalipay gayod ang mga biyuda nga ako usab nga natabangan.

14 Gihimo ko kanunay ang matarong ug husto;

daw sama na kini sa bisti ug turban nga kanunay kong gisul-ob.

15 Akoy nahimong mata sa tawong buta

ug tiil sa tawong bakol.

16 Akoy nahimong amahan sa mga kabos,

ug bisan ang mga estranghero gitabangan ko sa ilang mga kaso.

17 Gikuhaan ko sa gahom ang mga tawong daotan

ug giluwas ang ilang mga biktima.

18 “Abi nakog, ‘Magkinabuhi akog dugay

ug mamatay nga nalibotan sa akong pamilya.

19 Kay nahisama ako kaniadto sa kahoy

kansang mga gamot nakaabot sa tubig

ug ang mga sanga kanunayng matun-ogan.

20 Gidayeg ako kanunay sa mga tawo

ug kanunay akong baskog.’

21 “Hilom ug namati pag-ayo ang mga tawo sa akong tambag.

22 Pagkahuman kog sulti, wala na silay ikadugang pa

kay kontento sila sa akong gisulti.

23 Naghandom sila sa akong mga pulong

sama sa ilang paghandom sa ulan.

Gusto gayod nila kining pamation.

24 Daw dili sila makatuo kon pahiyoman ko sila;

ang akong malipayong panagway makapadasig kanila.

25 Gitudloan ko sila sa angay nilang buhaton

nga daw akoy ilang pangulo.

Gipangulohan ko sila nga daw usa ka hari

nga nagdumala sa iyang kasundalohan.

Ginahupay ko ang ilang kasubo.