Bahin 7: Ang Dakong Ministeryo sa Yuta sa mga taga-Galilea
Lagmit gikan sa tingdagdag sa AD 27 hangtod sa tingpamulak sa 29 (dayag nga mga usa ka tuig ug tunga)
Giasoy ni Marcos kining panahona sa daghang detalye ug ni Lucas sa usa ka mubo nga taho, samtang si Mateo naghan-ay ilabina sumala sa hilisgutan niini nga bahin. Ang Ebanghelyo ni Marcos midiretso dayon sa Dakong Ministeryo sa Yuta sa mga taga-Galilea (itandi ang mubo nga asoy ni Pedro bahin sa kinabuhi sa Mesiyas ngadto sa panimalay ni Cornelio sa Buhat 10:36–43). Tungod sa kadaghan sa materyal, lisod kining bahinbahinon sa tin-aw nga mga pundok, apan nagpadayon gayod ang mga panghitabo.
- Gisalikway sa Nazaret, Mibalhin si Jesus sa Capernaum
- Ang unang paglibot sa Galilea uban sa upat ka mangingisda, ug, sa pagbalik, ang pagtawag kang Mateo (Levi), samtang nagkadako ang kabantog ni Jesus.
- Ang Panaglalis Bahin sa Adlaw nga Igpapahulay sa Jerusalem ug Galilea
- Gipili ni Jesus ang Napulog Duha ug Miwali sa Bukid
- Nagdako ang Impluwensiya sa Mesiyas ug Nangutana si Juan Gikan sa Bilanggoan
- Ang ikaduhang paglibot sa Galilea (karon uban sa Napulog Duha), ug ang grabeng pagdumot sa mga Pariseo.
- Ang unang dakong pundok sa mga sambingay, uban sa pagbisita sa Gerasa (Kursi) ug sa kataposang pagbisita sa Nazaret.
- Ang ikatulong pagsuroy sa Galilea (nga si Jesus misunod sa Napulog Duha), ug ang epekto niini kang Herodes Antipas.
Nagtudlo si Jesus sa Galilea
Usa ka kinatibuk-ang asoy bahin sa pagtudlo ni Jesus sa Galilea.
27 hangtod sa 29 human matawo si Cristo
Biblica® Open Ang Pulong sa Dios™ (OCCB)
Mateo 4:17
4:17 Sukad niadto, nagsugod na si Jesus sa pagsangyaw. Nag-ingon siya, “Paghinulsol kamo ug biyai na ninyo ang inyong mga sala, kay ang gingharian sa Langit haduol na.”
Marcos 1:15
1:15 Miingon siya, “Miabot na ang panahon nga gipanagna sa mga propeta kaniadto. Ang paghari sa Dios haduol na gayod. Busa hinulsoli ug biyai ang inyong mga sala ug tuohi ninyo ang Maayong Balita.”
Lucas 4:15
4:15 Nagtudlo siya didto sa mga sinagoga ug gidayeg siya sa tanan.
Sa Cana Giayo ni Jesus ang Anak sa Usa ka Opisyal
Sa Cana, giayo ni Jesus ang anak sa usa ka opisyal sa hari nga taga-Capernaum.
Dinhi, sa pagsalikway kaniya sa Nazaret ug sa bag-ong pinuy-anan sa Capernaum, mibalik si Jesus sa Cana ug Nazaret, gitawag pag-usab ang upat ka mangingisda daplin sa Dagat sa Galilea, ug gisugdan ang iyang ministeryo sa pagtudlo ug pag-ayo sa Capernaum.
Juan 4:46–54
4:46 Mibalik na pud si Jesus sa Cana nga sakop sa Galilea, sa lugar diin gihimo niya nga bino ang tubig. Adunay usa ka opisyal sa gobyerno didto nga adunay anak nga lalaki nga nagmasakiton didto sa Capernaum. 47 Pagkadungog niya nga si Jesus mibalik sa Galilea gikan sa Judea, miadto dayon siya kang Jesus ug gihangyo niya siya nga moadto sa Capernaum ug ayohon ang iyang anak nga himalatyon.
48 Miingon si Jesus kaniya, “Kon wala pa kamo makakita ug mga milagro ug mga kahibulongan nga butang, dili kamo motuo kanako.”
49 Apan miingon ang opisyal nga nagpakiluoy, “Sir, kon mahimo uban una kanako samtang buhi pa ang akong anak.”
50 Giingnan siya ni Jesus, “Pauli na. Maayo na ang imong anak.”
Mituo ang opisyal sa gisulti ni Jesus kaniya, ug mipauli dayon siya. 51 Sa diha pa siya sa dalan, gisugat na siya sa iyang mga sulugoon ug gisultihan nga maayo na ang iyang anak. 52 Busa nangutana siya kon unsang orasa naayo ang iyang anak. Miingon ang mga sulugoon, “Mga ala una kagahapon sa hapon nahuwasan na siya sa iyang hilanat.”
53 Nahinumdoman dayon sa opisyal nga mao gayod kadto nga oras sa dihang miingon si Jesus kaniya nga ang iyang anak maayo na. Busa siya ug ang iyang tibuok panimalay mituo kang Jesus.
54 Mao kini ang ikaduha nga milagro nga gihimo ni Jesus didto sa Galilea human siya mibiya sa Judea.
Gisalikway sa Nazaret si Jesus sa Unang Higayon
Lucas 4:16–31
4:16 Unya miadto si Jesus sa Nazaret. Mao kini ang dapit diin siya nagdako. Miadto siya sa sinagoga sa mga Judio sa Adlaw nga Igpapahulay, sumala sa iyang nabatasan. Mitindog siya aron sa pagbasa sa Kasulatan. 17 Gihatag kaniya ang kasulatan ni Propeta Isaias. Gibukhad niya kini ug sa pagkakita niya sa bahin sa kasulatan nga iyang gipangita, gibasa dayon niya kini nga nag-ingon:
18 “Ang Espiritu sa Ginoo ania kanako.
Kay gipili niya ako sa pagwali
sa maayong balita sa mga kabos.
Gipadala niya ako aron sa pagsangyaw
nga aduna nay kagawasan ang mga binihag,
ug makakita na ang mga buta.
Gipadala niya ako sa pagpagawas sa mga dinaog-daog,
19 ug sa pagsangyaw sa mga tawo
nga karon mao na ang panahon nga sila luwason sa Ginoo.”
20 Unya gilukot ni Jesus ang iyang gibasa nga kasulatan ug gibalik ngadto sa piniyalan niadtong sinagoga, ug milingkod siya. Ang tanang mga tawo mitutok gayod kaniya. 21 Miingon si Jesus kanila, “Kini nga bahin sa Kasulatan natuman na karong adlawa samtang nakadungog kamo niini nga gibasa.”
22 Gidayeg siya sa tanan ug dako gayod ang ilang katingala sa kanindot sa mga pulong nga iyang gipanulti. Miingon sila, “Dili ba anak lang siya ni Jose?”
23 Miingon si Jesus kanila, “Sigurado gayod nga inyong isulti kanako kining maong panig-ingnan nga nag-ingon, ‘Doktor, unaha una pagtambal ang imong kaugalingon,’ nga ang buot ipasabot, ‘Ang among nadungog nga imong gipanghimo didto sa lungsod sa Capernaum kinahanglan himuon mo usab dinhi sa atong dapit.’ ”
24 Unya miingon si Jesus, “Sa pagkatinuod, sultihan ko kamo nga walay propeta nga giila diha sa iyang kaugalingon nga lungsod. 25 Apan sa pagkatinuod, daghan ang mga biyuda sa tibuok Israel niadtong panahon ni Elias, sa mga panahon nga wala paulana sa Dios sulod sa tulo ka tuig ug tunga, ug dakong kagutom ang nasinati sa mga tawo. 26 Apan wala gayod sugoa sa Dios si Elias aron tabangan si bisan kinsa kanila; kondili gipadala siya didto sa usa ka biyuda nga dili Judio nga nagpuyo sa lungsod sa Sarefat nga sakop sa Sidon. 27 Mao usab kini ang nahitabo sa panahon ni Propeta Eliseo. Daghan ang mga adunay ngilngig nga sakit sa panit, didto sa Israel, apan walay bisan usa kanila nga giayo. Si Naaman nga dili Judio nga taga-Siria mao lang ang giayo.”
28 Sa pagkadungog niini sa mga tawo didto sa sinagoga sa mga Judio nangasuko sila. 29 Nanindog sila ug gipagawas siya sa lungsod, ug gidala duol sa kilid sa bungtod nga gitukoran sa ilang lungsod, aron ihulog siya sa pangpang. Gusto unta nila nga itukmod si Jesus didto sa pangpang. 30 Apan miliot si Jesus taliwala sa mga tawo ug gibiyaan niya sila.
31 Gikan didto, milugsong si Jesus sa lungsod sa Capernaum nga sakop sa Galilea. Sa Adlaw nga Igpapahulay nagtudlo siya didto sa sinagoga sa mga Judio.
Gihimong Pinuy-anan ni Jesus ang Capernaum
Mateo 4:13–16
4:13 Wala siya magpabilin sa Nazaret, milahos hinuon siya sa lungsod sa Capernaum. Kini nga lungsod anaa sa daplin sa Linaw sa Galilea ug sakop sa Zabulon ug Neftali. 14 Nahitabo kini aron matuman ang panagna ni Propeta Isaias nga nag-ingon:
15 “Ang kayutaan sa mga taga-Zabulon ug taga-Neftali
duol sa daplin sa linaw, tabok sa Suba sa Jordan.
Kini nga mga dapit sakop sa Galilea gipuy-an sa mga dili Judio.
16 Apan bisan nagpuyo diha sa kangitngit
ang mga tawo niini nga mga dapit,
makakita sila ug kahayag nga hilabihan.
Ang mga anaa sa kangitngit
nga mahadlok mamatay madan-agan.”